Munateli Kudihana Kulonda Muzati Nyidimu Yawanta?

‘Nzambi wakeña muntu wahanaña namuzañalu.’—2 KOR. 9:7.

NSONA JITWATELA KUTOÑOJOKAÑAHU

Indi iji nsona jejima jinateli kutukwasha ñahi kutoñojoka hakudihana kutwadihanaña kuzata nyidimu yaWanta?

1 Kushindulula 29:9

1 Akorinda 16:1, 2

2 Akorinda 8:12

1. Antu amavulu adihanaña ñahi, nawa muloñadi?

 ANTU adihanaña chakufuma hamuchima kulonda azati yuma yalemeshawu. Anvwali azatishaña mpinji yawu, mali, niñovu hakukwasha anyanawu. Hela chakwila akwawu atwansi ahemaña nakudiluñisha, atwansi ahemaña yisela yakudibecha nakwimenaku ituña dawu azataña nañovu ifuku niifuku hakudiza. Yesu niyena wadihanini kulonda yeli yuma yalemesheliyi. Hakeñeleña maheta nikwikala nanyanaku. Ilaña washili muchima hakuzata nyidimu yakutwala Wanta hambidi. (Mat. 4:17; Luka 9:58) Niatumbanji twindi niwena adihanini chikupu hakwila azati nyidimu yaWanta waNzambi. Alemesheli nankashi mudimu wakutwala Wanta hambidi, dichi adihanini chikupu hakuzata nyidimu yaWanta. (Mat. 4:18-22; 19:27) Dichi twatela kudihula netu: ‘Yumanyi yinalemesha muchihandilu chami?’

2. (a) Nyilambwinyi yalema yatela kuhanawu akwaKristu alala ejima? (b) Antu amakwawu adihanaña ñahi kulonda azati nyidimu yikwawu?

² Nyilambu yikwawu yalema nankashi kudi akwaKristu alala nawa yatukwashaña kukwata nikutwalekahu kwikala nawubwambu wawuwahi naYehova. Nyilambu yeniyi yakeñekaña kuzatisha mpinji yetu ñovu, kulomba, kutaña Bayibolu, kudifuukula kwachisaka, kuya kukupompa nikuzata mumudimu wamwiha. * (Yosh. 1:8; Mat. 28:19, 20; Heb. 10:24, 25) Chineli tunakuzata nañovu nawa Yehova nakutukiswila, mudimu wakushimwina wunakuya hambidi nawa antu amavulu anakutwalekahu kuhwila ‘kumpidi yetala daYehova.’ (Isa. 2:2) Hakwila nawu azati chikupu nyidimu  yaWanta, antu amavulu adihanaña kuya nakuzatila haBeteli, kukwasha mudimu wakutuña Matala aWanta, Matala aKupompelamu Kupompa Kwamaneni, kuloñesha kupompa kwankambi hela kuzataku mudimu wakukwasha antu anaholokeli muwubanji. Kuheta wumi wahaya nyaka hikwashindamena hakuzata iyi nyidimuku, ilaña yalema hakutwala nyidimu yaWanta hambidi.

3. (a) Twahetelañamu ñahi neyi tudihana hakwila tuzati nyidimu yaWanta? (b) Malwihwinyi itukuhanjekahu?

³ Kudi kukaankila chikupu kwakuzata nyidimu yaWanta. Twazañalalaña hakumona antu amavulu anakudihana kulonda amuzatili Yehova namuchima wumu. (Tañenu Masamu 54:6.) Kudihana kwamuchidiwu kwatuzañaleshaña nankashi nawa chitunakutalila kwinza kwaWanta waNzambi. (Kuhit. 16:15; Yil. 20:35) Hela chochu, wonsu wetu twatela kudishinshika chachiwahi. Kudihu njila jikwawu jitunateli kudihaninamu kulonda tuzati nyidimu yaWanta? Twazatishaña ñahi mpinji yetu, mali, ñovu niwuswa wetu? Hakudihana, yumanyi yitwatela kwiluka? Tuhanjekenu hachakutalilahu chitunateli kwimbujola hakuhana nyilambu yeniyi mukudikeñela kulonda tusweji kwikala namuzañalu.

NYILAMBU YAHANINEÑAWU MUISARELA WAKUSHANKULU

4. A Isarela aheteleleñamu ñahi mukuhana nyilambu?

⁴ Antu amuIsarela wakushankulu ahanineña nyilambu hakwila nawu ayanakeni nshidi jawu. Antu ateleleli kuhana nyilambu hakwila awani wuselewa waYehova. Nyilambu yikwawu yakeñekeleña kuyihana yikwawu ayihanineña mukudikeñela. (Lev. 23:37, 38) Amulambwileña Yehova nyilambu yakushita yakufuma hamuchima hela yawana. Nyilambu yalambwiluwu hampinji yahanineñayi Solomoni tembeli, hichakutalilahu chanyilambu yamulambwileñawu Yehova.—2 Kushi. 7:4-6.

5. Yehova wetejeli atuzweñi kwila yumanyi?

⁵ Yehova welukili nindi antu ejima hiyanateli kuhana nyilambu yoyimuku, nawa wakeñeleña nindi muntu himuntu yahani kwesekeja nahanakumini ñovu yindi. Yehova washimwini mulushimbi lwindi nindi mashi akanyama ateleleli kuyipwekesha nakwikala ‘mwevulu wayuma yayiwahi yikenza’ kuhitila mudi Mwanindi, Yesu. (Heb. 10:1-4) Hela chochu, Yehova hashimwini nindi antu ateleli kuhana chuma chochateneniyuku. Chakutalilahu, Nzambi wetejeleña mulambu watutela tuyedi neyi muntu hakutwesha kuhana mulambu  wamukoku hela ñombuku. Dichi, niatuzweñi atwesheleña kuhana nyilambu kudi Yehova namuzañalu. (Lev. 1:3, 10, 14; 5:7) Hela chakwila nyilambu yawanyama yahanineñawu yadiña yashiyashana, muntu wejima wahanineña mulambu wakudikeñela wateleleli kwila yuma yiyedi.

6. Yumanyi yateleli kwilayi muntu wudi wejima wahanineña mulambu, nawa kulondela iyi nshimbi kwadiña kwalema ñahi?

⁶ Chatachi, muntu wateleleli kuhana mulambu wawuwahi. Yehova wayilejeli aIsarela nindi mulambu wudi wejima wahanineñawu wateleleli kwikala wakadi hiwatamina hakwila ‘yawiteji.’ (Lev. 22:18-20) Neyi kanyama kachifwayi, Yehova hakitejeleñaku. Chamuchiyedi, muntu wahanineña mulambu wateleleli kwikala wakadi majilu nawa wakadi muloña. Neyi muntu wudi namajilu, wateleleli kuhana mulambu wahanshidi hela mulambu wakutanya kulonda yafuntishi wubwambu windi naYehova henohu kanda yahani mulambu wakufuma hamuchima. (Lev. 5:5, 6, 15) Ichi chadiña chalema nankashi. Yehova washimwini nindi neyi muntu wudi namajilu yadya kuchimuna chamulambu, ateleli kumufumisha hadi antu jaNzambi. (Lev. 7:20, 21) Cheñi nawa, neyi muntu wunakuhana mulambu wudi nawubwambu wawuwahi naYehova nawa mulambu windi wakadi hiwatamina, mukwakuhana mulambu wazañaleleña chacheñi.—Tañenu 1 Kushindulula 29:9.

NYILAMBU YITWAHANAÑA MAKONU

7, 8. (a) Muzañalu wamuchidinyi wekalaña nawantu amavulu adihanaña kulonda azati nyidimu yaWanta? (b) Yumanyi yitukweti yitwatela kuzatisha?

⁷ Makonu, antu amavulu adihanaña namuchima wumu kulonda azati nyidimu yaYehova, nawa chamuzañaleshaña Yehova chikupu. Kukalakela amana kwetu kwatuzañaleshaña chikupu. Mana kwetu wazataña mudimu wakutuña Matala aWanta nikukwasha antu aholokelaña muwubanji wamwekanaña waweni, wahosheli nindi, chakala kulumbulula muzañalu watiyañayi hakuzata iyi nyidimu. Washimwini nindi, “Chinamona amana kwetu niahela chazañalalañawu nichahamekañawu, neyi anatachiki kupompela Mwitala daWanta dadiha hela anatambwili wukwashu neyi kunamwekani wubanji wamwekanaña waweni, chamwekeshaña nawu nyidimu yitwazataña yalema chikupu.”

⁸ Kuloñesha kwaYehova munanu mafuku mpinji yejima kwafwilaña kutwala mudimu waYehova hambidi. Mu 1904, Mana kwetu C. T. Russell wasonekeli nindi: “Wejima wetu twatela kuzata hakumina ñovu  yetu kulonda tuzatishi mpinji yetu, ñovu, mali kushilahu niyuma yikwawu hakumulemesha Yehova.” Twashiyaña yuma yayivulu hakwila nawu tudihana nakumukalakela Yehova, ilaña mwafumaña nkisu yayivulu. (2 Sam. 24:21-24) Komana tunateli kuzatisha chiwahi yuma yitukweti?

9. Lushimbinyi lwashimwiniyi Yesu lwekala haLuka 10:2-4 lutwatela kulondela hakuzatisha mpinji yetu?

⁹ Mpinji yetu. Chakeñekaña mpinji nikuzata nañovu hakutuntulula nikupulinta nyikanda yetu, kutuña matala akudifukwilamu, nikuloñesha kupompa kwankambi nikukwashana neyi kunamwekani wubanji, nikuzataku nyidimu yikwawu yalema. Ifuku dimu tukweti hohu maora 24. Yesu washimwini lushimbi lwatela kutukwasha. Hampinji yatemesheleñayi atumbanji twindi kuya nakushimwina, Yesu wayilejeli nindi bayi ‘emusha muntu munjilaku.’ (Luka 10:2-4) Muloñadi Yesu chahaniniyi nshimbi yamuchidiwu? Muntu wadiza jaBayibolu wahosheli nindi: “Antu Akumusela hiyadimushileña neyi chitwadimushaña etu, chidi neyi kunoñama chanti, hela kudipaka mumakasaku, ilaña adiña nakudikumbata kakavulu, kunoñama nikukama hamaseki. Kudimusha muniyi njila kwakeñekaña mpinji yeneni.” Yesu hakaanishileña atumbanji twindi kwimusha antuku. Ilaña wayikwashili kulonda eluki nawu adiña nampinji yantesha nawa ateleleli kuzatisha chiwahi mpinji yawu kulonda azati nyidimu yalema. (Efwes. 5:16) Komana tunateli kuzatisha ilu lushimbi kulonda twikali nampinji yeneni yakuzata nyidimu yaWanta?

10, 11. (a) Njilanyi jikwawu mwazatishilañawu yawana yitwahanaña kumudimu wamukaayi kejima? (b) Lushimbinyi lwekala ha 1 Akorinda 16:1, 2 lwatela kutukwasha?

¹⁰ Mali etu. Kunakukeñeka mali amavulu akuzatisha kunyidimu yaWanta. Hachaaka nichaaka azatishaña yihita yamali amavulu hakukwasha ankoñi endaña, apayiniya adimena, niamishonali. Kufuma tuhu mu 1999, anatuñi Matala aWanta akubadika ku 24,500 mumatuña ahutwa. Hela chochu, kunakukeñeka kutuña Matala aWanta akushika ku 6,400. Kakweji nikakweji apulintaña makopi akushika ku 100 miliyoni amagazini yaKaposhi Kakutalila niAwake! nyidimu yejimiyi yakwashewaña nayawana yimwahanaña chakufuma hamuchima.

¹¹ Kapostolu Pawulu wahanini lushimbi lutwatela kulondela hakuhana yawana. (Tañenu 1 Akorinda 16:1, 2.) Amoneneni kukolesha amana kwindi muKorinda kubula kuhembelela kunsa yamulungu kulonda amoni yuma yinashaluhu hakwila ahani chawana, ilaña wayilejeli kutenteka hambadi mali kukutachika kwamulungu kwesekeja nayuma yikwetuwu. Neyi chochichadiña muyaaka nkulakaji yasambila, amana kwetu niahela makonu afuukwilañahu chadimu kuhana yuma yikwetuwu kwesekeja nahakumina ñovu yawu. (Luka 21:1-4; Yil. 4:32-35) Yehova wazañalala neyi twikala namuchima wakuhana.

12, 13. Yumanyi yinateli kukañesha antu amakwawu kuzata nañovu nikuzatisha wuswa wawu nawa Yehova nateli kuyikwasha ñahi?

¹² Ñovu yetu niwuswa. Yehova watukwashaña chitwazataña nañovu nikuzatisha wuswa wetu munyidimu yaWanta. Watushika nindi wukatukwashaña neyi tuzeya. (Isa. 40:29-31) Komana twatoñojokaña netu yuma yitweluka yinateli kutukwasha wanyi kuzata mudimu? Komana twatoñojokaña netu kudi antu akuluka yitembi chikupu? Ilukenu nenu, Yehova nateli kukwasha muntu wudi wejima kuwahishaku wuswa wukwetiyi, neyi chakwashiliyi Bezaleli niOholiyabi.—Kwid. 31:1-6; talenu mwevulu wakutachikilahu.

¹³ Yehova watukoleshaña nindi tuzateña hakumina ñovu yetu chakadi kuleka. (Yish. 3:27) Hampinji yatuñulwileñawu tembeli, Yehova wayilejeli aYudeya adiña muYerusalema nindi atoñojoki chiwahi hayuma yelileñawu kutalisha hamudimu wakutuña. (Hag. 1:2-5) Ashili muchima kunyidimu yawu chatela alemeshi mudimu Yehova. Chikuwaha neyi tushinshika kulonda  tumoni neyi chakwila twalemesha chikupu kumuzatila Yehova kubadika yuma yikwawu. Komana kwila ‘tutoñojoka chachiwahi hayuma yitwelaña’ kulonda tuzateña nañovu munyidimu yaWanta munanu mafuku akukuminina nehi?

KUHANA NYILAMBU KWESEKEJA NAYUMA YITUKWETI

14, 15. (a)Indi chakutalilahu chawamana kwetu abula maheta chinatukoleshi ñahi? (b) Twatela kufwila kwila yumanyi?

¹⁴ Antu amavulu ashakamaña mumaluña mwasweja makabi niwuzweñi. Kuloñesha kwetu kwafwilaña ‘kukwasha’ amana kwetu mwanabuluwu ashakamaña mumatuña amuchidiwu. (2 Kor. 8:14) Hela chochu, niamana kwetu abula kuheta niwena eluka nawu kuhana kwalema. Yehova watiyaña kuwaha hakumona atuzweñi niwena anakuhana namuchima wamuzañalu.—2 Kor. 9:7.

¹⁵ Mwituña dimu damuAfrica dahutwa, amana kwetu amakwawu anonaña mbutu yantesha yedishañawu mwiha nakuyilandisha kulonda azatishi mali akufumamu kumudimu waWanta. Mwituña dodimu, mwadiña kukaankila kweneni kwakutuña Itala daWanta. Amana kwetu niahela amwiluña denidi akeñeleña kuzata iwu mudimu. Ilaña, mudimu weniwu wadiñaku hampinji yakudima. Chineli adiña namuchima wakutuña Itala daWanta, nantetemena ayileña nakutuña nampinji yamelela ayileña kumaha awu. Adihanini chikupu. Chumichi chatwanukishaña hadi amana kwetu amuyaaka nkulakaji yakusambila akuMasidoniya. Adiña ‘muwuzweñi waweni,’ ilaña akeñeleña kuzata chikupu mudimu wakutuña. (2 Kor. 8:1-4) Komana ninetu ejima tuhaneña ‘mwashikila ñovu jetu, mwomwashikila kukooleka kwanatukoolekeshiyi Yehova.’—Tañenu Kuhituluka 16:17.

16. Tunateli kwiluka ñahi netu Yehova nakutambwila nyilambu yetu?

¹⁶ Hela chochu, twatelela kubabala. Neyi chahanineñawu AIsarela nyilambu kushankulu, anetu nawa twatela kwiluka netu nyilambu yetu yitunakuhana chakufuma hamuchima Nzambi nateli kuyiteja. Chumanyi chikuleñela Nzambi yakaani nyilambu yetu? Twatela kuzata nakwesekeja kulonda tuzateña nyidimu yetu yalema yakwakamena yisaka yetu, ninyidimu yakundama kukudifukula kwetu kudi Yehova. Neyi twazataña mudimu wakutuña Matala aWanta, nimudimu wakukwasha antu anaholokeli muwubanji ninyidimu yikwawu, iyi nyidimu ‘hiyakuyitambwilaku’ neyi tukañanya kukwasha chisaka chetu kukolesha wubwambu wawu naYehova nikuyakamena kumujimba. Dikwila nawu tunakuhana yuma yitunabuli. (Tañenu 2 Akorinda 8:12.) Cheñi nawa twatela kukolesha wubwambu wetu naYehova kulonda abuli kutukaana. (1 Kor. 9:26, 27) Hela chochu, twatela kukuhwelela netu neyi tukakela kunshimbi jamuBayibolu, tukuzañalalaña nanyilambu yitukuhanaña nawa Yehova ‘wukuyitambwilaña.’

NYILAMBU YITWAHANAÑA YALEMA CHIKUPU

17, 18. Twatela kutiya ñahi hadi antu anakudihana kuzata nyidimu yaWanta, nawa wejima wetu twatela kutoñojoka hachumanyi?

¹⁷ Amana kwetu niahela adihanaña neyi ‘mulambu wavinyu yakuhuñununa’ hakuzata nyidimu yaWanta. (Fwi. 2:17) Twahamekaña antu ejima ahanaña chakufuma hamuchima. Twahamekaña añodawa mana kwetu anakulombola nyidimu yaWanta nianyanawu chadihanañawu namuchima wumu.

¹⁸ Chinakukeñeka kuzata nañovu hakwila nawu tuzati nyidimu yaWanta. Dichi wejima wetu twatela kulomba nikutoñojoka chikupu chitunateli kuzata hakumina ñovu yetu. Kuhwelelenu nenu mwakatambwila nkisu yayivulu chayinu mpinji ‘nikunyaka yakenza.’—Maku 10:28-30.

[Tumazu twaheshina]

[Malwihu aKuzatisha haKudiza]

[Mwevulu wudi hefu 12, 13]

Nyilambu yayivulu ayihanineña chakufuma hamuchima, neyi chitwahanaña nyilambu makonu (Talenu maparakalafu 4, 7-13)

[Mwevulu wudi hefu 12]

Akwakushimwina aWanta adi Mwitala daWanta kuKenya, Africa

[Mwevulu wudi hefu 13]

Mana kwetu wekala muKometi Yakutuña Matala aWanta, muTuxedo, New York, U.S.A.

[Mwevulu wudi hefu 13]

Antu azatileña haBeteli muAustralia