‘Babalenu Kulonda Mulombeña’

‘Dichi wundishenu mumesu, babalenu kulonda mulombeña.’—1 PET. 4:7.

MUKWAKULA NENUDI?

Kulombanyi kwashiyashana kumwatela kulomba nkawenu kakavulu?

Muloñadi akwaKristu alala chiyatela kutwalekahu nakulomba?

Anyi anateli kuhetelamu neyi tulombelañaku amakwawu?

1, 2. (a) Indi ‘kwikala asoñama kulonda tulombeña’ kwalemenadi? (b) Malwihwinyi alema anakuhosha hakulomba itwatela kudihula?

 IYALA wumu wadiña nakuzata nawufuku wahosheli nindi, “mpinji yakalaña kwikala wasoñama nawufuku himpinji yakumacha. Hadaha antu amakwawu achiishahu dehi anateli kwiteja mwahosheliyi. AkwaKristu makonu amonaña kukala kokumu muloña kaayi katama kaSatana kadi mumwidima waweni. (Rom. 13:12) Chikwikala chatama neyi tutachika kunoñoka hayinu mpinji yakala. Dichi chalema kwikala ‘awundisha mumesu’ nakutiyilila kufumba kwamuNsona kwakwila nawu ‘babalenu kulonda mulombeña.’—1 Pet. 4:7.

² Hamuloña wampinji yitunashikumu, chachiwahi kudihula netu: ‘Komana nekala wasoñama kutalisha kukulomba? Komana nalombaña kulomba kwashiyashana nikulombaña mpinji yejima? Nekala nachaaku chakulombelaku antu amakwawu, ntahindi nalombelaña hohu hayuma yinakukeña niyinakufwila? Nawa kulomba kunateli kunkwasha ñahi hakwila nikapuluki?’

LOMBENUÑA KULOMBA KWASHIYASHANA KWEJIMA

3. Kulombanyi kukwawu kwashiyashana?

³ Mumukanda windi wayisonekeleliyi Aefwesesa kapostolu Pawulu wateneni ‘hakulomba kwashiyashana kwejima.’ (Efwes. 6:18) Mukulomba kwetu, kakavulu twamulembelelaña Yehova kulonda yatukwashi muyuma yitwakeñaña nikushinda kukala. ‘Mukwakutiya mwalombañawu antu’ watiyaña chitwamulembelelaña netu yatukwashi. (Mas. 65:2) Hela chochu, twatela cheñi kusha muchima kukulomba kukwawu kwashiyashana. Iku kulomba kwekala kwakuhameka, kwakusakilila nikwakulembelela.

4. Muloñadi wutwatela kumushimekela Yehova mukulomba kwetu?

⁴ Kudi yuma yayivulu yaleñelaña mukulomba kwetu kudi Yehova tubombeleñamu nimazu  akumuhameka. Chakutalilahu, neyi tutoñojoka ‘hayuma yañovu yaleñayi nikutoha kwindi kwabadika’ chatusañumunaña kumushimeka. (Tañenu Masamu 150:1-6.) Dimuloña watukonkomwenañawu kapampa 11 mumavasi atanu nayedi aMasamu kapetulu 150 nawu tumushimekeña Yehova. Nsoneki yamasamu mukwawu wamwakamineña chikupu Nzambi wembili nindi: “Nakuhamekaña mapampa katanu nakayedi ifuku dimu, nanowu wuñaji weyi waloña.” (Mas. 119:164) Mwalala twatela kumushimeka Yehova. Dichi ninetu twatela kumushimeka mukulomba kwetu “mapampa katanu nakayedi ifuku dimu” dikwila nawu mpinji yejima.

5. Kulomba kwakusakilila kwatukiñaña ñahi?

⁵ Kusakilila hikulomba kukwawu kwalema. Pawulu wakonkomweneni akwaKristu amumusumba waFwilipi nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.” (Fwi. 4:6) Kumusakilila Yehova chakufuma hamuchima mukulomba kwatukiñaña. Chumichi chalema nankashi, chineli tunakushakama mumafuku akukuminina mudi antu “abulaña kusakilila.” (2 Tim. 3:1, 2) Eñañi antu mukaayi hiyanakusakililaku. Neyi kubabala nehi ninetu, tunateli kwikala namuchima wakubula kusakilila. Kumusakilila Nzambi mukulomba kwatuleñela kuzañalala nayuma yitukweti nawa kwatuleñelaña kubula ‘kunyinyita nikutoba hachihandilu chetu.’ (Yuda 16) Kubombelahu, neyi nyitu yayisaka yilombelaña hamu nayisaka yawu kulomba kwakusakilila, añodi jawu nianyanawu niwena akwikala namuchima wakusakilila.

6, 7. Indi kulembelela hichumanyi, nawa yumanyi yitwatela kumulembelela Yehova?

⁶ Kulembelela hikulomba kwakufuma hamuchima chikupu. Twatela kumulembelela Yehova hayumanyi? Tunateli kwila mwenimu neyi anakutuyandisha hela neyi tunaholokeli muyikatu yamaneni. Hampinji yamuchidiwu, dihu hitwamulembelelaña chikupu Nzambi mukulomba kulonda yatukwashi. Komana iyi diyi mpinji yitwatela kumulembelela Yehova hohu?

⁷ Toñojokenu hakulomba kwakutalilahu kwalombeliyi Yesu, nawa shinshikenu yuma yahosheliyi kutalisha hejina daNzambi, Wanta Windi, nimwaya Muchima Windi. (Tañenu Matewu 6:9, 10.) Mukanu kaayi munenzali yuma yatama, nawa nfulumendi yawantu yinakukañanya kwinka antu jawu yuma yakeñañawu. Dichi twatela kulombaña kudi Tata yetu wamwiwulu kulonda ijina dindi dijili niWanta windi wufumishuhu chiyuulu chaSatana hamaseki. Yinu diyi mpinji cheñi yitwatela kumulembelela Yehova kulonda muchima windi awili hamaseki neyi chawilañawu mwiwulu. Dichi tutwalekenuhu kwikala asoñama kulonda tulombeña kulomba kwashiyashana kwejima.

‘TWALEKENUHU NAKULOMBA’

8, 9. Muloñadi wutwatela kubula kumutwika Petulu niapostolu amakwawu muloña chakaminuwu tulu mwitempa daÑesemani?

⁸ Hela chakwila kapostolu Petulu wayikonkomweneni akwaKristu ‘kwikala ababala kulonda alombeña’ yena wakañenyi kwikala wasoñaña mpinji yimu. Wadiña hakachi kawapostolu akamini mutulu hampinji yayiliyi Yesu nakulomba mwitempa daÑesemani. Nihampinji yayilejeliyi Yesu kwikala ‘atona kulonda alombi,’ akañenyi kwikala atona.—Tañenu Matewu 26:40-45.

⁹ Hela chochu, chatela tumutwiki Petulu muloña niakwawu apostolu chabuliluwu kwikala asoñama, twatela kwanuka netu azeyeli nanyidimu yazatiluwu hadina ifuku. Azatili mudimu weneni wakuloñesha Paseka nikwanakana hadodina ifuku namelela. Kuhiñahu, Yesu watachikila Kudya kwaMwanta kwaMelela, nakushiya chakutalilahu chakulondela hakwanakana Chanukishu chakufwa kwindi. (1 Kor. 11:23-25) ‘Chembiluwu tumina twakuhameka, edikili,  nakuya kumpidi yaOliveta,’ endeli chintampu cheneni mutunjila twatulolu twaya kuYerusalema. (Mat. 26:30, 36) Mwadiña mukachi kawufuku mwamweni. Ninetu neyi twadiña mwitempa daÑesemani hawuna wufuku chiña ninetu twakamini. Chatela yayizuwili ana apostolu azeyeli Yesu wahosheli chachiwahi nindi “spiritu . . . yinakeñi, ilaña mujimba wunazeyi.”

10, 11. (a) Petulu wadizililuku kwodi kuchuma chakoñeliyi mwitempa daÑesemani? (b) Indi chuma chakoñeliyi Petulu chinayikundami ñahi?

¹⁰ Chuma chamumwekeneni Petulu mwitempa daÑesemani hichadiña chamukunkuluku. Wadizililuku yuma yakala hamuloña wakubula kwikala wasoñama. Hakusambila Yesu wahosheli nindi: “Wufuku iwu wejima wenu mukudimboka hansañu yami.” Petulu wamwakwili nindi: “Neyi antu ejima akudimboka hansañu yeyi, ami kwami hinamba kadimbukaku.” Yesu wakwili kuhitila mukumuleja Petulu nindi wakadikala kapampa kasatu. Chakubula nikuneña Petulu wakwili nindi: “Hela kufwa naneyi, ami hinakadikaleyuku.” (Mat. 26:31-35) Hela chochu, Petulu wadimbukili neyi chochahosheliyi Yesu. Waneñeli chanukiliyi nindi namukaani Yesu kapampa kakukumishaku, Petulu ‘wadilili nankashi.’—Luka 22:60-62.

¹¹ Petulu wadizililuku kuchuma chakoñeliyi nawa chamukwashili kuleka chaaku chadiñayi nachu chakudikuhwelela. Chikadi kujina, kulomba dikwamukwashili Petulu. Dichi chachiwahi hakumona neyi Petulu diyi wafumbili nindi ‘babalenu kulonda mulombeña’. Komana twatiyililaña iku kufumba kwonenawu? Kubombelahu, komana ‘twalombaña mpinji yejima’ nakumwekesha netu twamukuhwelela Yehova? (Mas. 85:8) Dichi twatela kwanuka cheñi kufumba kwakapostolu Pawulu kwakwila nawu: “Yowu natoñojoki nindi nemani, ababali kuchina kudimbuka.”—1 Kor. 10:12.

KULOMBA KWANEHEMIYA AKWAKWILI

12. Muloñadi chitwatela kwimbujolela chakutalilahu chachiwahi chaNehemiya?

¹² Toñojokenu hadi Nehemiya mukwakutwala lupasa kudi Mwanta Aratasheshe wakuPeresi wadinaku muyaaka yamuma 500 B.C.E. Nehemiya himuntu washili chakutalilahu chachiwahi chakulomba chikupu. Watwalekeluhu hadi mafuku amavulu ‘nakushakama nanzala nakulomba kumesu aNzambi’ hayihuñu yamweneñawu aYudeya muYerusalema. (Nehe. 1:4) Aratasheshe chamwihwiliyi muloña wadihombeleliyi ‘Hohenohu Nehemiya hakulomba kudi Nzambi wamwiwulu.’ (Nehe. 2:2-4) Chumanyi chafuminumu? Yehova wakwili kulomba kwindi nawa walombweli yuma munjila yakwashili antu Jindi. (Nehe. 2:5, 6)  Chumichi chakolesheli chikuhwelelu chaNehemiya!

13, 14. Twatela kwila ñahi kulonda tutwalekuhu kwikala nachikuhwelelu chakola nihakushinda ñovu jaSatana jakufwila kutuzeyesha?

¹³ Kulomba mpinji yejima, neyi chelileñayi Nehemiya kwatukwashaña kwikala nachikuhwelelu chakola. Satana hekala naluwuku nawa kakavulu watulukukaña neyi tunazeyi. Chakutalilahu, neyi tunakuyekela nayikatu hela chineñi tunateli kutachika kutoñojoka netu Nzambi nakutumona nindi tunakuzata nañovu wanyi mumudimu wakushimwina kakweji nikakweji. Etu amakwawu tunateli kutachika kuneña hadaha hamuloña wayuma yitwamweni kunyima muchihandilu chetu. Satana wakeñaña nindi tutoñojokeña netu tudi amukunkulwayi. Wafwilaña kuluwañesha yitoñojoka nikuzeyesha chikuhwelelu chetu. Hela chochu, neyi twikala ‘ababala kulonda tulombeña’ tunateli kutwalekahu kwikala nachikuhwelelu chakola. Mwalala ‘nkebu yakukuhwelela, yikutukwasha kujima nachu nyivu yakesi yamukwakutama yejima.’—Efwes. 6:16.

¹⁴ Neyi twikala ‘ababala kulonda tulombeña,’ tukwikala asoñama nawa neyi yuma yakweseka chikuhwelelu chetu yituholokela mukukasumwisha tukutwalekahu kwikala akola. Neyi tuholokela mukweseka, twatela kwanuka chakutalilahu chaNehemiya nakulomba kudi Nzambi hohenohu. Yehova hohu diyi wunateli kutukwasha kushinda kweseka nikuumika neyi chikuhwelelu chetu chidi mukweseka.

LOMBELENUÑAKU ANTU AMAKWAWU

15. Twatela kudihula netudi kutalisha hakulombelaku antu amakwawu?

¹⁵ Yesu wamulembeleluku Petulu kulonda chikuhwelelu chakapostolu chibuli kukañanya. (Luka 22:32) Epafwaditu mukwaKristu washinshika wamuyaaka nkulakaji  yakusambila wamwimbujoleli Yesu nawa walombeleluku amana kwindi amuKolosi. Pawulu wayisonekeleli nindi: “wayilwishilaña mukulomba kwindi mafuku ejima, nindi mwimani ngu mwikali antu alala chikupu, mwiluki chikupu mwanakeñiyi Nzambi mwejima.” (Kol. 4:12) Twatela kudihula netu: ‘Komana nayilombelañaku chikupu amana kwetu amukaayi kejima? Mapampa kañahi inalombelañaku amana kwami akwakwitiya anaholokeli muwubanji wadimwekenaña waweni? Ifukwinyi dinalombeleluku amana kwami anakuzata nyidimu yamaneni mukuloñesha kwaYehova? Chakatataka kudihu antu amuchipompelu anakuhita mukukala inalombeluku?’

16. Komana kulombelaku akwetu kwalema? Lumbululenu.

¹⁶ Kulombelaku antu amakwawu kudi Yehova Nzambi kunateli kuyikwasha chikupu. (Tañenu 2 Akorinda 1:11.) Yehova nateli kutiya kulomba kwetu hela chakwila akwakudifukula indi amavulu anakulomba kudi yena kapampa kakavulu, watiyaña chalombañawu nawa washaña muchima kuyuma yinakwakamenawu nikutiya kulomba kwawu. Dichi twatela kushaku muchima kukukooleka kutukweti kwakulombelaku akwetu. Kufwana Epafwaditu, twatela kumwekesha muchima wakukeña nawa wakuyakamena chikupu amana kwetu niahela akwaKristu kuhitila mukuyilombelaku. Neyi twila mwenimu tukwikalaña namuzañalu muloña ‘mukuhana mwekala muzañalu weneni kubadika wekala mukutambwila.’—Yil. 20:35.

“KUHANDA KWETU KUNASWILI DEHI KWAKWIHI”

17, 18. Indi kwikala ‘asoñama kulonda tulombeña’ kunateli kutukwasha ñahi?

¹⁷ Henohu Pawulu kanda yashimuni nindi, “wufuku wamana dehi hanalehi, mwaana keña wuchi;” wabombeleluhu nindi: “Muneluki dehi mpinji yakuhinduka mutulu hiyikuya nakupandakana; muloña katataka kuhanda kwetu kunaswili dehi kwakwihi, hitwetiyili kwadiña kwakulehi.” (Rom. 13:11, 12) Ituña dadiha datukanayi Nzambi didi kwakwihi nawa kuhanda kwetu kunaswili dehi kukamwihi kubadika chitwatoñojokaña. Bayi tuzeya munyidimu yetu yakumukalakela Nzambuku, nawa hitwatela kwiteja yuma yamukaayi yitumanishileña mpinji yitwatela kulomba kudi Yehovaku. Ilaña twatela kwikala ‘ababala kulonda tulombeña.’ Neyi twilaña mwenimu chikutukwasha kuzata ‘nyidimu yajila nakwakama Nzambi’ hampinji yitunakuchiñeja ifuku daYehova. (2 Pet. 3:11, 12) Tukuhandaña munjila yikumwekeshaña nawu tudi atona kuspiritu nikumwekesha chikupu nawu twakuhwelela netu kukuma kwakanu kaayi katama kudi mukamwihi. Dichi ‘bayi tuleka kulombaku.’ (1 Tesa. 5:17) Twatela cheñi kumwimbujola Yesu kuhitila mukwikala nampinji yakulomba nkawetu. Neyi tutonenañamu chikupu mukulomba kwakankawetu kudi Yehova, tukukundama kwakwihi nayena. (Yak. 4:7, 8) Nawa akutukiswila chikupu!

¹⁸ Nsona yahosha nawu: “Mafuku ashakaminiyi [Kristu] hamaseki walambwili yena watwesheli kumupulwisha afumi mukufwa nikulomba nikulembelela nikudila kwakweni nimadilu; amutiyili nanochu chadiñiyi nawoma wakwakama Nzambi.” (Heb. 5:7) Yesu walembeleli nakusakilila nawa watwalekeluhu kwikala washinshika kudi Nzambi kushika nikukuma kwachihandilu chindi chahamaseki. Chafuminumu, Yehova wamusañwili Mwanindi wakeñayi mudi afu nawa wamwinkeli wumi wakafwaña mwiwulu. Anetu nawa tunateli kwikala ashinshika kudi Tata yetu wamwiwulu hela chakwila kumbidi tunateli kuhita mukweseka. Eñañi tunateli kuheta wumi wahaya nyaka, neyi tutwalekahu kwikala ‘ababala kulonda tulombeña.’

[Malwihu aKuzatisha haKudiza]

[Mwevulu wudi hefu 5]

Hela chakwila, Petulu wadimbukili, wadizili ‘kwikala wasoñama kulonda yalombeña’ (Talenu maparakalafu 10, 11)

[Nyevulu yidi hefu 6]

Kwikala ‘ababala kulonda tulombeña’ kwatukwashaña kushinda kukala kwashiyashana (Talenu maparakalafu 13, 14)