Chimwatela Kwila Neyi Mwini Kwenu Nafwi

BAYIBOLU yahosha hatooka to-o nawu: Iyala watela ‘kukeña ñodindi neyi chadikeñayi yomweni.’ Mumbanda niyena watela ‘kumulemesha chikupu nfumwindi.’ Wejima wawu atela kuzata nyidimu yawu neyi “mujimba wumu.” (Efwes. 5:33; Kutach. 2:23, 24) Mukuhita kwampinji, antu adisumbula aswejaña kudikunda, nawa adikeñaña chikupu. Tunateli kwesekeja wubwambu wawu nanyiji yanyitondu yiyedi yinakukulila hamu. Chochimu antu adisumbula amuzañalu aswejaña kudikundaña chikupu.

Indi neyi chakwila iyala hela mumbanda yafwa? Dikwila nawu wubwambu wawu wakola chikupu wamanaña. Iyala hela mumbanda nfwila washalaña kwachikasa munshiñu, watiyaña wuudi mpinji yikwawu nawa washalaña nachikela. Hayaaka 58 yashakaminiyi Daniella mumaluwi wamweni antu amavulu afwishili eni kwawu. * Ilaña chafwili nfumwindi wahosheli nindi: “Hinelukili chatiyañayi muntu neyi nafwishuku. Himunateli kwiluka chatiyañayi muntuku sampu chumichi chiyimwekena.”

CHINEÑI CHAMWEKANAÑA NEYI HICHIKAMANAKU

Akwakusandujola nsañu ahoshaña nawu chineñi chatiyañayi muntu wunafwishi mwini kwindi wakeñayi chakataña kumuchima chikupu. Antu amavulu afwishahu dehi etejaña awa mazu. Hanahiti yaaka yayivulu kufuma hafwishiliyi Millie nfumwindi. Washimwini chahandañayi neyi ntuluwa  nindi: “Natiyaña neyi nidi chifwayi.” Wateneneña chineñi chatiyañayi hamuloña wakufwisha nfumwindi washakamini nindi mumaluwi hadi yaaka 25.

Susan wamweneña nindi anfwila awambanda adilaña anfumujawu hayaaka yayivulu aswejaña kulebumuna. Niyena wafwishili nfumwindi washakaminiyi nindi mumaluwi hadi yaaka 38. Hanahiti dehi yaaka 20 kufuma hafwili nfumwindi, ilaña wahoshaña nindi, “Nihanu namwanukaña mafuku ejima.” Wadilaña kakavulu muloña wamwanukaña nankashi.

Bayibolu yashimuna nawu chineñi chakufwisha mukwenu wamumaluwi chakata nankashi nawa hichamanaña swayuku. Hampinji yafwiliyi Sara, nfumwindi Abarahama, “wayiluku nakuyebañila, nakumudila Sara.” (Kutach. 23:1, 2) Hela chakwila welukili nindi kwekala kusañuka, Abarahama waneñeli chikupu hampinji yafwili ñodindi wakeñeliyi. (Heb. 11:17-19) Chafwiliyi ñodindi Racheli wakeñeliyi, Yakoba watwalekeluhu nakumwanuka. Wayilejeli anyanindi yuma yayiwahi hadi ñodindi.—Kutach. 44:27; 48:7.

Yumanyi yitunateli kudizila kudi awa antu ashimunawu muNsona? Amayala niambanda afwila aneñaña chikupu hadi yaaka yayivulu. Bayi tumonaña kudila kwadilañawu nichineñi chatiyañawu neyi azeyaku, ilaña atiyaña chikela chikupu hakufwisha muntu wakeñawu nankashi. Twatela kuyikundeja nikuyikwasha hadi mpinji yeneni.

BAYI MWAKAMA IFUKU DIKWAWUKU

Neyi muntu yafwisha mukwawu wamumaluwi hahandaña neyi chahandileñayi muwujikuku. Hanyima yakushakama yaaka yayivulu mumaluwi, iyala welukaña chikupu chakukundeja ñodindi neyi naneñi hela neyi nahili. Neyi iyala yafwa kukeña kwamukeñeliyi ñodindi nikumukundeja kwamanaña. Munjila yoyimu mumbanda niyena welukaña chakumuzañalesha nfumwindi. Kwosi yuma yinateli kwesekana, nachahoshañayi mazu akumukundeja, nichamwakamenañayi hayuma yakeñañayuku. Neyi ñodindi yofwa iyala washala nawuudi muchihandilu chindi. Dichi anfwila amakwawu akamenaña nawa atiyaña woma hayuma yakamwekana kumbidi. Nshimbinyi yamuBayibolu yinateli kuyikwasha kulonda abuleña kwakamena nikwikala namuzañalu?

“Bayi mwakama ifuku dakumadikuku, muloña ifuku dakumadiki dikudakama dadeni. Kutama kwefuku dimu kunawani.” (Mat. 6:34) Awa mazu aYesu ahosha chikupu hayuma yakumujimba yitwakeñaña muchihandilu, ilaña anakwashi antu amavulu kuumika chineñi chakufwisha muntu akeñawu. Chimwahitili tukweji hanyima yakufwisha ñodindi, Charles wasonekeli nindi: “Nichidi kumwanuka Monique nankashi, mpinji yikwawu chineñi chaswejelañaku. Hela chochu, nelukili nami chumichi chatama wanyi, nawa mukuhita kwampinji chineñi chayaña nakumana chovu chovu.”

Eñañi, Charles womikili “mukuhita kwampinji.” Womikili ñahi? Wahosheli nindi: “Yehova wakwashaña, dichi nakamaña ifuku dikwawu wanyi.” Charles hazeyeli nachineñuku. Chineñi chadiñayi nachu hichamanini hohu ifuku dimuku, nawa hichamuzeyesheluku.  Neyi mwafwisha mwini kwenu, zatenu nañovu kulonda muumiki chineñi, chakubula kwakama ifuku dikwawu. Himuneluki yuma yayiwahi hela kukundeja kwakayikundejawu ifuku dikwawuku.

Yehova hakeñeleña nindi tufweñaku. Kwambukaku, kufwa ‘hinyidimu yaDiyabolu.’ (1 Yow. 3:8; Rom. 6:23) Satana waleñelaña antu achineña kufwa kulonda yayiñiji muwuduñu nawa abuli kwikala nakuchiñeja. (Heb. 2:14, 15) Satana watiyaña kuwaha neyi muntu yatachika kujinoka nidi hanateli kuwana muzañalu walala hayinu mpinji nimwituña daNzambi dadihaku. Dichi chineñi chatiyañayi muntu wunafwishi nfumwindi hela ñodindi chafumaña hanshidi yaleteliyi Adama nitufuta twaSatana. (Rom. 5:12) Yehova wakakisañana yuma yatama yaletañayi Satana, nakushinda chikupu kufwa chitwa chindi chazatishañayi. Hakachi kawantu anasubuluwu kuwoma waletañayi Satana hadi niantu amavulu afwisha enikwawu, hadaha ninenu mwafwisha mwini kwenu.

Hadi antu akasañwilawu hamaseki, chakadi nikujina hakekala kuhimpika chikupu muwubwambu wawu. Toñojokenu hadi anvwali, ankaka jawantu, niankakulula akasañulawu nawa akayaña nakuwanina chovu chovu hamu nawanyanawu niezukulwawu. Yihuñu yamonañawu antu hamuloña wawushinakaji yakamana. Komana atwansi atela akamonaña ankakulula jawu munjila yabukaku nachinakuyimonawu makonu? Komana hitwakuhwelela netu iku kuhimpika kwakamwekana kwakaleñela antu akahandeña chiwahuku?

 Kwekala malwihu amavulu itwatela kwihula kutalisha hadi antu akasañuka, chidi neyi muntu wafwisha eni kwindi ayedi hela amavulu. Kudi lwihu lwehwiluwu aSadusi kutalisha hadi mumbanda wafwishili nfwimwindi watachi, wamuchiyedi niamakwawu amavulu. (Luka 20:27-33) Antu wenawa akekala nawulunda wamuchidinyi chikasañukawu? Tweluka wanyi, nawa hitwatela kubokaku hela kutiya kutama hayuma yitwabula kwilukaku. Ilaña twatela kumukuhwelela hohu Nzambi. Twatela kukuhwelela netu kumbidi Yehova wakakoña yuma yayiwahi, yitwatela kutalila bayi kuchiinaku.

KUCHIÑEJA KWAKUSAÑUKA, KWATUKUNDEJAÑA

Izu daNzambi datañishaña choloka chikupu nawu afu akasañuka. Nsañu yamuBayibolu yahoshaña hadi antu asañwiluwu kunyima yamwekeshaña nawu: “Antu ejima adi mumajamu akatiya izu dindi [daYesu], akedikamu.” (Yow. 5:28, 29) Antu akekala amomi hayina mpinji akazañalala hakudimona nawantu akasañulawu. Kubombelahu, hitunateli nikufwikija muzañalu wukatiyawu antu akasañukaku.

Afu chikasañukawu, hamaseki hakekala muzañalu waweni. Antu amavulu afwa akashakama hamu nawantu amomi. (Maku 5:39-42; Chim. 20:13) Kutoñojoka chikupu haniyi yihayamisha yikamwekana kumbidi kunateli kukundeja antu ejima afwisha antu akeñawu.

Komana kudihu muntu wukaneña neyi afu anayisañuli dehi? Bayibolu yahosha nawu kwosi. Kwesekeja namukanda waIsaya 25:8, Yehova ‘wakaminya kufwa chahaya nyaka.’ Ichi chabombelamu kufumishahu kufwa niyuma yatama yaletaña kufwa, muloña wuprofwetu watwalekahu nawu: “Yehova wakakombola madilu mumesu awantu ejima.” Neyi munaneñi muloña wakufwisha mwini kwenu, nsañu yakusañuka yinateli kuyizañalesha.

Kwosi muntu weluka chikupu yuma yejima yakakoñayi Nzambi mwituna dadihaku. Yehova wahosha nindi: “Chajindama mawulu hewulu damaseki, dichi nimunelañami mwabadika mumwelañenu, niyitoñojoka yami yabadika yitoñojoka yenu.” (Isaya 55:9) Chikaninu chaYesu chakusañuka chatukwashaña kumukuhwelela Yehova, neyi  chamukuhwelelayi Abarahama. Chuma chalema chatela kwila mukwaKristu wudi wejima hikwila yuma yakeñañayi Nzambi nindi twileña kulonda ‘akatufuukwili nawu twatela kushakama mwituña dadiha’ hamu nawantu akasañulawu.—Luka 20:35.

CHUMA CHALEÑELAÑA TUCHIÑEJEÑA

Chatela tutiyeña woma, twatela kwikala nakuchiñeja. Antu hiyachiñejaña yuma yakumbiduku. Ilaña Yehova watulejaña nindi tuchiñejeña yuma yayiwahi yakumbidi. Tweluka wanyi chikupu Yehova chakutwinkayi yuma yejima yitwakeñaña niyitwafwilaña, hela chochu, twatela kukuhwelela netu wakatwinka. Kapostolu Pawulu wasonekeli nindi: “Ilana kuchiñeja chuma chakumona dehi hikuchiñejaku. Hinyi wachiñejaña chuma chamonayi dehi? Ilaña neyi twachiñejaña chuma chakubula kumona, henohu dinu tukutatakena nakuchichiñilila.” (Rom. 8:24, 25) Kukuhwelela chikupu muyikaninu yaNzambi kunateli kuyikwasha kulonda muumiki. Neyi muumika mwakamona yuma yayiwahi ‘yakeña muchima wenu’ yakayinkayi Yehova. Wakekutisha “yuma yejima yikweti wumi.”—Mas. 37:4; 145:16; Luka 21:19.

Chelili Yesu wudi kwakwihi nakufwa, atumbanji twindi aneñeli chikupu. Yesu wayikundejeli nanawa mazu akwila nawu: “Bayi mwakama munyichima yenuku. Mwamukuhwelelaña Nzambi, nkuhwelelenu ninami nawa.” Wayilejeli nindi: “Hinakayishiya neyi anshonaku; nakenza kudenu.” (Yow. 14:1-4, 18, 27) Mazwindi aletesheli atumbanji twindi awayishewa ekali nakuchiñeja nikuumika hadi yaaka yayivulu. Antu afwilaña kumona antu akeñawu akasañulawu niwena atela kuumika nikuchiñeja. Yehova niMwanindi hiyakayishiya neyi anshonaku. Munateli kukuhwelela awa mazu.

[Tumazu twaheshina]

[Mwevulu wudi hefu 28]

Nzambi nateli kuyikwasha kulonda muumiki hakwila mubuleña kwakama ifuku dikwawu

[Chikasha chidi hefu 29]

Kundejenu Antu Ananeñi haMuloña Wakufwisha

Neyi mukwaKristu nafwishi mwini kwindi, antu amavulu enzaña nakumukundeja nikumukwashaku muyuma yashiyashana. Chakutalilahu, ntuluwa watiyaña kuwaha kumukundeja kudi antaña jindi niamabwambu. Ilaña chineñi chayaña nakumana chovu chovu, nawa mumbanda wunafwishi wakeñaña kumukundeja nikumukwashaku mpinji yikwawu. Bayibolu yahosha nawu: “Ibwambu damuntu wamukeñaña mukwawu mwahita mpinji jejima; mana kwamuntu wavwalikila yakala.”—Yish. 17:17.

Twatela kwimusha ñahi muntu wunafwishi? Bayibolu yatufumbaña nawu: “Toñojokenu wejima wenu mwomumu, nakutiyila akwenu wushona, nakukeñañana neyi chamwivumu denu, nakwikala nanyichima yaluwi.” (1 Pet. 3:8) MukwaKristu chafwishayi waneñaña hadi mpinji yeneni. Dichi, hela chakwila himazu amawahi, hitwatela kwimusha netu “Munakutiya ñahi?” hela “Chihandilu chidi ñahuku?” Muloña muntu wunafwishi nateli kutoñojoka nindi, ‘Muneluki wanyi chinakutiya’ hela ‘Nateli kutiya ñahi chiwahi hanyima yakufwisha?’ Dichi chikuwaha neyi tumwimusha munjila yayiwahi netu “Mudi ñahi?” kuhiñahu tuhosha mazu amawahi, netu “tunahiteña hohu netu tuyimonuhu” hela “Chimwenza nakupompa hachipompelu mwankoleshaña.”

Munateli kumuleja muntu wunafwishi kulonda mudiili hamu nindi hela kuya nakuhempula. Nfwila wejina daMarcos amukundejeli kudi amabwambu jindi amuhempwili. Ahanjekeleña hayumanyi? Washimwini nindi: “Hiyahosheleña hakukala kunamwenuku ilaña adiña nakuhosha hayuma yayiwahi yakunkolesha.” Nfwila wejina daNina wahosheli nindi: “Amabwambu jami amawahi ahoshaña mazu amawahi hampinji yatelela. Mpinji yikwawu kwosi mazu ahoshañawu, ilaña ekalaña hohu nanami.”

Neyi muntu wunafwishi nakukeña kuhosha hakukala kunamumwekeni, tiyililenu nakanañachima. Bayi musweja kwihula hayuma yimunakukeña kwilukaku. Bayi mumutwika muloñaku. Himwatela kumufumba muntu kutalisha hachatela kudilayi hela kuleha kwampinji yakudilayuku. Bayi mutiya kutamaku neyi nakukeña kwikala nkawinduku. Munateli kwinza mpinji yikwawu. Twalekenuhu nakumwekesha kukeña.—Yow. 13:34, 35.

[Chikasha chidi hefu 30]

Komana Mwakeñaña Kwiluka Yuma Yikamwekana Kumbidi?

Chatama wanyi kukeña kwiluka Yehova chakashikijayi yikaninu yindi. Abarahama watoñojokeleña kakavulu hachikaninu chaNzambi chakumwinka mwana. Yehova wamulejeli Abarahama kudiwunjika. Chuma chakeñeleñayi ona muntu washinshika chamwekeni.—Kutach. 15:2-5; Heb. 6:10-15.

Chelukiliyi nindi Yosefu nafwi, Yakoba waneñeli nankashi namwindi. Chimwahitili yaaka, Yakoba watwalekeluhu kumudiila mwanindi watoñojokeleñayi nindi wafwa. Ilaña Yehova wamukiswilili Yakoba, nayuma yabulili kukuhwelelayi. Chimwahitili mpinji, Yakoba wadiwanini cheñi naYosefu, nawa wekalili nakukooleka kwakumona ezukulwindi. Yakoba wahosheli nindi: “Ami nelili nami hinamba kakumona cheñi kumesuku, kwinza ichi Nzambi mwaka nañiteji dehi kumona nianyaneyi.”—Kutach. 37:33-35; 48:11.

Chumanyi chitukudizilaku kuniyi nsañu? Tachi, mwatela kukuhwelela nenu kwosi chuma chinateli kumukañesha Nzambi Watwesha Yejima kushikija yuma yafuukulayuku. Chamuchiyedi, neyi tulomba nikuzata kwesekeja namwaya muchima waYehova, wukutwakamenaña chayinu mpinji nawa kumbidi wakatwinka yuma yejima yitwakeñaña. Pawulu wasonekeli nindi: “Yena natweshi kwila chakubadika nankashi mutukulomba hela mutukutoñojoka mwejima, mwesekela ñovu yakoñaña mudetu; kudi yena kwikali kulema muchipompelu, nimudi Kristu Yesu, mukuhita yisaka yejima haya nyaka nanyaka. Amena.”—Efwes. 3:20, 21.

[Mwevulu wudi hefu 31]

Kuhwelelenu muyikaninu yaYehova yakumbidi yikaleta muzañalu