Yehova Wayikiñili Mujimpidi Jafwana Mwahitileñawu

MUMBANDA wumu chahindukiliyi nabudidi wedikilili kuchisu chakumbidi nawa wawanini ifunda hachinsu. Chanoneliyi ifunda watachikili kutalatala, ilaña mumukwakwa mwadiña mwosi muntu. Kudi mwenyi wakadi kwiluka waleteli idi ifunda nawufuku. Chasumbililiyi hefunda wanyakeli kwiñila mwitala yashika nikuchisu. Yuma yamweni hefunda diyaleñeleli yafunti mwitala lufuchi. Hadina ifunda hadiña nyikanda yashindamena haBayibolu yakaanishiluwu. Chafumbatiliyi dina ifunda, walombeli mumuchima windi nakumusakilila Yehova hakumuletela yakudya yayiwahi yakuspiritu.

Ichi dichamwekeneña muGermany muyaaka yamuma 1930. Nfulumendi yaNazi chiyatachikili kuyuula mu 1933, mudimu wawaYinsahu jaYehova awukaanishili mumaluña amavulu mudina ituña. Richard Rudolph, wunabadiki dehi yaaka 100 yakuvwalika * wahosheli nindi: “Twelukili chikupu netu antu hiyanateli kukañesha mudimu wakutiyakesha Yehova nijina dinduku. Nyikanda yashindamena haBayibolu diyi nyikanda yalema yitwazatishileña mumudimu wakushimwina nikudizisha antu. Hela chochu, chakalili kwikala naniyi nyikanda muloña ayikaanishili. Dichi twelukili wanyi chakutwalekahu namudimu wakushimwina.” Chimwahitili mpinji yantesha Richard welukili nindi nateli kuzata mudimu wakuwombolola nyikanda. Mudimu weniwu awuzatileña mujimpidi nawufuku—Ansomp. 9:36.

KUKALA KWAMWENEÑAWU AKWAKUWOMBESHA NYIKANDA

Neyi muhitila kunsulu yakaloña Elbe (hela, Labe), mukuwana Mpidi Jamaneni (Krkonoše), jekala muñinza yetuña daCzech Republic niPolanda. Hela chakwila iji mpidi jajilehi namamita akushika ku 1,600, iji mpidi ajitenaña nawu chitutu chakukabeta kambwela kumusela waEurope. Kwekala mayimakanza amaneni akushika kujimita jisatu nawa abutaña chikunku champata kwakwihi nachaaka. Antu adiwulaña mpepela yekalaku yahimpikaña anateli kufwa mashika muloña wambundu yekalañaku mukukasumwisha.

Hayaaka yayivulu yinahituhu iyi mpidi yambula ñinza natubeta, mawanta nijimbaka. Kuhita munawa  matuña kwadiña kwafwana, dichi kunyima antu amavulu amunawa maluña awombesheleña yuma yakuwombesha muniji mpidi. Muyaaka yamuma 1930 iji Mpidi jabwili ñinza Czechoslovakia naGermany, nawa aYinsahu atachikili kuzatisha njila yalekeli kuzatishawu akwakuwombesha yuma. Kulonda elidi? Kulonda awombololi nyikanda yalema yashindamena haBayibolu kufuma kwiluña kuyadiña nakutwala kwacheñi. Mukwenzi weyala wejina daRichard wadina hakachi kanana aYinsahu.

KUHITA MUMALUÑA AFWANA

Richard wanukaña nindi: “Kunsa yamulungu twayileña kujimpidi mumazanvu awantu atanu nayedi hela kubadikahu, akwenzi awamayala avwalileña neyi akwakwenda mumasaña. Twendeli maora kwakwihi nasatu kufuma kuGermany hakwila nawu tuketwankeshi jimpidi nakushika kuŠpindlerův Mlýn,” hekala chitampu chakushika kumakilomita 16.5 hakushika kuCzech. Kunyaka, akaGermany amavulu ashakamineña kunidi iluña. Dichi ndimi wumu wetejeli kuyikwasha amana kwetu. Chineli wadiña netemba dawatuwalu mwasendeleleñayi antu ayileña nakunooka, waloñelumu yikasha yanyikanda yafumini kumbaka yekala mukamwihi kwadiña nakushikena yikasha yenjileña namasuwa kufuma kuPrague. Wasendeli yikasha nakuyitwala kufwamu yindi nakuyisweka mumatahu akudyisha añombi nakwimena akwakusenda nyikanda kulonda ayitwali kuGermany.

Richard watwalekeluhu nakuhosha nindi: “Chitwashikili hafwamu, twayiloñejeli muyola yakusendelamu yuma yalema. Hamuntu hamuntu twasendeleña chiteli chalema namakeji 50.” Hakwila abuli kuyikwata endeleña nawufuku, anyamukileña namelela nawa ashikileña kumatala ifuku dikwawu henohu itena kanda diseli. Wiesner wadiña nkoñi wañinza muGermany hayina mpinji washimwini njila mwakudikiñila nindi: “Amana kwetu ayedi atwaminineñaku, chiyahumañanawu muntu asoñamishileña akwawu kuhitila mukwambula toochi. Ichi chinjikijilu chayikwashileña amana kwetu asendeli yitelu yalema alondeleleña hanyima hadiña chitampu chajimita jakushika ku 100 kulonda aswami, sampu amana kwetu ayedi adiña hambidi enza nakuyileja chinjikijilu chakwila nawu asoloki, chahimpileñawu mulungu nimulungu.” Hela chochu, hiyachinineña hohu akapokola akuGermany avwalileña yunifomu yawusombuku.

Richard wanukili nindi: “Ifuku dimu namelela nazatili maora amavulu, dichi yami nadiña mutachi kunyamuka  kufuma kuCzech kubadika amana kwami. Kwachidiña wufuku nawa kwadiña nimbundu, nadiña nakuzala muloña wamashika anokeleña neyi nvula. Najimbeleli munyitondu yatenañawu nawu Pinus mugo nawa hakwila niwani njila mwahitili maora amavulu. Ichi dichafwañawu akwakwenda amavulu. Nalubukili hohu hampinji yinahumañeni amana kwami afuntileña nabudidi yayeni.”

Hadi yaaka yisatu, izanvu danyanya dawamana kwetu ahamuka ahitileña mujimpidi mulungu nimulungu. Hampinji yamashika, ahitileña mujimpidi kuzatisha tuyuma twakwendelahu twatenañawu nawu skis iku analoñi nyikanda muyola yakweleka munyima. Mpinji yikwawu, mazanvu awamana kwetu akushika ku 20 ahitileña muñinza namwaana, kuhitila mukuzatisha nteeta yazatishaña akakwenda mumasaña. Ayileña hamu nawahela kulonda antu amoneña nawu hiyakwakwenda hohu mumasaña. Ahela amakwawu ayileñahu dehi kumbidi nawa chamonawu nawu kudi muntu anatileña matepawu mwiwulu.

Chumanyi chamwekeneña neyi akwakwenda anafunti dehi? Adiña nakuzata nañovu chikupu kulonda ahani nyikanda mukunyakashana. Munjilanyi? Nyikanda ayiloñeleña mumafunda neyi nyilola nakuyitwala kuchitesheni chamasuwa kuHirschberg. Dichi awa mafunda ayitemesheleña kumaluña ashiyashana amuGermany, amana kwetu niahela niwena ayihanineña kudi akwawu akwakwitiya mukuswamujoka neyi chalumbululawu hatachi. Aka kafuta kazatishileñawu hakuhana nyikanda neyi akifuñunwini kadi kuleta wubanji weneni. Mwalala, ifuku dimu antu acheñi diwu afuñunwini aka kafuta.

Mu 1936, awanini itala mwahembeleleñawu nyikanda kukamwihi naBerlin. Hayuma yawaninuwu hadiña nimafunda asatu afumini kudi muntu wakubula kwiluka muHirschberg. Akapokola atachikili kutala yizala yansona yasonekeluwu kulonda eluki muntu walombweleña izanvu dawakwakuwombolola nyikanda nawa amukwatili. Chimwahitili mpinji yantesha, antu ayedi amweneñawu nawu adiña hakachi kawu, kushilahu niRichard Rudolph, ayikasili. Hamuloña wakwila amana kwetu hiyadikaliluku, amana kwetu amakwawu atwalekeluhu nakuwombolola nyikanda nakuhita mumaluña afwana.

CHUMA CHITUKUDIZILAKU

Nyikanda yaleteleleñawu muyola yakweleka munyima kuhita muJimpidi Jamaneni diyi njila yalema yadiña yakuhaninamu nyikanda yashindamena haBayibolu kudi aYinsahu amuGermany. Kudi njila yikwawu yazatishileñawu kubadika yina njila yahitili muJimpidi Jamaneni. Kwadiña njila jikwawu jahitili muñinza yadina ituña, kushika nimu 1939 mpinji yatachikili kuyuula amashidika awaGermany ituña daCzechoslovakia. Mumatuña amakwawu adikuma ñinza naGermany, adi neyi France, Netherlands, niSwitzerland, aYinsahu ashakamineña kumatuña wenawa ashileña wumi wawu hakatoña hakwila atwalili akwawu akwakwitiya ayandishileñawu yakudya yakuspiritu.

Etu amavulu makonu, tukweti nyikanda yashindamena haBayibolu yayivulu munyitapu yashiyashana. Neyi mutambula mukanda wawuha Hetala daWanta hela muloñolola haWebu sayiti ya jw.org, komana kwila mutoñojoka hanyidimu yazatiluwu hakwila mukanda wushiki kudenu nehi? Hela chakwila hiwahitili munjila jakala jakuhita mujimpidi nawufukuku, ilaña akwenu akwakwitiya ayikalakelaña azatili nañovu hakwila muwutambuli.

[Tumazu twaheshina]

[Mazu aKusakilila eniMwevulu wudi hefu 3]

Mwevulu: Pavel Taclík

[Mwevulu wudi hefu 4]

Amana kwetu niahela avwalileña neyi akakwenda mumasaña iku anasendi nyikanda nakuhita muJimpidi Jamaneni nakuya muGermany

[Mwevulu wudi hefu 5]

Kuhita muniji Mpidi Jamaneni mwadiña mayimakanza kwadiña kwafwana