‘Ilenuña Mwenimu Muñanukaña Nachu’

“Wanoneni dinkendi, chanasakililiyi hakudihumuna, hakwila nindi, Weniwu diwu mujimba wami wanenkuwu hanyijimba yenwenu; ilenu mwenimu muñanukaña nachu.”—1 KOR. 11:24.

MUKWAKULA NENUDI?

Indi ifuku daChanukishu adilukaña ñahi?

Indi dinkendi nivinyu yazatishañawu haKudya kwaMwanta kwaMelela yemenañaku chumanyi?

Muloñadi chichalemena kuya kuChanukishu wonsu wetu, hichidi namuloña nakuchiñeja kutukwetuku?

1, 2. Apostolu atoñojokeleña nawudi henohu Yesu kanda yayi kuYerusalema?

 ‘NEYI mwiwulu mwosi mavu, twamonaña kakweji wachibalu. Ifuku dafuminuku namelela, atulama amuYerusalema amweni kakweji nediki chantesha. Ayilolu amuchota chaSanihedilini chayilejawu nawu kakweji namwekani, ahosheleña nawu anakwati kakweji wamuha waNisani. Hohenohu atuñanda atachika nikutiyakesha nsañu swayi-swayi. Yesu wakeñeleña kuya kuYerusalema kulonda yakashikeñahu dehi henohu Paseka kanda yitachiki.’

² Hadaha dichatoñojokeleñawu antu amakwawu adiñi naYesu muPereya (kwishinadi daYodana) hayileñayi lwendu lwakukumisha kuYerusalema. (Mat. 19:1; 20:17, 29; Maku 10:1, 32, 46) Chelukawu nawu ifuku datachi dakakweji kawaYudeya kaNisani dinatachiki, mwahitileña mafuku 13 hakwila ekali nachawija chaPaseka hakuhuma kwetañwa haNisani 14.

3. Muloñadi akwaKristu chalemeshelawu ifuku daPaseka?

³ Ifuku daKudya kwaMwanta kwaMelela, desekana nefuku daPaseka, dikekalaku haApril 14, 2014 hakuhuma kwetañwa. Idi hiifuku dalema kudi akwaKristu alala niantu akakeña kwinza. Muloñadi? Muloña wansañu yidi ha 1 Akorinda 11:23-25 yahosha nawu: “Cheliliyi Mwanta Yesu wufuku wamufukejeluwu, wanoneni dinkendi, chanasakililiyi hakudihumuna, hakwila nindi, Weniwu diwu mujimba wami wanenkuwu hanyijimba yenwenu; ilenu mwenimu muñanukaña nachu. Dichi cheliliyi nawa nilupasa.”

4. (a) Malwihwinyi itwatela kudihula kutalisha haChanukishu? (b) Ifuku daChanukishu adilukaña ñahi hachaaka hachaaka? (Talenu chikasha chinakuhosha nawu “Chanukishu chamu 2014.”)

⁴ Anenu nawa mwakekalaku kuchidika chashimwiniyi Yesu nindi atumbanji twindi akachanakaneña hachaaka hachaaka. Henohu chidika kanda, dihulenu nenu: ‘Nateli kwiladi kulonda nakayi kunichi chidika? Yifwikija yamuchidinyi yazatishañawu? Njilanyi  yakalondelawu hanichi chidika? Indi ichi chidika niyifwikija yikazatishawu yikankwasha ñahi?’

YIFWIKIJA

5. Yesu walejeli apostolu nindi aloñeshidi kutalisha kuPaseka yakukumishaku?

⁵ Yesu chalejeliyi apostolu nindi aloñeshi kapeka kakudiilamu Paseka, hashimwini nindi asweji kuwahishamuku; ilaña, wakeñeleña hohu kapeka katelela, kawunyonji mwatela kushikila antu atambikiliyi. (Tañenu Maku 14:12-16.) Ateleleli kushamu yuma yakuzatisha hachawija, kushilahu nidinkendi dakadi iluñi nivinyu yichinana. Chamanishiluwu kudya Paseka, Yesu wahosheli hanana mankendi ayedi.

6. (a) Chadiiluwu Paseka, Yesu wahosheli nindidi hadikendi? (b) Dinkendi damuchidinyi dazatishañawu haChanukishu?

⁶ Kapostolu Matewu wadiñahu wasonekeli nindi: “Yesu hakunona dinkendi, hakukisula nkisu, hakudihumuna, hakuyinka atumbanji nindi, Tambulenu mudyi, weniwu diwu mujimba wami.” (Mat. 26:26) Adina “dinkendi” hidadiña neluñuku, neyi dinkendi dazatishileñawu haPaseka. (Kwid. 12:8; Kuhit. 16:3) Awa mankendi ayituñileña nawuña watidiku nimenji, chakadi kushaku iluñi hela muñwa. Chineli ashileñaku iluñi wanyi, dinkendi hidatutumukileñaku. Dadiña dapela, dominina, daswayi kuhumuna mutuyitebu. Makonu, neyi hiyakuloñesha Chanukishu, aeluda muyipompelu alejaña muntu wumu kulonda yatuñi dinkendi damuchidiwu nawuña watidiku nimenji, nakudikaña hapani hadi manji antesha. (Neyi wuña watidiku kwosi, anateli kudituña nawuña walosu, bali, wuña wakabaka, hela wuña wayakudya yansachi.) Hela wuña wukwawu, chakadi kushaku muñwa, mateta hela sapoli.

7. Vinyu yamuchidinyi yateneniyi Yesu, indi makonu haChanukishu azatishaña vinyu yamuchidinyi?

⁷ Matewu watwalekeluhu nindi: “[Yesu] hakunona lupasa, hakusakilila, hakuyinka nindi, Nwenumu wejima wenu.” (Mat. 26:27, 28) Lupasa lwakwatiliyi Yesu muchikasa mwadiña vinyu yichinana. (Bayi neyi mulupasa akamwininumu nyikabu yavinyuku, muloña mpinji yanyikabu yavinyu yadiña yahita dehi.) Hakudya kwatachi muEjipitu hiyanwini vinyuku, hela chochu Yesu hakaanishili vinyu haPasekaku. Wazatishili nivinyu  hampinji yaKudya kwaMwanta kwaMelela. Dichi chazatishilañawu akwaKristu vinyu haChanukishu. Vinyu yazatishañawu haChanukishu hiyashañaku chuma chidi chejima chidi neyi walwa hela nyitondu yamavumba amawahuku. Kwosi chuma chiyateleluwu kubombela kumashi aYesu kulonda asweji kulemaku. Dichi azatishaña vinyu yichinana yakadi kushamu chidi chejima, yakwemena hetala hela vinyu yakulanda, yidi neyi Beaujolais, Burgundy, hela Chianti.

CHALUMBULUKA YIFWIKIJA

8. Muloñadi akwaKristu chashilawu muchima hakulema kwadinkendi nivinyu?

⁸ Kapostolu Pawulu wahosheli hatooka to-o nindi akwaKristu diwu atela kwanukaña Kudya kwaMwanta kwaMelela bayi apostoluku. Wayisonekeleli akwawu akwakwitiya amuKorinda nindi: “Chuma chinayilejeli enu, nachitambuli kudi Mwanta; cheliliyi Mwanta Yesu . . . wanoneni dinkendi, chanasakililiyi hakudihumuna, hakwila nindi, ‘Weniwu diwu mujimba wami wanenkuwu hanyijimba yenwenu; ilenu mwenimu muñanukaña nachu.’ (1 Kor. 11:23, 24) Nimakonu, akwaKristu alemesha ichi chidika chalema dichi achanakanaña hachaaka hachaaka nawa eluka kulema kwadinkendi nivinyu.

9. Indi antu amakwawu atoñojokaña ñahi mwaluwa kutalisha hadinkendi dazatishiliyi Yesu?

⁹ Antu amakwawu ayaña kumachechi ahoshaña nawu Yesu chahosheli nindi: ‘Weniwu diwu mujimba wami,’ akuhwelela nawu dinkendi dekalili mujimba waYesu muchihayamisha. Hela chochu, iyi nsañu yakutwamba. * Mujimba waYesu waweni wadiña hohu nidinkendi dakadi iluñi dateleleluwu kudya nawapostolu ashinshika. Dikwila nawu Yesu wahosheleña muchifwikija, neyi chahosheleñayi mpinji yikwawu.—Yow. 2:19-21; 4:13, 14; 10:7; 15:1.

10. Dinkendi dazatishañawu haKudya kwaMwanta kwaMelela demenañaku kwodi?

 ¹⁰ Dinkendi damweneñawu apostolu nawa dateleleli kudyawu demeneneñaku mujimba waYesu. Mujimba wumu wudihi? Mpinji yimu ambuña Nzambi atoñojokeleña nawu chineli Yesu wahumwini dinkendi, ilaña kwosi ifwaha dindi nidimu dakotokeli, dikwila nawu dinkendi dadiña nakwimenaku “mujimba waKristu,” chipompelu chawawayishewa. (Efwes. 4:12; Rom. 12:4, 5; 1 Kor. 10:16, 17; 12:27) Hela chochu, chimwahitili mpinji hanyima yakusandujola muNsona elukili nawu yashimunaña nawu dinkendi demeneneñaku mujimba waYesu, wamuloñesheleluwu. Yesu wamweni “yihuñu mumujimba,” nakumupopela hamutondu. Dichi haKudya kwaMwanta kwaMelela dinkendi demenañaku mujimba waYesu “wasendeli nyiloña yetu.”—1 Pet. 2:21-24; 4:1; Yow. 19:33-36; Heb. 10:5-7.

11, 12. (a) Yesu wahosheli nindidi kutalisha havinyu? (b) Vinyu yazatishañawu haKudya kwaMwanta kwaMelela yemenañaku kwodi?

¹¹ Chumichi chatukwashaña kwiluka Yesu chahosheliyi kutalisha havinyu. Twatañaña nawu “Dichi cheliliyi nawa nilupasa, chaneluwu anadyi dehi, hakwila nindi, Lupasilu dichi chitiyañenu chachiha chamumashi ami.” (1 Kor. 11:25) MaBayibolu amavulu ayisoneka chochimu naBayibolu yaRobert Young yahosha nawu: ‘Ilu lupasa dichi chitiyañenu chachiha chamashi ami.’ Komana aluna lupasa lwakwatiliyi Yesu dichi chitiyañenu chachiha? Inehi. Izu dakwila nawu “lupasa” datalisha kuvinyu yadiñamu. Yesu wahosheli nindi vinyu yadiña nakwimenaku chumanyi? Yemeneneñaku mashindi apwekesheliyi.

¹² MuNsañu Yayiwahi yaMaku twatañaña mazu aYesu ahosha nawu: “Diwu mashi ami achitiyañenu akupwekela antu amavulu.” (Maku 14:24) Eñañi, mashi aYesu ‘apwekeleli antu amavulu kulonda kuyanakena nachu nshidi.’ (Mat. 26:28) Dichi, vinyu yichinana yemenañaku chikupu mashi aYesu. Kuhitila mumashi aYesu anateli kutukuula nefutu danyiloña, ‘yowu kutwanakena nyiloña yetu.’—Tañenu Aefwesesa 1:7.

KWANAKANA KUFWA KWAKRISTU

13. Lumbululenu chanakanañawu Chanukishu chahachaaka chakufwa kwaKristu.

¹³ Neyi dikatachi kwinza kuChanukishu nakwanakana nawaYinsahu jaYehova, yumanyi yimunakukuhwelela kumona? Iluña dakupompela adiloñeshaña chiwahi, dawunyonji kulonda ejima anapompi adiluñishi. Awahishañamu nankenu yantesha, ilaña himwakamona nkenu yasweja nankashi neyi kwiji kumawijaku. Eluda washikahu wukahana mpanji yayiwahi yikashimuna chahoshaña Bayibolu hanichi chidika. Wakakwasha antu ejima kulonda akeluki chuma chatukoñelayi Kristu. Wafwili neyi mulambu kulonda tuhandi. (Tañenu Aroma 5:8-10.) Nhoshi wakalumbulula kuchiñeja kuyedi kwashiyashana kwashimunawu muBayibolu kwachiñililañawu akwaKristu.

14. Kuchiñejanyi kwalumbululañawu hakuhana mpinji yaChanukishu?

¹⁴ Kuchiñeja kumu kwekala kwakuyuula hamu naKristu mwiwulu, nawa atumbanji twaKristu antesha hohu diwu ekala naniku kuchiñeja, adi neyi apostolu ashinshika. (Luka 12:32; 22:19, 20; Chim. 14:1) Kuchiñeja kukwawu kwawakwaKristu amavulu anakumukalakela Nzambi nakashinshi mumafuku etu. Achiñejaña kushakama hamaseki muparadisa. Kuhiñahu muchima waNzambi akawila hamaseki neyi chawilañawu mwiwulu, chuma chalombañawu akwaKristu mpinji yejima. (Mat. 6:10) Nawa Nsona yashimuna yuma yayiwahi yakadiluñishawu antu haya nyaka.—Isa. 11:6-9; 35:5, 6; 65:21-23.

15, 16. Chumanyi chelañawu nadinkendi haKudya kwaMwanta kwaMelela?

¹⁵ Hakunkulula iyi mpanji nhoshi washimunaña nindi mpinji yinashiki yakwila chuma chayilejeliyi Yesu apostolu indi  nindi eleña. Neyi chashimunawu dehi hewulu, azatishaña yifwikija yiyedi, dinkendi dakadi iluñi nivinyu yichinana. Iyi yifwikija ayishaña hamesa kwakwihi nanhoshi. Wakataña nsañu yamuBayibolu yashimunaña Yesu chahosheliyi nicheliliyi hampinji yatachikiliyi ichi chidika. Chakutalilahu, munsañu yasonekeliyi Matewu twatañañamu nawu: “Yesu hakunona dinkendi, hakukisula nkisu, hakudihumuna, hakuyinka atumbanji nindi, Tambulenu mudyi, weniwu diwu mujimba wami.” (Mat. 26:26) Yesu wahumwini dinkendi dakadi iluñi kulonda yayinki apostolu ashakaminiyi nawu. Hakupompa kwakekalaku haApril 14 mwakamona dinkendi dakadi iluñi dakuhumona dehi dakashawu hayeña.

¹⁶ Kwakekala yeña yayivulu kulonda akabuli kumanisha mpinji hakuhitishamu yifwikija kudi antu ejima akapompa. Hikwekalaña tushidikilu tudi twejima hampinji yanichi chidikaku. Kwakekala kulomba mukwihihisha, kuhiñahu akahitishamu yeña munjila yayiwahi, kulondela njila yayiwahi yimwazatishaña. Antu antesha hohu (hadaha kwosi niwumu) wakadya dinkendi, neyi cheliluwu muyipompelu yayivulu hampinji yakuhitishamu mankendi mu 2013.

17. Hampinji yaChanukishu twalondelaña ñahi njila yazatishiliyi Yesu havinyu?

¹⁷ Kufumahu azatishaña njila yikwawu yalumbulwiliyi Matewu nindi: “[Yesu] hakunona lupasa, hakusakilila, hakuyinka nindi, Nwenumu wejima wenu; muloña diwu mashi ami achitiyañenu, akupwekela antu amavulu kulonda kuyanakena nachu nyiloña.” (Mat. 26:27, 28) Kulondela njila yoyimu akalomba cheñi, kuhiñahu akahitishamu ‘malupasa’ avinyu yichinana kudi antu ejima akapompa.

18. Muloñadi chichalemena kuya kuChanukishu, hela chakwila antu antesha hohu diwu akudya hela kwosi niwumu wukudya kuyifwikija?

¹⁸ Antu amavulu mwizaza amwekeshaña kalemesha kuhitila mukubula kudya hampinji yinakuhitishawu yifwikija muloña Yesu washimwini nindi antu akayuula muWanta windi wamwiwulu diwu atela kudya kuyifwikija. (Tañenu Luka 22:28-30; 2 Tim. 4:18) Antu amakwawu akapompa akatalañaku hohu nakalemesha. Hela chochu, kwinza kuKudya kwaMwanta kwaMelela kwalema nankashi, muloña kwamwekeshaña nawu alemesha mulambu waYesu chikupu. Hampinji yaChanukishu, atoñojokaña hankisu yakatambwilawu kushindamena hamulambu wefutu danyiloña daYesu. Akweti kuchiñeja kwakwikala hakachi ‘kezaza deneni’ dakapuluka ‘kuyihuñu yamaneni’ yinakwinza. Awa hiyakwakudifukula ‘akakosa mahinawu, nakuyitookesha namashi aKana kaMukoku to-o.’—Chim. 7:9, 14-17.

19. Tunateli kudiloñesha ñahi kulonda twakahetelumu muKudya kwaMwanta kwaMelela?

¹⁹ A Yinsahu jaYehova mukaayi kejima adiloñeshaña hanichi chidika chalema. Henohu kuchidi nyilungu, twakazata mukampeni yakutambika antu amavulu kulonda twakapompi nawu. Kubombelahu, mumafuku akutwala muChanukishu, etu amavulu twatañaña Bayibolu hansañu yahosha hayuma yeliliyi Yesu niyuma yamwekeni hamafuku akutwala ku 33 C.E. Twakadiloñeshi chiwahi kulonda twakayi kuChanukishu. Chalema kushikañahu dehi henohu kamina kakutachikilahu kanda nikulomba kulonda twakatambwili enyi nikulondela progiramu yejima chiwahi. Wonsu wetu, antu amuchipompelu nienyi, tunateli kuhetelamu neyi tulondelaña mumaBayibolu etu hampinji yinakutañawu Bayibolu. Sweje-e dinu, kuya kuChanukishu kwamwekeshaña chitwahamekaña chikupu mulambu waYesu nikwovwahila lushimbi lwakwila nawu: “Ilenu mwenimu muñanukaña nachu.”—1 Kor. 11:24.

[Tumazu twaheshina]

[Malwihu aKuzatisha haKudiza]

[Chikasha chidi hefu 23]

CHANUKISHU CHAMU 2014

Ñondu wanyeñumukaña iseki kakweji nikakweji. Kwekalaña mpinji yikwawu ñondu wekalaña hakachi keseki netañwa. Neyi ñondu yekala hakachi keseki netañwa twahoshaña netu tunakwati “kakweji kakaha.” Haniyi mpinji ñondu hamwekanaña hesekuku sampu munahiti maora 18 nakushika ku 30.

Muchaaka cha 2014, ñondu wamuha wukamwekana hamwela (equinox mpinji yesekanaña maora amwaana nawufuku) kwakwihi naMarch 30 nampinji ya 8:45 p.m (20:45), mpinji yakuYerusalema. Ifuku dikalondelahu haMarch 31 kwesekeja nampinji yamuYerusalema itañwa dikahuma chimwakahita maora 21. Ilaña Nisani 1 hiyikatachika hinidi ifukuku. Muloñadi? Hadaha kakweji wamuha hakamwekana haniyi mpinjuku. Ilaña, itañwa dikatachika kuhuma neyi ñondu wamuha namwekani dehi muYerusalema haApril 1. Dichi neyi tuzatisha njila yoyimu yazatishileñawu aYudeya akushankulu, tunateli kuhosha netu (Nisani 1) yikatachika hakuhuma kwetañwa haApril 1.

Yipompelu yawaYinsahu jaYehova mukaayi kejima ayileja nawu Nisani 14 yikatachika hakuhuma kwetañwa haChimu, April 14, 2014. Haniyi mpinji kakweji wukekala namwekani dehi wejima.—Neyi munakukeña kwiluka chakuchinda mafuku, talenu Kaposhi Kakutalila kaChizungu kaJune 15, 1977, mafu 383-384.

[Mwevulu wudi hefu 24]

Apostolu anwini vinyu yemeneneñaku mashi aYesu achitiyañenu (Talenu maparakalafu 11, 12)