Ovwahilenuña Atubiña Twayehova

‘Ovwahilenu anlomboli jenu nakuyitiyilila, muloña ahembaña nyichima yenu, nawu amba kashimunamu.’—HEB. 13:17.

MUKWAKULA NENUDI?

Indi aeluda amuchipompelu abiñaña ñahi nyikoku yaNzambi?

Muloñadi anyikoku chiyatela kutiyilila atubiña anyanya?

Muloñadi wutwatela kubula kudiwula kufumba kwamuNsona kwawatubiña anyanya hela chakwila hiyawaninaku?

1, 2. Muloñadi Yehova chadesekejelañayi yomweni nakabiña?

 YEHOVA wadesekejaña yomweni nakabiña. (Ezek. 34:11-14) Chumichi chalema muloña chatukwashaña kwiluka chekalayi Yehova. Kabiña wukweti kukeña wahembaña chiwahi mukanka wanyikoku yamukunjikawu. Wayitwalaña kumunyenvu wutuuta nikumenji (Mas. 23:1, 2) wayihembaña nimwaana niwufuku (Luka 2:8); wayihembaña kudi ayisumi (1 Sam. 17:34, 35); wasendaña anyana (Isa. 40:11); ajimbala wayikeñakeñaña nawa wakamenaña chiwahi anyikoku anadikatishi.—Ezek. 34:16.

² Chineli antu jaYehova amavulu akushankulu adimineña nikuhemba yimuna, elukili chikupu kulema kwakumwesekeja Yehova Nzambi nakabiña wukweti kukeña. Elukili nawu anyikoku akeñekaña kuyakamena chiwahi hakwila ahandi. Antu niwena atelela kuyakamena kuspiritu hakwila ahandeña chiwahi. (Maku 6:34) Antu akabakanaña neyi anakuyakamena nikuyilombola chiwahi wanyi kuspiritu. Hiyelukaña yuma yaloña niyatamaku muloña muntu wakuyakamena kwosi nawa apalañanaña neyi “nyikoku yinabuli kabiña.” (1 Anya. 22:17) Ilaña Yehova wayakamenaña chiwahi antu jindi.

3. Yumanyi yitukuhanjekahu muchinu chibaaba?

³ Nimakonu tweluka chamwesekejelañawu Yehova nakabiña. Yehova wuchidi kwakamena antu jindi adi neyi anyikoku. Tukushinshika chakamenañayi nyikoku yindi nikuyinka yuma yakeñañawu makonu. Tukushinshika cheñi anyikoku chiyatela kulondelawu wunlomboli wawuwahi waYehova.

KABIÑA WAMUWAHI WATONDAÑA ATUBIÑA ANYANYA

4. Mudimwinyi wazatañayi Yesu hakwakamena anyikoku yaYehova?

⁴ Yehova wamutonda Yesu kwikala Mutu wachipompelu chawakwaKristu. (Efwes. 1:22, 23) Chineli Yesu  ‘hikabiña wamuwahi,’ wamwekeshaña yililu yaTata yindi yidi neyi kukeña, nimwaya muchima windi. Yesu ‘watulili niwumi windi hanyijimba yawanyikoku.’ (Yow. 10:11, 15) Mulambu wefutu damuloña waKristu waletaña nkisu chikupu hadi antu. (Mat. 20:28) Yehova wakeñaña nindi, “muntu wukumukuhwelela [Yesu] aheti wumi wahaya nyaka, akabuli kunoña.”—Yow. 3:16.

5, 6. (a) Indi Yesu wakunjika anyi mudimu wakwakamena anyikoku jindi, nawa chumanyi chatela kwilawu anyikoku kulonda aheteleñamu? (b) Chumanyi chatela kutuleñela kwovwahila aeluda amuchipompelu?

⁵ Indi anyikoku amwekeshaña ñahi nawu Kabiña Wamuwahi, Yesu Kristu diyi kabiña wawu? Yesu wahosheli nindi, “Anyikoku ami atiyaña izu dami, ami nayiluka, niwena anlondaña.” (Yow. 10:27) Kutiya izu daKabiña Wamuwahi chalumbuluka kulondela wunlomboli windi muyuma yejima. Kushilahu nikutiyilila atubiña anyanya akuspiritu atondayi. Yesu washimwini nindi apostolu indi akatwalekahu kuzata mudimu watachikiliyi. Adiña namudimu ‘wakutañisha nikudiisha anyana kanyikoku aYesu.’ (Mat. 28:20; tañenu Yowanu 21:15-17.) Chelili nsañu yayiwahi yitandi niatumbanji avuli, Yesu watondeli akwaKristu apama kulonda abiñeña yipompelu.—Efwes. 4:11, 12.

⁶ Chahosheleñayi nawaeluda amuchipompelu chamuyaaka nkulakaji yakusambila muEfwesesa, kapostolu Pawulu washimwini nindi spiritu yajila yatondeli aeluda kulonda ‘abiñeña chipompelu chaNzambi.’ (Yil. 20:28) Dichi chuma chatela kwilawu niaeluda akwaKristu makonu, muloña niwena ayitonda kwesekeja nayuma yamuNsona yakeñekaña yonenawu naspiritu yajila. Dichi neyi twovwahila aeluda akwaKristu tukumwekesha netu twovwahilaña Yehova niYesu, atubiña amaneni ayedi. (Luka 10:16) Dichi chuma chatuleñelaña chikupu kwovwahila aeluda. Hela chochu, kwekala cheñi yuma yikwawu yatuleñelaña tuyovwahileña.

7. Indi aeluda ayikwashaña ñahi kutwalekahu kwikala nawulunda wawuwahi naYehova?

⁷ Neyi anakukolesha hela kufumba akwawu akwakwitiya, aeluda azatishaña Nsona chili yishina yashindamena haNsona. Hiyafwilaña kukakeja anakwawu chatela kuhandawu neyi anakuhana wunlomboli wamuchidiwuku. (2 Kor. 1:24) Ilaña akeñaña kuyileja akwawu akwaKristu nshimbi jamuNsona jatela kuyikwasha kufuukulahu chiwahi, kwila yuma munjila yatelela nikwikala nakuwunda muchipompelu. (1 Kor. 14:33, 40) Aeluda ‘ahembaña nyichima’ munjila yakwila nawu afwilaña kukwasha antu ejima amuchipompelu kwikala nawulunda wawuwahi naYehova. Dichi anyakalaña kukwashana neyi amona nawu mana kwetu hela muhela keña yavulumuni hela neyi “navulumuni” dehi. (Ŋal. 6:1, 2; Yuda 22) Komana iyi hinyiloña yayiwahi yitwatelela ‘kwovwahila anlomboli jetuku’?—Tañenu Aheberu 13:17.

8. Indi aeluda akiñaña ñahi anyikoku yaNzambi?

⁸ Kapostolu Pawulu, kabiña wapama kuspiritu wasonekeleli ana kwindi amuchipompelu chaKolosi nindi: “Babalenu hakenda kamwekana muntu wukuyipupa namaanindi namakasu amukunkulwayi, mwaya yaaku yawantu, mwaya yuma yampata yamunu mwishina yakuhemesha, himwaya Kristuku.” (Kol. 2:8) Iku kusoñamisha kwamwekeshaña muloña wukwawu wutwatelela kutiyilila kufumba kwamuNsona kwawaeluda. Akiñaña anyikoku kuhitila mukuyisoñamisha ana kwawu kulonda eluki antu ejima afwilaña kuyizeyesha. Kapostolu Petulu watusoñamishili nindi kwakenza “atuprofwetu akutwamba” ‘niantañishi akutwamba’ akafwilaña ‘kukokola  antu azeya munyichima’ kulonda eleña yuma yatama. (2 Pet. 2:1, 14) Aeluda amakonu atela kusoñamisha ana kwawu munjila yoyimu neyi chinatwesheki. Chineli hiyakwaKristu apama, eluka yuma yayivulu. Cheñi nawa, henohu kanda ayitondi amwekesheli nawu eluka Nsona nawa adiña ashikahu kutañisha yuma yaloña. (1 Tim. 3:2; Tit. 1:9) Chineli apama nawa akweti maana ashindamena muBayibolu, chumichi chayikwashaña kufumba chiwahi nyikoku.

KABIÑA WAMUWAHI WADIISHAÑA NIKUKIÑA ANYIKOKU JINDI

9. Indi Yesu walombolaña nikudiisha chipompelu chawakwaKristu munjilanyi?

⁹ Yehova wazatishaña kuloñesha kwindi hakuhana yakudya yayivulu yakuspiritu kudi ana kwetu mukaayi kejima. Twatambwilaña kufumba kwakuvulu kwamuNsona munyikanda yetu. Kubombelahu, mpinji yikwawu kuloñesha kwetu kwahanaña nshimbi kudi aeluda amuyipompelu kuzatisha nyikanda hela kuhitila muwunlomboli wayilejañawu kudi ankoñi endaña. Anyikoku atambwilaña nshimbi yatiyakana muniyi njila.

10. Nyidimwinyi yikwetuwu atubiña akwaKristu hadi antu anafumi hamukanka wawanyikoku?

¹⁰ Atubiña akamenaña ekala namudimu wakukiña nikuhemba nyikoku. Aeluda akwaKristu ataña maana chikupu kudi antu anazeyi muchikuhwelelu hela anavulumuni chikupu. (Tañenu Yakoba 5:14, 15.) Hadaha amakwawu hakachi kawu anafumi hamukanka wawanyikoku nawa  analeki kuzata nyidimu yawakwaKristu. Neyi kudi antu amuchidiwu, komana eluda wakamenaña hatela kuzata nañovu yindi yejima kulonda yawani mukoku wunajimbali nakumukolesha kulonda yafunti kwiyinda, dikwila nawu, kuchipompeluku? Eñañi watela kwila mwenimu. Yesu walumbulwili nindi: “Dichi muchima waTata yenu wudi mwiwulu hanakeñi mwana wanyanya wudi neyi iwu kunoñaku.”—Mat. 18:12-14.

TWATELA KUMONAÑA ÑAHI YILUWA YAWATUBIÑA ANYANYA?

11. Muloñadi antu amakwawu chichayikalilaña kwovwahila wunlomboli wawaeluda?

¹¹ Yehova niYesu diwu atubiña awanina. Antu ekala atubiña anyanya enkawu mudimu wakuhemba yipompelu hiyawaninaku. Ichi chinateli kuyikalila antu amakwawu kwovwahila wunlomboli wawaeluda. Muloña antu amuchidiwu anateli kuhosha nawu: ‘Niwena hiyawaninaku neyi etu. Muloñadi chitunateli kwovwahila mwatufumbañawu?’ Mwalala aeluda hiyawaninaku. Hela chochu, bayi tuswejaña kushinshika hakubula kuwanina niyiluwa yawuku.

12, 13. (a) Tunateli kuhosha netudi kutalisha hayiluwa yakoñeluwu antu amakwawu azatishiliyi Yehova munyidimu yalema? (b) Muloñadi yiluwa yakoñeliwu antu enkeluwu nyidimu yalema chayisonekelawu muBayibolu?

¹² Nsona yashimunaña hatooka yiluwa yawantu azatishileñayi Yehova hakulombola antu jindi kunyima. Chakutalilahu, Davidi amuwayishili kwikala mwanta nawa nlomboli yawaIsarela. Wavulumwini nakwila muloña wawuvumbi nikujahana. (2 Sam. 12:7-9) Toñojokenu cheñi hadi kapostolu Petulu. Hela chakwila amwinkeli nyidimu yalema muchipompelu chawakwaKristu chamuyaaka nkulakaji yakusambila, wakoñeli yiluwa yamaneni. (Mat. 16:18, 19; Yow. 13:38; 18:27; Ŋal. 2:11-14) Kufuma hampinji yavulumwini Adama naEvu kwosi antu awanina, Yesu hohu diyi wawanina.

¹³ Muloñadi Yehova chetejeleliyi ansoneki aBayibolu asoneki niyiluwa yawantu enkeliyi nyidimu? Nzambi welili mwenimu kulonda yamwekeshi nindi nateli kuzatisha antu abula kuwanina hakulombola antu jindi. Nawa mpinji yejima wayizatishaña. Dichi, makonu bayi tutobaña hela kudiwula wunlomboli wawu hamuloña wakwila antu anakutulombola aluwañeshaña. Yehova wakeñaña nindi tulemesheña amana kwetu anakutulombola nikuyovwahila.—Tañenu Kwidika 16:2, 8.

14, 15. Yumanyi yitwadizilañaku kudi Yehova munjila yahaninineñamu nshimbi kudi antu jindi kumpinji yakunyima?

¹⁴ Kwovwahila antu anakutulombola makonu kwalema. Toñojokenu Yehova chahosheliyi nawantu jindi hampinji yakala kumafuku akunyima. A Isarela chafuminuwu muEjipitu wakushankulu, Nzambi wayinkeli nshimbi kuhitila mudi Mosi niAroni. Hakwila nawu apuluki chipupu chamwikumi, Isarela ateleleli kwovwahila nshimbi yayilejeluwu yakudya chawija chalema nikusampwila mashi amukoku wajahiluwu kuyipamba nihachipamba chahewulu damatalawu. Iyi nshimbi hiyenjili nezu dakufuma mwiwuluku. Ilaña ateleleli kutiyilila kudi akulumpi amuIsarela, atambwilili nshimbi kufuma kudi Mosi. (Kwid. 12:1-7, 21-23, 29) Muniyi njila, Mosi niakulumpi amakwawu diwu adiña akwakutambwila nshimbi jaYehova nakulejamu antu. Eluda akwaKristu niwena azataña mudimu wowumu walema makonu.

¹⁵ Hadaha munateli kutoñojoka hampinji yashiyashana yakunyima hazatishiliyi Yehova antu hela añelu kulonda yaleji antu jindi nshimbi. Muyuma yejimiyi, Nzambi wamweni nindi chachiwahi kwinka antu nyidimu. Antemesha jindi ahosheleleña  mwijina dindi nawa alejeli antu jindi yuma yateleli kwilawu kulonda ahandi mumpinji yakukala. Komana hitunateli kutoñojoka netu Yehova wakela chuma chochimu haAmagedonuku? Eñañi, makonu aeluda enkawu mudimu wakumwimenaku Yehova hela kwimenaku kuloñesha kwindi atela kwikala ababala kuchina kuzatisha ñovu yayinkawu munjila yaheña.

“MUKANKA WUMU NIKABIÑA WUMU”

16. Twatela kutiyilila ‘kwizwinyi’?

¹⁶ Antu jaYehova ekala “mukanka wumu nikabiña wumu,” Yesu Kristu. (Yow. 10:16) Yesu wahosheli nindi wukekala nawatumbanji twindi “mafuku ejima nikwakakumina nyaka.” (Mat. 28:20) Chineli hiMwanta wamwiwulu nakulombola yuma yejima yikaleta wunsompeshi wakujilumuna kaayi kaSatana. Hakwila nawu tutwalekuhu kwikala anuñañana nawa akiñewa hamukanka wawanyikoku yaNzambi, twatela kutiyilila ‘izu kunyima yetu’ datulejaña njila mutwatela kuya. Idi “izu” dinabombelumu nimazu ahosha spiritu yaNzambi yajila asonekawu muBayibolu nimazu ahoshaña Yehova niYesu kuhitila mudi antu atondawu atubiña anyanya.—Tañenu Isaya 30:21; Chimwekeshu 3:22.

17, 18. (a) Indi anyikoku jaNzambi adi mukukalanyi, nawa chumanyi chitwatela kukuhwelela? (b) Muchibaaba chikalondela tukahanjeka hachumanyi?

¹⁷ Satana amushimuna nawu wudi nakuya nakutambatamba “nakukeñekeña akudyayi, neyi mutupa wabulumaña.” (1 Pet. 5:8) Kufwana chisumi wamwisaña wazuwa, Satana nakweba nyikoku, nakuyibelamena kulonda yakwata wazeya hela wunajimbali. Iwu dimuloña wutwatela kukundamina kwakwihi namukanka wawanyikoku nikudi ‘kabiña, mukwakuhemba wumi wetu.’ (1 Pet. 2:25) Kutalisha hadi antu akapuluka halukadi lwasweja, nsona yaChimwekeshu 7:17 yahosha nawu: “Kana kamukoku [Yesu] . . . , wakekala kabiña kawu, wakayilombolaña kutuseloki twamenji awumi; Nzambi wakakombola madilu ejima kumesu awu.” Komana kudihu chikaninu chachiwahi chakubadika ichi?

¹⁸ Chitunadizi mudimu walema wazatañawu aeluda akwaKristu hamu neyi atubiña anyanya, twatela kudihula netu, Awa amayala atondawu anateli kuhemba ñahi nyikoku yaYesu munjila yayiwahi? Tukahanjeka hañakwilu muchibaaba chinalondeluhu.

[Malwihu aKuzatisha haKudiza]

[Mwevulu wudi hefu 23]

Neyi chochakiñañayi kabiña nyikoku yindi, aeluda akiñaña nyikoku yayinkawu kuhemba (Talenu parakalafu 8)

[Mwevulu wudi hefu 25]

Aeluda afwilaña kukiña yisaka yawanvwali ajiki kulonda yibuleña kudikunda nawantu atama (Talenu maparakalafu 17, 18)