Yehova Diyi Ibwambu Detu Itwakeñesha

‘Abarahama amuteneneña nawu ibwambu daYehova.’—YAK. 2:23.

MUKWAKULA NENUDI?

Chumanyi chinateli kuleñela twikali Amabwambu jaYehova?

Kwesekeja naMasamu 15:3, 5, Nzambi wakeñaña yumanyi kudetu, hakwila nawu twikali amabwambu jindi?

Yumanyi yinateli kutukwasha hakwila tumuleji Ibwambu detu itwakeñesha yuma yindi munyichima yetu?

1. Wuswanyi wutukweti, chineli atuleña neyi chekalayi Nzambi?

 ANTU avula kuhosha nawu iwu mwana wafwana atata yindi. Eñañi, anyana amavulu afwana anvwali jawu chikupu. Kafwampi, anyana ejima aswanaña yililu yawatata jawu hela amama jawu. Yehova Tata yetu wamwiwulu, diyi Watwinka wumi. (Mas. 36:9) Nawa etu anyanindi ahamaseki, twamufwana muyuma yikwawu. Chineli watuleña neyi chekalayi yomweni, tukweti wuswa wakutoñojoka, kufuukulahu nikwikala nawubwambu nayena.—Kutach. 1:26.

2. Chumanyi chinateli kuleñela twikali Amabwambu jaYehova?

² Yehova nateli kwikala ibwambu detu itwakeñesha. Twekalaña amabwambu jaNzambi muloña watukeña nawa twamukuhwelela yena nimwanindi. Yesu wahosheli nindi: “Chaswejeliyi Nzambi kukeña mpata yamunu mwishina, waheni Mwanindi wumu hohu, kulonda muntu wukumukuhwelela aheti wumi wahaya nyaka, akabuli kunoña.” (Yow. 3:16) Kudi yakutalilahu yayivulu yawantu adiña nawubwambu wawuwahi naYehova. Tuhanjekenu hadi antu ayedi.

‘ABARAHAMA IBWAMBU DAMI’

3, 4. Shimunenu chaambu chadiña hawubwambu waAbarahama naYehova nawubwambu wawankakulula jindi naYehova.

³ Yehova wamuteneni nkakulula yawaIsarela nindi, ‘Abarahama ibwambu dami.’ (Isa. 41:8) Mukanda waKushindulula wamuchiyedi 20:7 wamutena cheñi Abarahama nawu ibwambu daNzambi.  Chumanyi chaleñeleli ona iyala washinshika yatwalekahu kwikala nawubwambu wawuwahi naNleñi yindi? Abarahama wadiña nachikuhwelelu.—Kutach. 15:6; tañenu Yakoba 2:21-23.

⁴ Anyana kaAbarahama ekalili munza wawaIsarela wakushankulu, hakusambila Yehova wadiña Tata yawu nawa Ibwambu dawu. Chawushona, wubwambu wawu naNzambi wamanini. Muloñadi? Muloña akañenyi kukuhwelela muyikaninu yaYehova.

5, 6. (a) Indi Yehova wekala ñahi ibwambu denu? (b) Malwihwinyi itwatela kudihula?

⁵ Chimwasweja kudiza hadi Yehova, mukumukuhwelela chikupu, nawa mukusweja kumukeña nankashi. Toñojokenu hampinji yimwamwilukili Nzambi nenu walala nawa nenu mwatela kwikala nawubwambu wawuwahi nankashi nayena. Mwadizili cheñi nenu wejima wetu twavwalikili akwanshidi muloña Adama wakañenyi kwovwahila. Mwelukili nenu antu ejima aambuka naNzambi. (Kol. 1:21) Mwelukili cheñi nenu Tata yetu wamwiwulu wukweti kukeña hekala kwakulehi nanetuku nawa watwakamenaña. Chitwelukili netu wahanini Yesu kulonda yekali ifutu danyiloña nikukuhwelela munidi ifutu danyiloña, twatachikili kwikala amabwambu jaNzambi.

⁶ Makonu neyi twanuka chitwamwilukili Yehova, twatela kudihula netu: ‘Komana wubwambu wami naNzambi wuchidi wakola? Komana nichidi kumukuhwelela chikupu, nawa ifuku niifuku namwekeshaña kukeña kudi Ibwambu dami inakeñesha Yehova?’ Muntu mukwawu wakushankulu wadiña nawubwambu wawuwahi naYehova hiGideyona. Tuhanjekenu hachakutalilahu chindi chachiwahi nichitwatela kumwimbujola.

“YEHOVA DIYI KUWUNDA”

7-9. (a) Chumanyi chakuhayamisha chamumwekeneni Gideyona, nawa mwafuminidi? (Talenu mwevulu wakutachikilahu.) (b) Tunateli kukolesha ñahi wubwambu wetu naYehova?

⁷ Nsompeshi Gideyona wamukalakeleli Yehova, mumpinji yakala heñilili munza wawaIsarela Mwituña Dachikaninu. Ansompeshi kapetulu 6 kashimuna nawu kañelu kaYehova wamuhempwili Gideyona muOfwara. Hayina mpinji, aMidiyani antuñi nawu diwu adiña ayilumbu jawaIsarela. Ichi dichaleñeleli Gideyona yabuli kuhulila tidiku mwiha, ilaña wayili nakuhila mwiyanda dakukamwina vinyu, mwateleleliyi kunyakala kusweka tidiku yalema. Wahayamini chelili kañelu yadimwekeshi kudi yena nawa yamuleji nindi eyi “chilobu mukwañovu,” Gideyona wajinokeli neyi chakwila Yehova, wapulwishili aIsarela kufuma muEjipitu, wadi kuyikwasha hayina mpinji. Kañelu wamwimeneneñaku Nleñi, wamukolesheli Gideyona nindi Yehova wukuyamwina.

⁸ Gideyona welukili wanyi chateleleliyi ‘kuyamwina aIsarela kudi aMidiyani.’ Amwakwili chakubula kuhita mumbadi, Yehova wahosheli nindi: “Chalala ami nukwikala hamu neyi, eyi wakatapa aMidiyani neyi chakutapa muntu wumu hohu.” (Ansomp. 6:11-16) Chakadi nikujina Gideyona wachidiña nakujinoka chatela kuyamwinayi, dichi walombeli chinjikijilu. Tunamoni chikupu netu hampinji yahanjekeleñawu Gideyona wamumweneña Yehova nindi hiMuntu walala.

⁹ Chuma chahiñiluhu chakolesheli chikuhwelelu chaGideyona nawa chamuleñeleli yakundami kudi Nzambi. Gideyona waloñesheli yakudya nawa wamwinkeli kañelu. Chelili yakudya ayinoñeshi nakesi muchihayamisha namutondu wadiña muchikasa chakañelu, Gideyona welukili nindi mwalala wadiña kañelu kaYehova. Gideyona watiyili woma, dichi wabidikili nindi: “Yayo! Eyi Mwanta Nzambi! Namumona dehi kañelu kaYehova kumesu!” (Ansomp. 6:17-22) Komana ichi chuma chamwekeni chamanishili wubwambu waGideyona naNzambi? Inehi. Gideyona wamwilukili Yehova chikupu chakwila washakamini mukuwunda naNzambi. Tweluka netu washakamini mukuwunda muloña wakameña katuñiliyi Gideyona hadina iluña, wakitumbili nindi “Yehova Shalomi.” MuchiHeberu  idi ijina daya mukwila nawu “Yehova diyi kuwunda.” (Ansomp. 6:23, 24, NW.) Neyi tutoñojoka chikupu hayuma yatukoñelañayi Yehova ifuku niifuku, twelukaña netu Hibwambu detu walala. Kulomba kudi Nzambi mpinji yejima kwaleñelaña twikali mukuwunda nawa kwakoleshaña wubwambu wetu nayena.

HINYI ‘WUKUSHAKAMA MWITENTI DAYEHOVA’?

10. Kwesekeja naMasamu 15:3, 5, Yehova wakeñaña yumanyi kudetu, hakwila nawu twikali amabwambu jindi?

¹⁰ Hakwila nawu Yehova yekali ibwambu detu, kudi yuma yitwatela kwila. Neyi chasonekawu muMasamu 15, Davidi wembeli nakutena yuma yakeñekaña hakwila ‘tushakami mwitenti daYehova,’ dikwila nawu kwikala ibwambu daNzambi. (Mas. 15:1) Tuhanjekenu hayuma yiyedi yakeñekaña, kubula kutwambila amakwawu nikwikala ashinshika muyuma yonsu yitwelaña. Kutalisha haniyi nsañu, Davidi wahosheli hadi muntu watela kushakama mwitenti daYehova nindi: “Yowu wabulaña kutwambila akwawu nedimi dindi . . . Yowu wabulaña kutambula maseleka akumufwisha nachu muntu wakadi muloña.”—Mas. 15:3, 5.

11. Muloñadi chitwatelela kutondolwela kutwambila antu amakwawu?

¹¹ Mwisamu dikwawu, Davidi wasoñamishili nindi: “Hembaku idimi deyi dibuli kuhosha yatama.” (Mas. 34:13) Neyi tukañanya kutiyilila iku kufumba kwonenawu hitunateli kwikala amabwambu jaTata yetu waloña wamwiwuluku. Muloña Satana chilumbu chaYehova muneni diyi sakutwamba. Izu dakwila nawu “Diyabolu” dafuma kwizu dachiGiriki daya mukwila nawu “Mukwakutwambila akwawu.” Neyi tutondolwelaña kuhosha mazu atama hadi antu amakwawu kukutukwasha kukundama kwakwihi naYehova. Sweje-e neyi hitukuhosha hadi amayala atondawu muchipompelu.—Tañenu Aheberu 13:17; Yuda 8.

12, 13. (a) Muloñadi chitwatela kwikala ashinshika muyuma yejima? (b) Yumanyi yafumaña mukwikala ashinshika?

¹² Ambuña aYehova ekala ashinshika, hiyadilaña akwawu mabula hamutuku. Kapostolu Pawulu wasonekeli nindi: “Tulombelenuku. Tuneluki chalala netu tukweti chinleji chamuchima chachiwahi, tunakeñi kushakama chakashinshi muyuma yejima.” (Heb. 13:18) Hamuloña wakufwila “kushakama chakashinshi muyuma yejima,” hitwadilaña amana kwetu akwaKristu mabula hamutuku. Chakutalilahu, neyi tweñija amana kwetu nyidimu, twayakamenaña chiwahi nikuyifweta kwesekeja nachitwadikanini. Hakwikala akwaKristu, twekala ashinshika kudi antu atwiñija nyidimu niantu ejima. Nawa neyi atwiñija nyidimu kudi mukwetu mukwaKristu, hitwakeñaña netu yatwishi hachifulu chenenuku.

¹³ Kakavulu twatiyaña antu amukaayi chahamekañawu aYinsahu jaYehova chazatañawu nawu chachiwahi. Chakutalilahu, mukulumpi wakampani yeneni yatalaña hanyidimu yakutuña wamweni nindi aYinsahu jaYehova elaña mwahoshañawu. Wahosheli nindi: “Enu mpinji yejima mwelaña mumunaditeji kwila.” (Mas. 15:4) Yililu yamuchidiwu yatukwashaña kutwalekahu kwikala amabwambu jaYehova. Sweje-e, yaletaña kalemesha kudi Tata yetu wamwiwulu wukweti kukeña.

KWASHENU AMAKWAWU EKALI AMABWAMBU JAYEHOVA

14, 15. Tunateli kukwasha ñahi antu mumudimu wetu wakushimwina kulonda ekali amabwambu jaYehova?

¹⁴ Hela chakwila akuhwelela nawu Nzambi wekala kwoku, antu amavulu itwawanaña mumudimu wakushimwina hiyamumonaña nawu Hibwambu dawu akeñeshawuku. Tunateli kuyikwasha ñahi? Toñojokenu hanshimbi yayinkeluwu atumbanji 70 kudi Yesu hampinji yayitemesheli kuya nakushimwina ayedi ayedi nindi: “Itala dimwakeñila, mwakasambila kwilamu nenu, Mwitalidi mwikali kuwunda. Neyi mudi muntu wawunda,  kuwunda kwenu kwakekala hadi yena; neyi nehi, kuwunda kwenu kwakafunta cheñi kudenu aweni.” (Luka 10:5, 6) Tunateli kukwokola antu kuchalala kuhitila muyililu yayiwahi. Neyi tumwekeshaña yililu yayiwahi kudi antu atudimbululaña, chinateli kufwomona ndulu yidi munyichima yawu kulonda mpinji yikwawu akatutambwili.

¹⁵ Neyi tuwana antu akuhwelela chikupu mukwitiya kwakutwamba hela alondelaña tushidikilu twakaanishawu muNsona, twatela kutwalekahu kuyikeña nikwikala awunda. Twatambwilaña chiwahi antu enzaña kukupompa kwetu hamuloña wakwila yuma yinakumwekana mukaayi makonu yinakuyileñela ekaleña nampwila yakukeña kudiza yuma yayivulu hadi Nzambi itwadifukulañaku. Yibaaba yinakuhosha nawu “Bayibolu Yahimpaña Yihandilu Yawantu” yatulejaña yakutalilahu yawantu amavulu anakudiza hadi Nzambi.

KUZATILA HAMU NEBWAMBU DETU ITWAKEÑESHA

16. Twekala ñahi amabwambu jaYehova nawa ‘akwakukalakala hamu nindi’?

¹⁶ Kakavulu antu azatilaña hamu adikundaña chikupu. Antu ejima adihana kudi Yehova akweti kukooleka kwakwikala amabwambu jindi nawa ‘akwakukalakala hamu nindi.’ (Tañenu 1 Akorinda 3:9.) Eñañi, chitwakalakalaña mumudimu wakushimwina nikwilisha atumbanji, twelukaña chikupu yililu yayiwahi yaTata yetu wamwiwulu. Twamonaña spiritu yajila chiyatukwashaña kuzata mudimu wetu wakushimwina nsañu yayiwahi.

17. Indi yakudya yakuspiritu yatuloñeshelañawu hakupompa kwanyanya nikwankambi yamwekeshaña ñahi nawu Yehova hibwambu detu?

¹⁷ Neyi tusweja kudikita nankashi mumudimu wakwilisha atumbanji, twakundamaña kwakwihi naYehova. Chakutalilahu, toñojokenu Yehova chakañeshañayi antu atudimbululaña. Anukenu hayaaka yantesha yinahituhu. Hitunadimweni namesu kapu Nzambi chinakutulombolayuku? Twahayamaña chiyanakutwalekahu nakutuloñeshela yakudya yayiwahi yakuspiritu. Maprogiramu akupompa kwankambi nikwanyanya amwekeshaña nawu Tata yetu wukweti kukeña weluka kukala kutwamonaña niyuma yitwakeñaña. Chisaka chimu chasonekeli mukanda wakusakilila hakupompa kwankambi nawu: “Maprogiramu ahakupompa atwishika hanyichima yetu. Twamweni netu Yehova watukeña hamuntu hamuntu nawa wakeñaña nindi twileña mwatulejañayi.” Eyala namumbanda adisumbula afumini kuGermany, chakumishiluwu kupompa kwankambi muIreland, asakilili nankashi chayitambwililuwu nikuyakamena chachiwahi, ahosheli nawu: “Tunasweji kusakilila kudi Yehova niMwanta windi Yesu Kristu. Atutambikili kulonda twikali hamu nawantu ekala muniwu munza wawanina. Hitunakuhosha hohu hakunuñañanaku, ilaña twakumonaña ifuku niifuku. Yuma yayiwahi yitwamweni hakupompa kwankambi  muDublin kukutwanukishaña mpinji yejima kukooleka kwakuwahi kutukweti kwakumukalakela Nzambi yetu wabadika hamu nanenu ejima.”

EBWAMBU NAMUNTU AHANJEKAÑA

18. Twatela kudihula netudi kutalisha hakuhanjeka naYehova mukulomba?

¹⁸ Wubwambu wakolaña neyi munakuhanjeka chachiwahi. Makonu mpinji yejima antu azatishaña Intaneti nikuditemeshela nsañu nikuhanjeka hajinshiña. Munjila yoyimu, indi etu hamuntu hamuntu twahanjekaña ñahi Nebwambu detu itwakeñesha Yehova? Eñañi, diyi “Watiyaña mwalombañawu antu.” (Mas. 65:2) Komana twahanjekaña nindi mukulomba mpinji yejima?

19. Yumanyi yitukweti yinateli kutukwasha neyi chatwikalilaña kumulejamu Tata yetu wamwiwulu yuma yindi munyichima yetu?

¹⁹ Ambuña aNzambi amakwawu akañanyaña kumuleja yuma yidi munyichima yawu yayineñeshaña. Ilaña, Yehova wakeñaña nindi tumulejeña yuma yidi munyichima yetu mukulomba. (Mas. 119:145; Mukeŋa 3:41) Hela chakwila, chatukalilaña kumulejamu Nzambi yuma yidi kumuchima, tukweti wukwashu. Pawulu wayisonekeleli akwaKristu amuRoma nindi: ‘Mwomumu nawa nispiritu yatukwashaña hitwazeyazeyaña; muloña hituneluki mutwadi kulombaku, ilaña spiritu yayeni yatulembelelaña nakwaba kwakweni kwakukañanya kushimuna. Niyena washinshikaña munyichima yawantu, neluki mwatoñojokaña spiritu, muloña walembelaña akwakujila mwaya muchima waNzambi.’ (Rom. 8:26, 27) Kutoñojoka chikupu hamazu asonekawu munyikanda yamuBayibolu yindi neyi Yoba, Masamu, niYishimu kukutukwasha kumuleja Yehova yuma yejima yindi munyichima yetu yatuneñeshaña.

20, 21. Indi mazu aPawulu ekala haAfwilipi 4:6, 7 atukundejaña ñahi?

²⁰ Neyi tuholokela mukukala, twatela kwanuka mazu aPawulu onenawu afumbiliyi Afwilipi nindi: “Bayi mwakama chumaku; ilaña mulejenu Nzambi yuma yejima yimunakeñi nakulomba, nakulembelela, nakusakilila.” Neyi tulombaña muniyi njila kudi Ibwambu detu itwakeñesha tukukundejewa, muloña Pawulu wabombeleluhu cheñi nindi: “Kuwunda kwaNzambi kwabadika maana ejima kwakahemba nyichima yenu niyitoñojoka yenu mudi Kristu Yesu.” (Fwi. 4:6, 7) Dichi twatela kulemesha chikupu “kuwunda kwaNzambi” kwabadika kwahembaña nyichima niyitoñojoka yetu.

²¹ Kulomba kwatuleñelaña kukwata wubwambu naYehova. Dichi bayi ‘tuleka kulombaku.’ (1 Tesa. 5:17) Ichi chibaaba chatela chikoleshi wubwambu wetu naNzambi nawa twatela kufwila kwovwahila nshimbi jindi jaloña. Nawa twatela tutoñojokenu chikupu hankisu yitukweti muloña Yehova diyi Tata yetu, hiNzambi yetu nawa Ibwambu detu.

[Malwihu aKuzatisha haKudiza]

[Mwevulu wudi hefu 24]

Twakwashaña amakwawu kulonda ekali amabwambu jaYehova (Talenu maparakalafu 14, 15)

[Mwevulu wudi hefu 25]

Kulomba kwakoleshaña ñahi wubwambu wetu naNzambi? (Talenu parakalafu 21)