Yaaka 100 Yakuyuula kwaWanta, Yinayikwashi Ñahi?
Yaaka 100 Yakuyuula kwaWanta, Yinayikwashi Ñahi?
“Eyi Yehova Nzambi, . . . nyidimu yeyi yeneni yakuhayama! . . . eyi Mwanta wahaya nyaka.”—CHIM. 15:3.
MUNATELI KWAKULA?
Yehova wekalili ñahi Mwanta mu 1914, nawa Wanta watachikili kwila yumanyi?
Indi Yesu nazatishi ñahi Wanta wawuMesiya hakutookesha, kudizisha, nikupompesha antu jaNzambi ashinshika aheseki?
Indi kulomba kwetu kwakwila nawu “Wanta weyi winzi” akakwakula chikupu mpinjinyi, nawa chikalumbulukadi?
1, 2. Wanta waNzambi wakakoña yumanyi, nawa muloñadi wutunateli kukuhwelela chikupu netu Wanta wakenza?
HAMPINJI yadiñayi hampidi kwakwihi naKaperinawu muchaaka cha 31 C.E., Yesu Kristu wayidizishili atumbanji twindi kulomba nawu: “Wanta weyi winzi.” (Mat. 6:10) Makonu antu amavulu ajinokaña neyi chakwila Wanta wakenza. Hela chochu twakuhwelela chikupu netu kulomba kwetu kwakufuma hamuchima kwakwila nawu Wanta waNzambi winzi akakwakula.
2 Yehova wakazatisha Wanta windi kulonda yakanuñañeshi chisaka chindi chamwiwulu nichahamaseki. Iku kufuukula kwaNzambi kukashikijewa. (Isa. 55:10, 11) Kafwampi nimakonu Yehova nekali dehi Mwanta! Yuma yayiwahi yinamwekani hadi yaaka 100 yinahituhu yinakumwekesha chikupu iwu wunsahu. Nzambi nakukoñela ambuñindi ashinshika amavulu nyidimu yeneni nawa yakuhayamisha. (Zek. 14:9; Chim. 15:3) Cheñi nawa, chineli Yehova nekali Mwanta chinambuki nakwinza kwaWanta waNzambi watudizishiliyi Yesu nindi tulombeña. Indi iyi yuma yambukaku ñahi, nawa yinateli kutukwashi ñahi?
MWANTA WASWANYIKAYI YEHOVA HAKUZATA NYIDIMU
3. (a) Mpinjinyi yamuswanyikiluwu Yesu neyi Mwanta nawa kudihi? (b) Munateli kwiluka ñahi nenu Yesu watachikili kuyuula mu 1914? (Talenu tumazu twaheshina.)
3 Kwakwihi nakukuma kwayaaka yamuma 1800, chejeji chatachikili kutoñekela hawuprofwetu wakunyaka wasonekeluwu hayaaka 2,500 kudi Danyeli nindi: “Hamafuku amba kekala anyantowu, Nzambi wamwiwulu wamba kaloñesha wanta wakubula kukisika haya nyaka.” (Dan. 2:44) Atudizi aBayibolu ashimwineña hayaaka yayivulu nawu chaaka cha 1914 chadiña chaaka chalema. Antu amavulu hayina mpinji akuhweleleli. Neyi chahosheli nsoneki wumu nindi: “Antu mu 1914 akuhweleleli yuma yayivulu niyikaninu.” Hela chochu, chavulumukili Njita Yakaayi Yatachi muchina chaaka, wuprofwetu wamuBayibolu washikijeweli. Nzala yakapwelendendi, nyitentanshi niyipupu yaholokeli mukulondashana kushilahu nikushikijewa kwawuprofwetu wukwawu wamuBayibolu kwamwekesheli hatooka nawu Yesu Kristu watachikili kuyuula neyi Mwanta waWanta waNzambi mwiwulu mu 1914. * Yehova wekalili Mwanta munjila yayiha, hampinji yamuswanyikiliyi Mwanindi hamu neyi Mwanta wawuMesiya.
4. Chumanyi chatachi cheliliyi Yesu hampinji yamuswanyikiluwu, nawa kuhiñahu welili chumanyi?
4 Mudimu watachi wazatiliyi Mwanta wamuha waswanyikiluwu kudi Nzambi wadiña wakwasa njita nachilumbu muneni waTata yindi, Satana. Yesu niañelu jindi amunatili Diyabolu niandemoni jindi kufuma mwiwulu. Chumichi chaleteli muzañalu mwiwulu ilaña hamaseki hekalili yihuñu yamaneni. (Tañenu Chimwekeshu 12:7-9, 12.) Kuhiñahu Mwanta watachikili kutookesha ambuñindi ahamaseki, kuhitila kuyidizisha nikuyipompesha kulonda eleña mwaya muchima waNzambi. Tutalenu chitunateli kwimbujola chakutalilahu chawu chachiwahi makonu, chakwovwahila wunlomboli waYesu.
MWANTA WAWUMESIYA HAKUTOOKESHA ANTU JINDI ASHINSHIKA
5. Kutookeshanyi kwamwekeni hakachi kachaaka cha 1914 nikukutachika kwa 1919?
5 Hanyima yakwila Yesu namufumishi dehi Satana niandemoni jindi mwiwulu, Yehova wamulejeli Yesu kuyihempula nikutookesha ambuñindi ahamaseki kuspiritu. Kaprofwetu Mika washimwini nindi iku kwadiña kutookesha kwakuspiritu. (Mal. 3:1-3) Wunsahu wamwekeshaña nawu iku kutookesha kwamwekeni hakachi kachaaka cha 1914 nikumatachikilu achaaka cha 1919. * Hakwila nawu twikali muchisaka chaYehova, twatela kwikala akadi majilu, hela ajila. (1 Pet. 1:15, 16) Dichi bayi tudiñija mukudifukula kwakutwamba nimunsañu yamapolitikiku muloña jikutuleñela twikali amajilu.
6. Indi yakudya yakuspiritu anakuyihana ñahi, nawa yalema ñahi?
6 Kuhiñahu Yesu wazatishili ñovu yaWanta hakutonda “nduñu washinshika wukweti maana.” Iwu nduñu wakahanaña yakudya yayiwahi yakuspiritu mpinji yejima kudi antu ejima ekala “mukanka wumu” alombolañawu kudi Yesu. (Mat. 24:45-47; Yow 10:16) Kufuma tuhu mu 1919, izanvu danyanya dawamana kwetu awayishewa anatwalekuhu nakukalakala nakashinshi mudimu weneni wakudyisha “akwetala dindi.” Yakudya yayivulu yakuspiritu yatwinkañawu kuhitila mudi nduñu washinshika yatukwashaña kwikala nachikuhwelelu chakola. Yatuleñelaña tufuukuluhu chikupu kwikala akadi majilu kuspiritu, muyililu, muyitoñojoka nikumujimba. Iyi yakudya yakuspiritu yatudizishaña nikutukwasha kushikahu chikupu kuzata mudimu walema wunakuzatawu makonu mukaayi kejima. Komana munakudya chikupu iyi yakudya yakuspiritu yatwinkañawu?
MWANTA NAKUDIZISHA ANTU JINDI CHAKUSHIMWINA MUKAAYI KEJIMA
7. Mudimwinyi walema watachikiliyi Yesu hampinji yadiñayi hamaseki, nawa wukatwalekahu kushika mpinjinyi?
7 Yesu chatachikiliyi mudimu windi wakushimwina hamaseki, wabidikili nindi: “Chiña nishimwina nsañu yawanta waNzambi yayiwahi nikunyikala yikwawu yinashali nawa; muloña dichi chantemesheleluwu.” (Luka 4:43) Hadi yaaka yisatu nachikunku, Yesu washili muchima hakuzata iwu mudimu. Wayilejeli atumbanji twindi nindi: “Chimukuya, muyaña nakushimuna nenu, Wanta wamwiwulu wudi kwakwihi.” (Mat. 10:7) Chasañukiliyi, Yesu washimwinineñahu dehi nindi atumbanji twindi akatandisha iyi nsañu “nikwakumina maseki.” (Yil. 1:8) Wayikanini nindi wakayilombolaña hampinji yakazatañawu iwu mudimu walema kushika nimakonu.—Mat. 28:19, 20.
8. Indi Mwanta wasañumwini ñahi antu jindi ahamaseki kulonda azati mudimu?
8 Mu 1919 ‘nsañu yayiwahi yaWanta’ atachikili kuyilumbulula munjila yikwawu. (Mat. 24:14) Mwanta wadiña nakuyuula mwiwulu nawa wapompesheli cheñi izanvu dawambuñindi ahamaseki atookesheliyi. Idi izanvu dovwahilili mazu aYesu akusañumuna akwila nawu: Shimwinenu nsañu yayiwahi mwahita kaayi kejima nenu Wanta waNzambi wunatachiki kuyuula mwiwulu. (Yil. 10:42) Chakutalilahu, muSeptember 1922 akwakushimwina aWanta akushika ku 20,000 apompeli kupompa kwanyuza kwadiñi muCedar Point, Ohio, U.S.A. Fwikijenu muzañalu watiyiluwu hampinji yahaniniyi Mana Kwetu Rutherford mpanji yadiña namutu wakwila nawu, “Wanta” nawa wabidikili nindi: Talenu, Mwanta hakuyuula! Yenu mwatela kumutiyakesha kudi antu ejima. Dichi, tiyakeshenu, tiyakeshenu, tiyakeshenu, Mwanta niwanta windi.” Antu apompeli akushika kumakombakaji ayedi elili mwayilejeluwu kuhitila mukuzata “Mudimu Walema,” ayili nakushimwina nawa endeli makilomita 72 kufuma heluña hadiña kupompa. Muntu wumu wadiña haniku kupompa wahosheli nindi: “Hinamba kavulamena mutambi wakutiyakesha Wanta niiyena damwekesheli antu apompeluku!” Antu amakwawu niwena dichi chatiyiluwu.
9, 10. (a) Mashikolanyi analoñeshuwu akudizishilamu akwakushimwina aWanta? (b) Indenu munahetelumu ñahi munawa mashikola?
9 Muchaaka cha 1922, akwakushimwina aWanta akubadika ha 17,000 adikitileña mumudimu wakushimwina mumatuña 58 mukaayi kejima. Hela chochu, akeñekeleña kuyidizisha chakushimwina. Muyaaka nkulakaji yakusambila, Mwanta Watondawu wayilejeli atumbanji twindi nshimbi jatiyakana kutalisha hansañu yakushimwina, kumaluña kwakushimwina nichakushimwina. (Mat. 10:5-7; Luka 9:1-6; 10:1-11) Kulondela njila yoyimu makonu, Yesu nakulombola iwu mudimu kulonda antu ejima anakuzata mudimu wakushimwina Wanta atambwileña nshimbi ninyikanda yakuzatisha hakushimwina chachiwahi. (2 Tim. 3:17) Kuhitila muchipompelu chawakwaKristu, Yesu nakudizisha antu jindi kulonda ashimwineña. Wayidizishaña kuhitila muShikola yaMudimu waTeokalatiki, yalombolañawu muyipompelu yakubadika ha 111,000 yamukaayi kejima. Kuhitila mukulondela iyi nshimbi, awa akwakushimwina akubadika ha 7,000 000 aneluki chakushimwina nikutañisha munjila yakushika hanyichima ‘yawantu ejima.’—Tañenu 1 Akorinda 9:20-23.
10 Kubombela haShikola yaMudimu waTeokalatiki, kudi cheñi mashikola amakwawu akudizisha antu Bayibolu, kudizisha aeluda amuchipompelu, apayiniya, amana kwetu ajiki, akwaKristu adisumbula, mamembala amuKometi yaMutayi niañodijawu, ankoñi endaña niañodijawu, niamishonali. * Atudizi adiña muShikola yaKudiza Bayibolu yawakwaKristu Adisumbula ahamekeli haniyi shikola nawu: “Yuma yayiwahi yinatudizishuwu munjila yayiwahi yinatuleñeli tusweji kumukeña Yehova chikupu nawa yinatudizishi chakukwasha antu amakwawu.”
11. Indi akwakushimwina aWanta anatwalekuhu ñahi nakushimwina chili Satana nakuyikañesha?
11 Satana chilumbu nakufwila kuluwañesha iwu mudimu wakushimwina Wanta nikutañisha wunakudikitawu nañovu. Wazatishaña tukosi twashiyashana tutwamonaña nitutwabulaña kumona kulonda yalukuki nsañu yaWanta niakwakushimwina iyi nsañu hakwila yalekeshi iwu mudimu. Ilaña iwu chilumbu hakweti ñovu yabadikaku. Yehova wamuswanyika Mwanindi kulonda yekali ‘wabadika nankashi kuyuula kwejima, niwanta, niñovu, nimawanta antuumba.’ (Efwes. 1:20-22) Chineli Yesu himwanta, wazatishaña ñovu yindi hakukiña nikulombola atumbanji twindi hakwila eleña mwaya muchima waTata yindi. * Nsañu yayiwahi anakuyishimwina nawa antu amavulu akweti nyichima yayiwahi anakuyidizisha njila jaYehova. Tukweti kukooleka kwakweni hakuzata iwu mudimu walema!
MWANTA NAKUPOMPESHA ANTU JINDI KULONDA AZATEÑA MUDIMU WENENI
12. Lumbululenu yuma yinahimpiki mukuloñesha kufuma hampinji yatachikili kuyuula Wanta.
12 Kufuma tuhu hampinji yatachikili Yesu kuyuula mu 1914, Mwanta natookeshi ambuña Nzambi nikuyipompesha kulonda eleña mwaya muchima waTata yindi. (Tañenu Isaya 60:17.) Kufuma tuhu mu 1919 atondeli nkoñi wakulombola muchipompelu chidi chejima kulonda yalomboleña mudimu wakushimwina. Muchaaka cha 1929 atanjikili mudimu wakushimwina kwitala nikwitala haMulungu mpinji yejima. Akwakushimwina aWanta azañaleli nankashi hakudikita mudimu weneni nawa muchaaka cha 1931 etejeli ijina dakwila nawu aYinsahu jaYehova. (Isa. 43:10-12) Mu 1938, antu adiña namudimu wakulombola muyipompelu alekeli kuyitonda kuhitila mukuvota, ilaña ateleleli kushikija yuma yakeñekaña yamuNsona. Nawa kutachika mu 1972, mazanvu awaeluda diwu enkeluwu mudimu wakulombola nyidimu yamuchipompelu chatela amwinki nkoñi wumu hohu muchipompelu. Aeluda ejima ayikolesheli ‘kubiña mukanka wanyikoku yaNzambi wayinkawu kuhemba.’ (1 Pet. 5:2) Mu 1976, Izanvu dalombolaña adambwili mumakometi atanu nakamu kulonda alomboleña mudimu wakushimwina Wanta mukaayi kejima. Mwamweni, Mwanta watondayi Yehova natwalekuhu kupompesha antu akayuulañawu kudi Wanta wateokalatiki hela njila mwayuulileñayi Nzambi.
13. Indi yuma yinazatiki hayaaka 100 yakuyuula kwaWanta yinayikwashi ñahi?
13 Toñojokenu hayuma yinazati Mwanta wawuMesiya hayaaka 100 yatachi yinayuuliyi. Watookesha antu kulonda alemeshi ijina daYehova. Nakulombola antu mumudimu wakushimwina nsañu yayiwahi yaWanta mumatuña 239, nawa nadizishi antu amavulu hayuma yakeñañayi Yehova. Nikukwasha antu akubadika ha 7 miliyoni, anakudihana namuchima wumu kulonda eleña mwaya muchima waTata yindi. (Mas. 110:3) Eñañi, nyidimu yinakuzatayi Yehova kuhitila mudi Mwanta wawuMesiya yamaneni nawa yakuhayamisha. Nawa kumbidi kudi yuma yayiwahi nankashi!
NKISU YIKALETA WANTA WAWUMESIYA KUMBIDI
14. (a) Neyi tulomba netu “Wanta weyi winzi,” tunakulomba netu Nzambi yeli chumanyi? (b) Nsona yachaaka cha 2014, yinakuhosha nawudi, nawa muloñadi chiyinateleli?
14 Hela chakwila Yehova wamuswanyikili Mwanindi, Yesu Kristu neyi Mwanta wawuMesiya mu 1914, kulomba kwetu kwakwila nawu “Wanta weyi winzi” akwakwili chikupu wanyi. (Mat. 6:10) Ashimwineñahu dehi muBayibolu nawu Yesu ‘wakashinda hadi ayilumbu jindi.’ (Mas. 110:2) Nfulumendi jawantu jidi mumakasa aSatana jinakutwalekahu nakudikaña naWanta waNzambi. Dichi neyi tulomba netu Wanta waNzambi winzi, dikwila nawu tunakulomba netu Nzambi yatemeshi Mwanta wawuMesiya nianyuuli jindi enzi nakumanisha chiyuulu chawantu nikufumishahu akwakudikaña naWanta hamaseki. Neyi anayifumishuhu dehi, mazu ekala haDanyeli 2:44 akwila nawu “wakahumonaña mawantawa ejima puchi puchi, nakuyinoñesha,” akashikijewa. Wukajilumuna ayilumbu jaWanta ekala munsañu jamatuña nachiyuulu. (Chim. 6:1, 2; 13:1-18; 19:11-21) Mpinji keña yishiki yakujilumuna ayilumbu jaWanta. Dichi Nsona yachaaka cha 2014, yinateleli nankashi muloña yinakuhosha nawu kwanakana yaaka 100 yakuyuula kwaWanta waNzambi mwiwulu, yinafumi haMatewu 6:10 hahoshaña nawu, “Wanta weyi winzi”!
15, 16. (a) Yumanyi yayiwahi yikamwekana muChiyuulu chaYaaka Ikombakaji? (b) Chumanyi chakukumishaku chikakoñayi Yesu hamu neyi Mwanta wawuMesiya, nawa chikalumbulukadi kutalisha hankeñelu yaYehova hayileñaleña yindi yejima?
15 Wanta wawuMesiya chiwukajilumuna ayilumbu jaNzambi, wakamumbila Satana niandemoni jindi mwikela hadi yaaka ikombakaji. (Chim. 20:1-3) Chiyakafumishahu kutama kwejima, Wanta wukatwalekahu nakukwasha antu kulonda akaheteli mumulambu waYesu nikufumishahu kutama kwenjili nanshidi yaAdama. Iwu Mwanta wakasañula antu amavulu anakami mumajamu nawa wukalombola mudimu weneni wakuyidizisha hadi Yehova. (Chim. 20:12, 13) Iseki dejima dakabalumuka paradisa neyi chadiña itempa daEdeni. Antu ejima ashinshika akekala awanina.
16 Hakukuma kwaYaaka Ikombakaji yaChiyuulu chaKristu, Wanta wawuMesiya wukashikija nkeñelu yejima. Kuhiñahu, Yesu wukahana Wanta kudi Tata yindi. (Tañenu 1 Akorinda 15:24-28.) Hikwakekala nawa cheñi ihaku hakachi kaYehova nawanyanindi ahamasekuku. Anyana kaNzambi ejima amwiwulu niahamaseki akekala anuñaña naTata yawu wamwiwulu neyi chisaka chimu.
17. Chumanyi chimunafuukuluhu kwila kutalisha haWanta waNzambi?
17 Yuma yayiwahi yinazatiki hadi yaaka 100 yakuyuula kwaWanta yatuleñelaña kukuhwelela chikupu netu Yehova diyi wunakulombola nawa nkeñelu yindi yaheseki yikashikijewa. Tutwalekuhu kwikala antu ovwahila nikutiyakesha Mwanta niWanta windi. Twelaña mwenimu nachikuhwelelu netu Yehova keña yakuli kulomba kwetu kwakufuma hamuchima kwakwila nawu: “Wanta weyi winzi”!
[Tumazu twaheshina]
^ Talenu mukanda waChumanyi Chacheni Chatañishaña Bayibolu? mafu 88-92.
^ Talenu Kaposhi Kakutalila kaJuly 15, 2013, mafu 22-23, parakalafu 12.
^ Talenu Kaposhi Kakutalila kaSeptember 15, 2012, hamafu 13-17, hamutu wunakwila nawu, “Mashikola aTeokalatiki Amwekeshaña Kukeña kwaYehova.”
^ Talenu Kaposhi Kakutalila kaChibemba kaDecember 1, 1998, mafu 19-21, kanakushimuna hanyiloña yayiñawu mumatuña ashiyashana.
[Malwihu aKuzatisha haKudiza]
[Mazu ekoku adi hefu 12]
Nsona yetu yachaaka cha 2014 yinakwila nawu: “Wanta weyi winzi.”—Matewu 6:10
[Chati yidi hefu 14, 15]
KUTOOKESHA mu 1914 kushika nimu 1919
Yesu wahempwili atumbanji twindi ahamaseki nikuyitookesha kuspiritu. Mu 1919, Yesu watondeli “nduñu wamaana nikashinshi”
1919 Atondeli nkoñi wakulombola
1927 Aloñesheli mudimu wakushimwina kwitala nikwitala haMulungu
1938 Aeluda ateleleli kushikija yuma yakeñekaña yamuNsona
1972 Izanvu dawaeluda adinkeli mudimu wakulombola muchipompelu
1943 Shikola Yakudiza Bayibolu yaGileyadi niShikola yaMudimu waTeokalatiki
Akwakushimwina Mukaayi Kejima:
6,000
17,000
328,572
851,378
1910
1914
1920
1930
1940
1950
1960
1976 Izanvu Dalombolaña adambwili mumakometi atanu nayimu
1977 Shikola yaMudimu wawuPayiniya
1987 Shikola yaKudiza Mudimu wawuNkoñi
2000 Shikola yawaNkoñi Endaña
2011 Shikola yaKudiza Bayibolu yawakwaKristu Adisumbula
1,384,782
2,175,403
6,035,564
7,224,930
1970
1980
1990
2000
2010
2014
Kuloñesha
Kudizisha
