Muchima Wenu Wuzañalaleña Nayanukishu Yayehova

“Wunsahu weyi washimunaña nawidyi neyi wuswana wahaya nyaka.”—MAS. 119:111.

MUKWAKULA NENUDI?

Muloñadi chitwatela kuzañalela nayanukishu yaYehova?

Tunateli kwikala ñahi nachikuhwelelu mudi Yehova?

Muloñadi chichalemena kutwalekahu nakudikita munyidimu yaWanta?

1. (a) Antu atambwilaña ñahi kufumba, nawa muloñadi? (b) Indi kudivwimba kunateli kuleñela ñahi muntu yakañanyi kutambwila kufumba?

 ANTU atambwilaña wunlomboli munjila jashiyashana. Neyi ayanukisha kudi muntu wukweti ñovu etejaña namuchima wumu, ilaña neyi ayifumba kudi ibwambu dawu hela kudi muntu wuyabadikawu ñovu ashikenaña dakukaana. Neyi muntu amubabesha hela amufumba, waneñaña, kudihomba, hela kutiya nsonyi. Ilaña amakwawu chayisañumunaña nawa afwilaña kuzatilahu. Muloñadi antu chatambwilañawu kufumba munjila jashiyashana? Chuma chimu chaleñelaña hikudivwimba. Eñañi, yililu yakudinka wanta yakañeshaña muntu kufukulahu chiwahi, nakumuleñela yakaani kufumba niwunlomboli wawuwahi.—Yish. 16:18.

2. Muloñadi akwaKristu alala chahamekelañawu chikupu kufumba kwekala Mwizu daNzambi?

² Ilaña, akwaKristu alala ahamekaña chikupu kufumba kwakuwahi, sweje-e neyi kunashindameni Hezu daNzambi. Yanukishu yaYehova yatwinkaña kashinshi, yatudizishaña nikutukwasha kutondolwela tukosi tudi neyi kusweja kukeña maheta, yililu yawuvumbi, kuzatisha chatama yitumbu hela kusweja kusheta walwa. (Yish. 20:1; 2 Kor. 7:1; 1 Tesa. 4:3-5; 1 Tim. 6:6-11) Kubombelahu, twazañalalaña hakwikala ‘nachiseki mumuchima’ chafumaña mukwovwahila yanukishu yaNzambi.—Isa. 65:14.

3. Yililwinyi yañimbi yamasamu yitwatela kwimbujola?

³ Hakwila nawu tuhembi wubwambu wetu walema chikupu naTata yetu wamwiwulu, twatela kutwalekahu kuzatisha nshimbi jaYehova jajiwahi muchihandilu chetu. Chikuwaha neyi twikala nayililu yadiña nañimbi yamasamu wasonekeli nindi: “Wunsahu weyi washimunaña nawidyi neyi wuswana wahaya nyaka; muloña natiyañamu kuwaha mumuchima wami”! (Mas. 119:111) Komana ninetu  twatiyaña kuwaha nanshimbi jaYehova, indi kwiji twajimonaña netu jakala? Hela chakwila mpinji jikwawu twahilaña neyi atufumba, hitwatela kuneñaku. Tunateli kukuhwelela chikupu maana aYehova abadika. Tuhanjekenu hanjila jisatu.

KOLESHENU CHIKUHWELELELU CHENU KUHITILA MUKULOMBA

4. Chumanyi chatwalekeli kwilayi Davidi muchihandilu chindi?

⁴ Mwanta Davidi wahitili mukukala kwashiyashana muchihandilu chindi, hela chochu watwalekeluhu kukuhwelela chikupu mudi Nleñi yindi. Wahosheli nindi: “Kudeyi, eyi Yehova, diku natalishaña muchima wami. Eyi Nzambi yami, yeyi nakuhwelela.” (Mas. 25:1, 2) Chumanyi chamukwashili Davidi yamukuhweleli chikupu Tata yindi wamwiwulu?

5, 6. Izu daNzambi datulejaña nawudi kutalisha hawubwambu waDavidi naYehova?

⁵ Antu amavulu alombaña hohu kudi Nzambi neyi adi mukukala. Ekala neyi ibwambu denu wenzaña hohu kudi enu neyi nakukeña mali hela nakukeña nindi mumukwashi? Mukuhita kwampinji munateli kutachika kumujinoka neyi mwalala wayikeña. Ilaña hidichi chadiña wubwambu waDavidi naNzambuku. Wubwambu windi naYehova wamwekesheli chikuhwelelu chindi nikumukeña Nzambi muchihandilu chidi chejima, mumpinji yayiwahi niyakala.—Mas. 40:8.

⁶ Talenu Davidi chamuhamekeliyi nikumushimeka Yehova nindi: “Eyi Yehova, Mwanta wetu, ijina deyi o chidalema hejima heseki! Yeyi wunashi lubanji lweyi hewulu damawulu.” (Mas. 8:1) Komana munamoni wubwambu wawuwahi wadiña hakachi kaDavidi naTata yindi wamwiwulu? Hamuloña wakwila Davidi wahamekeleña kulema kwaNzambi niwukeleñi windi chamuleñeleli yamushimekeña Yehova “mwaana wejima.”—Mas. 35:28.

7. Twahetelañamu ñahi neyi tukundama kwakwihi naNzambi mukulomba?

⁷ Kufwana Davidi, ninetu twatela kuhanjekaña naYehova mpinji yejima kulonda tumukuhweleli chikupu. Bayibolu yahoshaña nawu: “Kundamenu kwakwihi naNzambi, niyena wukukundama kwakwihi nanenu.” (Yak. 4:8) Kukundama kwakwihi naNzambi mukulomba hinjila yikwawu yalema mutwatambwilaña spiritu yajila.—Tañenu 1 Yowanu 3:22.

8. Muloñadi wutwatela kutondolwela kuhoshaña mazu wowamu neyi tunakulomba?

⁸ Neyi munakulomba, komana mwafuntishañahu mazu wowamu hela kuzatisha nhoshelu yoyimu mpinji yejima? Neyi dimu, henohu kanda mulombi, mwatela kwikala nampinji yakutoñojoka hayuma yimunakukeña kuhosha. Neyi muhoshaña mazu wowamu kudi ibwambu denu hela ntaña yenu mpinji yejima imunakuhosha nindi, komana wukutiya kuwaha? Nateli kutachika kudiwula jitunakuhosha. Hela chochu, Yehova hanateli kukaana kulomba kwakufuma hamuchima kunakulomba kambuñindi washinshikaku. Ilaña twatela kutondolwela kuhoshaña mazu wowamu mpinji yejima yitunakulomba.

9, 10. (a) Yumanyi yitwatela kubombela mukulomba kwetu? (b) Yumanyi yinateli kutukwasha hakwila tulombeña chakufuma hamuchima?

⁹ Mwamweni, neyi tunakukeña kukundama kwakwihi naNzambi kulomba kwetu kwatela kwikala kwakufuma hamuchima. Neyi tumulejaña Yehova yuma yejima yidi kumuchima, tukusweja kukundama kwakwihi nayena nawa tukumukuhwelela chikupu. Hanu dinu, yumanyi yitwatela kubombela mukulomba kwetu? Izu daNzambi dakulaña nawu: “Mulejenu Nzambi yuma yejima yimunakeñi nakulomba, nakulembelela, nakusakilila.” (Fwi. 4:6) Dichi, yuma yejima yinateli kuluwañesha wubwambu wetu naNzambi hela wumi wetu hamu neyi ambuñindi tunateli kuyisha mukulomba.

¹⁰ Chalema nankashi kutoñojoka hamazu awamayala niambanda ashinshika alombeli kulomba kwasonekawu muBayibolu. (1 Sam. 1:10, 11; Yil. 4:24-31) MuMasamu mwekala  kulomba kwakufuma hamuchima nitumina twakumushimeka Yehova. Yuma yejima yahitañamu antu chili yakuneñesha hela yamuzañalu, ayimwekesha muniku kulomba nitumina. Kudiza iku kulomba kunateli kutukwasha kuwahishaku kulomba kwetu.

TOÑOJOKENUÑA CHIKUPU HAYANUKISHU YANZAMBI

11. Muloñadi chitwatela kutoñojokela chikupu hakufumba kwaNzambi?

¹¹ Davidi wahosheli nindi: ‘Yanukishu yaYehova yakashinshi, yalejaña wakadi maana.’ (Mas. 19:7) Mwamweni, hela chakwila hitukweti maanaku, tunateli kwikala namaana neyi tovwahila nshimbi jaNzambi. Hela chochu, kufumba kukwawu kwamuNsona kwakeñekaña kutoñojokahu chikupu hakwila tuhetelumu nankashi. Chakutalilahu, kutoñojoka chikupu hanshimbi jamuBayibolu kunateli kuyikwasha kutwalekahu ashinshika neyi muholokela mukweseka kwakwila yuma yatama hashikola hela hamudimu. Kunateli cheñi kuyikwasha kwovwahila nshimbi jaNzambi jahoshaña hamashi nihadi akwaKristu nawu abuleña kudiñija munsañu jamatuña nikuzatisha nshimbi jamuBayibolu hakusakula yakuvwala. Kutoñojoka hakufumba kwaNzambi kukutukwasha kwikala adiloñesha kuhita mukukala kwamuchidiwu. Kuhiñahu tunateli kufuukulahu chuma chitunateli kwila henohu kukala kanda kumwekani. Kudiloñesha munjila yamuchidiwu kunateli kutukwasha hakwila tutondolweli kuwila muyuma yomisha mbaña.—Yish. 15:28.

12. Twatela kutoñojokaña hayumanyi yinateli kutukwasha kuhemba yanukishu yaNzambi?

¹² Chitunakuchiñeja kushikijewa kwayikaninu yaNzambi, komana chihandilu chetu chinakumwekesha nawu tunakutwalekahu kwikala atona kuspiritu? Chakutalilahu, komana twakuhwelela chikupu netu Babiloni Muneni katataka amujilumuni? Komana nkisu jakumbidi, jidi neyi wumi wahaya nyaka muparadisa yahamaseki, tuchidi kuyimona netu yalala neyi chitwayimweneña hampinji yitwayilukili? Komana tunakutwalekahu kudikita neyena mumudimu wakushimwina chatela tutwamijeñaku yuma yitwelaña muchihandilu chetu? Indi kuchiñeja kwakusañuka, kujilika ijina daYehova, nikuyiñisha wanta windi? Komana iyi nsañu tuchidi kuyimona netu yalema? Kutoñojoka hamalwihu amuchidiwu kunateli kutukwasha kwila neyi cheliliyi ñimbi yamasamu wahosheli nindi, hembenu ‘yanukishu yaNzambi haya nyaka.’—Mas. 119:111.

13. Muloñadi akwaKristu amuyaaka nkulakaji yakusambila chakañenyuwu kutiyisha nsañu jikwawu? Shimunenu chakutalilahu.

¹³ Yuma yikwawu yashimunawu muBayibolu hitunateli kuyitiyisha chikupu makonuku, muloña mpinji yaYehova yakusolola yumiyi kanda yishiki. Yesu wayilejeleña apostolu indi kakavulu nindi watela kukabakana nawa nkumininaku hiyakumujaha. (Tañenu Matewu 12:40; 16:21.) Ilaña apostolu hiyelukili mwatalishiliyuku. Enjeli nakwiluka mwatalishiliyi hanyima yakufwa kwindi nihasañukiliyi hampinji yabalumwiniyi mujimba windi mumujimba wawuntu, wamwekeni kudi atumbanji amakwawu, nawa ‘wajikwili kashinshi kawu kulonda eluki mwalumbulukila Nyikanda yajila.’ (Luka 24:44-46; Yil. 1:3) Chochimu, atumbanji twaKristu hiyelukili nawu Wanta Nzambi wakatachika kuyuula mwiwuluku, sampu nichayichikililuwu spiritu yajila haPentekosta 33 C.E.—Yil. 1:6-8.

14. Kukutachika kwayaaka nkulakaji yamu 20, chakutalilahwinyi chachiwahi chemikiluwu amana kwetu hela chakwila akuhweleleli yuma yaheña kutalisha hamafuku akukuminina?

¹⁴ Munjila yoyimu, hakutachika kwayaaka nkulakaji yamuma 20, akwaKristu alala akuhweleleli yuma yaheña kutalisha ‘hamafuku akukuminina.’ (2 Tim. 3:1) Chakutalilahu, muchaaka cha 1914, amakwawu atoñojokeleña nawu mpinji yashikili yakuya mwiwulu. Chelili kuchiñeja kwawu kubuli kuzatika, kusandujola cheñi chikupu muNsona kwayileñeleli eluki nawu kumbidi kwadiña mudimu weneni wakushimwina. (Maku 13:10) Dichi, mu 1922, J. F. Rutherford, walombweleña mudimu wakushimwina, walejeli antu  apompeli hakupompa kwanyuza kwadiña haCedar Point, Ohio, U.S.A. nindi: “Talenu, Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niwanta windi.” Kufuma hayina mpinji nikutwalekahu, kushimwina ‘nsañu yawanta yayiwahi’ wekala himudimu walema wawambuña aYehova amakonu.—Mat. 4:23; 24:14.

15. Twahetelañamu ñahi neyi tutoñojokaña chikupu hadi Nzambi chakamenañayi antu jindi?

¹⁵ Neyi tutoñojokaña chikupu hanjila yayiwahi yazatishayi Yehova hakwakamena antu jindi, akunyima nimakonu, twaswejaña kukuhwelela muñovu jindi jakushikija mwaya muchima windi ninkeñelu yindi yakumbidi. Hampinji yoyimu, yanukishu yaNzambi yatukwashaña kutoñojokaña nikwanukaña wuprofwetu windi wuchidi kanda wushikijewi. Tunateli kukuhwelela netu neyi tukwilaña mwenimu chikutukwasha kwikala nachikuhwelelu chakola muyikaninu yindi.

KOLESHENU CHIKUHWELELU CHENU KUHITILA MUKUDIFUKULA

16. Nkiswinyi jafumañamu neyi tutwalekahu nakudikita chikupu mumudimu wakushimwina?

¹⁶ Nzambi yetu, Yehova, hiNzambi wasweja ñovu, Nzambi welaña munafuukuliyi. Ñimbi yamasamu wehwili nindi: “Hinyi wukweti ñovu yakweseka naneyi, eyi Yah?” Wabombeleluhu nindi: “Chikasa cheyi chakola, chikasa cheyi chachidiilu chidi hewulu.” (Mas. 89:8, 13) Hamuloña wakwila hiNzambi welaña munafuukuliyi, Yehova watiyaña kuwaha neyi tuzata chikupu mumudimu windi nawa watukiswilaña. Watalaña ambuñindi chili awamayala hela awambanda, atwansi hela akulumpi, nindi hiyashakamaña hohu nakudya “kudya kwawukopuku.” (Yish. 31:27) Hakumwimbujola Nleñi yetu, twatwalekañahu kukalakala chikupu nyidimu yateokalatiki. Kumukalakela Nzambi namuchima wejima kwatuleñelaña kwikala namuzañalu nawa twamutiyishaña Yehova  kuwaha chakwila wakiswilaña mudimu wetu.—Tañenu Masamu 62:12.

17, 18. Muloñadi chitunateli kuhoshela netu kuzata nyidimu yakashinshi kwatukwashaña kukuhwelela kufumba kwaYehova? Shimunenu chakutalilahu.

¹⁷ Indi kuzata nyidimu yakashinshi kwatukwashaña ñahi kumukuhwelela Yehova? Tushinshikenu hansañu yawaIsarela yamuNsona yahoshaña hampinji yeñililuwu Mwituña daChikaninu. Yehova walejeli atupristu asendeli chimbañu chachitiyañenu nawu endi nakuya kuKaloña Yodana. Hela chochu, antu chashikiluwu kwakwihi, amweni nawu nvula yakukumininaku yinenzeshi kaloña chikupu nakuleñela dibaji. Chumanyi chadi kwilawu aIsarela? Adi kuteeka chimba kuchikumu chakaloña nakutalila hadi nyilungu hela kubadikahu kulonda menji ahiti? Inehi, amukuhweleli chikupu Yehova nawa alondeleli wunlomboli windi. Chumanyi chafuminumu? Nsañu yahosha nawu: ‘Nyendu yawatupristu asendeli chimbañu chiyeñilili lwe kwakumina menji, menji emeni nawa atupristu emeni mbe hamaseki homa chawu mukachi kaYodana kwakwihi naYeriku nawa antu ejima azambukili hamaseki homa chawu.’ (Yosh. 3:12-17) A Isarela atela azañaleli chikupu chamwenuwu menji endeleña hiyakwimana. Eñañi, chikuhwelelu chawaIsarela mudi Yehova chakoleleluku muloña alondeleli wunlomboli windi.

¹⁸ Mwamweni, Yehova hakoñelaña antu jindi yihayamisha makonuku, ilaña wakiswilaña neyi amwekesha chikuhwelelu nawa alondela wunlomboli windi. Spiritu yaNzambi yazatikaña yayinkaña ñovu yakuzata mudimu wayinkawu wakushimwina nsañu yaWanta mwahita kaayi kejima. Nawa Chinsahu chaYehova wabadika, Kristu Yesu wasañwiluwu, wakonkomweneni atumbanji twindi nindi wukayikwashaña muniwu mudimu walema wayilejeli nindi: “Dichi yenu mwakelishi atumbanji munyuza yejima . . . Ami nidi nenu mafuku ejima nikwakakumina nyaka.” (Mat. 28:19, 20) A Yinsahu amavulu adiña nachaaku chakutiya nsonyi hela woma anateli kwiteja nawu spiritu yaNzambi yajila yayinka ñovu yakuhosha nawantu abula kwilukawu mumudimu wakushimwina.—Tañenu Masamu 119:46; 2 Akorinda 4:7.

19. Hichidi namuloña nakukala kwakumujimba kutukwetuku, chumanyi chitweluka?

¹⁹ Amana kwetu niahela amakwawu akweti kukala kweneni kwakumujimba hamuloña wayikatu hela kushinakaja. Ilaña, atela kwiluka nawu “Tata wavulishaña luwi, Nzambi wakukundeja kwejima” weluka chihandilu chamukwaKristu walala wejima. (2 Kor. 1:3) Wahamekaña yuma yejima yitwelaña hakwila tutwali nyidimu yaWanta hambidi. Wejima wetu twatela kwiluka netu kukuhwelela hohu mwifutu damulambu waKristu dikwatela kupulwisha wumi wetu nawa hampinji yoyimu twatela kuzata nañovu kwesekeja nachihandilu chetu.—Heb. 10:39.

20, 21. Munjilanyi jikwawu mutwamwekeshelaña netu twamukuhwelela Yehova?

²⁰ Kudifukula kwetu kwabombelamu kuzatisha mpinji yetu, ñovu, nimaheta chikupu kwesekeja nahanakumini ñovu jetu. Eñañi, tunakukeña ‘kwila mudimu wakushimuna nsañu yayiwahi’ namuchima wetu wejima. (2 Tim. 4:5) Chikuma chacheni chakwila nawu, twazañalalaña hakwila mwenimu, muloña twakwashaña antu amakwawu “eluki nsañu yalala chikupu.” (1 Tim. 2:4) Chakadi nikujina, kumulemesha nikumushimeka Yehova kwatuheteshaña kuspiritu. (Yish. 10:22) Kwatukwashaña cheñi kumukuhwelela chikupu Nleñi yetu.—Rom. 8:35-39.

²¹ Kwesekeja nachitunahanjekuhu, kumukuhwelela Yehova hawunlomboli wawuwahi hikwadinjilaña kwakwenuku; twatela kuzata nañovu hakwila tumukuhweleli. Dichi, mukuhwelelenu chikupu Yehova kuhitila mukulomba. Toñojokenuña chikupu hadi Yehova chashikijiliyi mwaya kukeña kwindi kumpinji yakunyima nichakelayi mwenimu kumbidi. Nawa twalekenuhu kukolesha chikuhwelelu chenu mudi Yehova kuhitila mukudifukula. Eñañi, yanukishu yaYehova yakatwalekahu haya nyaka. Neyi mutiyilila kuniyi yanukishu, munateli kushakama haya nyaka.

[Malwihu aKuzatisha haKudiza]

[Mwevulu wudi hefu 15]

Komana munateli kumwekesha chikuhwelelu neyi chamwekesheluwu antu jaYehova amumafuku aYoshuwa? (Talenu maparakalafu 17, 18)