Yuma Yitunateli Kudizila Kukulomba Kwalombeluwu Chachiwahi
Yuma Yitunateli Kudizila Kukulomba Kwalombeluwu Chachiwahi
‘Ijina deyi dalema, adikiswili nkisu.’—NEHE. 9:5.
MUNATELI KWAKULA?
Yumanyi yayiwahi yeliluwu aIsarela hampinji yayipompesheluwu hamu kudi aLevi?
Yumanyi Yehova yakoñeleliyi antu jindi yamwekeshaña nawu ijina dindi damutelela?
Yumanyi yitwadizilaña kukulomba kwawaLevi?
1. Kupompanyi kwawantu jaNzambi kutukudizahu, nawa malwihwinyi itwatela kudihula?
“IMANENU mumukiswili Yehova Nzambi yenu wakufumisha kunyaka yejima, wakushika kunyaka yejima, nkisu.” Kuhitila munawa mazu, antu jaNzambi akushankulu ayipompesheli kulonda alombeli hamu kulomba kwakulehi kwasonekawu muBayibolu. (Nehe. 9:4, 5) Apompeleli muYerusalema hefuku da 24 dakakweji kamuchitanu natuyedi kaTishri, kawaYudeya mu 455 B.C.E. Chitukudizaña haniku kupompa kwadimena, dihulenu nenu: ‘Yililwinyi yayiwahi yamwekesheluwu aLevi yaleñeleli iku kupompa kwendi chiwahi? Yumanyi yikwawu yinatela kudizilaku kuniku kulomba kwalombeluwu chachiwahi?’—Mas. 141:2.
KAKWEJI KADIMENA
2. Chakutalilahwinyi chachiwahi chatwimikililuwu aIsarela hakupompa kwawu hanyima yakutuñulula mpwembu jaYerusalema?
2 AYudeya amanishili kutuñulula mpwembu jaYerusalema henohu kunashali kakweji kamu hakwila ekali naniku kupompa. (Nehe. 6:15) Antu jaNzambi amanishili mudimu wakutuñulula mumafuku 52, kuhiñahu atwalekeluhu kusha maana kuyuma yakuspiritu. Dichi, hefuku datachi dakakweji kakaha, Tishri, apompeli hamu hanji kulonda atiyilili kudi Ezera niaLevi amakwawu atañileña nezu datiyakana nikulumbulula Nshimbi jaNzambi. (Mwevulu 1) Yisaka yejima, kubombelahu ‘niejima atwesheli kutiyamu chalumbuluka,’ emeni nakutiyilila “kufumisha kukucha nakushika kuchayili.” Ichi hichakutalilahu chachiwahi nankashi kudi etu makonu tunakupompela muMatala aWanta amawahi. Hela chochu, komana mpinji jikwawu twahuñumukaña nakutachika kutoñojoka hayuma yikwawu yabula kulema? Neyi dichitwelaña, tushinshikenu cheñi hachakutalilahu chanawa aIsarela akushankulu atiyilileña nakanañachima nikutoñojokahu chikupu hayuma yatiyiluwu chakwila atachikili nikudila hamuloña wakukañanya kwovwahila Nshimbi jaNzambi.—Nehe. 8:1-9.
3. AIsarela ovwahilili nakulondela wunlomboli wamuchidinyi?
3 Hela chochu, iyi hiyadiña mpinji yakwiteja nshidi jawu hatookaku. Hakwikala ifuku dachawija, yadiña himpinji yakuzañalala mukudifukula kwaYehova. (Mwevulu 2) (Kuch. 29:1) Dichi Nehemiya walejeli antu nindi: “Yenu mwakadyi yanuna, mwakanwi yatowala, anabuli kuloñeshelawu mwakamutemeshelaku yindi, muloña lelu hiifuku dajila dakujilikila Mwanta wetu, dichi bayi mutiya chikelaku, muloña muzañalu waYehova diyi ñovu yenu.” Chamuzañalu, antu ovwahililili nawa idi ifuku dekalili ‘dakuzañajala nankashi.’—Nehe. 8:10-12.
4. Indi nyitu yayisaka yawaIsarela yelilidi, nawa yumanyi yalema yawaninuwu yadiña munichi Chawija chaYisolu?
4 Hefuku dahiñiluhu, nyitu yayisaka yapompeli hamu kulonda amoni munza chiwateleli kulondela chikupu Nshimbi jaNzambi. (Mwevulu 3) Hakudiza kwawu kwaNsona, awanini kwila nawu kakweji kamuchitanu natuyedi kabombelelumu Chawija chaYisolu kufuma hefuku da 15 nakushika hefuku da 22 dakakweji kaTishri, dichi atachikili kuloñesha. (Mwevulu 4) Ichi Chawija chaYisolu chawahili chikupu kubadika yawija yadiñaku kutachika tuhu mumafuku aYoshuwa nawa mwafumini “kuzañalala kwakweni kwabadika.” Chuma chalema chadiña munichi chawija hikutaña Nshimbi jaNzambi hadi antu amavulu, “hefuku hefuku, kufumisha kwifuku dakusambila nakushika kwifuku dakukuminina.”—Nehe. 8:13-18.
IFUKU DAKWITEJA NSHIDI
5. Chumanyi chelileñawu antu jaNzambi henohu aLevi kanda ayilombeluku kudi Yehova?
5 Chimwahitili mafuku ayedi, mpinji yashikili kudi aIsarela yakwiteja nshidi jawu hatooka hamuloña wakukañanya kuhemba Nshimbi jaNzambi. Idi ifuku hidadiña dachawija chakudyaku. Ilaña, antu jaNzambi alekeli kudya nawa avwalili yikeleyi yadiña chinjikijilu chakwila nawu anakudila. Kuhiñahu, ayitañilili antu Nshimbi jaNzambi hadi maora asatu nantetemena. Namwaana, ‘etejeleña nshidi jawu nikudifukula kudi Yehova Nzambi yawu.’ (Mwevulu 5) Kuhiñahu aLevi alombeleluku antu mukulomba kwawu kwalombeluwu chachiwahi. (Mwevulu 6)—Nehe. 9:1-4.
6. Yumanyi yaleñeleli aLevi alombi chachiwahi, nawa ichi chatudizishaña chumanyi?
6 Chakadi nikujina, kutaña Nshimbi jaNzambi kapampa kakavulu kwayikwashili aLevi kulomba chachiwahi. Mavasi ikumi akutachikilahu ahoshaña nankashi hanyidimu niyililu yaYehova. Muchibalu chikwawu chakulomba, aLevi ashimwini nshidi jajivulu jakoñeluwu antu nawa alumbulwili chikupu muloña waleñeleli aIsarela abuli kwikala atelela kutambwila ‘wushona waNzambi wawuvulu.’ (Nehe. 9:19, 27, 28, 31) Chumanyi chitunateli kudizila kudi aLevi? Twatela kutañaña nikutoñojoka chikupu Hezu daNzambi ifuku niifuku. Neyi twilaña mwenimu, Yehova wukuhoshaña nanetu. Nawa hakulomba kudi yena, tukwikala nayuma yayivulu yakulombelahu kudi Yehova, nawa kulomba kwetu kukwikalaña kwakuwahi.—Mas. 1:1, 2.
7. Yumanyi yalombeluwu aLevi kudi Nzambi, nawa chumanyi chitwadizilañaku?
7 Kudi chuma chimu hohu chatelela chalombeluwu. Twachiwanaña mumazu akukumisha muvasi 32, akwila nawu: “Dichi dinu, eyi Nzambi yetu, Nzambi muneni, wañovu, wakutiya woma nankashi, wakakelaña muwatiyañeni nimuluwi lweyi, kukabakana kwejima kunatuwani ninetu, nianyanta jetu, nitulamba twetu, nitupristu twetu, nituprofwetu twetu, niankakulula jetu, niantu eyi ejima, kufumisha hamafuku adiñuwu anyanta jakuAshuri, nakushika kwitañwa dalelu, bayi wukumona kukehaku.” Dichi, aLevi atwimikilili chakutalilahu chachiwahi kulonda ninetu tusambileña kumushimeka nikumusakilila Yehova henohu kanda tulombi yuma yitunakukeña.
KUSHIMEKA IJINA DANZAMBI DALEMA
8, 9. (a) Munjilanyi yakudizoza mwatachikililuwu aLevi kulomba? (b) Mazazanyi ayedi amwiwulu atenenuwu aLevi?
8 Hela chakwila aLevi alombeli chachiwahi, adiña adizoza nawa elukili nawu mazu azatishiluwu hakumushimeka Yehova hiyamushimekeli chikupuku. Dichi atachikili kulombelaku aIsarela ejima kudi Yehova mukudizoza nakulembelela nawu: “Ijina deyi dalema, Datuumbakana, chakubadika nkisu yejima nikushimeka kwejima, adikiswili nkisu.”—Nehe. 9:5.
9 Kulomba kwatwalekahu nawu: “Eyi yeyi Yehova kanka weyi hohu; yeyi welili iwulu, iwulu damawulu, niyileñaleña yawu yejima, niiseki niyuma yekalahu yejima, nituluñalwiji niyuma yekalamu yejima, yeyi wayihembaña yejima. Yileñaleña yamwiwulu yadifukulaña kudeyi.” (Nehe. 9:6) Eñañi, Yehova waleñeli mawulu niyuma yekalamu, ninyilalanji yayivulu yatutumbwa. Waleñeli cheñi yuma yejima yekala heseki detu dadiwahi nawa wenkeli yuma yawumi wuswa wakusemununa. Añelu jaNzambi ajila itunateli kutena cheñi netu “izaza dejima damwiwulu,”amweneña yuma yejimiyi. (1 Anya. 22:19; Yoba 38:4, 7) Kubombelahu, awa añelu elaña mwaya muchima waNzambi mukudizoza kuhitila mukukalakela antu akwanshidi “akaswana wamwinu.” (Heb. 1:14) Makonu, anetu nawa twamukalakelaña Yehova hamu neyi izaza dadizishewa chikupu. Twatela kwimbujola añelu kuhitila mukumukalakela Nzambi mukudizoza.—1 Kor. 14:33, 40.
10. Chumanyi chitunadiziluku kunyidimu yaNzambi yamukoñeleliyi Abarahama?
10 Kuhiñahu, aLevi ashili maana hanyidimu yaNzambi yamukoñeleliyi Abarama, washikijili yaaka 99 chakadi kuvwala mwana nañodindi Sarayi wadiña nshinta. Dihafumini Yehova yamuhimpi ijina nakumutumba nindi Abarahama, datalisha mukwila nawu ‘nkakulula wamukanka.’ (Kutach. 17:1-6, 15, 16) Nzambi wamukanini cheñi Abarahama nindi mbutu yindi yakaswana ituña daKenani. Antu kakavulu ajimbalaña mwakanañawu; ilaña Yehova hajimbalaña mwokuku. ALevi ashimwini chashikijiliyi Yehova chikaninu chindi nawu: “Eyi yeyi Yehova Nzambi watondeli Abarama, wamufumishili muUri wawaKaladeya, wamwinkeli ijina daAbarahama; wamweni muchima windi washinshika kumesu eyi, watiyañeni nindi chitiyañenu chakwinka anyanindi ituña dawaKenani, . . . ninochu muwahosheli wunakoñumu; muloña eyi waloña.” (Nehe. 9:7, 8) Anetu nawa tumwimbujolenuña Nzambi waloña kuhitila mukwila mutwahoshaña.—Mat. 5:37.
YUMA YAYIWAHI YAKOÑELILIYI YEHOVA ANTU JINDI
11, 12. Lumbululenu mwatalisha ijina daYehova niyuma yakoñeleliyi Yehova antu jindi yamwekeshaña nawu idi ijina damutelela.
11 Ijina dakwila nawu Yehova datalisha mukwila nawu “Wakojejaña Yuma Kwikalaku.” Chumichi chatalisha mukwila nawu Nzambi watwalekañahu kuzata kulonda yashikiji yikaninu yindi. Chakutalilahu chachiwahi chamwekeshaña chumichi hinjila mwashikijililiyi chikaninu chindi chakaniniyi anyana kaAbarahama hadiñawu anduñu muEjipitu. Hayina mpinji, chamwekeneña neyi kwiji munza wawaIsarela hiwakakuulewa nakuya nakushakama Mwituña daChikaninuku. Hela chochu, Nzambi watwalekeluhu kwila yakeñekeleña sampu nichashikijiliyi chikaninu chindi. Hakwila mwenimu, wamwekesheli nindi ijina dabadika dakwila nawu Yehova damutelela.
12 Kulomba kwasonekeliyi Nehemiya kwahosha hadi Yehova nawu: “Wamweni chadiñi nakukabawu ankakulula jetu muEjipitu; watiyili chadililuwu kuKaluñalwiji Kachinana. Wamwekesheli hadi Fwaro, nihadi ambuñindi ejima, nihadi antu amwituña dindi ejima yinjikijilu nayihayamisha, muloña eyi welukili chadiñi nakudinkawu wanta nawena; hiwukutiyakana niijina neyi chididi lelu. Waambwili kaluñalwiji kwakuyawu, hiyakuhita mukachi kakaluñalwiji, hiyakuzambuka heseki dawuma; ayihañili wayinatilili mumanyiñi neyi ilola mumenji añovu.” Kuhiñahu, kulomba kwatwalekeluhu kuhosha hayuma yikwawu yakoñeleliyi Yehova antu jindi nawu: “Kukuyawu hiwukuyifwomwena akwetuña, wowu aKenani . . . Atambwili nyikala yampwembu, niituña damanji, hiyakuheta nimatala enzala nayuma yejima yayiwahi, nimashima akupunda dehi, nimatempa anyivinyu, nimatempa anyiolive, ninyitondu yakudya yayivulu nankashi; hiyakudya, hiyakwikuta, hiyakutoha, hiyakuluña nakuwaha kweyi kwasweja.”—Nehe. 9:9-11, 24, 25.
13. Indi Yehova wayakameneni ñahi aIsarela kuspiritu, ilaña chumanyi cheliluwu?
13 Yehova wakoñeli yuma yikwawu yayivulu hakwila yashikiji yikaninu yindi. Chakutalilahu, chimwahitili hohu kapinji kantesha hanyima yakwila aIsarela anafumi dehi muEjipitu, Yehova wayakemeneni kuspiritu. Hakulomba kwawu kudi Nzambi, aLevi anukili nawu: “Wasulukilili nawa hampidi yaSinayi, wahosheli nawu nezu dakufuma mwiwulu, wayinkeli wuñaji waloña, ninshimbi jalala, niyidika yayiwahi, nikuleja kwakuwahi.” (Nehe. 9:13) Yehova wadizishili antu jindi kwikala nayililu yayiwahi kulonda ekali atelela ijina dindi dajila hamu neyi akwakuswana Ituña daChikaninu, ilaña avulameneni yuma yayiwahi yadiziluwu.—Tañenu Nehemiya 9:16-18.
AISARELA AKEÑEKELEÑA KUYIFUMBA
14, 15. (a) Indi Yehova muwushona windi, wayakemeneni ñahi antu jindi akwanshidi? (b) Chumanyi chitwadizilaña kudi Nzambi hachayakameneniyi aIsarela?
14 Kulomba kwawaLevi kwahoshaña hanshidi jiyedi jakoñeluwu aIsarela hanyima yakwiteja hampidi yaSinayi nawu akuhembaña Nshimbi jaNzambi. Hamuloña wayumiyi, ateleleli kuyishiya kankawawu kulonda adifwili. Ilaña iku kulomba kwamushimekaña Yehova nawu: “Nawushona weyi wawuvulu nankashi [eyi] kuyilekela mwisaña nehi. . . . Wayidiishili . . . nyaka makumi awana, hiyabulili chumaku, yuma yawu yakuvwala kukulaña nehi, nyendu yawu kunanaña nehi.” (Nehe. 9:19, 21) Makonu, watwinkaña yuma yejima yitwakeñaña hakwila tumukalakeleña nakashinshi. Bayi tufwana aIsarela amavulu afwilili mwisaña hamuloña wakubula kwovwahila nikubula chikuhweleluku. Mwamweni, yumiyi “ayisonekeli kulonda kutukonkomwena, etu tudi kunu kunsa yanyaka yamakonu.”—1 Kor. 10:1-11.
15 Chawushona, hanyima yakwiñila Mwituña daChikaninu, aIsarela hiyatwalekeluhu kwikala ashinshika kudi Yehovaku, atachikili kudifukula kudi anzambi jawaKenani nikwila yuma yatama nikulambula anyanawu. Dichi Yehova wetejeli nyunza yadiña mukamwihi yiyandishi munza windi watondewa. Chabalumukiluwu munyichima, Yehova wayitiyilili wushona nakuyanakena nawa wayikuulili kudi ayilumbu jawu. Chumichi chamwekeneña “kakavulu.” (Tañenu Nehemiya 9:26-28, 31.) ALevi etejeli nawu, “Wayiwundilili nyaka yayivulu, wayitotelumu naspiritu yeyi kudi atuprofwetu tweyi, wena kwawu kushaku matu nehi, hiwukuyihana kudi nyuza yamumatuña.”—Nehe. 9:30.
16, 17. (a) Yumanyi yafuminumu hampinji yalekeluwu aIsarela kumwovwahila Yehova? (b) Yumanyi yetejeluwu aIsarela, nawu chumanyi chakaninuwu kwila?
16 AIsarela alekeli cheñi kumwovwahila Yehova nihanyima yakufuma muwunkoli muBabiloni. Yumanyi yafuminumu? ALevi atwalekeluhu kulomba nawu: “Tala, saña tudi anduñu nilelu, hakwila ituña diwenkeli ankakulula jetu kulonda akadyi yakudya niyayiwahi yekalamu, Tala, etu twashakamamu chawuduñu hohu. Dasoñaña kudya kwakuvulu kwakudya anyanta iwatushilili kutuyula nansañu yanshidi jetu . . . tudi nakumona kukala nankashi.”—Nehe. 9:36, 37.
17 Komana aLevi atalishili mukwila nawu Nzambi wayiheñesheleleña wuñanji hakukala kwamweneñawu? Inehi! Etejeli nawu: “Muyuma yejima yinatuwani eyi kweyi waloña hohu, muloña eyi wuneli mwalala, hakwila etu tuneli mwatama.” (Nehe. 9:33) Dichi, akunkulwili kulomba kwawu kwakudizoza nakukana chikupu nawu muza wukwovwahilaña Nshimbi jaNzambi. (Tañenu Nehemiya 9:38; 10:29) Asonekeli chikaninu chawu mumukanda wafwachikiluwu kudi anlomboli jawaYudeya akushika ku 84.—Nehe. 10:1-27.
18, 19. (a) Chumanyi chitwatela kwila hakwila tukeñili mwituña daNzambi dadiha? (b) Chumanyi chitwatela kutwalekahu nakulombela, nawa muloñadi?
18 Hakwila twikali antu akeñañayi Yehova nindi akeñili mwituña dadiha, twatela kumwiteja yatufumbeña. Kapostolu Pawulu wehwili nindi: “Mwananyi abulaña kufumbawu kudi tata yindi?” (Heb. 12:7) Twamwekeshaña netu twetejaña wunlomboli waNzambi muchihandilu chetu kuhitila mukuumika nakashinshi mumudimu windi nikwiteja spiritu yindi yitufumbeña. Nawa neyi tukoña nshidi yahamesu bwi-i, tunateli kukuhwelela netu Yehova wukutwanakena neyi tubalumuka chikupu mumuchima nikwiteja kufumba mukudizoza.
19 Katataka, Yehova wukutohesha ijina dindi chikupu kubadika chaditohesheliyi hampinji yakuuliliyi aIsarela muEjipitu. (Ezek. 38:23) Neyi chochaswaninuwu antu jindi akushankulu Ituña daChikaninu, akwaKristu ejima anakuumika neyi akwakudifukula aYehova ashinshika niwena akaswana wumi mwituña daNzambi dadiha daloña. (2 Pet. 3:13) Dichi, tutwalekenuhu nakulomba kulonda ijina daNzambi dalema adijiliki. Chibaaba chinalondeluhu chikahanjeka hakulomba kukwawu kunateli kutukwasha kwila yuma yinakukeñeka hakwila Nzambi yatukiswileña makonu nihaya nyaka.
[Malwihu aKuzatisha haKudiza]
[Caption on page 22]
1
[Caption on page 22]
2
[Caption on page 22]
3
[Caption on page 23]
4
[Caption on page 23]
5
[Caption on page 23]
6
