Muhamekenu Kristu, Mwanta Walema!

‘Wendi chachiwahi nakushinda.’—MAS. 45:4.

YIKUMA YITWATELA KWANUKA

Yehova wamuwayishili Yesu chakubadika ‘akwawu’ munjilanyi?

Mpinjinyi yatachikiliyi Kristu kumanyika mpoku yindi yakabali, wayizatishili ñahi katachi, nawa wamba kayizatisha cheñi mpinjinyi?

Nsañwinyi yalala yatela kuhakwilaku Yesu Kristu Mwanta Wanjita?

1, 2. Muloñadi chitwatela kushila maana kunsañu yekala muMasamu 45?

 MWANTA walema hakwenda mwaya nsañu yalala nikuloña, hakuya cheñi nakushinda ayilumbu jindi. Chemikiliyi mushindu kapampa kakukumishaku hadi ayilumbu jindi, hakusumbula nsumbuki wakeñayi. Mwanta hiyakumwanuka nikumushimeka munyunza yejima yikenza. Awa diwu mazu alema ekala muMasamu 45.

² Hela chochu, muMasamu kapetulu 45 mwekala nsañu yabadika kuwaha yamanishawu chiwahi. Yuma yashimunawu munaka kapetulu yalema nankashi kudi etu. Nawa yahosha hachihandilu chetu chamakonu nichakumbidi. Tuhanjekenu nakanañachima hansañu yekala mumasamu.

“MUCHIMA WAMI HIWUKUSUMPOKA HOHU NANSAÑU YABADIKA KUWAHA”

3, 4. (a) Indi “nsañu yabadika kuwaha” hinsañwinyi, nawa yaleñelaña nyichima yetu kutiya ñahi? (b) Munjilanyi ‘mutwahoshelaña nakutena yuma yituneli nakwanakana nachu mwanta,’ nawa idimi detu dekalaña ñahi neyi nsonekeshu?

³ Tañenu Masamu 45:1. “Nsañu yabadika kuwaha” yasañumwini muchima wañimbi yamasamu nikuwuleñela ‘kusumpoka’ yahosha hadi mwanta. Chumichi chaleñeleli muchima wañimbi  yamasamu kusumpoka neyena daleñeleli idimi dindi dikali neyi ‘nsonekeshu yamukwakusoneka swayi.’

⁴ Indetu makonu? Nsañu yayiwahi yaWanta wawuMesiya hinsañu yabadika kuwaha yatushikaña hanyichima. Nsañu yaWanta yekalili ‘yayiwahi’ sweje-e mu 1914. Kufuma tuhu hayina mpinji, iyi nsañu hiyahosheleña haWanta wakumbiduku, ilaña yahoshaña hanfulumendi yalala yinakuyuula mwiwulu makonu. Iyi diyi ‘nsañu yayiwahi yaWanta’ yitwashimwinaña “mwahita matuña ejima mwashakamawu antu.” (Mat. 24:14) Komana nyichima yetu ‘yasumpokaña’ nansañu yaWanta? Twashimwinaña nsañu yayiwahi yaWanta neyena? Kufwana ñimbi yaMasamu, ‘twahoshaña nakutena yuma yituneli nakwanakana,’ nachu Mwanta wetu Yesu Kristu. Twamushimwinaña netu amuswanyika mwiwulu neyi Mwanta waWanta wawuMesiya. Kubombelahu, twalejaña anyanta niantu ejima netu ovwahili chiyuulu chindi. (Mas. 2:1, 2, 4-12) Madimi etu anekali neyi ‘nsonekeshu yamukwakusoneka swayi,’ muloña twazatishaña chikupu Izu dasonekawu mumudimu wetu wakushimwina.

‘KUNYIVUMBU YAMWANTA KWAFUMAÑA MAZU AMAWAHI’

5. (a) Yesu wadiña ‘walubanji’ munjilanyi? (b) Indi ‘kunyivumbu yaMwanta kwafumaña ñahi mazu amawahi,’ nawa tunateli kwimbujola ñahi chakutalilahu chindi?

⁵ Tañenu Masamu 45:2. Nsona hiyalumbulula chikupu Yesu chamwekeneñayuku. Chineli wadiña wawanina, chakadi nikujina wadiña ‘walubanji.’ Hela chochu, waswejeli kwikala walubanji hamuloña wakwikala washinshika kudi Yehova. Kubombelahu, Yesu wazatishileña “mazu amawahi” hampinji yashimwinineñayi nsañu yaWanta. (Luka 4:22; Yow. 7:46) Komana ninetu twafwilaña kwimbujola chakutalilahu chindi mumudimu wetu wakushimwina nikuhosha mazu atela kushika antu hanyichima?—Kol. 4:6.

6. Indi Nzambi wamukiswilili ñahi Yesu ‘haya nyaka’?

⁶ Yehova wamukiswilili Yesu mumudimu windi wakushimwina hamaseki nawa wamwinkeli wuloku hanyima yakufwa neyi ifutu danyiloña muloña wakudihana namuchima wumu. Kapostolu Pawulu wasonekeli nindi: ‘Chamumwenuwu himuntu [Yesu], hakudizoza, hakwovwahilaña ho-o, ndo-o nikukufwa, eña kwakufwa hamutondu wakuyandishila. Dichi Nzambi nawa namutuumbakeshi chakubadika, namwinki ijina dabadika majina ejima; kulonda mwijina daYesu manuñu ejima akafukami, niamwiwulu, niahamaseki, niamwishina damaseki; nimadimi ejima aketeji nawu Yesu Kristu diyi Mwanta, kulonda kulemesha Nzambi Tata.’ (Fwi. 2:8-11) Yehova wamukiswilili Yesu ‘haya nyaka’ kuhitila mukumusañula nakumwinka wumi wakafwaña.—Rom. 6:9.

MWANTA ANAMWILISHI YEKALI WALEMA KUBADIKA ‘AKWAWU’

7. Nzambi wamuwayishili Yesu chakubadika ‘akwawu’ munjilanyi?

⁷ Tañenu Masamu 45:6, 7. Hamuloña wakwila Yesu wakeñeli kuloña chikupu nawa waheleli yuma yatama yadi kumusawula Tata yindi, Yehova wamuwayishili yekali Mwanta waWanta wawuMesiya.  Yesu amuwayishili “manji akuzañalala” chakubadika ‘akwawu,’ dikwila nawu anyanta amuYuda amuchisaka chaDavidi. Munjilanyi? Muloña Yesu amuwayishili kudi Yehova yomweni. Kubombelahu, Yehova wamuwayishili kulonda yekali Mwanta nawa Kapristu Muneni. (Mas. 2:2; Heb. 5:5, 6) Cheñi nawa, Yesu hiyamuwayishili namanjuku, amuwayishili naspiritu yajila, nawa wanta windi hiwekala wahamasekuku, ilaña wekala wamwiwulu.

8. Tukuhosheladi netu ‘Nzambi diyi itanda daYesu,’ nawa muloñadi wutukukuhwelela netu wanta windi waloña?

⁸ Yehova wamuswanyikili Mwanindi hamu neyi Mwanta wawuMesiya mwiwulu mu 1914. ‘Lukanu lwakuloña dilu lukanu lwawanta windi,’ dichi chiyuulu chindi chekala chaloña mpinji yejima. Wukweti wuswa wakuyuula chineli ‘Nzambi diyi itanda dindi.’ Dikwila nawu, Yehova diyi chikuku chawanta windi. Kubombelahu, itanda daYesu “dahaya nyaka nanyaka.” Komana himwatiyaña kuwahaku, hakumukalakela Yehova chineli mukweti Mwanta wamuchidiwu wañovu waswanyikawu kudi Nzambi?

MWANTA ‘HAKUMANYIKA MPOKU YINDI YAKABALI’

9, 10. (a) Mpinjinyi yatachikiliyi Kristu kumanyika mpoku yindi yakabali, nawa wayizatishili ñahi hayina mpinji? (b) Indi Kristu wamba kazatisha ñahi mpoku yindi yakabali?

⁹ Tañenu Masamu 45:3. Yehova wamuleja Mwanta windi ‘kumanyika mpoku yindi yakabali hambunda yindi,’ dikwila nawu amwinkeli ñovu yakuya nakulwa njita nikujilumuna antu ejima adikañaña nawanta waNzambi. (Mas. 110:2) Muloña wakwila Kristu hiMwanta Wanjita washindaña, amutena nawu “Eyi chilobu.” Wamanyikili mpoku yidi yakabali mu 1914 nawa wamushindili Satana mwiwulu niandemoni jindi, nakuyinatila hamaseki.—Chim. 12:7-9.

¹⁰ Diyi mpinji yatachikiliyi Mwanta kuya nakushinda. Ilaña watela ‘kwimika mushindu cheñi.’ (Chim. 6:2) Wunsompeshi waYehova wuchidi kanda winzi hayuma yejima yekala mukaayi kaSatana, nawa Satana niandemoni jindi atela kuyijilumuna chikupu. Babiloni Muneni, wanta wakaayi wansakililu yakutwamba diyi akasambila kujilumunawu. Yehova wafuukulahu kuzatisha anyuuli ajipolotiki hakumujilumuna iwu “chivumbi” watama. (Chim. 17:16, 17) Kuhiñahu, Mwanta Wanjita wakajilumuna cheñi kaayi kaSatana kajipolotiki. Kristu atenañawu cheñi nawu “kañelu wekela,” wakemika mushindu kuhitila mukumuumbila Satana niandemoni jindi mwikela. (Chim. 9:1, 11; 20:1-3) Tushinshikenu wuprofwetu wekala muMasamu 45 chiwashimuna iyi yuma yakuhizumwisha.

MWANTA HAKWENDA ‘MWAYA NSAÑU YALALA’

11. Indi Kristu wukenda ñahi ‘mwaya nsañu yalala’?

¹¹ Tañenu Masamu 45:4. Mwanta Wanjita halwaña njita kulonda yatambuli maluña nikutwala antu muwuduñuku. Kudi yuma yayiwahi yaleñelaña yalwi njita. Wendaña ‘mwaya nsañu yalala, nakudizoza nikuloña.’ Nsañu yalala yatela kuhakwilaku hinsañu yahosha hawanta waYehova wakuleña kwejima. Satana wamujinokeli Yehova nindi wayuulaña chiwahi wanyi hampinji yadikañiliyi naNzambi. Kufuma tuhu hayina mpinji, iyi nsañu yalala ayidimbululaña kudi andemoni niantu. Ichi Mwanta atondawu kudi Yehova keña yendi mwaya nsañu yalala kulonda yamwekeshi nindi Yehova diyi Mwanta wamuwahi.

12. Munjilanyi Mwanta mwendelañayi ‘mwaya nsañu yakudizoza’?

¹² Mwanta wendaña cheñi ‘mwaya nsañu yakudizoza.’ Chineli diyi Mwana kaNzambi wasemuka kankawindi, wemika chakutalilahu chachiwahi chakudizoza nikwovwahila  chikupu wanta waTata yindi. (Isa. 50:4, 5; Yow. 5:19) Antu ejima ovwahilaña Mwanta atela kulondela chakutalilahu chindi chakudizoza nikwovwahila wanta waYehova muyuma yonsu. Antu elaña mwenimu hohu diwu aketejawu kushakama mwituña dadiha dakanayi Nzambi.—Zek. 14:16, 17.

13. Indi Kristu wendaña ñahi nakuhakwilaku ‘nsañu yakuloña’?

¹³ Kristu wendaña cheñi nakuhakwilaku ‘nsañu yakuloña.’ Nsañu yaloña yahakwilañaku Mwanta ‘hikuloña kwaNzambi,’ dikwila nawu nshimbi jaYehova jahosha hayuma yaloña niyatama. (Rom. 3:21; Kuhit. 32:4) Isaya waprofweteli hadi Mwanta Yesu Kristu nindi: ‘Mwanta wakayuula chaloña.’ (Isa. 32:1) Chiyuulu chaYesu chikaleta “mawulu amaha niiseki dadiha,” akaninuwu “mwakekala kuloña.” (2 Pet. 3:3) Muntu wejima wukashakama mwituña dadiha wukwovwahilaña nshimbi jaYehova.—Isa. 11:1-5.

MWANTA HAKUKOÑA “YUMA YIKWETI WOMA”

14. Indi chikasa chaKristu chachidiilu chikakoña ñahi “yuma yikweti woma”? (Talenu mwevulu wakutachikilahu.)

¹⁴ Chinakuyayi nakushinda, Mwanta namanyiki mpoku yindi yakabali hambunda. (Mas. 45:3) Ilaña mpinji yikashika yakusomona mpoku yakabali nakuyizuya nachikasa chindi chachidiilu. Ñimbi yamasamu waprofweteli nindi: ‘Chikasa cheyi chachidiilu chikakoña yuma yikweti woma.’ (Mas. 45:4) Yesu Kristu chikaletayi wunsompeshi waYehova haAmagedoni, wukakoña “yuma yikweti woma” nakujilumuna ayilumbu jindi. Tweluka wanyi yuma yikazatisha hakujilumuna kanu kaayi kaSatana. Hayina mpinji antu ahamaseki akafwa mutentu waweni, muloña wakubula kwovwahila kusoñamisha kwaNzambi kwakwovwahila chiyuulu chaMwanta. (Tañenu Masamu 2:11, 12.) Muwuprofwetu windi wahosha hamafuku akukuminina, Yesu wahosheli nindi antu “akahwidijela nawoma, nakutalila yuma yidi nakwinza hamatuña, muloña ñovu jamawulu jakakanka.” Watwalekeluhu nindi: “Henohu akamona Mwana kamuntu hakwinza mwivu, nañovu yayeni, nalubanji lwakulema kwasweja.”—Luka 21:26, 27.

15, 16. Indi ‘akwanjita’ akamulondelaña Kristu munjita hiyanyi?

¹⁵ Hakubidika kwinza kwaMwanta “nañovu yayeni, nalubanji lwakulema kwasweja” nakujilumuna ayilumbu jaNzambi, mukanda waChimwekeshu wahosha nawu: ‘Hinukumona mwiwulu munenzuluki dehi. Kutala hikudi kawalu katooka nimukwakwendelahu, anamuteni nawu, Washinshika, Walala. Wasompeshaña, waasaña njita mwaloña hohu. Majita amwiwulu adi nakumulondela, adinakwendela hatuwalu tutooka, anavwali mahina atooka akadi hatama. Mukanwa kindi himukwidika mpoku yakabali yatwa, kulonda akatapi nachu nyunza; wakayiyuula nambwechi yachikuñu. Hakudata wukamwinu wavinyu yakulendumuka kwalendumukaña kuzuwa kwaNzambi Watwesha yejima.’—Chim. 19:11, 14, 15.

¹⁶ Indi ‘akwanjita’ amwiwulu akamulondelaña Kristu munjita hiyanyi? Hampinji yamanyikiliyi mpoku yindi yakabali katachi kulonda yamuhañi Satana niandemoni jindi mwiwulu, Yesu wadiña hamu “nawañelu jindi.” (Chim. 12:7-9) Dichi tunateli kukunkulula netu hanjita yaAmagedoni, akwanjita akekala hamu naKristu, hiyañelu ajila. Komana kudihu akwanjita amakwawu akekala hamu naKristu? Yesu wayikanini amana kwindi awayishewa nindi: ‘Yowu wukwimika mushindu, wukukakela nyidimu yami ndo-o nikunsa, nakamwinka wanta wanyunza. Wakayiyuula nambwechi yachikuñu, neyi chafumpañawu manuñu akañemi, pwo-pwo kwayizanda hohu; mwomunatambuli ninami nawa kudi Tata yami.’ (Chim. 2:26, 27) Dichi, amana kwaKristu awayishewa  akekala anatambwili dehi wuloku wawu wamwiwulu, akekala hakachi kanawa akwanjita. Awayishewa akayuula naKristu akamulondaña hampinji yakakoñañayi “yuma yikweti woma” iku nakuyuula nyunza nambwechi yachikuñu.

MWANTA HAKWIMIKA MUSHINDU

17. (a) Indi kawalu katooka kendelañahu Kristu kemenañaku kwodi? (b) Indi mpoku yakabali niwuta wamukunji yemenañaku yumanyi?

¹⁷ Tañenu Masamu 45:5. Mwanta wudi hakawalu katooka, kemenañaku njita yawunyonji nawa yaloña kumesu aYehova. (Chim. 6:2; 19:11) Wukweti mpoku yakabali niwuta wamukunji. Twatañaña nawu: “Nami nitali, hinukumona kawalu katooka; mukwakwendelahu wasenda wuta wamukunji. Amwinka chibaaba, hakuya nakwimika mushindu kulonda nawa akemikaña mushindu ho-o.” Mpoku yakabali niwuta wamukunji wamwekeshaña yuma yikazatishayi Kristu hakujilumuna ayilumbu jindi.

18. Indi “nsewu” jaKristu jikekala ñahi “jatwa”?

¹⁸ Kuzatisha nhoshelu yankinji, ñimbi yamasamu waprofweteli nindi ‘nsewu jaMwanta jatwa, antu hiyakudimbuka, jinashiki munyichima yawayilumbu jindi.’ Antu akayijilumuna mwahita iseki dejima. Wuprofwetu waYeremiya washimwinineñahu dehi nawu: “Akajahawu kudi Yehova ifuku odu akekala heseki dejima, kufumisha kunsa yeseki yimu ndo-o nikunsa yeseki yikwawu.” (Yere. 25:33) Wuprofwetu wahosha hansañu yoyimu wahosha nawu: “Hinukumona kañelu nemani mwitañwa. Hakubidika nezu datiyakana, hakuyila atujila ejima atuukaña hakachi kaluzwizu nindi, Inzenu mupompi kuchawija chaNzambi cheneni; mudyi mbiji yawanyanta ankanu, niyawakulumpi anjita, niyawayilobu, niyawatuwalu nawakwakwendelahu, niyawantu ejima, hela abula wuduñu hela anduñu, hela anyanya hela amaneni.”—Chim. 19:17, 18.

19. Indi Kristu ‘wakenda ñahi chachiwahi’ nakwimika mushindu?

¹⁹ Chikajilumunawu kaayi kaSatana katama hamaseki, Kristu ‘wakenda chachiwahi nakushinda.’ (Mas. 45:4) Wakemika mushindu kuhitila mukumuumbila Satana niandemoni jindi mwikela hampinji yayilehi yaChiyuulu Chayaaka Ikombakaji. (Chim. 20:2, 3) Chineli Diyabolu niañelu jindi akekala neyi anafwi, antu akashakama hamaseki hiyakayiluwañeshaña cheñi kudi Satanaku nawa akwovwahilaña chikupu Mwanta wawu wakashinda nawa walema. Hela chochu, henohu iseki dejima kanda adibalumuni chovu-chovu kulonda dikali paradisa, kudi chuma chikwawu chikayileñela akazañalaleña naMwanta wawu nialunda nindi amwiwulu. Muchibaaba chinalondeluhu tukadiza hachuma chakuzañalesha chikamwekana kumbidi.

[Malwihu aKuzatisha haKudiza]

[Mazu ekoku adi hefu 4]

Twazañalalaña hakushimwina nsañu yayiwahi yaMwanta wetu Yesu Kristu

[Mwevulu wudi hefu 7]

Atujila akayipompesha kulonda akatookeshi heseki (Talenu parakalafu 18)