NSAÑU YACHIHANDILU

Kushindamena Hadi Yehova Kunankwashi

Washimwini Malcolm Allen

Mpinji jikwawu, hitunateli kwiluka jinateli kumwekana muchihandiluku, nawa chihandilu chakala chikupu. Ilaña Yehova wakiswilaña antu ashindamenaña hadi yena bayi hamaanawuku. Ichi dichuma chitwahitamu ami niñodami muchihandilu chetu nawa munafumi nkisu jajivulu chikupu. Tiyenu yuma yitwahitamu muchihandilu chetu.

ATATA nawamama adibulakeni mu 1919 hakupompa kwaInternational Bible Students muCedar Point, Ohio, U.S.A. Adisumbwili kukumana kwachaaka chenichi. Navwalikili mu 1922 nawa mana kwami Paul wavwalikili hanyima yayaaka yiyedi. Ñodami Grace wavwalikili mu 1930. Anvwali jindi aRoy naRuth Howell adiña aTudizi aBayibolu, nawa ankaka jindi niwena adiña aTudizi aBayibolu nawa amabwambu jaMana Kwetu Charles Taze Russell.

Nadibulakeni naGrace mu 1947, nawa twadisumbwili haJuly 16, 1949. Henohu kanda tudisumbuli, twahanjekeli chakadi kuhita mumbadi hachihandilu chetu chakumbidi. Twafuukwiluhu kuzata mumudimu wampinji yejima nawa hitwakeñeleña kwikala nanyanaku. Ha October 1, 1950, twatachikili kuzatila hamu mudimu wawupayiniya. Kuhiñahu mu 1952, atutambikili kutachika kuzata mudimu wamuñinza.

MUMUDIMU WAKWENDA NISHIKOLA YAGILEYADI

Wonsu wetu twatoñojokeli netu twakeñeleña wukwashu hakwila tutweshi kuzata iwu mudimu wawuha. Hela chakwila nadizilileña kudi amana kwetu akuluka yitembi, hampinji yoyimu nakeñeleña atela kumukwasha mwini kwami Grace. Nahosheli naMarvin Holien, ibwambu dami wanyaka wadiña wakuluka yitembi mukuzata mudimu wawunkoñi wakwenda, nawa namwihwili nami: “Grace wuchidi kansi nawa kanda yeluki yuma yayivulu. Komana kuduhu muntu wunateli kuzatañayi nindi hadi mpinji yantesha kulonda yamukwashi?” Waakwili nindi, “Eña. Edna Winkle hipayiniya wakuluka yitembi wunateli kumukwasha chikupu.” Chimwahitili mpinji, Grace wahosheli hadi Edna nindi: “Wanleñeleli kwikala wakasunuka neyi tunakushimwina kwitala nikwitala, nelukili chakwila neyi muntu nakukeña kunkañesha nawa wandizishili kutiyilila kudi mwiniitala kulonda nitweshi kuhoshahu neyi chinateleli. Dimuntu inakeñeleña!”

Ami niGrace twazatilili muñinza jiyedi mumusumba waIowa, kubombelahu niyibalu yamumusumba waMinnesota niSouth Dakota. Kufumahu atutwalili kuÑinza 1 yamuNew York, yabombelelumu nimbaka jamuBrooklyn niQueens. Twanukaña chitwatiyileña netu hitukutwesha kuzata iwu mudimuku.  Ñinza mutwazatilileña yabombelelumu nichiPompelu chaBrooklyn Heights, apompeleleña Mwitala daWanta dahaBeteli nawa mwadiña antu amavulu amuchisaka chaBeteli akuluka yitembi. Hanyima yakuhana mpanji yamudimu yatachi munichi chipompelu, Mana Kwetu Nathan Knorr wenjeli kudami nakunleja mazu akwila nawu: “Malcolm, wunatuleji kufumba kutwatela kuzatilahu, nawa kwadiña kufumba kwatelela. Watela kwiluka neyi, chiwakañanya kutukwasha kuhitila mukutufumba chiwahi, dikwila nawu wudi wamukunkulwayi mukunu kuloñesha. Twalekakuhu kuzata chiwahi.” Hanyima yakupompa, namulejelumu mwini kwami Grace. Kufumahu, twayili hewulu mukapeka kamuBeteli mutwakamineña. Hamuloña wakusweja kwakama, twadilili.

Chimwahitili tukweji twantesha, twatambwilili mukanda wakututambika kuya nakuwanika kuShikola yaGileyadi yanaambala 24, yamanini muFebruary 1955. Atulejeleli chadimu henohu kanda tuyi kushikola nawu hitunakuya nakudiza iyi shikola kulonda twakekali amishonaluku. Ilaña, yikatukwasha kulonda tukazateña chiwahi mumudimu wakwenda. Kuwanika kuniyi shikola kwadiña hichuma chachiwahi nankashi nawa kwatuleñeleli kwikala adizoza.

Chitwamanishili shikola, atutemesheli kuya nakuzata mudimu wamunkambi. Nkambi yetu yabombelelumu musumba waIndiana, Michigan, niOhio. Kuhiñahu, muDecember 1955 twatambwilili mukanda kufuma kudi Mana Kwetu Knorr wahosheleña nawu: “Chakadi kuhita mumbadi wushimuni chiwunakutoñojoka, nawa wunleji mwalala. Wunleji neyi wunakukeña kwinza kuBeteli nakushakama kunu . . . hela neyi wunakukeña kuya nakuzatila kwituña dacheñi hanyima yakuzatila chantesha haBeteli. Nukukeña kwiluka neyi wunakukeña mudimu wamunkambi nimudimu wamuñinza.” Twakwili netu tukutiya kuwaha kuzata mudimu wudi wejima wuyakutwinka. Atulejeli kuya kuBeteli hohenohu.

YAAKA YAKUZAÑALESHA YINAZATILI HABETELI

Yaaka yakuzañalesha yinazatili mudimu wahaBeteli yabombelelumu kuhana jimpanji nikutañisha muUnited States mwejima. Nazatiluku mudimu wakudizisha nikukwasha akwenzi amavulu atachikili kuzata nyidimu yamaneni mukuloñesha kwaYehova. Chimwahitili mpinji, nazatili neyi nsoneki waMana Kwetu Knorr mukasanji katalileña hamudimu wakushimwina mukaayi kejima.

Nadiluñishili chikupu yaaka yinazatilili muDipatimenti Yatalaña haMudimu waKushimwina. Nazatileña hamu naT. J. (Bud) Sullivan. Wazatili neyi nkoñi muniyi dipatimenti hadi yaaka yayivulu henohu kanda nitachiki kuzatila kuniyi dipatimenti. Ilaña kwadiña antu amakwawu inadizililuku yuma yayivulu. Fred Rusk, iyenkeluwu mudimu wakundizisha niyena  wadiña hakachi kwawu. Namwihwili munjila yayiwahi nami: “Fred, muloñadi chiwasonekelañamu cheñi munyikanda neyi nasoneki dehi?” Waseheli nawa wabombeleluhu awa mazu anleñeleli nitoñojokuhu chikupu nindi, “Malcolm, neyi wuhosha hohu hakanwa, nsañu yiwunahoshi anateli kuyilumbulula namazu amakwawu, ilaña neyi wusoneka mukanda, sweje-e neyi wunakufumina kunu, mukanda watela kwikala wawuwahi nawa woloka chikupu.” Kuhiñahu wahosheli munjila yayiwahi nindi, “Kolaku, wunakwila chiwahi nawa mukuhita kwampinji wukekala chiwahi.”

Hayaaka yitwashakamini haBeteli, Grace wazatili nyidimu yashiyashana kubombelahu mudimu wakuwahisha mutupeka twakushakamamu nimudimu wakuloñesha yuma yinafwi mutupeka. Wadiluñishileña kuzata iwu mudimu. Makonu, neyi tudibulakana nawamana kwetu amakwawu adiña atwansi haBeteli hayina mpinji, amulejaña Grace namuzañalu nawu, “Mwandizishili chachiwahi chakwala kadidi, nawa amama atiyili kuwaha chikupu chimwandizishili.” Grace wadiluñishili cheñi kuzata mudipatimenti yaMagazini, Kutambwila niKutemesha Nyikanda, nikudipatimenti yaKutuña Matepu. Kuzata iyi nyidimu yashiyashana kwamukwashili kwiluka nindi kuzata mudimu wudi wejima hela kuzatila kwiluña kudi kwejima mukuloñesha kwaYehova hikukooleka nawa hinkisu. Nimakonu, dichatoñojokañayi.

YUMA YITUNAHIMPI MUCHIHANDILU CHETU

Muyaaka yamuma 1970, twelukili netu anvwali jetu anashinakaji dehi, dichi akeñekeleña kuyakamena chikupu. Nkumininaku, twafuukwiluhu chuma chakala. Hitwakeñeleña kufuma haBeteli nikushiya akwetu ambuña aYehova itwakeñeli chikupuku. Hela chochu, nelukili nami himudimu wami wakwakamena anvwali jetu. Dichi, chimwahitili mpinji twafumini haBeteli, ilaña twakuhweleleli netu neyi yuma yinahimpi, twakafunta cheñi muBeteli.

Hakwila tuwani mali mwakuhandila, natachikili kuzata kukampani yainshuwalansi. Mpinji yejima nakanukaña mazu anlejeli mukulumpi wanyidimu hampinji yinadizileña wahosheli nindi: “Iwu mudimu washindamena hakwendela antu namelela. Diyi mpinji yiwatela kuwana antu hamatala. Kwosi chuma chalema kubadika kwendela antu namelela.” Nakwili nami, “Neluki nami munakuhosha hayuma yimweluka, nawa neteji mumunahoshi. Ilaña ninami nikweti nyidimu yakuspiritu yinashaku maana chikupu, nawa hinakukeña kutachika kuyidiwulaku. Nukwendelaña antu namelela, ilaña Hachiyedi niHachiwana namelela, nukuyaña kukupompa kwalema nankashi.” Yehova wankiswilili chikupu hamuloña wakubula kujiña kukupompa nakuzatilamu mudimu wakumujimba.

Mu July 1987 hampinji yafwili amama mwitala mwahembelañawu ayeji twadiña kukadidi hakaaminuwu. Mukulumpi wawanansi wenjili kudi Grace nawa wamulejeli nindi: “Mama Allen, yenu kwitala mukanooki. Antu ejima aneluki nawu mwadiña  kunu mpinji yejima nakwakamena akuwenu awambanda. Kwakama nehi.”

MuDecember 1987, twasonekesheli cheñi mudimu wakuya nakukalakela haBeteli, iluña ditwakeñeli. Ilaña chimwahitili mafuku antesha, Grace amukwatili nachikatu chakansa yakumujiñwa. Hanyima yakumuladika nichakoleliyi, amulejeli nawu kansa yinamani. Hela chochu, haniyi mpinji, twatambwilili mukanda wakufuma kuBeteli wakutwiteja nawu tutwalekuhu namudimu wetu wakushimwina muchipompelu mutwadiña. Twadiña namuchima wakutwalekahu kudikita mudimu wetu waWanta.

Chimwahitili mpinji, nawanini mudimu kuTexas. Twafuukwiluhu kuya kunidi iluña muloña kutaata chiwahi, nihanu kuchidi kwakuwahi. Hadi yaaka 25, tunashakami muTexas nawamana kwetu niahela atwakamenaña nawa itwadikunda nawu.

YUMA YITUNADIZILUKU

Hampinji yantesha Grace wakatili kansa yakumujiñwa niyovu, nawa katataka wakatili kansa yakumayeli. Ilaña kanda yatobeñahu dehi hakukala kwamonañayi muchihandilu hela kudiwula nshimbi yahoshaña hawumutu nikuzatila hamu. Kakavulu amwihulaña nawu, “Chumanyi chayileñela mushakameña chiwahi neyi adisumbula nikumwekesha muzañalu. Wateneni yuma yiwana nindi: “Tudi amabwambu chikupu. Twahanjekaña mpinji yejima ifuku niifuku. Twayaña nakuhempula hamu ifuku niifuku. Nawa twasambilaña kumanisha kukala kutukweti henohu kanda tuyi nakukama.” Hela chochu, mpinji yikwawu twabobolaña, ilaña twadanakenaña nikujimbalaku, nawa ichi chatukwashaña.

Mukweseka kwejima kutunahitumu, kudi yuma yayivulu yayiwahi yitunadiziluku:

(1) Mpinji yejima shindamenenuña hadi Yehova nikwiteja yuma yetejañayi nindi yitumwekeni. Bayi mushindamena kukashinshi kenwenu awenuku.—Yish. 3:5, 6; Yere. 17:7.

(2) Shindamenenu hawunlomboli waMwizu daYehova, hichikweti muloña nakukala kumukwetuku. Chalema kumwovwahila Yehova ninshimbi jindi. Mwatela kutondahu chuma chimu, chili kumwovwahila hela nehi.—Rom. 6:16; Heb. 4:12.

(3) Kwekala chuma chalema nankashi muchihandilu, kwikala nejina dadiwahi naYehova. Kutwamijaku yuma yakeñañayi, bayi kufwila mahetaku.—Yish. 28:20; Mukwa. 7:1; Mat. 6:33, 34.

(4) Lombenuña kulonda muzateña nañovu nikudikita mumudimu waYehova kushika hakumina ñovu yenu. Shenu muchima hayuma yimwatela kwila, bayi hayuma yimukubula kutwesha kwilaku.—Mat. 22:37; 2 Tim. 4:2.

(5) Ilukenu nenu kwosi kuloñesha kukwawu kukweti nkisu yaYehova niwuselewaku.—Yow. 6:68.

Ami niGrace wejima wetu hamuntu hamuntu tunamukalakeli Yehova kubadika hadi yaaka 75, nawa hamu neyi adisumbula, tunazati yaaka kukamwihi na 65. Tunadiluñishi chikupu kumukalakela Yehova hamu hadi yaaka yejima yinahituhu. Tunakuhweleli nikulomba netu amana kwetu ejima niahela niwena akuwana muzañalu wafumaña mukushindamena hadi Yehova.

[Mwevulu wudi hefu 18]

Kufuma kuchimunswa: Nathan Knorr, Malcolm Allen, Fred Rusk, Lyle Reusch, Andrew Wagner

[Mazu ekoku adi hefu 18]

“Chiwakañanya kutukwasha kuhitila mukutufumba chiwahi, dikwila nawu wudi wamukunkulwayi mukunu kuloñesha. Twalekakuhu kuzata chiwahi.”

[Mwevulu wudi hefu 19]

Hewulu: Fern niGeorge Couch, Grace ninami kuGileyadi, mu 1954

[Mwevulu wudi hefu 19]

Heshina: Hampinji yinazatileña kuDipatimenti Yatalaña haMudimu waKushimwina, mu 1956

[Mazu ekoku adi hefu 20]

“Mpinji yejima shindamenenuña hadi Yehova nikwiteja yuma yetejañayi nindi yitumwekeni”