Fuukulenuhu Yuma Yayiwahi Hampinji Yimuchidi Atwansi

“Anyikwenzi nayañadima; . . . ahameki ijina daYehova.”—MAS. 148:12, 13.

MUNATELI KULUMBULULA?

Atwansi anateli kwiladi chayinu mpinji kulonda akadiluñishi kukooleka kwakumuzatila Yehova kumbidi?

Indi antu amakwawu adiluñishaña ñahi hampinji yachiduwu atwansi?

Nshimbinyi yamuBayibolu yinateli kuyikwasha kulonda mufuukuluhu chiwahi yuma yimwatela kwila muchihandilu?

1. Nyidimwinyi yayiwahi yinakuzatawu atwansi akwaKristu amavulu?

 TUNAKUSHAKAMA mumpinji yalema. Antu amavulu makonu mumatuña ejima anakuhwila kukudifukula kwalala. (Chim. 7:9, 10) Atwansi amavulu anakuhetelamu chikupu hakukwasha amakwawu kulonda adizi chalala chamuBayibolu chapulwishaña wumi. (Chim. 22:17) Amakwawu anakudizisha antu Bayibolu, nakuyikwasha kulonda ahandeña chiwahi. Amakwawu niwena anakudikita chikupu kulonda ashimwineña nsañu yayiwahi mumaluña mwahoshañawu idimi dacheñi. (Mas. 110:3; Isa. 52:7) Munateli kudiluñisha ñahi iwu mudimu wawuwahi wunakuzatawu antu jaYehova?

2. Chakutalilahu chaTimotewu chamwekeshaña ñahi nawu Yehova wakeñaña kwinka atwansi nyidimu? (Talenu mwevulu wakutachikilahu.)

² Chineli muchidi atwansi, munateli kufuukulahu yuma yinateli kuyileñela mukekali nakukooleka kweneni kwakumukalakela Nzambi kumbidi. Chakutalilahu, Timotewu wakuLisitira wafuukwiluhu yuma yayiwahi, yamuleñeleli yekali nakukooleka kwakwikala kamishonali, wachidiña muyaaka yamuma 19 hela 20. (Yil. 16:1-3) Hadaha chimwahitili tukweji twantesha, kufuma hampinji yashiliyi kapostolu Pawulu chipompelu chachiha chatuñiluwu muTesalonika hamuloña wekañesha, Pawulu wamushilili kansi Timotewu mudimu wakufunta kuTesalonika nakukolesha amana kwindi. (Yil. 17:5-15; 1 Tesa. 3:1, 2, 6) Indi Timotewu watiyili ñahi hakutambwila iwu mudimu?

 CHUMA CHALEMA NANKASHI CHIMWATELA KUFUUKULAHU

3. Chumanyi chalema nankashi chimwatela kufuukulahu, nawa mpinjinyi yimwatela kwila mwenimu?

³ Hampinji yimuchidi atwansi diyi mpinji yakufuukulahu yuma yalema. Kufuukulahu kumukalakela Yehova dichi chuma chalema nankashi kubadika yuma yejima. Mpinjinyi yimwatela kufuukulahu kumukalakela Yehova? Yehova wahosha nindi: “Anukaña . . . Nleñi yeyi mumafuku awukwenzi weyi.” (Mukwa. 12:1) Kumukalakela Yehova chikupu diyi njila yayiwahi ‘yakumwanukilamu.’ (Kuhit. 10:12) Neyi mufuukulahu kumukalakela Nzambi namuchima wenu wejima dichuma chabadika kulema. Neyi mwila mwenimu chikayikwasha kumbidi muchihandilu chenu.—Mas. 71:5.

4. Yumanyi yikwawu yalema yimwatela kufuukulahu yikayikwasha kumukalakela Nzambi?

⁴ Kafwampi, kufukulahu kumukalakela Yehova hidichi chuma chikayikwasha hohu kumbiduku. Chakutalilahu, munateli kutachika kudihula neyi mwamba keñila mumaluwi, nimuntu imukeñila nindi mumaluwi, nichimwakahandaña. Iyi hiyuma yalema yimwatela kufuukulahu, ilaña chikuwaha neyi mukusambila kufuukulahu kumukalakela Yehova chikupu. (Kuhit. 30:19, 20) Muloñadi? Muloña yumiyi yendelaña hamu. Chuma chimukufuukulahu kutalisha hamaluwi nimudimu chinateli kuyileñela mumukalakeli Nzambi hela nehi. (Esekejenu Luka 14:16-20.) Mwalala, neyi mufuukulahu kumukalakela Nzambi chikuyikwasha kutonda chiwahi muntu imwatela kwiñila nindi mumaluwi nimudimu wumukuzataña. Dichi mwatela kusambila kufuukulahu yuma yalema.—Fwi. 1:10.

YUMANYI YIMUKWILA MUWANSI WENU?

5, 6. Lumbululenu kufuukulahu yuma yayiwahi chikwatetaña nkisu kumbidi. (Talenu cheñi chibaaba chinakwila nawu “Chuma Chinafuukwiluhu Hinadiña Kansi” muchinu chibaaba.)

⁵ Chimwatondahu kumukalakela Nzambi, munateli kutoñojoka hayuma yakeñañayi nindi mwili, nawa munateli kufuukulahu chimwatela kumukalakela. Mana kwetu wakuJapan wasonekeli nindi: “Chinadiña nayaaka 14, nayili nakushimwina naeluda wamuchipompelu wamweni nindi nadiluñishileña wanyi mumudimu wakushimwina. Wanlejeli mumesu awunda nindi: ‘Yuichiro yaku kwitala. Chiwashika wushakami hamaseki nakutoñojoka chiwahi hayuma yinakukoñeliyi Yehova.’ Nelili mwalejeliyi. Nawa natwalekeluhu nakutoñojoka nikulomba hadi mafuku amavulu. Natachikili kuhimpa yitoñojoka yami chovu chovu. Chimwahitili mpinji, natachikili kudiluñisha kumukalakela Yehova. Nadiluñishileña kutaña nsañu yahoshaña hadi amishonali, nawa natachikili kutoñojoka hakumukalakela Nzambi chikupu.”

⁶ Yuichiro wahosheli cheñi nindi, “Nafukwiluhu kwila yuma yikankwasha kumukalakela Yehova kumaluña acheñi. Chakutalilahu, natachikili kudiza Chizungu. Chinamanishili shikola, nazatileña mudimu wampinji yantesha wakutañisha Chizungu kulonda nitwalekuhu kuzata mudimu wawupayiniya. Chinashikijili yaaka 20 yakusemuka, natachikili kudiza idimi daMongolian nawa nadiña nakukooleka kwakuhepula izanvu dawakwakushimwina dazatishileña idimi daMongolia. Chimwahitili yaaka yiyedi, mu 2007 nayili nakuhempula iluña daMongolia. Chinayili nakushimwina nawapayiniya amakwawu namweni nami antu amavulu akeñeleña chalala, dichi nafwilileña kuya nakuzatilaku. Nafuntili kuJapan kulonda nimoni chinatela kuzata. Nichidi kuzatila wupayiniya kuMongolia kufuma tuhu muApril 2008.Chihandilu chakala. Ilaña antu akeña nsañu yayiwahi, nawa inakuyikwasha kulonda akundami kwakwihi naYehova. Natoñojokaña nami natondeluhu chuma chachiwahi nankashi muchihandilu chami.”

7. Yumanyi yitwatela kufuukulahu, nawa chakutalilahwinyi chashiliyi Mosi?

⁷ Muntu nimuntu watela kufuukulahu yomwenindi yuma yatela kuzatayi muchihandilu chindi hamu neyi Chinsahu chaYehova. (Yosh. 24:15) Hitunateli kuyileja netu mwiñili mumaluwi hela kuyinyikila muntu wakwiñila nindi mumaluwi nimudimu wumwatela kwiñilaku.  Komana kwila mutonda mudimu wumwatela kudiza hadi mpinji yantesha nehi? Enu atwansi akwaKristu amakwawu mwashakamaña munyikala yahutwa; amakwawu ekala munyisumba mwekala maheta. Atwansi ekala mukaayi kejima, akweti yililu yambukaku chikupu, wuswa, yuma yelukawu, yakeñawu niyakuhwelelawu. Hadaha ninenu mwambuka chikupu nawakwenu atwansi neyi chambukiluwu atwansi Aheberu akushankulu adiña muEjipitu naMosi hadiñayi kansi. Wadiña nakukooleka kwakwikala muchipañu chamwanta, ilaña akwawu Aheberu adiña anduñu. (Kwid. 1:13, 14; Yil. 7:21, 22) Niwena adiña nakushakama mumpinji yamwekeneña yuma yayiwahi, neyi mpinji yimunashikumu. (Kwid. 19:4-6) Muntu nimuntu wateleleli kufuukulahu yuma yateleleli kwilayi muchihandilu chindi. Mosi watondeluhu yuma yayiwahi.—Tañenu Aheberu 11:24-27.

8. Kudihi kumunateli kuwana wukwashu hakwila mufuukuluhu yuma yayiwahi muchihandilu?

⁸ Yehova wayikwashaña kulonda mufuukuluhu yuma yayiwahi hampinji yimuchidi atwansi. Wayifumbaña kuhitila mukuyinka nshimbi jindi jimunateli kuzatisha muyuma yimwamonaña muchihandilu chenu. (Mas. 32:8) Kubombelahu, anvwali jenu etiya niaeluda amuchipompelu anateli kuyikwasha kulonda mwiluki chakuzatisha iyi nshimbi. (Yish. 1:8, 9) Tushinshikenu hanshimbi jisatu jalema jamuBayibolu jinateli kuyikwasha hakwila mufuukuluhu yuma yayiwahi yikayikwasha chikupu kumbidi.

NSHIMBI JISATU JAMUBAYIBOLU JINATELI KUYIKWASHA

9. (a) Yehova watulemesha ñahi hakutwinka wuswa wakutondahu? (b) ‘Kusambila kukeña Wanta’ kwaletaña kukoolekanyi?

⁹ Sambilenu kukeña Wanta waNzambi nikuloña kwindi. (Tañenu Matewu 6:19-21, 24-26, 31-34.) Yehova watulemesha hakutwinka wuswa wakutondahu yuma etu aweni. Hashimuna nindi mwatela kuzatisha mpinji yenu yejima mumudimu wakushimwina Wantaku. Ilaña Yesu watwinkeli lushimbi lwatela kutukwasha kusambila kukeña Wanta. Kuzatisha mazu ahosheliyi kukuleñela mwikali nakukooleka kwakumwekesha chimwamukeña Nzambi, antuñi nenu nichimwalemesha kuchiñeja kwawumi wahaya nyaka. Chimukutoñojokaña hansañu yakwiñila mumaluwi ninyidimu, shinshikenu hayuma yimukufuukulahu neyi yikuleñela muswejeña kwakamena yuma yakumujimba indi kwiji mukwikala neyena dakukeña Wanta waNzambi nikuloña kwindi.

10. Yumanyi yamuzañalesheleña Yesu, nawa yumanyi yimukutondahu yinateli kuyizañalesha?

¹⁰ Zañalalenuña hakukalakela amakwawu. (Tañenu Yililu 20:20, 21, 24, 35.) Yesu watudizishili chiwahi lushimbi lwalema lwatela kutukwasha muchihandilu. Wadiña namuzañalu chikupu muloña welili mwaya muchima waTata yindi kubadika kwila mwakeñeleñayi. Yesu watiyileña kuwaha hakukwasha antu adizoza atiyi nsañu yayiwahi. (Luka 10:21; Yow. 4:34) Hadaha ninenu mudi namuzañalu hamuloña wakukwasha antu. Neyi yuma yalema yimukufuukulañahu muchihandilu chenu yikushindamenaña hanshimbi jatañishiliyi Yesu, chakadi nikujina mukuzañalala nawa mukuzañaleshaña nimuchima waYehova.—Yish. 27:11.

11. Muloñadi Baruki chabuliliyi kwikalayi namuzañalu, nawa Yehova wamufumbili ñahi?

¹¹ Dichi muzañalu waweni wafumaña mukumukalakela Yehova. (Yish. 16:20) Hadaha Baruki nsoneki yaYeremiya niyena wavulameneni chumichi. Kwadiña mpinji yimu, yalekeliyi kudiluñisha hakumukalakela Yehova. Yehova wamulejeli nindi: “Wudi nakukeñakeña yuma yeyi yamaneni tahindi? Bayi wuyikeñakeñaku. Tiya, ami nakaleta katama hadi antu ejima. Ilaña wumi weyi nakakwinkawu wakekala neyi chuma chakupupa kunjita mwejima muwakaya.” (Yere. 45:3, 5) Enu munakutoñojoka nenu, yumanyi yadi kumuzañalesha Baruki, kukeñakeña yuma yamaneni tahindi, kupuluka hampinji yajilumwinuwu Yerusalema neyi kambuña Nzambi washinshika?—Yak. 1:12.

12. Yumanyi yafuukwiluhu Ramiro yamuzañaleshaña muchihandilu?

¹² Mana kwetu Ramiro wazañalalaña hamuloña wakukalakela amakwawu. Wahosheli  nindi: “Nafuma muchisaka chahutwa chashakamaña mumukala waAndes wamaMpidi. Dichi yayami weyala chakeñeleñayi kunfwetela mali kulonda niyi kushikola yamuñoñi, kwadiña hikukooleka chikupu. Ilaña nafumini tuhu hakumpapatisha neyi Chinsahu chaYehova, nawa payiniya wumu walejeli nindi nizateña nindi mumbaka yanyanya. Nayili nindi nawa nadizili chakutewula nsuki kulonda niwaneñamu mali akudikwasha nachu. Chitwadiñi nakutañisha antu amavulu Bayibolu adiñi nakutiyilila. Chimwahitili mpinji, natachikili kupompa nachipompelu chachiha chazatishileña idimi detu. Nakalakali mudimu wampinji yejima hadi yaaka ikumi. Kwosi mudimu watela kunzañalesha kubadika chinazañalalaña hakukwasha antu kudiza nsañu yayiwahi mwidimi dawu.”

13. Muloñadi mpinji yimuchidi atwansi chiyekalila mpinji yayiwahi yakumukalakela Yehova chikupu?

¹³ Zañalalenuña hakumukalakela Yehova muwansi. (Tañenu Mukwakutañisha 12:1.) Himwatela kutoñojoka nenu chiña musambila kwiñila mudimu wawuwahi mwaka dinu mukamukalakeleña Yehova kumbiduku. Hampinji yimuchidi atwansi diyi mpinji yayiwahi kumukalakela Yehova chikupu. Atwansi amavulu adana nyidimu yayivulu yamuchisaka nawa akola kumujimba, anateli kuzata nyidimu yakola. Yumanyi yimunakukeña kumuzatila Yehova himuchidi atwansi? Hadaha munakukeña kwikala payiniya. Munateli nikuya nakuzatila kwiluña kwahoshañawu idimi dacheñi. Indi kwiji munateli kuwana njila yimwatela kuzatilamu chikupu muchipompelu chenu. Hela chakwila munakufwila kukalakala chikupu nyidimu yaNzambi, mwatela cheñi kuwana njila mwakuhandila. Mwatela kudiza mudimu wamuchidinyi? Mudimu wamuchidinyi wumwatela kutonda?

MWATELA KUZATISHA NSHMBI JAMUBAYIBOLU HAKWILA MUFUUKULUHU CHIWAHI

14. Muntu watela kubabala nayumanyi neyi nakufuukulahu yuma yakumbidi?

¹⁴ Nshimbi jisatu jamuBayibolu jitunahanjekuhu jinateli kuyikwasha kwiluka mudimu  wumunateli kuzata. Chakadi nikujina, antañishi jenu ayifumbaña hansañu yanyidimu anateli kwiluka kunateli kuwanika nyidimu. Hela kunateli kwikala mutayi wanfulumendi wunateli kuyileja kunakwiñijawu nyidimu mwiluña denu hela kumunakukeña kuzatila. Nsañu yikuyilejawu yinateli kuyikwasha ilaña mwatela kubabala. Antu abula kumukeña Yehova anateli kuyileñela mutachiki kukeña yuma yampata yamunu mwishina. (1 Yow. 2:15-17) Neyi mumona yuma yinakumwekana mukaayi, muchima wenu wunateli kuyidimba.—Tañenu Yishimu 14:15; Yere. 17:9.

15, 16. Hinyi wunateli kuyikwasha kulonda mwiluki mudimu wumwatela kuzata?

¹⁵ Chimweluka nyidimu yimwatela kuzata, mwatela kukeña muntu wakuyifumba chachiwahi. (Yish. 1:5) Hinyi watela kuzatisha nshimbi jamuBayibolu kulonda yayikwashi mwiluki chachiwahi mudimu wumunatondi? Tiyililenu kudi antu amukeña Yehova, ayikeña ninenu, nawa ayiluka, eluka nichekala chihandilu chenu. Anateli kuyikwasha mwiluki chiwahi yuma yimwatela kwila niyimunakukeña kwila. Hadaha yuma yinateli kuyilejawu yikuyikwasha mutoñojokuhu cheñi hayikonkwanyi yimunemiki. Neyi anvwali jenu amukeña Yehova dikwila nawu mwakooleka chikupu! Cheñi, aeluda ekala muchipompelu chenu hiyamayala apama kuspiritu anateli kuyikwasha. Kubombelahu, hanjekenu nawapayiniya niankoñi endaña. Muloñadi chiyatondeleluwu mudimu wampinji yejima? Atachikili ñahi kuzata mudimu wawupayiniya nawa awanaña ñahi mwakuhandila? Kuwahanyi kunawanuwu mumudimu wawu wakushimwina?—Yish. 15:22.

¹⁶ Antu ayiluka chachiwahi anateli kuyifumba nakashinshi. Twili netu munakukeña kuleka shikola kulonda mutachiki kuzata mudimu wawupayiniya muloña wakubula kukeña kuzata nañovu kushikola. Muntu wayikeña nateli kwiluka yitoñojoka yenu nawa nateli kuyikwasha mwiluki nenu kutaña shikola kunateli kuyikwasha mwikali atatakena, ichi chililu chalema chinateli kuyikwasha mumukalakeli Yehova chikupu.—Mas. 141:5; Yish. 6:6-10.

17. Yumanyi yitwatela kutondolwela neyi hitukufuukulahu?

¹⁷ Muntu wejima wamukalakelaña Yehova nateli kuhita muyuma yinateli kuluwañesha wubwambu windi naYehova, kukala kweniku kunateli kumufumisha kudi Yehova. (1 Kor. 15:33; Kol. 2:8) Ilaña kudi nyidimu yikwawu yinateli kusha wubwambu wetu naYehova mukukala kwakweni kubadika nyidimu yikwawu. Kuduhu antu amakwawu mwiluña denu ‘anajiyishi dehi chikuhwelelu chawu’ hanyima yakwiñila nyidimu? (1 Tim. 1:19) Chikuwaha neyi mukubula kufuukulahu yuma yinateli kumanisha wubwambu wenu naNzambi.—Yish. 22:3.

TIYINU KUWAHA HAKWIKALA MUKWAKRISTU WAKANSI

18, 19. Neyi muntu wudana muchima wakumukalakela Yehova nateli kwiladi?

¹⁸ Neyi munakufwila kumukalakela Yehova, diluñishenu kukooleka kwenzaña hamuloña wakwikala kambuña Nzambi wakansi. Tondenu yuma yinateli kuyikwasha mudiluñisheña kumukalakela Yehova muyinu mpinji munakumwekana yuma yakuzañalesha.—Mas. 148:12, 13.

¹⁹ Hanu dinu, munateli kwiladi neyi mudana muchima wakumukalakela Yehova? Mwatela kutwalekahu nakukolesha chikuhwelelu chenu. Kapostolu Pawulu washimwini chazatiliyi nañovu hakwila yazati nyidimu yaleñeleli Nzambi yamukiswili, wasonekeli nindi: “Neyi hansañu yimu mukutoñojoka mwacheñi, hela nsañu oyu Nzambi wukuyilejamu. Ilaña tukakelenu kwenda mutunashiki dehi.” (Fwi. 3:15, 16) Twalekenuhu nakutoñojoka hakukeña kwaNzambi nihayuma yayiwahi yatufumbañayi. Yehova nateli kuyikwasha kulonda mufuukulahu yuma yayiwahi himuchidi atwansi, kubadika muntu wudi wejima.

[Malwihu aKuzatisha haKudiza]

[Mwevulu wudi hefu 20]

Ramiro wadiluñishaña kumuzatila Yehova kufuma tuhu kuwansi windi (Talenu parakalafu 12)