Kumukalakela Nzambi Diyi Yitumbu Yindi!

Apayiniya ayedi chayitambikiluwu hetala dimu kuKenya, ahayamini hakumona muntu wanyanya nakami hakadidi. Wadiña watohela chantulu nawa wadiña namakasa amehi. Chamulejeluwu chikaninu chaNzambi chakwila nawu ‘mukwakubalakata wakakiloka neyi nkayi,’ iwu muntu wamwemweteli.—Isa. 35:6.

Awa apayiniya elukili nawu Onesmus wadiña muyaaka yamuma 30, wavwalikili nachikatu chatenañawu nawu osteogenesis imperfecta, hela chikatu chamumafwaha. Mafwaha indi adiña amwovu chakwila neyi mukwata nañovu wukushikena dakukotoka. Chineli kwosi yitumbu yatela kuuka ichi chikatu, Onesmus wukayekelaña hohu nayikatu muchihandilu chidi chejima nikwendela muchitwamu chatufumbu.

Onesmus wetejeli kudiza Bayibolu. Hela chochu, amama yindi amukanishileña kuya kukupompa kwawakwaKristu, atoñojokeleña nawu nateli kudikatisha nawa yikatu yikuswejelaku. Dichi amana kwetu adiña nakumukwatila nsañu yahakupompa, nawa amutwalilileña Onesmus kwitala kulonda yatiyilileñaku. Chadiziliyi hadi tukweji tutanu, Onesmus wafuukwiluhu kuya nakupompa hela chakwila chumichi hichadiña chaswayiku.

Komana kuya kukupompa kwawakwaKristu kwaleñeleli yikatu yaOnesmus kuswejelaku? Kuya kukupompa kwamukwashili chikupu. Onesmus wanukaña nindi: “Hampinji yakupompa hinatiyileña kukataku.” Yuma yayiha yakuhweleleliyi diyamuleñeleleña yatiyeñaku chiwahi. Amama yaOnesmus niwena amweni mwanawu chahimpiliyi nawa azañaleli nankashi chakwila etejeli kudiza Bayibolu. Ahosheli nawu: “Kumukalakela Nzambi diyi yitumbu yamwanami.”

Chimwahitili mpinji yantesha, Onesmus wekalili mukwakushimwina wabula kupapatishewa. Kuhiñahu wapapatisheweli nawa chayinu mpinji nakukalakala neyi nkoñi wakuzatila. Hela chakwila hatweshaña kuzatisha nyendu nichikasa chidi chimuku, Onesmus wafwilaña kuzata hakumina ñovu yindi mumudimu waYehova. Wakeñeleña kuzata wupayiniya wakukwasha ilaña wajinokeleña hakusonekesha. Muloñadi? Muloña welukili nindi chiña kwikala muntu mukwawu wakushinjika chitwamu chindi chatufumbu. Chayilejeliyi akwawu akwaKristu kukala kwindi amulejeli nawu akumukwasha. Mwalala, amukwashili Onesmus kuzata wupayiniya wakukwasha.

Nihampinji yakeñeleñayi Onesmus kuzata wupayiniya wampinji yejima wadiña nakudakamena. Hela chochu, ifuku dimu nsona yefuku yamukolesheli chikupu. Nsona yafumini haMasamu 34:8, hahosha nawu: “Tompenu mutiyi chawahayi Yehova.” Hanyima yakutoñojoka chikupu haniyi nsona, Onesmus wafuukwiluhu kuzata wupayiniya wampinji yejima. Ichi washimwinaña mafuku awana mumulungu nawa wukweti antu amavulu adizishañayi Bayibolu anakwila chachiwahi muchipompelu. Mu 2010, wayili kuShikola yaMudimu wawuPayiniya. Onesmus watiyili kuwaha chikupu hakumona muntu wamushimwinini katachi diwadiña ntañishi yindi kuShikola yaMudimu wawuPayiniya.

Chayinu mpinji anvwali jaOnesmus afwa dehi, ilaña amana kwetu niahela muchipompelu amwakamenaña ifuku niifuku. Wazañalalaña hankisu yejima yinakumonayi makonu nawa nakutalila ifuku ‘dakabula kuhoshayi Mwenimbu nindi Ami nakata.’—Isa. 33:24.