Chuma Chinafuukwiluhu Hinachidiña Kansi

NADIÑA hohu nayaaka ikumi mu 1985 hampinji yenjiluwu akashikola afumini kuCambodia hashikola yetu muColumbus, Ohio, U.S.A. Kansi wumu weyala welukili mazu antesha amuChizungu. Watachikili kunleja nyevulu yatama yamwekesheleña antu ayandishileñawu, ajahiluwu niapulukili. Hakukaama nawufuku nadilileña neyi nanuka ana anyana. Nafwilileña kuyileja nsañu yakuchiñeja yahosha haParadisa nikusañuka, ilaña adiña eluka idimi dami wanyi. Hela chakwila nachidiña kansi, nafuukwiluhu kudiza idimi daCambodian kulonda nishimwineña akwetu akashikola hadi Yehova. Nelukili wanyi nami chuma chinafuukwiluhu chikahimpa chihandilu chami kumbidi.

Kudiza idimi daCambodian kwadiña kwakala. Kwashalili hohu chantesha chiña nalekeli kudiza, ilaña Yehova wankolesheli kuhitila mudi anvwali jami. Mukuhita kwampinji, antañishi jami niakwetu akashikola atachikili kunkakeja nawu nikeñi mudimu wawuwahi. Ilaña nakeñeleña kwikala payiniya, dichi natondeli kudiza nyidimu yatela kunkwasha kwiñila mudimu wakuzata kapinji kantesha hakwila nizateña wupayiniya wunakeñeleña. Chinafumineña kushikola nadibulakeneña nawapayiniya nakuzata nawu mumudimu wakushimwina. Nadihanini cheñi kudizisha atudizi adizileña idimi daChizungu, ichi chankwashili chikupu kumbidi.

Chinadiña nayaaka 16, natiyili nawu kuLong Beach, California, U.S.A kwadiña izanvu dadiñi nakudiza idimi daCambodian. Nayili kunidi iluña nawa nadizili kutaña idimi daCambodian. Chinamanishili tuhu shikola, nekalili payiniya nawa natwalekeluhu kushimwina antuñi netu ahosheleña idimi daCambodian. Chinashikijili yaaka 18, natachikili kutoñojoka hakubuukila kwituña daCambodia. Dadiña ituña dafwana, ilaña nelukili nami antu antesha hohu diwu atiyahu dehi nsañu yayiwahi yaWanta, hakachi kawantu 10 miliyoni ashakamaña mwituña daCambodia. Hayina mpinji, mudina ituña mwadiñi hohu chipompelu chimu chadiña nawakwakushimwina 13. Mpinji yatachi yinayili kuCambodia nadiña nayaaka 19. Chimwahitili yaaka yiyedi, nafuukwiluhu kuya nakushakama kuCambodia. Nawanini mudimu wakuzata kampinji kantesha wakubalumuna nikutañisha Chizungu kulonda niwaneñamu mali akudikwasha nachu mumudimu wakushimwina. Mukuhita kwampinji nasumbwili mumbanda wakeñeli mudimu wowumu nawunakeña. Ami niñodami tunakwashi antu amavulu akuCambodia kulonda adihani kudi Nzambi.

Yehova wanyinka yuma ‘yakeña muchima wami.’ (Mas. 37:4) Kwilisha atumbanji diwu mudimu walema nankashi hanyidimu yejima. Hayaaka 16 yinazatili mwituña daCambodia, ana ambuña Yehova adiña antesha akushika ku 13 anavuli nakushika muyipompelu 12 nimazanvu awana ekala kumaluña acheñi!—Washimwini Jason Blackwell.

[Mwevulu wudi hefu 32]

Hinadiña Kansi