‘Banjilenu Yehova Chawahayi’

Yuma yatama yatumwekenaña yinateli kutuneñesha chikupu. Yinateli kutumanishila maana, ñovu, nawa yahimpaña chihandilu chetu. Mwanta Davidi wamuIsarela wakushankulu wamweni kukala kwakuvulu. Washindili ñahi iku kukala? Davidi wakwili namazu akushika hamuchima amwisamu nindi: “Hinukubilela nezu dami kudi Yehova, hinukumulembelela Yehova nezu dami. Hinukuhuñunwina matopi ami kumesu indi, hinukumuleja munamoni yihuñu. Chelili spiritu yami jinamukañi dehi mukachi kami eyi welukili njila yami.” Eñañi, Davidi walombeli kudi Nzambi kulonda yamukwashi.—Mas. 142:1-3.

Mwisamu dikwawu Davidi wembili nindi: “Kudi chuma chimu chinamulombi Yehova, nafwili nami nichimoni; dichenichi nami, nishakami mwitala daYehova mafuku ejima inukwikala wamumi, nami nibanjili Yehova chawahayi, nimwihuli chachiwahi mutembeli yindi.” (Mas. 27:4) Davidi hadiña kaLevuku, ilaña fwikijenu nemani hanji yachipañu chajila kwakwihi natabanaka yadiña iluña dakudifukwila kwalala hayina mpinji. Davidi wazañaleli nankashi chakwila wakeñeleña kushakama mwitala daYehova muwumi windi wejima kulonda ‘yabanjili Yehova chawahayi.’

Izu dachiHeberu datuntululawu haMasamu 27:4 nawu ‘kuwaha’ datalisha kuchuma ‘chalubanji hela chatiyishaña kuwaha.’ Mpinji yejima Davidi watiyileña kuwaha kubanjila itala daNzambi dakudifukwilamu. Twatela kudihula etu aweni netu, ‘komana twatiyaña neyi chatiyileñayi Davidi?’

‘HAMEKENU’ TEMBELI YANZAMBI

Munanu mafuku, njila yaloñeshayi Yehova yakudifukwilamu kudi yena hiyashindamena hetala dakutuña namakasaku. Ilaña, yashindamena hatembeli yaNzambi yabadika yakuspiritu, njila yajila yakudifukula kwalala. * Neyi ‘tuhamekaña’ iyi njila, anetu nawa tunateli ‘kubanjila Yehova chawahayi.’

Toñojokenu hakameña kawuru kamulambu wakushita kashililuwu kuchinsu chatabanaka. (Kwid. 38:1, 2; 40:6) Aka kameña kadiña nakumwekesha nawu Nzambi wetejeli wumi waYesu wikali mulambu. (Heb. 10:5-10) Toñojokenu chalumbuluka chumichi kudetu. Kapostolu Pawulu wasonekeli nindi: ‘Hitwadiñi ayilumbu, atukundamishili kudi Nzambi kuhitila mukufwa kwaMwanindi.’ (Rom. 5:10) Neyi tukuhwelela mumashi aYesu apwekeli, tukwikala nawuselewa nawa akutukuhwelela hamuloña wakwikala amabwambu jaNzambi. Chaleñelaña twikali ‘amabwambu jaYehova.’—Mas. 25:14.

Hamuloña wakwila ‘ajimañeshaña nshidi jetu,’ kulonda “kwinzi yilaaka yakuhizumwisha yakuleta ñovu jakufuma kwekala Yehova.” (Yil. 3:19) Kukala kwetu kudi neyi kayili akasawu mukaleya wunakuditoñesha hayuma yeliliyi nikubalumuka mumuchima chinakuhembelelayi kumujaha. Hakumona chumichi, nsompeshi wukweti luwi hakujimañesha nyiloña yindi nakuhosha nindi hatelela kumujahaku. Ona kayili wukuzañalala chikupu! Kafwana ona nsompeshi, Yehova watiyilaña antu abalumukaña munyichima luwi, nakujimañesha nyiloña yakufwa.

ZAÑALALENUÑA NAKUDIFUKULA KWALALA

Yuma yamweneñayi Davidi mukudifukula kwalala hetala daYehova yadiña mazaza awakwawu Isarela apompeleña, kutañila antu nikulumbulula Nshimbi, kwocha insensi, ninyidimu yajila yakalakeleñawu  atupristu niAlevi. (Kwid. 30:34-38; Kuch. 3:5-8; Kuhit. 31:9-12) Iyi yuma yelileñawu mukudifukula kwalala muIsarela wakushankulu yesakana nayuma yitwelaña makonu.

Neyi chichadiña kunyima, nimakonu “o kuwaha o kutowala antu amwivumu dimu akushakama hamu nakutiyañana!” (Mas. 133:1) Kudi kuvulilaku nankashi ‘kwawamana kwetu’ mukaayi kejima. (1 Pet. 2:17) Atañaña nikulumbulula Izu daNzambi hakupompa kwetu. Kuhitila mukuloñesha kwindi, Yehova watuloñeshela progiramu yayiwahi yakutudizishilamu. Cheñi watuloñeshela yakudya yayivulu yakuspiritu yasonekawu munyikanda yitwatela kuzatisha hakudiza nkawetu ninachisaka. Membala wumu waMwizanvu Dalombolaña wahosheli nindi: “Kutoñojoka chikupu Hezu daYehova, kushinshika mudatalisha, nikukeñakeña kashinshi nikwiluka kwankwashaña nankashi kutoñojoka hamaheta akuspiritu nawa kwanzañaleshaña.” Eñañi, ‘kwiluka kwatiyishaña muchima wetu kuwaha.’—Yish. 2:10.

Makonu, kulomba kwakuwahi kwawambuña Nzambi kwayaña kudi Yehova ifuku niifuku. Kudi Yehova, kulomba kwamuchidiwu kudi neyi ivumba damanji anunkila neyi insensi yikweti ivumba dadiwahi. (Mas. 141:2) Chazañaleshaña chikupu muchima wetu neyi twiluka netu Yehova Nzambi watiyaña kuwaha neyi tumulomba mukudizoza.

Mosi walombeli nindi: “Lubanji lwaYehova Nzambi yetu lwikali hadetu; wutukolesheli nimudimu wamakasetu.” (Mas. 90:17) Chitunakudikita neyena mumudimu wetu wakushimwina, Yehova wukukiswilaña mudimu wetu. (Yish. 10:22) Hadaha, tunakwashi antu amakwawu kudiza chalala. Indi kwiji, tunomiki mumudimu wakushimwina hadi yaaka yayivulu hela chakwila atudiwulaña, twakatakataña, twaneñaña, hela kutuyandisha. (1 Tesa. 2:2) Komana hitunadimweni namesu “Yehova chawahayi” nikwiluka netu Tata yetu waMwiwulu watiyaña kuwaha chikupu chitwazataña nañovuku?

Davidi wembili nindi: “Yehova diyi iseka dami danañambwiluwu, diyi iseka damulupasa lwami; yeyi wankwatilaña chinjikijilu chami chakusakula nachu. Ñinza jami anampimini kwakuwahi cheeñi.” (Mas. 16:5, 6) Davidi wazañaleli chikupu ‘neseka,’ dindi dikwila nawu, wubwambu wawuwahi naYehova nikukooleka kwadiñayinaku kwakumuzatila. Kufwana Davidi, tunateli kumona kukala kwakuvulu, ilaña twatela kwiluka netu tukweti nkisu yayivulu yakuspiritu. Dichi tutwalekenuhu kuzañalala nakudifukula kwalala ‘nikuhameka’ tembeli yaYehova yakuspiritu.

[Tumazu twaheshina]

[Mazu ekoku adi hefu 29]

Hampinji yadiñayi mukweseka, Davidi walombeli kudi Yehova mukudizoza kulonda yamukwashi