“Wanta Weyi Winzi,” Wakenza Mpinjinyi?

“Chimwakamona yuma yejimiyi, kelukenu nenu yena wudi kwakwihi.”—MAT. 24:33.

MUKWAKULA NENUDI?

Indi yuma yinakumwekana mukaayi kufuma mu 1914 yinakushikija ñahi wuprofwetu wamuBayibolu?

Yuma chiyinakusweja kutaminaku mukaayi yinakumwekesha chumanyi?

Munakutiya ñahi chineli kukuma kudi mukamwihi nankashi?

1, 2. (a) Yumanyi yatuputishaña mesu? (b) Tunateli kukuhwelela netu Wanta waNzambi wukakoña yumanyi?

 NEYI chimweluka, antu amweni chuma chamwekeni ashimunaña wunsahu washiyashana. Munjila yoyimu, chinateli kumukalila muntu kwanuka chahoshayi ndotolu hampinji yamukwatawu nachikatu. Hadaha muntu wukwila tuhu keñe-e hashayi nsapi hela magilasi henohu adi tuhu hatooka. Yuma yejimiyi yitunashimuni diyahoshañawu akwakusandujola nsañu nawu hikuputa mesu, kwakukañanya kumona chuma hela kulalamena chuma hamuloña wakwikala nayuma yayivulu yakwila. Ichi dichazatikaña woñu wetu.

² Antu amavulu makonu anaputi mesu anakukañanya kwiluka yuma yinakumwekana mukaayi. Anateli kwiteja nawu kaayi kanahimpiki chikupu kufuma tuhu mu 1914, ilaña hiyelukaña mwatalisha iyi yuma yinakumwekanaku. Hakwikala atudizi aBayibolu, tweluka netu munjila yikwawu Wanta waNzambi wenjili mu 1914 hampinji yamuswanyikiluwu Yesu neyi Mwanta mwiwulu. Ilaña tweluka netu kudi yuma yayivulu yakazatika hakwila akakuli kulomba kwakwila nawu “Wanta weyi winzi. Muchima weyi awili hamaseki neyi chawilañawu mwiwulu.” (Mat. 6:10) Mwamweni, hakwila yumiyi yikamwekani  akasambila kufumishahu kaayi katama kamakonu. Yuma yatama chiyakayifumishahu, muchima waNzambi akawila hamaseki neyi chawilañawu mwiwulu.

3. Wulokwinyi wutwawanaña hakudiza Izu daNzambi?

³ Hamuloña wakudiza Izu daNzambi mpinji yejima, tunakwiluka netu wuprofwetu wunakushikijewa makonu. Ilaña twambukaku nawantu amukaayi. Asha muchima hayuma yamuchihandilu chawu chakwila anakukañanya kwiluka wunsahu wunakumwekesha nawu Kristu watachikili kuyuula mu 1914 nawa keña yaleti wunsompeshi waNzambi. Ilaña mwatela kutoñojoka hanilu lwihu lwakwila nawu: Neyi munamuzatili Nzambi hadi yaaka yayivulu, komana muchidi akuhwelela nikwiluka nenu kukuma kudi mukamwihi neyi chimwakuhwelela kumafuku akunyima? Hela neyi dihu himunekali Chinsahu, mwasha muchima hayumanyi? Hichidi namuloña nachimukwakula ilu lwihuku, tuhanjekenu hayikuma yisatu yalema yikutuleñela tukuhweleli netu Mwanta wawayishawu kudi Nzambi keña yakoñi yuma yikaletesha muchima waNzambi awili hamaseki chikupu.

AKWAKWENDELA HATUWALU ANAMWEKANI DEHI

4, 5. (a) Kufuma mu 1914 yumanyi yinakuzatayi Yesu? (Talenu mwevulu wakutachikilahu.) (b) Indi akwakwenda hatuwalu asatu anakwimenaku yumanyi, nawa yumanyi yinakumwekena?

⁴ Mu 1914, Yesu Kristu wamwekeshawu nakwendela hakawalu katooka, amwinkeli chibañula chindi chamwiwulu. Hohenohu washindili chikupu ituña datama daSatana. (Tañenu Chimwekeshu 6:1, 2.) Wuprofwetu wamuChimwekeshu kapetulu 6 walumbulwili nawu Wanta waNzambi chiwatachikili kuyuula, yuma yatachikili kutaminaku nankashi hamaseki, njita yatachikili, nzala yakapwelendendi, yipupu niyuma yikwawu yajahaña antu. Iyi yuma yinakumwekana ayishimuna muwuprofwetu wahosha hadi akwakwendela hatuwalu asatu amulondelaña chikupu Yesu Kristu.—Chim. 6:3-8.

⁵ Neyi chashimwineñawu dehi, ‘hamaseki afumishiluhu’ kuwunda, hela chakwila nfulumendi jawantu jadikanaña kuzatila hamu nawu aleti kuwunda. Njita yaKaayi Yatachi diyi njita yatachi hamanjita amaneni, neyi chinakumwekesha yuma yinakumwekana mukaayi. Hela chakwila kudi kuya hambidi mujamaheta nijasayansi kufuma mu 1914, nzala yinatwalekuhu nakuleta ndombu nimajita mukaayi. Cheñi nawa, kwosi watela kujinoka nindi yipupu yejima, niwubanji wadimwekenaña waweni kushilahu ‘niyipupu yikwawu yafwana’ yichidi kujaha antu hachaaka hachaaka. Iyi yuma yafwana nawa yinakumwekana nankashi nikujilumuna antu amavulu mukuhanda kwawantu. Komana munakwiluka mwatalisha yumiyi?

6. Anyi elukili wuprofwetu wamuBayibolu chiwashikijeweli nawa chumichi chayileñeleli elidi?

⁶ Antu amavulu aluwankeni hampinji yavulumukili Njita yaKaayi Yatachi nihampinji yaholokeli chipupu chaSpanish influenza. Ilaña, akwaKristu awayishewa adiña nakutalila chaaka cha 1914 nawu diyi mpinji yakamana Nyaka yawaJentili, hela ‘mpinji yatoñwelawu dehi nyuza.’ (Luka 21:24) Hiyelukili chikupu yuma yakamwekanaku. Hela chochu, elukili nawu mu 1914 kudi chuma chalema chikamwekana muwanta Nzambi. Chelukiluwu nawu wuprofwetu wamuBayibolu wunashikijewi, atachikili kuleja antu chakadi woma nawu wanta waNzambi wunatachiki kuyuula. Hamuloña wakushimwina Wanta, atachikili kuyiyandisha chikupu. Chineli ayiyandishileña mumatuña amavulu ichi chashikijili wuprofwetu wamuBayibolu. Muyaaka yalondeleluhu, ayilumbu jaWanta atachikili ‘kuleta wufwinda kuhitila mukuzatisha  nshimbi.’ Atachikili cheñi kuyeta, kuyisha mutuleya, kuyijaha kuhitila mukuyikudika, hela kuyiloza nikuyiketula amana kwetu nyitu.—Mas. 94:20; Chim. 12:15.

7. Muloñadi antu amavulu chinakukañenyawu kwiluka mwatalisha yuma yinakumwekana mukaayi?

⁷ Chineli kudi wunsahu wawuvulu wunakumwekesha nawu Wanta waNzambi wunakuyuula mwiwulu, muloñadi antu amavulu chinakukañenyawu kwiluka mwatalisha yumiyi? Muloñadi chiyabulilañawu kwiluka nawu yuma yinakumwekana yinakushikija wuprofwetu wamuBayibolu watachikiluwu dehi kushimwina antu jaNzambi? Tahindi antu asha muchima hohu hayuma yamonañawu namesu? (2 Kor. 5:7) Komana kusweja kusha muchima hayuma yinakwilawu antu kunayiputishi mesu chakukañanya kumona yuma yinakwilayi Nzambi? (Mat. 24:37-39) Komana antu amakwawu anakuyiluwañesha nansañu yakutwamba yinakutandishayi Satana? (2 Kor. 4:4) Twatela kwikala nachikuhwelelu niwuswa wakwiluka yuma yitwabulaña kumona namesu kulonda twiluki yuma yinakukoña Wanta waNzambi. Twatela kuzañalala muloña tunakwiluka yuma yinakumwekana.

KUTAMA KUNAKUSWEJELAKU

8-10. (a) Indi mukanda wa 2 Timotewu 3:1-5 wunakushikijewa ñahi? (b) Muloñadi chitukuhoshela netu kutama kunakuswejelaku chikupu?

⁸ Kudi chuma chamuchiyedi chatuleñelaña kwiluka netu Wanta waNzambi keña wutachiki kuyuula yuma yaheseki: Muloña antu anakuswejelaku kwila yuma yatama. Yuma yashimwineñawu dehi ha 2 Timotewu 3:1-5 yinamwekani hadi yaaka kwakwihi na 100. Iyi yuma yashimunawu yinakumwekana mukaayi kejima. Komana ninenu munakumona nenu iwu wuprofwetu wunakushikijewa? Tutalenu hayuma yinakumwekesha nawu iwu wuprofwetu wunakushikijewa.—Tañenu 2 Timotewu 3:1, 13.

⁹ Toñojokenu hayuma yamweneñawu muma 1940 hela 1950 nawu hiyishimashima nayuma yinakumwekana makonu hanyidimu, muyisela nimunvwalilu. Antu anakusweja madombu nikwila yuma yatama. Antu adibechaña kulonda ayimoneña nawu asweja kuzuwa, hiyakapwa nsonyi hela oma muchima kubadika akwawu.  Maprogiramu aha TV amweneñawu nawu atama muma 1950 chayinu mpinji anakuyimona nawu diwu atela kutalaña yisaka. Amavulu atoñojokaña nawu antu elaña wutumwa awahishaña yisela ninvwalilu nawa amwekeshaña chihandilu chawu kudi antu amavulu. Ilaña etu hitwatoñojokaña mwenimuku muloña tweluka yitoñojoka yaNzambi.—Tañenu Yuda 14, 15.

¹⁰ Cheñi, mukwaKristu nateli kutoñojoka hayililu yakudikaña yamwekesheleñawu atwansi muyaaka yamuma 1950 niyililu yinakumwekeshawu makonu. Anvwali adiña nakwakamena neyi chakamañawu makonu hadi anyanawu neyi chakwila anakunwa makanya, kunwa walwa hela kuhañana munjila yatama. Makonu, mpinji yejima tunakutiya nsañu yekomwesha yidi neyi: Kadizi wayaaka 15 nalozi akwawu akashikola, ayedi anafwi nawa anyana 13 anayikatishi. Izanvu dawatumpululu asheteli ajahili kansi wamumbanda wayaaka 9 nawa eteli atata yindi nintaña yindi. Chinleji chikwawu chashimuna nawu atwansi amwituña damuAsia diwu akoñeli chikunku chayuma yatama yamwekeni hayaaka ikumi yinahituhu. Komana kudi muntu wunateli kukaana nindi yuma hiyinasweji kutamaku?

11. Muloñadi antu amavulu chakañenyañawu kwiluka nawu yuma yinakusweja kutaminaku?

¹¹ Kapostolu Petulu washimwini chikupu nindi: “Hamafuku akukuminina kwakenza akwakuseha nakuseha, nakwila mwaya kufwila kwawu aweni kwatama; nawu, Indi kwinza kwindi kwakaniniyi kwokudihi? Muloña chochakaminuwu ankakulula tulu, yuma yejima chochiyekala, neyi chiyadiñi hatachi haleñeluwu yuma.” (2 Pet. 3:3, 4) Muloñadi antu amakwawu chiyahoshelañawu muniyi njila? Chidi neyi antu ekalaña nakadiwu muloña wakumona yuma yoyimu mpinji yejima. Hitunateli kwiluka yililu yayiwahi mukaayi chiyinakutaminaku chovu chovuku, ilaña twahayamaña neyi ibwambu detu yashikena kuhimpa yililu yindi. Hela chochu, hamuloña wakwila yililu yayiwahi yinakutaminaku chovu chovu, munakufuma jomisha mbaña.

12, 13. (a) Muloñadi yuma yinakumwekana mukaayi chiyatela kubula kutuzeyesha? (b) Yumanyi yitwatela kwiluka yinateli kutukwasha kuumika yuma ‘yakala’?

¹² Kapostolu Pawulu watusoñamishili nindi “kumafuku akukuminina” yuma ‘yikakala.’ (2 Tim. 3:1) Ilaña tunateli kushakama mukanu kaayi mudi antu anakwila yuma yatama nikutwalekahu kwikala ashinshika kudi Yehova. Yehova nateli kutukwasha naspiritu yindi nichipompelu chawakwaKristu kulonda tushindi yuma yakala yinateli kutumwekena. Twatela kwikala ashinshika. “Ñovu jabadika nankashi” jambala jaNzambi bayi etu awenuku.—2 Kor. 4:7-10.

¹³ Twatela kwiluka netu Pawulu watachikili kuhosha hawuprofwetu wahosha hamafuku akukuminina namazu akwila nawu “ilukaku chumichi.” Awa mazu anakutuleja nawu yuma yashimwiniyi yikashikijewa. Chakadi nikujina antu atama akutwalekañahu nakwila yuma yatama kushika nimpinji yakayifumishahu Yehova. Nsañu yanyaka yashimunaña nawu antu neyi asweja kwila yuma yatama, yililu yayiwahi yajiyaña munyunza. Chayinu mpinji, yililu yayiwahi yinakusweja kutaminaku nankashi mukaayi kubadika chiyadiña kunyima. Antu amavulu anakudiwula mwatalisha yumiyi, ilaña yuma yinakumwekana kufuma mu 1914 yinakutuleja chikupu nawu twatela kukuhwelela netu Wanta waNzambi keña wufumishuhu kutama kwejima.

CHISAKICHI HICHAKAHITAKU

14-16. Chumanyi chamuchisatu chatuleñelaña tukuhweleli netu Wanta waNzambi keña ‘winzi’?

¹⁴ Kudi chuma chamuchisatu chatela kutuleñela twikali nakuchiñeja. Yuma yinakumwekana hakachi kawantu jaNzambi yinakumwekesha nawu kukuma kudi kwakwihi. Chakutalilahu, henohu Wanta waNzambi  kanda wutachiki kuyuula mwiwulu, izanvu dawantu ashinshika awayishewa adiña nakudikita mumudimu waNzambi. Chelili yuma yikwawu yakuhweleleluwu nawu yakamwekana mu 1914 yibuli kushikijewa, elilidi? Amavulu atwalekeluhu kwikala ashinshika hampinji yayesekeleñawu nikuyikabisha nawa atwalekeluhu kumuzatila Yehova. Hayaaka yinahituhu, awayishewa amakwawu, amanisha dehi mudimu wawu wahamaseki nakashinshi.

¹⁵ Muwuprofwetu windi wahosha hakukuma kwakanu kaayi, Yesu wahosheli nindi: “Chisakichi hichakahitaku, chiña yuma yejimiyi yinamani.” (Tañenu Matewu 24:33-35.) Tweluka netu Yesu chahosheliyi nindi “chisakichi,” wateneneña mazanvu ayedi awakwaKristu awayishewa. Izanvu datachi dadiña kwoku mu 1914, nawa delukili chinjikijilu chakwinza kwaKristu muchina chaaka. Antu adiña munidi izanvu dadiñaku mu 1914 ayiwayishili naspiritu yajila kulonda ekali anyana kaNzambi muchochina chaaka hela henohu ichi chaaka kanda chishika.—Rom. 8:14-17.

¹⁶ Izanvu damuchiyedi dekala ‘muchisakichi’ hiyantu awayishewa amabwambu jawantu ekala mwizanvu datachi. Antu amwizanvu damuchiyedi adiña kwoku hampinji yadiñaku awayishewa amwizanvu datachi, ilaña niwena ayiwayishili naspiritu yajila hampinji yachidiñawu awayishewa amwizanvu datachi hamaseki. Dichi, bayi neyi antu ejima awayishewa amakonu ekala ‘muchisakichi’ chateneniyi Yesuku. Makonu, ana adi mwizanvu damuchiyedi anakushinakaja. Ilaña, mazu aYesu ekala haMatewu 24:34 atuleñelaña tukuhweleli netu antu amakwawu ‘amuchisakichi hiyakahitaku’ sampu anamoni kutachika kwalukadi lwasweja. Ichi chatela kutuleñela tusweji kukuhwelela netu Mwanta waWanta waNzambi keña yajilumuni antu atama nakuleta ituña dadiha mwakekala kuloña.—2 Pet. 3:13.

KRISTU KEÑA YEMIKI MUSHINDU

17. Indi iwu wunsahu wusatu wutunahanjekuhu wunakutukwasha kwilukadi?

¹⁷ Tunateli kukunkulula netudi haniwu wunsahu wutunahanjekuhu? Yesu wahosheli nindi tweluka wanyi nawa hitwamba keluka ifuku hela mpinjuku. (Mat. 24:36; 25:13) Ilaña tweluka “mpinji” kwesekeja nachashimwiniyi Pawulu. (Tañenu Aroma 13:11.) Tunakushakama mumpinji yateneniyi, yamafuku akukuminina. Neyi tusha muchima hawuprofwetu wamuBayibolu nihayuma yinakukoñayi Yehova Nzambi niYesu Kristu, tukwiluka chikupu wunsahu wunakumwekesha nawu tudi mumafuku akukuminina akanu kaayi.

18. Chumanyi chakayimwekena antu anakukaana kwovwahila Wanta waNzambi?

¹⁸ Antu akaanaña kwiluka ñovu yasweja yamwinkawu Yesu Kristu, Mukwakwendela hakawalu katooka wemika mushindu, keña eluki nawu adikañileña. Hiyakamona mwakuleyelaku. Hayina mpinji, amavulu akabilela nawoma nawu: “Wukutwesha kwimanaku hinyi?” (Chim. 6:15-17) Ilaña, kapetulu kanalondeluhu kaChimwekeshu kakulaña ilu lwihu. Awayishewa niantu achiñejaña kushakama hamaseki diwu ‘akemana’ hadina ifuku nawuselewa waNzambi. Kuhiñahu, “izaza deneni” dawanyikoku acheñi diwu akapuluka mulukadi lwasweja.—Chim. 7:9, 13-15.

19. Chineli muneluki chikupu nenu kukuma kudi kwakwihi, chumanyi chimunakutalila?

¹⁹ Neyi tusha muchima hakwiluka chinakushikijewa wuprofwetu wamuBayibolu muyinu mpinji munakumwekana yuma yayiwahi, hitwakahuwankana nepumba damwituña daSatanaku; nawa hitwakakañanya kwiluka mwatalisha yuma yinakumwekana mukaayiku. Kristu keña yemiki mushindu mudinu ituña datama kuhitila mukwasa njita yakukumishaku mukuloña. (Chim. 19:11, 19-21) Toñojokenu hamuzañalu wutukatiya chikashikijewa yumiyi!—Chim. 20:1-3, 6; 21:3, 4.

[Malwihu aKuzatisha haKudiza]

[Mwevulu wudi hefu 29]

Chineli akwakwendela hatuwalu achidi, yuma yinakutwalekahu nakutaminaku mukaayi (Talenu parakalafu 4, 5)