Chitunateli Kukwasha Antu Anakaankili

FRANCOIS Eluda wekala mwituña dahutwa washimwini nindi: “Ndombu yavulumukili hampinji yikwadiña kudibecha hakuvota, nawa yaleñeleli aYinsahu jaYehova kutemoka nakushiya matalawu. Yakudya niyitumbu yakeheli nawa yadiñaku yaswejeli wuseya. Jinyambawulu ajishikili nawa makina akutambwilahu mali alekeli kuzatika.”

Amana kwetu hamutayi anyakeli kuhana mali nikukwasha aYinsahu amwituña dejima ashili matala awu nakushakama muMatala aWanta. Mazanvu awayilumbu atachikili kushika nyikwakwa, ilaña kukabadi kejima elukili nawu aYinsahu hiyadiñijaña munsañu jamatuña nachiyuuluku, nyotoka yahamutayi ayitejeleña kuhita.

François wahosheli nindi “Ifuku dimu twayileña Hetala daWanta dichi amashidika atachikili kuloza motoka mutwadiña. Hela chochu, yidaña yahitili hakachi. Chitwamweni mushidika nakwinza lufuchi niwuta windi mumakasa, twafuntishili motoka mankinka nyima nawa twateñulukili nakufunta kumutayi. Twamusakililili Yehova hakutupulwisha. Ifuku dahiñiluhu amana kwetu akushika ku 130 adiña Hetala daWanta atemukili nakuswama. Amakwawu atemukili kumutayi, kutwayakameneneña kuyuma yakumujimba niyuma yakundama kuwulunda wawu naYehova kushika nimpinji yamanini kukala.”

François nindi: “Chimwahitili mpinji kasanji kamutayi katambwilili nyikanda yakusakilila yayivulu kufuma kudi amana kwetu mwituña dejima. Chamwenuwu amana kwawu akumaluña amakwawu chayikwashiluwu chayileñeleli asweji kumukuhwelela Yehova.”

Hampinji yitwamonaña kukala kwaletañawu antu, hitwayilejaña amana kwetu niahela netu ‘tiyenu iyena, ikutenuku.’ (Yak. 2:15, 16) Ilaña twafwilaña kuyinka yuma yakaankilañawu kumujimba. Munjila yoyimu chayisoñamishiluwu muyaaka nkulakaji yakusambila nawu kwakaholoka nzala yeneni, “atumbanji ejima hiyakwila nawu tukwashuku ana kwetu adi muYudeya. Hiyakuhanahana iwu mwanatwesheliyi, iwu mwanatwesheliyi.”—Yil. 11:28-30.

Hakwikala ambuña Yehova, twafwilaña kukwasha antu anakaankili kumujimba. Hela chochu, antu akeñaña kuyikwasha kulonda ekali nawulunda wawuwahi naNzambi. (Mat. 5:3) Hakwila nawu yayikwashi kulonda ekali nawulunda naNzambi nichiyatela kwikalawu naniwu wulunda, Yesu wayinkeli atumbanji twindi mudimu wakwilisha atumbanji. (Mat. 28:19, 20) Hamuntu hamuntu twazatishaña mpinji yetu, ñovu nimaheta etu hakuzata iwu mudimu. Hamu neyi kuloñesha, twazatishaña mali amakwawu ahanañawu nakulandamu yuma yakumujimba yakeñekaña, ilaña iyi yawana yekala yakutwala nachu nyidimu yaWanta hambidi nikutiyakesha nsañu yayiwahi. Muniyi njila twamwekeshaña netu twamukeña Nzambi niatuñi netu.—Mat. 22:37-39.

Antu ahanaña yawana yakukwasha mudimu wawaYinsahu jaYehova wamukaayi kejima atela kwiluka nawu yawana yahanañawu ayizatishaña chiwahi nawa munjila yatelela. Komana munateli kukwashaku amana kwenu adi mukukaankila? Komana mwafwilaña kukwasha iwu mudimu wakwilisha atumbanji? Neyi dimu, “Antu atela kuyilila mwamuwahi hiwuchidi nañovu yakuyilila, bayi wuleka mwoku.”—Yish. 3:27.

 [Chikasha chidi hefu 9]

NJILA MWAHANINAÑAWU AMAKWAWU YAWANA YAKUKWASHA MUDIMU WAMUKAAYI KEJIMA

Neyi chichadiña mumafuku akapostolu Pawulu, antu amavulu makonu ‘atentekaña hambadi mali,’ hela kuhemba mali akusha mutuyikasha twamuchipompelu hakusoneka nawu “Mudimu Wamukaayi Kejima.” (1 Kor. 16:2) Kakweji nikakweji, yipompelu yatemeshaña iyi yawana kukasanji kawaYinsahu jaYehova kamwituña dawu. Munateli cheñi kutemesha yawana yamali kuhitila mukuzatisha mutayi wetejawu munshimbi wazatishañawu aYinsahu jaYehova mwituña denu. Hakwila mwiluki mutayi wetejawu munshimbi wazatishañawu aYinsahu jaYehova mwituña denu, mwani ihulenu kasanji kamutayi kamwituña denu. Munateli kuwana keyala yakasanji kamutayi wenu hawebu sayiti yawww.pr418.com. Yawana yimunateli kutemesha kukasanji diyi iyi:

YAWANA YAKUDIKEÑELA

• Munateli kuhana mali, yingelingeli hela yuma yikwawu.

• Mwatela kusoneka mukanda nakuwutemeshela hamu namali hela yawana yidi yejima yimunatemeshi.

NJILA YAKUHANINAMU MALI AKUSONDAMISHA

• Mwatela kuhana mali kulonda ayizatishi kumudimu wamukaayi kejima nawa neyi himukukeña mali enu akuyifuntishila.

• Sonekenu mukanda wunakumwekesha nawu munateli kukeña kuyifuntishila mali enu.

KUFUUKWILA CHADIMU KUHANA WUKWASHU

Kubombela hayawana yamali nimaheta enu imwatela kuhana, kudi njila jikwawu mutwatela kukwashila mudimu waWanta wamukaayi kejima. Njila jeniji anajishimuni heshina. Njila yidi yejima yimunakukeña kuzatisha hakuhana, mwani sambilenu kwihula kasanji kamutayi kamwituña denu kulonda mwiluki njila jazatishañawu mwituña denu. Chineli nshimbi ninyisonku yashiyashana, mwatela kwihula antu akuluka yitembi munsañu janyisonku ninshimbi henohu kanda muwani njila yayiwahi yakuhaninamu yawana.

Inshuwalansi: Mwatela kusoneka nenu aWatch Tower Bible and Tract Society of Pennsylvania diwu atela kutambula mali akukiñilamu wumi wenu hela apeshoni.

Mali Akunyambawulu: Mali akunyambawulu, yipapilu yimwaswekejelañahu mali, hela mali apeshoni mwatela kuyihana kudi aWatch Tower Bible and Tract Society of Pennsylvania neyi mufwa, kwesekeja nanshimbi yanyambawulu yamwituña denu.

Mali Asompokañamu: Antu amakwawu ekala namakampani nawa mali asompokañamu ayihanaña chawana kuWatch Tower Bible and Tract Society of Pennsylvania hela anateli kusoneka nawu neyi wena mwiluña mwosi aWatch Tower Bible and Tract Society of Pennsylvania diwu akatambula mali.

Mpata Hela Matala: Mwatela kuhana itala hela mpata yatela kulandishawu neyi chawana, neyi mudi netala mwatela kusonekesha nenu mukashila aWatch Tower Society of Pennsylvania, enu aweni mukutwalekahu nakushakamamu.

Chawana Chahachaaka: Iyi hinjila yimu yakuhaninamu mali hela njila yikwawu yakuhembelamu mali kumutayi wazatishañawu aYinsahu jaYehova. Mukwakuhana niyena hela muntu mukwawu anenkuwu iwu mudimu kudi mukwakuhana, wukutambulaña nfwetu hachaaka hachaaka muchihandilu chindi.

Mawilu niYikumba: Yikumba hela mali mwatela kusonekesha nenu yikashali mumakasa aWatch Tower Bible and Tract Society of Pennsylvania kuhitila mukusoneka wilu, munateli kusoneka nenu aWatch Tower Bible and Tract Society of Pennsylvania diwu akatambula yikumba. Neyi muhana yikumba yenu kulonda yikwasheña chipompelu yikuyileñela mubuleña kufweta nyisonku.

Kwesekeja namwatalisha mazu akwila nawu “kufuukwila chadimu kuhana wukwashu,” iyi yawana yakeñekaña wunakuhana kufuukwila chadimu. Dichi mwatela kwihula ihaku wenu hela antu eluka nsañu janyisonku. Kuhitila mukuzatisha iyi njila yakufuukwila chadimu kuhana wukwashu, antu amavulu anakukwasha nankashi yipompelu yetu ninyidimu yakukwasha antu mukaayi kejima nawa ahanaña musonku wantesha.

Neyi munakukeña kwiluka nsañu jajivulu, munateli kwihula akatilejali, munateli kuyisonekela hela kuyitemeshela nshiña, kuzatisha keyala yidi heshina hela kwihula kasanji kamutayi kamwituña denu.

TREASURY

Watch Tower Bible and Tract Society of Pennsylvania

P.O. Box 33459,

Lusaka 10101

Telefoni: 260 211 272062