Bayi “Munyakala Kujinoka Muyitoñojoka Yenuku”

“Enu ana kwetu, . . . tunalembi netu bayi munyakala kujinoka muyitoñojoka yenuku.”—2 TESA. 2:1, 2.

YIKUMA YAKUTOÑOJOKAHU

Kusoñamishanyi kwahampinji yatelela kwekala munyikanda yasonekeliyi Pawulu kudi Atesalonika?

Yumanyi yinateli kutukwasha kulonda abuleña kutudimba?

Kushimwina neyena mumudimu waWanta kwatukiñaña ñahi?

1, 2. Muloñadi makudi chinaswejuwu makonu, nawa anakuyitandisha munjilanyi? (Talenu mwevulu wakutachikilahu.)

 TUFUTA nimakudi hiyuma yinasweji kutanda makonu mukaayi. Chumichi hichatela kutuhayamishaku. Bayibolu yashimuna hatooka to-o nawu Satana Diyabolu hisakutwamba nawa diyi wunakuyuula kanu kaayi. (1 Tim. 2:14; 1 Yow. 5:19) Chineli kanu kaayi kadi kwakwihi nakukuma, Satana wudi nandombu yayeni muloña neluki nindi ‘nashali nakapinji kantesha hohu.’ (Chim. 12:12) Dichi antu ayuulañawu kudi Diyabolu akuswejaña kutwamba, sweje-e kutwambila antu ekala mukudifukula kwalala.

² Mpinji yikwawu yikuzulemba yayitwambilaña ambuña Yehova chikupu niyuma yakuhwelelawu. Nyitu yansañu yamuyipapilu, nsañu yahayisanji yanyivwimbimbi niyahaIntaneti yatandishaña nsañu yakutwamba. Nsañu yamuchidiwu yaluwañeshaña antu amavulu nawa ayitejaña.

3. Yumanyi yinateli kutukwasha kulonda abuli kudimba nansañu yamakudi?

³ Hakwila tufuñununi aka kafuta kanakuzatishayi chilumbu chetu, tukweti Izu daNzambi, ‘dawaha . . . kwolola nachu.’ (2 Tim. 3:16) Twatela kudizila kumazu akapostolu Pawulu asonekeleliyi akwaKristu amuyaaka nkulakaji yakusambila muTesalonika adimbiluwu nakwiteja nsañu yamakudi. Wayikonkomweneni nindi bayi ‘anyakala kujinoka muyitoñojoka yawuku.’ (2 Tesa. 2:1, 2) Yumanyi yitunateli kudizila kukufumba kwakuwahi kwaPawulu nawa tunateli kuzatisha ñahi iku kufumba muchihandilu chetu?

 KUSOÑAMISHA KWAHAMPINJI YATELELA

4. AkwaKristu amuTesalonika ayisoñamishili ñahi hansañu yakwinza ‘kwefuku daYehova,’ indi etu makonu anakutusoñamisha ñahi?

⁴ Mumukanda windi watachi wasonekeleliyi chipompelu chakuTesalonika, Pawulu wayanukishili nindi ‘ifuku daYehova’ dinakwinza. Hakeñeleña amana kwindi ekali mumwidima hela akadi kudiloñeshaku. Ilaña, wayikonkomweneni neyi ‘akwachejeji’ kulonda ekali ‘atona nakubabala.’ (Tañenu 1 Atesalonika 5:1-6.) Makonu, tunakuchiñilila kujilumuka kwaBabiloni Muneni, wanta wakaayi wansakililu yakutwamba. Ichi dichakatachika ifuku deneni daYehova. Nawa Yehova watulejaña chamba kashikijayi nkeñelu yindi. Cheñi nawa, muchipompelu atusoñamishaña mpinji yejima kulonda twikala asoñama. Neyi tukwovwahilaña nsañu yatulejañawu mpinji yejima tukutwalekahu kumukalakela Nzambi ‘mudimu wajila nañovu yetu yakutoñojoka.’—Rom. 12:1.

5, 6. (a) Mumukanda wamuchiyedi wasonekeleliyi Atesalonika, Pawulu watenenidi? (b) Nzambi keña yelidi kuhitila mudi Yesu, nawa twatela kudihula netudi?

⁵ Chayisonekeleliyi akwaKristu amuTesalonika mukanda watachi, Pawulu wayisonekeleli cheñi wamuchiyedi. Muniwu mukanda wateneni lukadi lwakenza hampinji yakayisompeshayi Mwanta Yesu ‘antu abula kumwiluka Nzambi niabulaña kwovwahila nsañu yayiwahi.’ (2 Tesa. 1:6-8) Mazu adi mukapetulu 2 kaniwu mukanda ashimunaña nawu antu amakwawu muchina chipompelu ‘azañaleli’ chelukiluwu nawu ifuku daYehova didi kwakwihi. (Tañenu 2 Atesalonika 2:1, 2.) Awa akwaKristu akusambila hiyelukili chikupu Yehova chakashikijayi mwafuukwiliyuku, neyi chashimwiniyi Pawulu muwuprofwetu nindi: “Twelukaña hanti, twaprofwetaña nawa hanti; ilaña chamba kashika chuma chalala chikupu, yuma yakumininamu yakahita.” (1 Kor. 13:9, 10) Ilaña chikuhwelelu chawu chakoleli muloña wakwovwahila nsañu yonenawu yasonekeliyi Pawulu, kapostolu Petulu niamana kwawu awayishewa adiñuku munana mafuku.

⁶ Hakwila yololi nsañu, Pawulu wonenenuwu walumbulwili nindi kwakenza akwakusenwisha ‘nimuntu wanshidi’ henohu ifuku daYehova kanda. * Kuhiñahu hampinji yindi yatelela, Mwanta Yesu  ‘wakayijilumuna’ antu ejima anadimbuwu. Kapostolu washimwini muloña waweni wakayisompeshelawu, nindi ‘nanichi chalekeluwu kukeña nsañu yalala.’ (2 Tesa. 2:3, 8-10) Dichi twatela kudihula netu: ‘Komana chalala nachikeña chikupu? Komana nelukaña nsañu yinalumbululiwu chakatataka yasonekañawu muyinu magazini nimunyikanda yashindamena haBayibolu yinakusonekelawu chipompelu chamukaayi kejima chawantu jaNzambi?’

TONDENU CHIWAHI ANTU AKUDIKUNDA NAWU

7, 8. (a) AkwaKristu akusambila alwishileña nakukalanyi? (b) Kukalanyi kwamonaña akwaKristu makonu?

⁷ Kuhosha hohu chalala, akwaKristu amweni kukala kweneni kubadika kwaleteluwu akwakusekesha nantañishilu yawu. Pawulu wamusonekeleli Timotewu nindi “mali diwu muji wayuma yatama yejima.” Kapostolu washimwini nindi ‘diyi nsañu yinasenwishi amakwawu muchikuhwelelu, anadipwiki yihuñu yayivulu, nzwa-a nikwishinadi.’ (1 Tim. 6:10) “Nyidimu yachisemwa chaheseki” niyena yinakuleta kukala makonu.—Ŋal. 5:19-21.

⁸ Hela chochu, tuneluki muloña wayisoñamishiluwu chikupu akwaTesalonika kudi Pawulu kutalisha hakukala kweneni kwaleteluwu awa antu ateneniyi nindi “apostolu akutwamba.” Hakachi kawu hadiña antu ahosheleña ‘yuma yaheña, nakudikokela atumbanji awenawu.’ (2 Kor. 11:4, 13; Yil. 20:30) Chimwahitili mpinji, Yesu wahamekeli chipompelu chamuEfwesesa muloña ‘hiyashileña antu atama kumuchimaku.’ Antu amuEfwesesa ‘ayesekeleña’ antu aditenaña nawu tuyapostolu, komana hiyapostoluku. (Chim. 2:2) Dichi, mumukanda windi wamuchiyedi wayisonekeleliyi Atesalonika Pawulu wayilejeli nindi: “Ichi dinu, enu ana kwetu, tukuyileja mwijina daMwanta wetu Yesu Kristu, netu ambukenu kudi ana kwenu ejima endaña chakuluwañesha.” Kuhiñahu, wateneni akwaKristu ‘abulileña kukeña kuzata.’ (2 Tesa. 3:6, 10) Neyi chakwila ana antu ayimweneña nawu endeleña chakuluwañesha, indi antu atachikili kukundama kudi akwakusekesha adi kuyimona ñahi? Eñañi kudikunda nawantu amuchidiwu munana mafuku kwadiña kwafwana nawa hiyateleli kudikunda nawuku, anetu nawa twatela kuyitondolwela.—Yish. 13:20.

9. Muloñadi wutwatela kubabala namuntu washimunaña nsañu yakadi kwiluka hela kutuñula akwawu?

⁹ Chineli tudi kwakwihi nakutachika kwayihuñu yamaneni nikukuma kwakanu kaayi katama, kusoñamisha kwayisoñamishiluwu akwaKristu amuyaaka nkulakaji yakusambila kwalema nankashi makonu. Chakadi nikujina, hitwakeñaña kwila yuma ‘yinabuli kwesekana nankeñelu’ yaluwi lwaYehova kulonda tukabuli kwikala nawumi wahaya nyaka chili mwiwulu hela hamasekuku. (2 Kor. 6:1) Hela neyi muntu wenzaña nakupompa kuchipompelu chetu yatachika kuhosha nsañu yinabuli kwilukayi chiwahi hela kutuñula akwawu, twatela kubabala namuntu wamuchidiwu.—2 Tesa. 3:13-15.

‘KAKELENU KUYUMA YIMWADIZILI’

10. AkwaKristu amuTesalonika ayikonkomweneni kukolela kuyaaku yamuchidinyi?

¹⁰ Pawulu wakolesheli amana kwindi amuTesalonika nindi ‘emani mbe,’ nikukakela kuyuma yadiziluwu. (Tañenu 2 Atesalonika 2:15.) Indi “yaaku” yayidizishiluwu yadiña yakwinyi? Eñañi iyi bayi neyi yadiña yaaku yatañishileñawu munsakililu yakutwamba nawa yalemesheleñawu neyi hinsañu yekala muNsonaku. Ilaña, Pawulu wadiña nakutena ntañishilu yamudizishiluwu niyadiziluwu akwawu kudi Yesu hamu ninsañu yayonenenuwu apostolu kudi Nzambi nawu asoneki, iyi nsañu diyi yekala Nyikanda yonenawu. Pawulu wayihamekeli amana kwindi amuchipompelu chamuKorinda muloña wasonekeli nindi, “chimwañanukaña muyuma yejima, nichimwakakelaña  yaaku, mwomunayilejeli ninami.” (1 Kor. 11:2) Chineli iyi ntañishilu yafumini kudi Yehova nikudi Mwanindi Yesu yalala nawa ateleleli kuyikuhwelela.

11. Indi nsañu yakutwamba yaluwañeshaña ñahi antu amakwawu?

¹¹ Hayisonekeleleñayi Aheberu, Pawulu wahosheli hanjila jiyedi jinateli kuleñela mukwaKristu kujiyisha chikuhwelelu chindi nikukañanya kwimana wakola mbe-e. (Tañenu Aheberu 2:1; 3:12.) Wahosheli ‘hakuhuñumuka nikumuleka Nzambi.’ Watu wunateli kukumpuka nakufuma kuchikumu chakaloña chakubula kwiluka. Wunateli kutachika kuswila chovu-chovu. Cheñi nawa, muntu nateli kufuukulahu kushinjika watu windi kulonda wufumi kuchikumu. Iji njila jejima jiyedi jinakumwekesha yuma yamwekanaña kudi antu adimbañawu kulonda aleki kukuhwelela nsañu yalala.

12. Yumanyi yamakonu yinateli kuluwañesha wubwambu wetu naYehova?

¹² Ichi dichayimwekeneni antu amakwawu amuTesalonika. Indi etu makonu? Makonu kudi yuma yayivulu yatumanishilaña mpinji. Toñojokenu hampinji yitwazatishaña hakuhanjeka nawantu haIntaneti, kutaña nikwakula nsañu yahanshiña, kufwila yisela, hela kwiñija mutu muyisela yinakumwekana. Iyi yuma yejimiyi yinateli kumuluwañesha mukwaKristu nikumanisha iyena dindi. Yumanyi yinateli kufumamu? Muntu nateli kuleka kulomba, kudiza Izu daNzambi, kuya nakupompa, nikuleka kushimwina nsañu yayiwahi. Twatela kwila ñahi kulonda tubuleña kunyakala kujinoka muyitoñojoka yetu?

YUMA YIKUTUKWASHA KULONDA TUBULEÑA KUJINOKA

13. Neyi chiyashimwineñawu dehi, antu amavulu anakumwekesha yililwinyi, nawa yumanyi yinateli kutukwasha kulonda chikuhwelelu chetu chibuli kujiya?

¹³ Chuma chitwatela kwila hikwiluka mpinji yitunashikumu niyuma yatama yafumaña mukudikunda nawantu akaanaña kwiteja nawu anu ‘himafuku akukuminina.’ Kapostolu Petulu wasonekeli kutalisha haniyi mpinji nindi: “Kwakenza akwakuseha nakuseha, nakwila mwaya kufwila kwawu aweni kwatama; nawu, Indi kwinza kwindi kwakaniniyi kwokudihi? Muloña chochakaminuwu ankakulula tulu, yuma yejima chochiyekala, neyi chiyadiñi hatachi haleñeluwu yuma.” (2 Pet. 3:3, 4) Kutaña Bayibolu ifuku niifuku nikudiza Izu daNzambi kwatukwashaña kwiluka mpinji yitunashikumu, nawa chumichi chatukwashaña kwiluka netu tudi ‘mumafuku akukuminina.’ Akwakusekesha ashimwineñawu dehi amwekeni dehi kunyima nawa nimakonu adi kwoku. “Ninowu muntu wanshidi” wudi kwoku nawa wadimbululaña ambuña Nzambi. Mwalala, twatela kwikala asoñama muloña ifuku daYehova didi mukamwihi.—Zef. 1:7.

14. Kuzata nañovu mumudimu waNzambi kwatukiñaña ñahi?

¹⁴ Wunsahu wamwekeshaña nawu chuma chalema chinateli kutukwasha kwikala atona nikubula kujinoka muyitoñojoka yetu hikushimwina nsañu yayiwahi yaWanta mpinji yejima. Dichi, Yesu Kristu, Mutu wachipompelu, chayilejeliyi atumbanji twindi nindi yenu mwakelishi atumbanji munyunza yejima, mwakayileji kuhemba yuma yejima yinayilejenu, wafumbileña atumbanji twindi kulonda yayikiñi. (Mat. 28:19, 20) Hakwila nawu tuzatishi iku kufumba chakeñekaña kuzata nañovu mumudimu wakushimwina. Toñojokenu neyi chakwila amana kwenu amuTesalonika adiña nakushimwina nikutañisha chakadi kushaku muchima, neyi kwiji himudimu wabula kulema. Anukenu mazu ayisonekeleliyi Pawulu nindi: ‘Bayi mujima spirituku. Bayi mudiwula wuprofwetuku.’ (1 Tesa. 5:19, 20) Tunakudiza wuprofwetu wawuwahi nankashi nikulejaku antu amakwawu.

15. Yumanyi yitwatela kudiza hakudifukula kwachisaka yinateli kutukwasha?

 ¹⁵ Kafwampi, twafwilaña kukwasha yisaka yetu kulonda yizateña chiwahi mumudimu wamwiha. Chuma chinakwashi amana kwetu niahela amavulu kwila mwenimu hikwikala nachibalu chakuhanjeka hamudimu wakushimwina hakudifukula kwawu kwachisaka. Chinateli kuyikwasha neyi muhanjekaña hanjila yinateli kukwasha antu amuchisaka kufuntila kudi antu amwekesheli mpwila yakudiza chalala. Yumanyi yikahoshawu hakufuntilaku? Nsañwinyi yikahoshawu hakufuntilaku kulonda yikatwalekuhu kusañumuna mpwila yawantu? Mpinjinyi yatelelawu kufuntilaku? Antu amavulu azatishaña mpinji yakudifukula kwachisaka hakwila ahituluki munsañu yakadizawu hakupompa kwachipompelu kulonda ayiluki. Komana kwila muloñesha chikupu kulonda mukakuleñahu nehi? Kwakulahu kukukolesha chikuhwelelu chenu nawa kukuyikwasha mubuleña kujinoka muyitoñojoka yenu. (Mas. 35:18) Eñañi, kwikala nampinji yakudifukula kwachisaka kukuyikwasha kulonda mubuleña kuboka nsañu nikujinoka.

16. AkwaKristu awayishewa akweti kuchiñejanyi kunateli kuyikwasha kubula kujinoka muyitoñojoka yawu?

¹⁶ Neyi tushinshika Yehova chinakiswiliyi antu jindi hayaaka yinahituhu kutiyishisha chikupu wuprofwetu wamuBayibolu, tunateli kwiluka chikupu netu tunakutalila nkisu yayiwahi kumbidi. Awayishewa akweti kuchiñeja kwakwikala hamu naKristu mwiwulu. Iku kuchiñeja kwayileñelaña abuleña kujinoka muyitoñojoka yawu! Mwalala mazu aPawulu asonekeleliyi Atesalonika ahosha hadi awayishewa makonu akwila nawu: ‘Tunatiyi kuwaha kumusakilila Yehova hadenu mafuku ejima, muloña ayitondeli kudi Nzambi . . . mukujila kwakuyijilika naspiritu, nimukwitiya nsañu yalala.’—2 Tesa. 2:13.

17. Mazwinyi akukolesha imwawanaña mumazu ekala ha 2 Atesalonika 3:1-5?

¹⁷ Niantu akweti kuchiñeja kwakwikala nawumi wahaya nyaka hamaseki niwena atela kuzata nañovu kulonda abuleña kunyakala kujinoka muyitoñojoka yawu. Neyi mukweti kuchiñeja kwakushakama hamaseki anukenuña mazu aPawulu akukolesha asonekeleliyi akwawu awayishewa adiña muTesalonika. (Tañenu 2 Atesalonika 3:1-5.) Wejima wetu twatela kusakilila hanawa mazu amawahi. Eñañi, munyikanda yayisonekeleleluwu Atesalonika mudi kusoñamisha kwalema nankashi hansañu yakuboka niyitoñojoka yaluwa. Chineli tunakushakama mumafuku akukuminina, iku kusoñamisha kwalema chikupu kudi akwaKristu makonu.

[Tumazu twaheshina]

[Malwihu aKuzatisha haKudiza]

[Mwevulu wudi hefu 7]

Pawulu wasonekeli nyikanda yayisoñamishileña akwaKristu hampinji yatelela (Talenu maparakalafu 4, 5)

[Mwevulu wudi hefu 10]

Kuloñesha chachiwahi nikuya mumudimu wakushimwina kunateli kutukwasha kulonda ubuleña kunyakala kujinoka muyitoñojoka yetu (Talenu maparakalafu 14, 15)