KUFUMA MUNKALAÑA JETU

“Kaditala Kami Hikashalileñaku”

HAMPINJI yikwadiña kampeni kazatiluwu mukunyakashana neyi kakundukundu kakushimwina hadi mafuku atanu nawana kadiñileñaku muAugust/September 1929, akwakushimwina akubadika ha 10,000 ajimañenenumu mumaluña amuUnited States. Ahanini nyikanda yayivulu nankashi nitumabukuleti kudi antu. Hadi awa akwakushimwina aWanta hadiña niikombakaji dimu dawa payiniya. Apayiniya avulililuku nankashi! The Bulletin * yatena iwu mudimu nawu “wakadi kumonañahu dehi” nawa nambaala yawapaniya yavulililuku nankashi kutachika mu 1927 nakushika mu 1929

Kunsa yachaaka cha 1929, kwadiña chipupu chaholokeli munsañu jamali mwituña. Hachiyedi October 29, 1929, wuseya wamali waholokeli hamutayi watalaña nsañu jamali waNew York Stock Exchange chaleteli wufwinda weneni munsañu jamali mwituña dejima nawa kwadiña Kukala Kweneni. Mali amanini mumaBanki amavulu. Mafwamu amavulu alekeli kwidisha yakudya. Jifakitoli jamaneni jalekeli kuzatika. Dichi antu amavulu alekeli kuzata muloña nyidimu yamanini. Muchaaka cha 1933, naambala yamatala atambwiluwu hamuloña wakubula kuyifwetela yakandamini hewulu nakushika ha 1,000 hefuku.

Antu adiña mumudimu wampinji yejima atwesheli ñahi kutwalekahu namudimu wawu mukukala kwamuchidiwu? Chuma chimu chayikwashili hikaditala katuñiluwu natufumbu. Chineli kaditala kamuchidiwu kadiña kawana nawa hiyakifweteleleña musonkuku, kaditala katuñiluwu natufumbu hela itemba kakwashileña apayiniya amavulu kuzata mudimu wawu wakushimwina hela adiña namali antesha. * Hampinji yakupompa kwankambi, kaditala katuñiluwu natufumbu akizatishileña neyi kapeka kamuhotela kawana. Mu 1934, Mudimu Wetu waWanta washimwini hakufuukula kwadiñaku kwakutuña kaditala kanyanya ilaña kakawahi mudi menji, sitovu yakutelekelahu, kadidi kakuvuña, niyuma yakuleñela mwitala mubuleña kutuuta.

Akwakushimwina adikita mukaayi kejima atachikili kutuña tumatala twatufumbu. Victor Blackwell, wanukili nindi “Nowa hadiña weluka kutuña watuku, anami nawa nadiñi kanda nituñeñahu dehi tumatala twatufumbu nawa hinelukili chakututuñaku.” Ilaña watwesheli kutuña.

Avery niLovenia Bristow adiña namotoka yidi neyi kaditala. Avery wahosheli nindi, “Kaditala Kami Hikashalileñaku.” Chisaka chawaBristow chadiña nakuzatila hamu mudimu wawupayiniya naHarvery niAnne Conrow, kaditala kawu katufumbu kadiña kakulambwija chiwahi naweñi kujimbañu. Yipapilu yalamikiluwu kujimbañu yalamukileña mpinji yejima yabukileñawu. Avery wanukaña nindi: “Kwosi muntu wamwenuhu itemba damuchidiwuku, nikulelu kwosi wadimonahu dehuku. Ilaña Avery wahosheli nindi chisaka chawaConrow nianyanawu ayedi awamayala “adiña nachisambu.” Harvey Conrow washimwini nindi, “Kwosi chuma chitwakaankililuku, nawa twamweni netu twadiña akiñewa mumudimu waYehova muloña watwakameneneña.” Chimwahitili mpinji antu awana amuchisaka chawaConrow ayili kuShikola yaGileyadi nawa ayitemesheli kuya nakuzatila kuPeru hamu neyi amishonali.

Chisaka chawaBattaino niwena azatilili wupayiniya hamu. Giusto niVincenza chelukiluwu nawu hiyakukeña kwikala avwali abalumwini motoka yawu yeneni Ford yatuñiluwu mu 1929 kwikala itala “damwekeneña  neyi hotela yayiwahi” kubadika mateti muyashakamineña hakusambila. Nihampinji yekaliluwu namwana wamumbanda atwalekeluhu namudimu wawu wakushimwina kudi antu akuItaly ashakamineña muUnited States.

Antu amavulu etejeleña nsañu yayiwahi, ilaña atuzweñi niantu abulileña kuzata hiyatwesheleña kuhana yawana kunyikanda yashindamena haBayiboluku. Ilaña ahanineña yuma yidi yejima yadiñawu nayu. Apayiniya ayedi achindili yuma yakushika ku 64 yashiyashana yayinkeluwu kudi antu adiña nampwila yakudiza. Yuma yatambwiluwu yadiña “neyi ndandanda yayuma yambokamboka yindi musitolu.”

Fred Anderson wadiwanini nandimi wakeñeleña nyikanda yetu, niyena wahanini magilasi akutaña nachu adiñi awamama yindi. Hafamu yikwawu muntu wumu wamwekesheli mpwila yakutaña nyikanda yetu, ilaña wahosheli nindi, “Hinikweti magilasi akutaña nachuku.” Ilaña, chavwaliliyi magilasi ahanini ntuñi nindi watwesheli kutaña chiwahi nyikanda yamwinkeluwu nawa wahanini yawana hanyikanda nimagilasi atambwiliyi.

Herbert Abbott wasendeleña kachikalaña kawatusumbi mumotoka yindi. Welileña chamwinkawu tusumbi tusatu hela tuwana, wayileña nakutulandisha kuchisankanu, ana mali walandileñamu manji amumotoka. “Kuduhu mpinji yitwashakamineña chakadi mali? Eña,” wasonekeli nindi, “chumichi hichatukañesheli kutwalekahu kuzata mudimu wetuku. Chakala neyi manji mumotoka adimomu, twatwalekeleñahu nakushimwina, nakumukuhwelela nikushindamena hadi Yehova.”

Kushindamena hadi Yehova nikutatakena kwakweni kwakwashili antu jindi kutwalekahu muyina yaaka yakala. Hampinji yikwadiña nvula yampepela yeneni aMaxwell niEmmy Lewis cheñi afwilili mukaditala kawu katufumbu chihaholokeleli mutondu nakubaluka hayedi. Maxwell wasonekeli nindi “iku kukala kwamwekeneña kwadiña himaposu hohu nawa hitwatoñojokeluhu jakuleka mudimu wetuku. Nyidimu yakuzata yachidiña yayivulu nawa twafwilileña kuyizata.” Maxwell niEmmy atuñulwili kaditala kawu kahatufumbu chakadi kutiya woma nawa amabwambu jawu ayikwashiluku.

Nimunanu mafukwetu akala, aYinsahu jaYehova amavulu adikita amwekeshaña yililu yoyimu yakudihana. Kufwana apayiniya akushankulu, ninetu tunakufwila kutwalekahu namudimu wakushimwina kushika nimpinji yikahosha Yehova nindi mudimu wunamani.

[Tumazu twaheshina]

[Mwevulu wudi hefu 32]

Kaditala katuñiluwu natufumbu kakeñeleña kujiya mukaloña mumpinji yamayinza kuIndia