Tunateli ‘Kuchiñilila Ñahi Nzambi Yawamwinu Wetu’

‘Nukuchiñilila Nzambi yawamwinu wami.’—MIKA 7:7.

MUKWAKULA NENUDI?

Tunateli kudizila kwodi kudi Mika?

Tunakuchiñilila kumona yumanyi?

Njilanyi jitunateli kumwekeshelamu netu twahamekaña hakudiwunjika kwaYehova?

1. Chumanyi chinateli kutuleñela tuleki kuchiñilila?

 WANTA waMesiya chiwatachikili kuyuula mu 1914, kaayi kaSatana kekalili mumafuku akukuminina. Hamuloña wanjita yavulumukili mwiwulu, Yesu wamunatili Diyabolu niandemoni jindi hamaseki. (Tañenu Chimwekeshu 12:7-9.) Satana neluki nindi nashali ‘nampinji yantesha hohu.’ (Chim. 12:12) Hela chochu, iyi “mpinji” yinatwalekuhu hadi yaaka yayivulu, nawa antu amakwawu anateli kutoñojoka nawu mafuku akukuminina anasweji kushimbula. Chitunakuchiñilila netu Yehova yajilumuni kanu kaayi, komana tunakutoñojoka netu Nzambi nalabi?

2. Yumanyi yitukudiza muchinu chibaaba?

² Kubula kuchiñilila kwafwana, muloña kunateli kutuleñela twileña yuma mukunyakashana. Tunateli kuchiñilila ñahi Nzambi yawamwinu wetu? Chinu chibaaba chikutukwasha kulonda tuchiñilileña kuhitila mukwakula awa malwihu. (1) Tunateli kudizilaku chumanyi kudi kaprofwetu Mika wadiña nakuchiñilila? (2) Yumanyi yikamwekesha kukuma kwampinji yetu yakuchiñilila? (3) Tunateli kumusakilila ñahi Yehova hakwikala wadiwunjika?

YUMANYI YITUNATELI KUDIZILA KUCHAKUTALILAHU CHAMIKA?

3. Kukalanyi kwadiña muIsarela mumpinji yaMika?

³ Tañenu Mika 7:2-6. Mika kaprofwetu kaYehova wamweni aIsarela chabuliluwu kwikala ashinshika nawa akoñeleña yuma yatama chikupu muchiyuulu chaMwanta watama Ahazi. Mika wesekejeli aIsarela abulili chikuhwelelu ‘nachikwata’ hela “ikoli danyiña.” Neyi muntu yahita kukamwihi nachikwata dikwila nawu mutondu wanyiña hela ikoli danyiña nateli kudikatisha, chochimu aIsarela atama adiña nakukabisha akwawu adikundileñawu nawu. Kutama kwaswejeli nankashi chakwila niyisaka yambokelelumu. Hamuloña wakwila welukili  nindi hadiña nañovu yakuhimpa yuma yatama yamwekeneñaku, Mika walombeli kudi Yehova. Kuhiñahu wamuchiñililili Nzambi kulonda yamwamwini. Mika welukili chikupu nindi Yehova wakamanisha kukala hampinji Yindi yatelela.

4. Kukalanyi Kutwamonaña?

⁴ Anetu tunakushakama hamu nawantu adikeña, neyi chichadiña mumpinji yaMika. Antu amavulu ‘asakililaña wanyi, ajila wanyi, hiyakeñañana mwasemwakenawuku.’ (2 Tim. 3:2, 3) Twaneñaña neyi akwetu itwazataña nawu, akashikola, niantuñinetu neyi amwekesha muchima wakudikeña. Hela chochu, ambuña aNzambi amakwawu amonaña kukala kweneni. Yesu wahosheli nindi, atumbanji twindi akayidimbulula kudi yisaka yawu nawa wahosheli mazu adifwana namazu asonekawu haMika 7:6 hakulumbulula yuma yikafuma mumazu ahosheliyi. Yesu nindi: “Nenzi nakwambula iyala natata yindi, mwana wamumbanda namama yindi, nimuku windi wamumbanda namuku windi wamumbanda. Akwankunyi namuntu akekala wowu amwitala dindi yomweni.” (Mat. 10:35, 36) Chakala nankashi kuumika neyi antaña abula kwitiya anakutudimbulula. Neyi tunaholokeli mukweseka kwamuchidi iwu, bayi tuhuñumuka hamuloña wekakeja dawantaña jetuku. Ilaña, tutwalekuhu kwikala ashinshika nakuchiñilila Yehova kulonda yakamanishi kukala. Neyi tutwalekahu kulomba netu yatukwashi, wukutwinka ñovu nimaana akeñekaña hakwila tuumiki.

5, 6. Yehova wamukiswilili ñahi Mika, nawa yumanyi yabulili kumonayi Mika?

⁵ Yehova wamukiswilili Mika wadiwunjikili. Mika wamweni chamujahiluwu Mwanta Ahazi nichamanini chiyuulu chindi. Wamweni mwana kaAhazi, Mwanta wamuwahi Hezekiya, chaswaniniyi hetanda nakutachika cheñi kudifukula kwalala. Nawa wamweni chashikijeweli mazu awunsompeshi waYehova kutalisha hadi Samariya ahosheliyi kuhitila mudi Mika hampinji yalukukiluwu Ashuri wanta wakukabeta kaluwunda wawaIsarela.—Mika 1:6.

⁶ Hela chochu, Mika hamweni kushikijewa kwayuma yejima yamonenenuwu kuprofweta kudi Yehovaku. Chakutalilahu, Mika wasonekeli nindi: “Hamafuku akukuminina antu amba kamona mpidi yetala daYehova yinashimati dehi hewulu damapidi, yakasompoka mpidi janyanya; kwakahwila nyunza yawantu. Nyunza yayivulu yakaya nakuhosha nawu, Tuyenu, twakakanduki kumpidi yaYehova, nikwitala daNzambi yaYakoba; akatuleji mwaya yaaku yindi kulonda twakendaña munjila jindi. MuZiyona mwakafuma nshimbi, kuYerusalema kwakafuma izu daYehova.” (Mika 4:1, 2) Mika wafwili henohu iwu wuprofwetu kanda wushikijewi. Hela chochu, wafwilileña kutwalekahu washinshika kudi Yehova kushika nikukufwa, hela chakwila antu amakwawu akoñeleña yuma yambukaku. Dichaleñeleli Mika kusoneka nindi: “Muloña nyuza yawantu yejima yakenda, iwu mwijina damukishi wawu, iwu mwijina damukishi wawu, hakwila etu twakendaña mwijina daYehova Nzambi yetu chahaya nyaka nanyaka.” (Mika 4:5) Mika wadiña wadiwunjika nakuchiñilila hampinji yakala muloña wakuhweleleli chikupu nindi Yehova wukashikija yikaninu yindi yejima. Iwu kaprofwetu washinshika wamukuhweleleli Yehova.

7, 8. (a) Yumanyi yinakutuleñela tumukuhweleli Yehova? (b) Yumanyi yinateli kuleñela mpinji yimani swayi?

⁷ Komana ninetu dichi chitwamukuhwelela Yehova? Kudi yuma yayivulu yatuleñelaña kumukuhwelela. Tunadimweni chinakushikijewa wuprofwetu waMika. “Hamafuku akukuminina,” antu amavulu akunyunza yejima niakunyichidi yejima nikumadimi ejima anakuhwila ‘kumpidi yetala daYehova.’ Hela chakwila afuma kunyunza yadihela, awa akwakudifukula achila ‘mpoku jawu jatubali nakwikala matemwa,’ nawa akaanaña ‘kudiza cheñi njita.’ (Mika 4:3) Tukweti kukoleka chikupu kwakwikala hakachi kawantu jaYehova awunda.

⁸ Kafwampi, tunakukeña netu Yehova  yanyakali kufumishahu kanu kaayi katama. Hela chochu, neyi tunakukeña kuchiñilila mumesu awunda, twatela tumoneña yuma neyi chayimonañayi Yehova. Watoñola dehi ifuku damba kasompeshayi antu “neyala anafuukuliyi dehi,” Yesu Kristu. (Yil. 17:31) Ilaña henohu idi ifuku kanda dishiki, Nzambi nakuyinka antu ejima kukooleka kwakwiluka nsañu yalala’ kulonda akapuluki. Mawumi awantu alema adi muwumbanji (Tañenu 1 Timotewu 2:3, 4.) Neyi tunakudikita nañovu nakukwasha antu eluki chalala hadi Nzambi, mpinji yinashaluku hakwila Yehova yaleti wunsompeshi windi hiyikushimbulaku. Katataka hela netu neyi mukulabula kwadisu, mpinji keña yimani. Mpinji chiyakamana, twakazañalala hamuloña wakwila twadiña nakudikita mumudimu wakushimwina Wanta.

YUMANYI YIKAMWEKESHA KUKUMA KWAKUCHIÑILILA KWETU?

9-11. Komana nsona ya 1 Atesalonika 5:3 yashikijewa dehi? Lumbululenu.

⁹ Tañenu 1 Atesalonika 5:1-3. Kumbidi, nyunza yikahosha nawu ‘Kwamwena, kwanzo-o!’ Neyi tunakukeña netu akabuli kutukasumwisha hampinji yakabidikawu awa mazu, twatela kwikala ‘atona nakubabala.’ (1 Tesa. 5:6) Hakwila twikali atona kuspiritu, tuhanjekenu chantesha hayuma yikamwekana yikaleñela akabidiki iku kubidika kwalema.

¹⁰ Hanyima yanjita yamukaayi yatachi niyamuchiyedi, nyunza yabidikili nawu kwamwena. Chamanini njita yatachi yamukaayi, atuñili mutayi waLeague of Nations wakuhweleleluwu antu nawu wukaleta kuwunda. Chimwahitili mpinji, hakumana kwanjita yamukaayi yamuchiyedi, antu akinkili manuñu mumutayi waUnited Nations nawu wukaleta kuwunda hamaseki. Akulumpi janfulumendi niamumachechi ashindamena haniyi nyitayi nawu yikaleñela antu akashakami mukuwunda. Chakutalilahu, mu 1986, mutayi waUnited Nations washimwini nawu ichi chadiña hiChaaka Chakuleta Kuwunda kwaMukaayi kejima. Muchaaka chenichi, anlomboli amunyunza yayivulu niamumachechi adibombeli hamu naChechi yaKatolika muAssisi, kuItaly, nakulomba nawu kwikali kuwunda.

 ¹¹ Hela chochu, iku kubidika kwakwila nawu kwamwena kwanzo-o nikubidika kukwawu kudi neyi iku kwashikija wanyi wuprofwetu wasonekawu ha 1 Atesalonika 5:3. Muloñadi? Muloña ‘kujilumuka kwakukasumwisha’ kwashimwineñawu dehi kanda kumwekani.

12. Yumanyi yitweluka kutalisha hakubidika kwakwila nawu ‘Kwamwena, kwanzo-o’?

¹² Hinyi wamba kabidika iku kubidika kwakwila nawu ‘Kwamwena, kwanzo-o’? Mudimwinyi wakazatawu anlomboli amuKristendomu niamukwitiya kukwawu? Indi nfulumendi jashiyashana jakadibombamu ñahi muniku kubidika? Nsona yatulejaña wanyi. Tweluka netu hela chakwila akabidika chamuchidinyi hela chatiyakana chikupu, hikwakekala kuwunda kwalalaku. Satana diyi wunakulombola kanu kaayi katama. Kanu kaayi katama nawa kanakutwalekahu nakutaminaku. Chikwikala chawushona neyi antu amakwawu hakachi ketu akuhwelela awa mazu akutwamba aSatana nikudiñija munsañu jamatuña nachiyuulu.

13. Muloñadi añelu chiyakwatilawu mpepela yakujilumuna?

¹³ Tañenu Chimwekeshu 7:1-4. Hampinji yitunakuchiñilila kushikijewa kwansona ya 1 Atesalonika 5:3, añelu asweja ñovu anakukwata mpepela yalukadi lwasweja lwakujilumuna. Chumanyi chinakuchiñililawu? Kapostolu Yowanu washimuna chuma chimu cheneni, chakulamika awayishewa “ambuña Nzambi yetu.” * Chakamanishawu kulamika kwakukumishaku, añelu akaleka kukwata mpepela yakujilumuna. Chumanyi chikamwekana?

14. Chumanyi chinakumwekesha nawu kujilumuka kwaBabiloni Muneni kudi mukamwihi?

¹⁴ Babiloni Muneni wanta wakaayi wakwitiya kwakutwamba akamujilumuna. ‘Antu amumatuña, mazaza, nyunza, niakwamadimi’ hiyakatwesha kumukwashaku. Chayinu mpinji tunakumona yinjikijilu yinakumwesha nawu kujilumuka kwindi kudi mukamwihi. (Chim. 16:12; 17:15-18; 18:7, 8, 21) Tunakumona chinakukañanyawu kumukwasha nichinakumusawulawu munsañu yahayikuzulemba, kwitiya kwakutwamba nianlomboli jawu anakumuhoshola chikupu. Hela chochu, anlomboli jaBabiloni Muneni amonaña nawu hiyadi muwubanjuku. Anakudidimba chikupu. Hanyima yakubidika nawu ‘Kwamwena, kwanzo-o!’ akwansañu jamatuña nachiyuulu amukaayi kaSatana akalukuka kwitiya kwakutwamba mukukasumwisha nakumujilumuna. Babiloni Muneni hamba kamwekana cheñiku. Komana chalema kudiwunjika nakuchiñilila chikamwekana iyi yuma yalema.—Chim. 18:8, 10.

TUNATELI KUMWEKESHA ÑAHI NETU TWAHAMEKAÑA HAKUDIWUNJIKA KWANZAMBI?

15. Muloñadi Yehova chinabuliliyi kujilumuna antu atama swayi?

¹⁵ Hela chakwila, antu anakusawula ijina dindi, Yehova wadiwunjika nakuchiñilila mpinji yatelela kulonda akayijilumuni. Yehova hanakukeña kujilumuna antu ovwahilaku. (2 Pet. 3:9, 10) Komana ninetu dichi chitwakeñaña? Henohu ifuku daYehova kanda dishiki tunateli kumwekesha netu twamuhamekaña hakudiwunjika kwindi muniji njila jidi heshina.

16, 17. (a) Muloñadi wutwatela kukwashila antu anafunti hanyima munyidimu yakuspiritu? (b) Muloñadi antu anafunti hanyima munyidimu yakuspiritu chiyatela kunyakala kufunta kudi Yehova?

¹⁶ Kwashenu antu anafunti hanyima munyidimu yakuspiritu. Yesu wahosheli nindi mwiwulu mwekalaña muzañalu neyi mukoku wumu wajimbeli yamwekana. (Mat. 18:14; Luka 15:3-7) Mwamweni, Yehova wakamenaña chikupu antu ejima akeña ijina dindi, hela chakwila hiyanakumuzatila nañovu chayinu mpinjuku. Neyi tuyikwasha antu wenawa kufunta muchipompelu, tukumuzañalesha Yehova niañelu.

 ¹⁷ Komana mudi hakachi kawantu anakubula kumukalakela Nzambi chikupu? Hadaha kudi muntu wamuchipompelu wayineñesheli nawa mwalekeli nikudikunda nakuloñesha kwaYehova. Chineli hanahiti dehi mpinji, dihulenu nenu: ‘Komana inakushakama chachiwahi nawa nidi namuzañalu? Yehova diyi waneñesheli tahindi muntu wabula kuwanina? Komana Yehova Nzambi wakoñahu dehi chuma chankuneñesha?’ Chakadi nikujina, mpinji yejima watwinkaña yuma yayiwahi. Hela chakwila hitunakukoña yuma yitwamukanini hakudihana kudi yenaku, watwinkaña yuma yayiwahi yitwadiluñishaña. (Yak. 1:16, 17) Ifuku daYehova keña dishiki. Yinu diyi mpinji yakufunta kudi Tata yetu wamwiwulu wukweti kukeña nikuchipompelu, dimu twawanaña kukiñewa kwalala munanu mafuku akukuminina.—Kuhit. 33:27; Heb. 10:24, 25.

18. Muloñadi wutwatela kuzatila hamu nawantu anakulombola?

¹⁸ Zatilenu hamu nakashinshi nawaeluda. Hamu neyi kabiña wamuwahi, Yehova watulombolaña nikutukiña. Watonda Mwanindi kwikala Kambiña Muneni wamukanka wawanyikoku. (1 Pet. 5:4) Aeluda muyipompelu yakubadika 100,000 abiñaña nyikoku yaNzambi hamuntu hamuntu. (Yil. 20:28) Neyi tuzatilaña hamu namuchima wumu nawantu enkawu mudimu wakulombola, dikwila nawu tunakumuhameka Yehova niYesu hayuma yejima yatukoñelañawu.

19. Tunateli kudikunda ñahi wumu namukwawu?

¹⁹ Dikundenu wumu namukwawu. Ichi chatalisha mudihi? Neyi amashidika akuluka yitembi ayilukuka kudi chilumbu, amashidika amakwawu aswinaña kwakwihi nawakwawu, dikwila nawu adikundaña wumu namukwawu. Dichi atuñaña ikoli dakola chikupu. Satana nakusweja kulukuka antu jaNzambi. Ayinu bayi neyi himpinji yakulwa mulwetuku. Yinu himpinji yakudikunda wumu namukwawu, kudiwula yiluwa yawakwetu, nikukuhwelela wunlomboli waYehova.

20. Chumanyi chitwatela kwila chayinu mpinji?

²⁰ Dichi wejima wetu tutwalekuhu kwikala akola kuspiritu nikumuchiñilila Nzambi yetu. Tudiwunjikenu nakuchiñilila kubidika kwakwila nawu ‘Kwamwena, kwanzo-o!’ nikulamika kwakukumisha kwawantu atondawu. Kuhiñahu, añelu awana akaleka kukwata mpepela yakujilumuna, nawa Babiloni Muneni akamujilumuna. Hampinji yitunakuchiñilila iyi yuma yalema yikamwekana, twatela kwovwahila wunlomboli wawantu enkawu mudimu wakulombola mukuloñesha kwaYehova. Twatela kudikaña chikupu naDiyabolu niandemoni. Ayinu diyi mpinji yakutiyilila kusoñamisha kwañimbi yamasamu kwakwila nawu: “Dikoleshenu, dikwatishenu munyichima yenu, Enu ejima mwamuchiñejaña Yehova.”—Mas. 31:24.

[Tumazu twaheshina]

[Malwihu aKuzatisha haKudiza]

[Nyevulu yidi hefu 12]

Antu jaYehova azataña nañovu hakukwasha antu anafunti hanyima munyidimu yakuspiritu kulonda afunti kudi Yehova (Talenu maparakalafu 16, 17)

[Mwevulu wudi hefu 14]

Ayinu diyi mpinji yakudikaña naSatana niandemoni (Talenu parakalafu 19)