MALWIHU KUFUMA KUDI ANTAÑI

Muloñadi Yesu chadilililiyi henohu kanda yamusañuli Lazaru kwesekeja nachashimunawu haYowanu 11:35?

▪ Neyi ntaña yetu itwakeña yafwa, twadilaña muloña tukumwanukaña. Hela chakwila wamukeñeli chikupu Lazaru, Yesu wadilili bayi neyi hamuloña wakwila Lazaru wafwiluku. Wadilili muloña watiyilili wushona antu afwishili, neyi chashimuna nsañu yasonekeliyi Yowanu.—Yow. 11:36.

Hampinji yatiyili Yesu nindi Lazaru wakata, hanyakeli kuya kwitala daLazaru nakumuukaku. Iyi nsañu yahosha nawu: “[Yesu] chanatiyiyi nawu [Lazaru] wakata, hakushakama kwenoku mafuku ayedi.” (Yow. 11:6) Muloñadi Yesu chalabililiyi? Kudi chuma chaleñeleli yeli mwenimu. Wahosheli nindi: “Kukatiku hikwakufwaku; kwakulemesha nachu Nzambi, kulonda akalemeshi nachu Mwana kaNzambi.” (Yow. 11:4) Iyi yikatu hiyaleteli hohu kufwaku, ilaña yaleñeleli amulemeshi Nzambi. Yesu wakeñeleña kuzatisha kufwa kwaLazaru kulonda ‘yamulemeshi nachu Nzambi.’ Munjilanyi? Yesu wakeñeleña kukoña chihayamisha cheneni kuhitila mukumusañula ibwambu dindi wakeñeliyi kufuma mwijamu.

Hampinji yahanjekeleñayi nawatumbanji twindi, Yesu wafwanishili kufwana natulu. Dihafumini yayileji nawu ‘nakuya nakumuhindwisha [Lazaru] mutulu.’ (Yow. 11:11) Yesu wamweneña kumusañula Lazaru kufuma kudi afu neyi chochahindwishaña nvwali mwanindi wudi mutulu. Dichi hateleleli kuneña hakufwa kwaLazaruku.

Hanu dinu, chumanyi chamuleñeleli Yesu yadili? Cheñi, nsañu yayeni yashimunaña ñakwilu. Hampinji Yesu yabulakeniyi Mariya muhela aLazaru nichamweniyi yena niantu amakwawu anakudila, ‘wadishishimwini muspiritu, atiya nikukala.’ Chamweniyi chineñi chiyadiñi nachu chamukatili Yesu kumuchima chakwila ‘wadishishimwini muspiritu.’ Ichi dichuma chaleñeleli ‘Yesu yadili.’ Chamuneñesheli chikupu Yesu chamweniyi amabwambu jindi akeñeliyi ananeñi nankashi.—Yow. 11:33, 35.

Iyi nsañu yamwekeshaña nawu Yesu wukweti ñovu niwuswa wakusañula antu itwakeña nikuyinka wumi wawuwahi mwituña dadiha dinakwinza. Chatukwashaña cheñi kuhameka netu Yesu watiyilaña wushona antu ajimbeshaña antaña jawu akeñawu mukufwa kwaleteli Adama. Chuma chikwawu chitukudizilaku kuniyi nsañu chakwila nawu twatela kutiyila wushona antu anakudila hamuloña wakufwisha antaña jawu akeñawu.

Yesu welukili nindi wukuya nakumusañula Lazaru. Hela chochu, wadilili, hamuloña wakusweja kuyikeña niwushona watiyililiyi amabwambu jindi. Chochimu ninetu, wushona wunateli kutuleñela ‘tudili nawakwakudila.’ (Rom. 12:15) Kumwekesha wushona wamuchidiwu hikwatalisha mukwila nawu muntu hakuhwelela mukusañukaku. Komana chachiwahi, hakwila Yesu wemikili chakutalilahu chakutiyila wushona antu anafwishi kuhitila mukudila chikupu hela chakwila wadiña kwakwihi nakumusañula Lazaru.