Kuzata Mudimu Wawupayiniya Kwakoleshaña Wubwambu Wetu Nanzambi

“Chachiwahi kumuseña Nzambi yetu.”—MAS. 147:1.

MALWIHU ITWATELA KUTOÑOJOKAHU

Indi kuzata mudimu wawupayiniya kunateli kukolesha ñahi wubwambu wenu naYehova?

Neyi mudi apayiniya, chumanyi chinateli kuyikwasha kulonda mutwalekuhu muniwu mudimu wawuwahi?

Neyi kanda mwikala apayiniya, yumanyi yimwatela kuhimpa yinateli kuyikwasha mwikali apayiniya?

1, 2. (a) Yumanyi yinateli kufuma mukutoñojoka nikuhosha hadi muntu itwakeña? (Talenu mwevulu wakutachikilahu.) (b) Malwihwinyi itukuhanjekahu?

 KUTOÑOJOKA nikuhosha hadi muntu itwakeña kunateli kukolesha wubwambu wetu. Chochimu niwubwambu wetu naYehova Nzambi. Hampinji yadiñayi kabiña, Davidi kakavulu nawufuku washinshikileña mwiwulu mwenzala tutumbwa nikutoñojoka hadi Nleñi yawu wabadika chikupu. Wasonekeli nindi: “Chinukushinshika mawulu eyi, himudimu wanyinu yeyi, nikakweji nitutumbwa tuwunashuku; Nami, Muntu hichumanyi, mwaka wumushi kumuchima? Hela mwana kamuntu, mwaka wumuhempuli?” (Mas. 8:3, 4) Chamweniyi nkeñelu yaYehova kutalisha hadi aIsarela akuspiritu chiyadiña nakushikijewa munjila yayiwahi, kapostolu Pawulu wahosheli nindi: “Maheta amaana nayuma yelukayi Nzambi, o chiyakunama!”—Rom. 11:17-26, 33.

² Chitwazataña mumudimu wakushimwina, twatoñojokaña nikuhosha hadi Yehova. Kwila mwenimu kwatukoleshaña chikupu. Antu amavulu azataña mudimu wawupayiniya awanaña nawu nkisu yafumaña mukuzata chikupu mumudimu waWanta yayileñelaña asweji kumukeña Nzambi. Chili munakuzata mudimu wawupayiniya chakatataka hela munemiki chikonkwanyi chakuzata wupayiniya, toñojokenu halwihu lwakwila nawu: Indi mudimu wawupayiniya wunateli kukolesha ñahi wubwambu wenu naYehova? Neyi mudi apayiniya, dihulenu nenu, ‘Chumanyi chikunkwasha kutwalekahu kuzata iwu mudimu wawuwahi?’ Neyi kanda mwikali apayiniya, dihulenu nenu, ‘Yumanyi yinatela kuhimpa kulonda nitachiki mudimu wawupayiniya?’ Tushinshikenu hanjila mudimu wawupayiniya chiwunateli kukolesha wubwambu wetu naNzambi.

 MUDIMU WAMPINJI YEJIMA NIWUBWAMBU WETU NANZAMBI

3. Neyi tudi mumudimu wakushimwina, kuhanjeka hankisu yakumbidi yikaleta Wanta kwatukwashaña ñahi?

³ Kuhanjeka nawantu amakwawu hankisu jakumbidi jikaleta Wanta kwatukundamishaña kwakwihi naYehova. Nsonanyi jimwakeña kuzatisha neyi munakushimwina kwitala nikwitala? Hadaha mwakeña nankashi Masamu 37:10, 11; Danyeli 2:44; Yowanu 5:28, 29 hela Chimwekeshu 21:3, 4? Mpinji yejima yitukuhanjeka hayikaninu yamuchidiwu nawakwetu, chatwanukishaña nawu Nzambi yetu wahanaña mwalala diyi mukwakuhana “yuma yayiwahi yahanañawu yejima, niyamukunkulu yalala yejima.” Ichi chatuleñelaña kukundama kwakwihi nayena.—Yak. 1:17.

4. Muloñadi chitwaswejelaña kuhameka kuwaha kwaNzambi neyi tumona antu itwashimwinaña chinakuhandawu kuspiritu?

⁴ Kumona chinakuyandawu kuspiritu antu itwashimwinaña kwatuleñelaña tusweji kuhameka chalala. Antu mukaayi adana wunlomboli walala watela kuyikwasha ayiluku hambidi nikuwana muzañalu. Antu amavulu akamaña hampinji yakumbidi nawa adana kuchiñeja. Akeñakeñaña kulonda eluki wumi chikwekalilaku. Niantu etiya hiyeluka chikupu chahosha Nsonaku. Adi neyi chadiñawu antu amumusumba waNineve wakushankulu. (Tañenu Yona 4:11.) Neyi tuswejaña kuzata mumudimu wakushimwina, twelukaña chikupu chaambu chekala hachihandilu chakuspiritu chawantu itwashimwinaña nawantu jaYehova. (Isa. 65:13) Chatwanukishaña hakuwaha kwaYehova muloña watwinkaña yuma yayivulu kubombela hayuma yakuspiritu yitwakeñaña; watambikaña antu ejima atambuli yakudya yakuspiritu nikwikala nakuchiñeja kwalala.—Chim. 22:17.

5. Indi kukwasha antu amakwawu kuspiritu kwatuleñelaña tumoneña ñahi kukala kwetu?

⁵ Kukwasha antu amakwawu kuspiritu kwatukwashaña kutondolwela kusweja kwakama hamakabi etu. Ichi chamukwashili Trisha, payiniya wampinji yejima, hampinji yadiseñeluwu anvwali jindi. Washimwini nindi: “Ichi hichuma chimu channeñesheli chikupu muchihandilu chami.” Ifuku dimu waneñeli chakwila hakeñeleña kufuma hetalaku, hela chochu wayili nakudizisha anyana asatu Bayibolu adiña nakukala kweneni chikupu hetala dawu. Tata yawu wayitemukili, nawa yayawu weyala wayiyandishileña. Trisha wahosheli nindi: “Kukala kudi kwejima kunamweneña hela yihuñu hikwesekeni nakukala kwamweneñawuku. Chitwadizileña, azañaleli nakutiya kuwaha nankashi. Awa anyana adiña hichawana chakufuma kudi Yehova, sweje-e hanidi ifuku.”

6, 7. (a) Indi chikuhwelelu chetu chakolaña ñahi neyi tunakudizisha amakwawu nsañu yalala yamuBayibolu? (b) Neyi tumona antu itwadizishaña Bayibolu anakuhimpa chihandilu chawu kuhitila mukuzatisha nshimbi jamuNsona, chatuleñelaña tumoneña ñahi maana aNzambi?

⁶ Kudizisha chalala chamuBayibolu kwakoleshaña chikuhwelelu chetu. Kapostolu Pawulu wasonekeli hadi aYudeya amakwawu amumafuku indi akañenyeña kulondela yuma yatañishileñawu nindi: “Eyi walejaña mukwenu, hiwadilejaña eyi awenuku, tahindi?” (Rom. 2:21) Chumichi chaambukaku chikupu nawapayiniya amakonu. Kakavulu ekalaña nampinji yakutañisha chalala nikudizisha antu Bayibolu. Hakwila eli mwenimu chachiwahi, atela kuloñeshela chadimu kudiza kwejima hadaha nikusandujola kulonda atweshi kwakula malwihu. Payiniya wamumbanda wejina daJaneen walumbulwili nindi: “Mpinji yejima yinekalaña nakukooleka kwakutañisha antu chalala, naswejelañaku kukuhwelela chikupu muchalala chinatañishaña. Chafumañamu, chikuhwelelu chami chatwalekañahu nakukola.”

⁷ Chitwamona netu nshimbi jamuBayibolu jinakukwasha atudizi kuhimpa chihandilu chawu, twaswejelañaku kuhameka maana aNzambi. (Isa. 48:17, 18) Chumichi chatuleñelaña ninetu kudikasa chikupu mumuchima kutwalekahu kuzatisha iji nshimbi muchihandilu chetu. Adrianna, payiniya mukwawu, wahosheli nindi: “Chihandilu chawantu chinateli kwikala chatama chikupu neyi ashindamena hamaanawu.  Ilaña neyi atachika kushindamena hamaana aYehova, atachikaña kuhetelamu hohenohu.” Munjila yoyimu, Phil wahosheli nindi: “Wukumona Yehova chahimpañayi chihandilu chawantu akañenyi kuhimpa chihandilu halwawu.”

8. Indi kuzatila hamu nawamabwambu amawahi mumudimu wakushimwina kwatukwashaña ñahi?

⁸ Kuzatila hamu nawamabwambu amawahi mumudimu wakushimwina kwatukoleshaña kuspiritu. (Yish. 13:20) Apayiniya amavulu azataña mpinji yeneni mumudimu wakushimwina nawakwawu akwakushimwina. Ichi chaleñelaña ekaleña nampinji ‘yakudikolesha wumu namukwawu.’ (Rom. 1:12; tañenu Yishimu 27:17.) Payiniya wejina daLisa wahosheli nindi: “Kumudimu kunazatilaña, kakavulu kwekala yililu yakudibecha niichima. Ifuku niifuku wukutiyaña matuñu ninhoshelu yatama. Kwekala yowu kufwila kubadika akwenu. Mpinji yikwawu, wukuwana anakusekesha hela anakuseha hamuloña wakumwekesha yililu yawakwaKristu. Hela chochu, kuzata hamu nawakwetu akwaKristu mumudimu wakushimwina kwankoleshaña chikupu. Chinafunta kwitala namelela, nazañalalaña chikupu, hela chakwila nazeyi chikupu.”

9. Kuzatila hamu mudimu wawupayiniya namwini kwetu kunateli kukwasha ñahi chibaaba chamaluwi chanyonji yisatu?

⁹ Kuzatila hamu wupayiniya namwini kwetu kwakoleshaña chibaaba chamaluwi chanyonji yisatu. (Mukwa. 4:12) Madeline, wazatilaña hamu mudimu wawupayiniya nanfumwindi, walumbulwili nindi: “Ami ninfumwami twekalaña nampinji yakuhanjeka hachitwazata mumudimu wakushimwina hela yuma yitwataña muBayibolu yitunateli kuzatisha mumudimu wetu wakushimwina. Chaaka nichaaka chitwazatilaña hamu mudimu wawupayiniya, wubwambu wetu wakolelañaku.” Munjila yoyimu, Trisha wahosheli nindi: “Wonsu wetu hitwafwilaña kwiñila munyikuduku, dichi hitwabobolaña hansañu yamaluku. Wonsu  wetu tukweti ndandanda yoyimu yamumudimu, dichi twelukaña antu itwatela kufuntilaku niantu itunakudizisha Bayibolu, ichi chatukwashaña kutoñojoka hayuma yoyimu nikuspiritu.”

10. Neyi tusambila kutwamijaku Wanta nawa tumona wukwashu waNzambi, chatukwashaña kumukuhwelela ñahi Yehova?

¹⁰ Twaswejaña kumukuhwelela Yehova neyi tutwamijaku yuma yaWanta, kumona wukwashu waYehova, nikumona chakulañayi kulomba kwetu. Ichi, dichuma chamonaña akwaKristu alala ejima ashinshika. Ilaña adi mumudimu wampinji yejima eluka nawu kushindamena hadi Yehova kunateli kuyikwasha hakwila atwelekuhu nakuzata mudimu wawupayiniya. (Tañenu Matewu 6:30-34.) Curt, payiniya nawa wemenañaku cheñi neyi nkoñi wañinza, wetejeli kuya nakuhempula chipompelu hekala iluña hakwenda maora ayedi nachikunku kufuma hetala dindi. Yena niñodindi payiniya adiña hohu namanji antesha mumotoka wawu wakwendelamu kulonda ayi kuchipompelu hohu chakadi kufunta, nawa ifuku dakutambwila nfwetu yakumudimu kwachidiña mulungu wumu. Curt wahosheli nindi, “Natachikili kujinoka neyi chakwila natondeli chuma chachiwahi.” Hanyima yakulomba, afuukwiluhu nawu akuzata mudimu, akuhweleleli nawu Nzambi wukuyinka yuma yakankililuwu. Cheliluwu nawu ayeña, muhela wumu wayitemesheleli nshiña nakuyileja nindi kudi chawana chakeñeleña kuyinkayi. Wayinkeli mali ashikila akeñeleñawu akwendelamu. Curt wahosheli nindi, “Neyi wumonaña yuma yamuchidiwu kakavulu, chaswayi kwiluka nenu Yehova watukwashaña.”

11. Nkiswinyi jikwawu jatambwilañawu apayiniya?

¹¹ Eñañi, kakavulu apayiniya amonaña nawu azataña chikupu mumudimu waYehova nikwikala nawubwambu nayena, nkisu jajivulu chikupu jakadi kumana ‘jayiwanaña.’ (Kuhit. 28:2) Hela chochu, kuzata mudimu wawupayiniya hichapelaku. Kwosi kambuña aYehova wabulaña kumona makabi afumini mukudikaña kwaAdamaku. Hela chakwila apayiniya amakwawu alekaña mudimu wawu hadi mpinji yashikila, kukala kukwawu anateli kukwimanisha hela kukwitondolwela. Chumanyi chinateli kukwasha apayiniya hakwila atwelekuhu namudimu wawu walema?

CHAKUTWALEKAHU KUZATA MUDIMU WAWUPAYINIYA

12, 13. (a) Chumanyi chatela kwilayi payiniya neyi nakukañanya kushikija chikonkwanyi chamaora akeñekaña? (b) Muloñadi kutanjika mpinji yakutaña Bayibolu ifuku niifuku, kudiza kwahalwawu, nikutoñojoka chikupu chikwalemena nankashi?

¹² Apayiniya amavulu ekala nanyidimu yayivulu nankashi. Chinateli kuyikalila hakwila azati nyidimu yejima, dichi chalema kwikala wadiloñesha chiwahi. (1 Kor. 14:33, 40) Neyi payiniya nakukañanya kuwanisha chikonkwanyi chamaora akeñekaña, watela kudishinshika chiwahi kulonda yamoni chinakuzatishayi mpinji. (Efwes. 5:15, 16) Watela kudihula nindi; ‘Nazatishaña mpinji yishika hadihi hayuma yakumujimba hela yakuhema? Komana inakukeñeka kudihemba chikupu? Komana nateli kuhimpa ndandanda yami yamudimu wakumujimba?’ MukwaKristu wudi wejima nateli kwiteja nindi chaswayi kubombelaku nyidimu yikwawu kundandanda yeyi; dichi, antu adi mumudimu wampinji yejima atela kudishinshikaña mpinji yejima nikuhimpa hanakukeñeka.

¹³ Kutañaña Bayibolu ifuku niifuku, kudiza halwenu, nikutoñojokaña chikupu kwatela kwikala handandanda yapayiniya. Mwalala, payiniya watela kudihemba kulonda nyidimu yabula kulema yibuleña kumudiila mpinji yakwililamu iyi yuma yalema. (Fwi. 1:10) Chakutalilahu, fwikijenu nakufunta kwitala hanyima yakuzata ifuku dejima mumudimu wakushimwina. Dichi namelela nakufwila kuloñeshela chadimu kupompa kudi hambidi. Hakutachika kwila yuma yikwawu. Chikwilayi nindi yatali, hanahiti dehi amaora kwakwihi nayedi nawa kanda yatachiki kudiza yuma yinakeñeñayi nindi yadizi namelela. Muloñadi chichakalilaña? Akwakutemuka lufuchi akuluka  yitembi atela kwakamena nyijimba yawu neyi anakukeña nawu akatwalekuhu nakutemuka lufuchi. Munjila yoyimu, apayiniya atela kwikala nandandanda yayiwahi yakudizaña halwawu kulonda akoli kuspiritu hakwila atwelekuhu mumudimu wampinji yejima.—1 Tim. 4:16.

14, 15. (a) Muloñadi apayiniya chatela kwikalawu nachihandilu chapela? (b) Neyi payiniya yaholokela mukukala, chumanyi chatela kwilayi?

¹⁴ Apayiniya akalakalaña chiwahi afwilaña kwikala nachihandilu chapela. Yesu wayikolesheli atumbanji twindi kwikala nadisu datala mumu. (Mat. 6:22) Chihandilu chindi chadiña chapela kulonda yamanishi mudimu windi wakushimwina chakadi yuma yatela kumuluwañesha. Wahosheli nindi: “Anyumbu akweti menawu, niatujila ahaluzwizu akweti yisakala yawu, hakwila Mwana kamuntu hakweti nihakusachila mutu winduku.” (Mat. 8:20) Hamuloña wakukeña kudizila kuchakutalilahu chaYesu, Payiniya watela kwiluka nindi neyi yekala nayuma yayivulu, yikukeñekaña mpinji yeneni yakuyakamena nikuyiloñesha.

¹⁵ Apayiniya elukaña nawu mudimu wawu wuyazataña awuzataña bayi hamuloña wawuswa wadimena wuyakwetuku. Ilaña, chawana chejima chikwetuwu hela kukoleka kwamudimu himuloña waluwi lwaNzambi lwabadika. Dichi, hakwila atwalekuhu kuzata mudimu wawupayiniya, muntu himuntu watela kushindamena hadi Yehova. (Fwi. 4:13) Kukala nimakabi anateli kumwekana. (Mas. 34:19) Neyi apayiniya aholokela mukukala, atela kushindamena hadi Yehova kulonda yayilomboli nikuyikwasha, chatela anyakali hohu kuleka kukalakala mudimuku. (Tañenu Masamu 37:5.) Chakumonaña wukwashu waNzambi, akukundama kwakwihi nayena hamu neyi Tata yawu wamwiwulu wayakamenaña.—Isa. 41:10.

KOMANA KWILA MUTACHIKA MUDIMU WAWUPAYINIYA NEHI?

16. Neyi munakukeña kuzata mudimu wawupayiniya, chumanyi chimwatela kwila?

¹⁶ Neyi munakukeña kwikala nankisu neyi yadiluñishañawu antu adi mumudimu wampinji yejima, mulejenu Yehova mpwila yidi kumuchima wenu. (1 Yow. 5:14, 15) Hanjekenu nawantu anakuzata mudimu wawupayiniya chayinu mpinji. Imikenu yikonkwanyi yayiwahi yikuyikwasha mwikali apayiniya. Dicheliluwu aKeith naErika. Adiña nakuzata mudimu wakumujimba, nawa kufwana adisumbula amavulu, alandili itala nimotoka wawuha hanyima yakudisumbula. Ahosheli nawu: “Twatoñojokeleña netu yumiyi yikutuletela muzañalu, ilaña hiyatuleteleli muzañaluku.” Keith chamuhañiluwu nyidimu, watachikili kuzata neyi payiniya wakukwasha. Wahosheli nindi: “Kuzata mudimu wawupayiniya kwañanukishileña muzañalu wafumaña mukuzata mumudimu wakushimwina.” Adikwatili wubwambu nawapayiniya adisumbula ayikwashili kwiluka muzañalu wafumaña mukwikala nachihandilu chapela nikuzata mudimu wawupayiniya. Chumanyi cheliluwu aKeith naErika? “Twasonekeli ndandanda yayikonkwanyi yakuspiritu, nakusha hafiliji, nawa twelileña chitwashikija chikonkwanyi chimu, tuchijimahu handandanda.” Chimwahitili mpinji atwesheli kuzata mudimu wawupayiniya.

17. Muloñadi chimwatela kutoñojokela hakuhimpa ndandanda yenu hela chihandilu kulonda muzatuku mudimu wawupayiniya?

¹⁷ Komana kwila mutachika mudimu wawupayiniya nehi? Neyi himukutweshaku chayinu mpinji, zatenu nañovu kulonda musweji kukundama kwakwihi naYehova kuhitila mukuzata chikupu mumudimu wakushimwina. Hanyima yakudishinshika chiwahi, munateli kwiluka nenu neyi muhimpa ndandanda yenu hela chihandilu chenu munateli kuzata mudimu wawupayiniya. Neyi munateli kuzata mudimu wawupayiniya, muzañalu imukuwana wukubadika kudihana kudi kwejima. Mukusweja kwikala namuzañalu wafumaña mukutwamijaku yuma yaWanta kubadika yenu. (Mat. 6:33) Mukwikala namuzañalu wasweja wafumaña mukuhana kudi antu amakwawu. Kubombelahu, mukwikalaña nampinji yeneni yakutoñojoka nikuhosha hadi Yehova, nakusweja kumukeña nikumuzañalesha.

[Malwihu aKuzatisha haKudiza]

[Nyevulu yidi hefu 29]

Kwikala adikita mumudimu wampinji yejima kwaletaña chihandilu chachiwahi? (Talenu parakalafu 9)