‘Mukalakelenu Yehova’

‘Hansañu yatela kudikwatisha, bayi mulabaku; mukalakelenu Yehova.’—ROM. 12:11.

MUNATOÑOJOKUHU NENUDI?

Wuduñu wamuchidinyi washimunawu hamukanda waAroma 12:11?

Tunateli kutondolwela ñahi kwikala anduñu jaSatana nikaayi kindi?

Wulokwinyi walambulañayi Yehova anduñu jindi?

1. Indi antu amavulu atoñojokaña nawudi hadi nduñu, indi wuduñu watenawu haAroma 12:11 wambukaku ñahi?

 ANTU amavulu atoñojokaña hadi nduñu nawu himuntu wayuulañawu nikumuyandisha chikupu kudi nkaka yindi. Ilaña kwikala nduñu waNzambi chambukaku chikupu. Izu daNzambi dahoshaña nawu mukwaKristu nateli kutondahu kwikala nduñu waMwanta wakukeña. Mwamweni, hampinji kapostolu Pawulu yakonkomweneniyi akwaKristu amuyaaka nkulakaji yakusambila ‘kumukalakela Yehova,’ wayikolesheleña nindi amukalakeleña Nzambi mudimu wajila hamuloña wakumukeña. (Rom. 12:11) Indi wuduñu wamuchidiwu wabombelamu yumanyi? Tunateli kutondolwela ñahi kwikala anduñu jaSatana nikaayi kindi? Nawa nkiswinyi jafumaña mukukalakala nakashinshi neyi anduñu jaYehova?

‘AMI NAMUKEÑA CHIKUPU NKAKA YAMI’

2. (a) Chumanyi chamuleñeleleña nduñu kaIsarela kukaana kumushiya nkaka yindi? (b) Chumanyi chamwekesheleñayi nduñu neyi yeteja nawu amulokoli kwitu?

² MuNshimbi jayinkeluwu aIsarela kudi Nzambi, twadizaña hawuduñu wakeñañayi Yehova nindi twikali. Nduñu kaHeberu amuumbileñaku kudi nkaka yindi hanyima yakumuzatila hadi yaaka yitanu nayiyedi. (Kwid. 21:2) Hela chochu, neyi nduñu namukeñi chikupu mwanta windi nawa hanakukeña kumushiyaku, watwalekeleñahu kushakama, nshimbi yaYehova yetejeli chumichi. Nkaka yanduñu wamutwalileña nduñu kuchenzelu hela chipamba chakuchisu nakumulokola kwitu dindi namukumbu. (Kwid. 21:5, 6) Muloñadi chelilileñayi mwenimu? Mwidimi dachiHeberu, kwovwahila akwifwanisha kukutiya nikutiyilila. Dichi, neyi nduñu yeteja nindi amulokoli kwitu, wamwekesheleña nawu nakukeña kutwalekahu kumukalakela nkaka yindi nakashinshi. Chumichi chinakutukwasha kwiluka yuma yabombelamu mukudihana kwetu kudi Yehova, dikwila nawu twatela kumwovwahila chakufuma hamuchima hamuloña wakwila twamukeña Nzambi.

3. Chumanyi chatuleñelaña tudihani kudi Nzambi?

³ Hampinji yitwapapatisheweli kulonda twikali akwaKristu,  twadiña twafuukulahu dehi kumukalakela Yehova, kwikala anduñu jindi. Kufwila kumwovwahila Yehova nikwila mwaya muchima windi dikwaletesheli nawu tudihani. Kwosi muntu niwumu watukanjikijiluku. Mwamweni, niatwansi apapatishewaña elaña mwenimu hanyima yakwila anadihani dehi kudi Yehova halwawu, bayi neyi hamuloña wakufwila kuzañalesha anvwali jawuku. Wejima wetu twafuukulañahu kudihana kudi Nkaka yetu wamwiwulu, Yehova, muloña twamukeña. Kapostolu Yowanu wasonekeli nindi, “Kumukeña Nzambi yowu kwila mwatulejañayi; mwatulejañayi himwakalaku.”—1 Yow. 5:3.

HELA CHAKWILA TWASUBUKA TUCHIDI ADUÑU

4. Chumanyi chakeñekaña hakwila nawu twikali “anduñu jakuloña”?

⁴ Twamusakililaña nankashi Yehova hakutukwasha kwikala anduñu jindi. Kukuhwelela mwifutu danyiloña daKristu kwatukwashaña kubula kuyuulewa chikupu nanshidi. Hela chakwila tuchidi abula kuwanina, twatondahu kwovwahila Yehova niYesu ekala aNkaka jetu. Pawulu walumbulwili chikupu chumichi muchatalisha mumukanda windi wumu wonenewa nindi: “Difuukulenu nenu kunshidi muyafu, hakwinza mudi Kristu Yesu munekali amomi akuhandila Nzambi.” Kuhiñahu wasoñamishili nindi: “Mweluka dehi, neyi mukudilubula kudi muntu mwili anduñu jindi akumwovwahila, muneli dehi anduñu janowu mwovwahilaña; hela janshidi nakutwala kukufwa, hela hakwovwahila nakutwala kukuloña. Ichi dinu, tumusakililenu Nzambi, netu hela mwadiñi anduñu janshidi, munekali dehi akwakwovwahila munyichima yenu kuleja mwayilejeleluwu. Chayifumishiluwu muwuduñu wanshidi, mwabalumukili kwikala anduñu jakuloña.” (Rom. 6:11, 16-18) Ahanu kapostolu nateni ‘hakwovwahila kwakufuma kumuchima.’ Dichi, neyi tudihana kudi Yehova, twekalaña “anduñu jakuloña.”

5. Ndombwinyi yamukachi yitwekala nayu wejima wetu, nawa muloñadi?

⁵ Hela chochu, kudi yuma yitwatela kushinda hakwila tutwalekuhu kushakama kwesekeja nakudihana kwetu. Twazuñaña ndombu jiyedi. Yatachi, hikukala kwamweniyi Pawulu. Wasonekeli nindi: “Muntu wami wamukachi watiyaña kuwaha nanshimbi jaNzambi; ilaña namoni lushimbi lwacheñi muyidi yami lwalwishaña nalushimbi lwayitoñojoka yami, lunakeñi kuñiñija muwuduñu walushimbi lwanshidi lwekala muyidi yami.” (Rom. 7:22, 23) Cheñi, kubula kuwanina kutwaswana kwatwimakena. Chafumañamu, twatwalekañahu kulwisha nayaaku yetu yakumujimba. Kapostolu Petulu watukonkomweneni nindi: “Himudi anduñuku; hakwila chimunabuli wuduñu bayi chila chuma chakubuta nachu nkunyuku; shakamenu neyi anduñu jaNzambi.”—1 Pet. 2:16.

6, 7. Indi Satana waleñelaña ñahi kanu kaayi kekali nekoku?

⁶ Tukweti ndombu yamuchiyedi yitwatela kuzuña, kuzuña nakanu kaayi kanakuyuulewa nawandemoni. Satana, nyuuli wakaayi, watwinyikaña nyivu yindi kulonda yaluwañeshi kashinshi ketu kudi Yehova niYesu. Wafwilaña kututadika wuduñu kuhitila mukutweseka nayuma yindi yatama. (Tañenu Aefwesesa 6:11, 12.) Njila yimu Satana mwelilañayi mwenimu hikuhitila mukutukokola nayuma yamu kaayi. Kapostolu Yowanu wasoñamishili nindi: “Neyi muntu wukukeña mpata yamunu mwishina, kukeña kwaTata hikwekala mudi yenaku. Muloña yuma yampata yamunu mwishina yejima, kufwila kwachisemwa chaheseki, nikufwila kwamesu, nikudisamba kwamukunkulwayi kwawumi wunu, hiyakudi Tataku, yamumpata yamunu mwishina.”—1 Yow. 2:15, 16.

⁷ Kunyeñumuka kaayi kejima, antu anakukeña kwikala namaheta chikupu. Satana waleñelaña antu akuhweleleña nawu neyi ekala namali amavulu anateli kwikala namuzañalu. Masitolu amaneni anawanini kwejima. Kuselujola kwaleñelaña antu asheña maana  hamaheta niyiseki. Antu atalaña hajakwenda akoleshaña antu kuya kumaluña amawahi hamu nawantu akweti yitoñojoka yamukaayi. Eñañi, kwejima kutukuya atulejaña kuhimpa chihandilu chetu kwesekeja nayitoñojoka yamukaayi.

8, 9. Wubanjinyi wutunateli kwiñilamu, nawa muloñadi?

⁸ Hakutena antu adiña muchipompelu chawakwaKristu amuyaaka nkulakaji yakusambila ekalili nayitoñojoka yamukaayi, Petulu wasoñamishili nindi: “Atiyaña kuwaha nakuluña namwaana; himahuji namabeka, aluñaña kumawijawu akukeñañana, hadyañawu nanenu. Muloña chahoshañawu mazu akuhemesha akudisamba, hiyakukoka antu nakufwila kwatama kwachisemwa chaheseki nikubajama; antu anakeñi kupuluka mudi awa ashakama mukuluwañesha. Ayikanaña nawu mukufuma muwuduñu, kutoña awenawu hiyanduñu jakutoka. Muloña neyi muntu anamwimiki mushindu kudi mukwawu, neli dehi nduñu yanowu namwimiki mushindu.”—2 Pet. 2:13, 18, 19.

⁹ Kwila mwaya ‘kufwila kwamesu,’ hikwaleñelaña muntu kwikala wasubukaku. Ilaña wekalaña nduñu wankaka yakanu kaayi wabulaña kumwekana, Satana Diyabolu. (1 Yow. 5:19) Tunateli kwikala muwubanji wakwikala anduñu akufwila maheta chikupu, dikwila nawu wuduñu wakala kufumamu.

MUDIMU WAWUWAHI

10, 11. Anyi afwilaña kulukukayi Satana, nawa shikola yahewulu yinateli kuleta ñahi kukala kudi akwaKristu achidi atwansi?

¹⁰ Neyi cheliliyi muEdeni, nimakonu Satana wafwilaña kulukuka antu achidi kanda eluki yuma yayivulu. Wakeñaña kulukuka chikupu atwansi. Satana hatiyaña kuwaha neyi kansi hela muntu wudi wejima yadihana kumukalakela Yehovaku. Chilumbu chaNzambi wakeñaña antu ejima adihana kudi Yehova akañanyi kwila mwaya kumwakama Nzambi nikwikala nakashinshi.

¹¹ Tushinshikenu cheñi hachakutalilahu chanduñu wetejeleña kumulokola kwitu dindi. Iwu nduñu hadaha watiyileña kukata hakampinji kantesha; ilaña kukata kwadiña kwahakapinji kantesha hohu, nakumushila chinjikijilu chamwekesheleña nawu weteja kushakama nankaka yindi. Chinateli kwikala chakala hela kuyeña kudi atwansi kutondahu yuma yamuchihandilu yambukaku nayawantu ayinyeñumuka. Satana waleñelaña antu atoñojokeña nawu kuzata mudimu mukaayi kindi kunateli kuleñela antu kwikala nachihandilu chachiwahi, ilaña akwaKristu atela kutoñojoka chikupu hakulema kwakumanisha mpwila yawu yakuspiritu. Yesu watañishili nindi, “Atuzweñi muspiritu anakooleki.” (Mat. 5:3) AkwaKristu adihana afwilaña  kwila mwaya muchima waNzambi, bayi waSatanaku. Atiyaña kuwaha nanshimbi jaYehova, nawa atoñojokañahu chikupu mwaana niwufuku. (Tañenu Masamu 1:1-3.) Hela chochu, shikola yahewulu hiyamushilaña kambuña aYehova mpinji yakutoñojoka nikumanisha mpwila yindi yakuspirituku.

12. Chumanyi chiyatela kufuukulahu atwansi makonu?

¹² Nduñu mukwaKristu nateli kwikala nankaka yindi wabulaña kudifukula kudi Yehova wunakumuyandisha. Mumukanda windi watachi wasonekeleliyi akwaKorinda, Pawulu wehwili nindi: ‘Enu hayitambikiluwu, mwadiña anduñu tahindi?’ Kuhiñahu wayilejeli nindi: ‘Bayi muneñañaku; ilaña neyi mukutwesha kufumamu, fumenumu tuhu.’ (1 Kor. 7:21) Neyi nduñu wadiña nankaka yindi wabulileña kudifukula kudi Yehova wamuyandishileña, nduñu wateleleli kutondahu kusubuka. Makonu, mumatuña amavulu, nshimbi yahosha nawu kansi watela kuya kushikola kwesekeja nayaaka yetejawu. Kuhiñahu, atudizi ayilejaña kutondahu neyi chakwila akukeña kutwalekahu kutaña hela nehi. Chinateli kwikala chakala nankashi kuzata mudimu wampinji yejima neyi mukwaKristu yatondahu kutaña shikola yahewulu kulonda yakeñili mudimu wawuwahi mukanu kaayi.—Tañenu 1 Akorinda 7:23.

KOMANA MWATELA KUTAÑA SHIKOLA YAHEWULU TAHINDI SHIKOLA YABADIKA?

13. Shikola yamuchidinyi yinateli kuhetesha nankashi ambuña aYehova?

¹³ Pawulu wasoñamishili akwaKristu aKolosi nindi: “Babalenu hakenda kamwekana muntu wukuyipupa namaanindi namakasu amukunkulwayi, mwaya yaaku yawantu, mwaya yuma yampata yamunu mwishina yakuhemesha, himwaya Kristuku.” (Kol. 2:8) Antañishi amavulu atañishaña ‘maana nimakasu amukunkulwayi kwesekeja namwaya yaaku yawantu.’ Shikola yahewulu, mwavula kwikala iyi ntañishilu, hiyavula kukwasha atudizi chakuzata nyidimuku, nawa hiyanateli kudiloñesha kuzata nyidimu yamafuku ejimaku. Kwambukaku, ambuña aYehova atondañahu shikola yayikwashaña kudiza nyidimu yinateli kuyikwasha kutwalekahu nachihandilu chapela hakumukalakela Nzambi. Alondelaña kufumba kwaPawulu kwamufumbiliyi Timotewu nindi: “Kwakama Nzambi, nikutiya kuwaha, hikuheta kwakweni. Dichi neyi tukweti yakudya niyakudivwika, yumiyi yinawani.” (1 Tim. 6:6, 8) Chatela ekaleña namadigili nimajina ankumbu, akwaKristu alala ashaña maana hakuzata chikupu mudimu wakushimwina kulonda akwasheñaku antu amakwawu ekaleña atumbanji twaKristu.—Tañenu 2 Akorinda 3:1-3.

14. Kwesekeja namukanda waAfwilipi 3:8, indi Pawulu wamweneña ñahi kukooleka kwadiñayi naku kwakumukalakela Nzambi niKristu?

 ¹⁴ Toñojokenu hachuma chamumwekeneni Pawulu. Amudizishili kudi kaYudeya nkuluñaña waNshimbi Gamaleli. Shikola yatañiliyi Pawulu tunateli kuyesekeja nashikola yayunivesiti yamakonu. Indi Pawulu wayimweni ñahi iyi shikola chayesekejeliyi nakukooleka kwakukalakela Nzambi niKristu? Wasonekeli nindi: “Nafuukulaña yuma yejima nami yakujimbañesha hohu, nanochu chasweja kuwaha kumwiluka Kristu Yesu, Mwanta wami.” Kuhiñahu wabombeleluhu nindi: “Hadi yena najimbañeshi yuma yejima, ninochu nayifuukulaña nami hiwuzondu hohu, kulonda niheti Kristu.” (Fwi. 3:8) Iyi yitoñojoka yaPawulu yinateli kukwasha atwansi akwaKristu nianvwali jawu amwakamaña Nzambi kutondahu chachiwahi kutalisha hakutaña shikola. (Talenu nyevulu)

HETELENUMU MUSHIKOLA YABADIKA

15, 16. Indi kuloñesha kwaYehova kwadizishaña mashikolanyi, nawa akweti nkeñelwinyi?

¹⁵ Indi yililu hamashikola ayunivesiti yekala ñahi? Hanawa maluña, kakavulu antu ekalaña akasunuka kudikaña nikumwekesha nawu anahilili nfulumendi niakwanfulumendi. (Efwes. 2:2) Kwambukaku, kuloñesha kwaNzambi kwadizishaña shikola yabadika munjila yakuwunda muchipompelu chawakwaKristu. Wejima wetu tukweti kukooleka kwakuhetelamu muShikola yaMudimu waTeokalatiki yekalañaku mulungu nimulungu. Kwekala cheñi shikola yawamana kwetu apayiniya ajiki (Shikola yaKudiza Bayibolu Yawamana Kwetu Ajiki) nishikola yawapayiniya adisumbula (Shikola yaKudiza Bayibolu yawakwaKristu Adisumbula). Mashikola ateokalatiki amuchidiwu atukwashaña kumwovwahila Yehova, Nkaka yetu wamwiwulu.

¹⁶ Tunateli kusandujola maheta akuspiritu muWatch Tower Publications Index hela the Watchtower Library haCD-ROM. Nkeñelu yayeni yanawa mashikola yekala yakudifukula kudi Yehova. Yatudizishaña chitunateli kukwashaku antu amakwawu kukundama kudi Nzambi. (2 Kor. 5:20) Kufumahu, antu itwatañishaña niwena akatwesha kutañishaku antu amakwawu.—2 Tim. 2:2.

WULOKU WATAMBULAÑAYI NDUÑU

17. Kufuukulahu kudiza shikola yabadika kwaletaña nkiswinyi?

¹⁷ Muchishimu chaYesu chantalenta, anduñu ayedi ashinshika ayihamekeli hamudimu wawu. Chumichi chayileñeleli azañaleli hamu nankaka yawu. Hakumwekesha kusakilila, nkaka yawu wayinkeli cheñi mudimu wukwawu. (Tañenu Matewu 25:21, 23.) Makonu, kutondahu shikola yabadika kwaletaña muzañalu ninkisu. Talenu chakutalilahu chaMichael. Wazatili chiwahi kushikola chakwila antañishi jindi amutambikili kulonda ahanjeki nindi hajakuya kuyunivesiti. Antañishi jindi ahayamini hakutiya nawu wakeñeleña wanyi kutaña shikola yahewulu. Ilaña watondeluhu kudiza mudimu wahakapinji kantesha. Iwu mudimu wamukwashili kudakamena yomweni kumujimba nikuzata wupayiniya. Komana watoñojokeli nindi wafuukwili mwaluwa? Wahosheli nindi: “Shikola yinnadizi muBayibolu neyi payiniya nawa eluda muchipompelu yinankwashi chikupu. Nkisu nikukooleka kunadiluñishaña kwabadika chikupu mali ejima inadi kwikala nawu. Nidi namuzañalu chikupu hamuloña wakwila hinafuukwiluhu kutaña shikola yahewuluku.”

18. Chumanyi chayileñela mutonduhu kudiza shikola yabadika?

¹⁸ Shikola yabadika yatudizishaña mwaya muchima waNzambi nawa yatukwashaña kumukalakela Yehova. Yatuleñelaña ‘tufumi muwuduñu wakutoka’ nawa nkumininaku ‘nakwiñila muwaana wawanyana kaNzambi wowu waana walema.’ (Rom. 8:21) Sweje-e dinu, twadizaña njila yayiwahi mutunateli kumwekeshela netu twamukeña chikupu Nkaka yetu wamwiwulu, Yehova.—Kwid. 21:5.

[Malwihu aKuzatisha haKudiza]

[Nyevulu yidi hefu 14, 15]

Nkaka yenu wumu yodihi wumukukalakelaña?