Yehova Diyi Watwinkaña Yuma Yitwakeñaña Nawa Watukiñaña

“Nakamupulwisha nanochu chanankeñiyi nankashi, nakamusha hewulu, nanochu chanelukiyi ijina dami.”—MAS. 91:14.

MUKWAKULA NENUDI?

Muloñadi wutukuhoshela netu Yehova Himukwakuhana Wabadika?

Chumanyi chakoñeliyi Yesu hakukundamisha antu kudi Nzambi?

Yehova wakiñaña ñahi antu amukeña nawa amwovwahilaña?

1, 2. Twashiyashana ñahi muyuma yitwelaña muchisaka chetu, nichitwadiza chalala?

 YEHOVA diyi waleñeli yisaka yejima. (Efwes. 3:14, 15) Hela chakwila, twekala muchisaka chimu, tukweti yililu yashiyashana nawa twelaña yuma yambokamboka. Hadaha munashakami nawanvwali jenu kufuma himwavwalikili kushika nimpinji yimunakuli. Amakwawu afwisha anvwali jawu, hamuloña wayikatu, maposu, hela kukala kukwawu. Amakwawu niwena eluka wanyi anvwali jawu.

² Hakachi kawantu amuchisaka chawakwakudifukula aYehova, hekala antu adiza chalala munjila yashiyashana. Hadaha ‘mwakulila muchalala’ neyi chahoshañawu amakwawu, nawa anvwali ayidizishileña. (Kuhit. 6:6, 7) Hadaha mudi hakachi kawantu amavulu anadizi chalala kuhitila mumudimu wakushimwina wakalakalañawu ambuña Yehova amakwawu.—Rom. 10:13-15; 1 Tim. 2:3, 4.

3. Yumanyi yitwamonaña wonsu wetu?

³ Hela chakwila twashiyashana muyuma yitunashimuni hewulu, Ilaña twafwanañana muyuma yikwawu. Wonsu wetu twamonaña  yuma yatama yafumaña mukubula kwovwahila kwaAdama, twaswana nshidi, nawa twafwaña. (Rom. 5:12) Hela chochu, hakwikala akwakudifukula alala, twamutenaña Yehova netu “Tata yetu.” Hakutena antu jaNzambi atondeliyi akushankulu, haIsaya 64:8 hahosha nawu: “Eyi Yehova yeyi tata yetu.” Kubombelahu, Yesu watachikili kulomba kwindi kwakutalilahu nanawa mazu akwila nawu: “Tata yetu wekala mwiwulu, ijina deyi dijili.”—Mat. 6:9.

4, 5. Chitukutoñojokaña chikupu chitwatela kumuhameka Tata yetu, Yehova, yumanyi yitwatela kushinshikahu yikutukwasha?

⁴ Tata yetu wamwiwulu watwinkaña yuma yitwakeñaña nikutukiña hamu neyi antu atambikaña hejina dindi muchikuhwelelu. Kwesekeja nachasonekeli ñimbi yamasamu, Yehova wahosha nindi: “Nakamupulwisha [mukwakudifukula walala] nanochu chanankeñiyi nankashi, nakamusha hewulu, nanochu chanelukiyi ijina dami.” (Mas. 91:14) Eñañi, Yehova Nzambi mukukeña watupulwishaña kudi ayilumbu jetu nawa watukiñaña neyi antu jindi kulonda abuli kutujilumuna.

⁵ Tuhanjekenu hayikuma yisatu yalema, yikutukwasha tusweji kumuhameka Tata yetu wamwiwulu (1) Tata yetu watwinkaña yuma yitwakeñaña. (2) Yehova Watukiñaña. (3) Nawa Nzambi Hiibwambu detu itwakeñesha. Chitukuhanjekaña haniyi yikuma chikuwaha neyi tutoñojoka chikupu hawubwambu wetu naNzambi kulonda twiluki chitwatela kumuhameka neyi Tata yetu. Tukuhetelamu cheñi neyi tutoñojoka hankisu yahembelayi Yehova antu akundamaña kwakwihi nayena.—Yak. 4:8.

YEHOVA HIMUKWAKUHANA WABADIKA

6. Munjilanyi Yehova mwamwekeshilañayi nindi Himukwakuhana “yuma yayiwahi yahanañawu yejima”?

⁶ Kambanji Yakoba wasonekeli nindi: “Yuma yayiwahi yahanañawu yejima, niyamukunkulu yalala yejima, yasulukaña kwiwulu kudi Tata yayejeji.” (Yak. 1:17) Wumi hichawana chabadika kuwaha chatwinkayi Yehova. (Mas. 36:9) Neyi twilaña mwaya muchima waNzambi muchihandilu chetu, akutukiswila chikupu makonu nawa tukwikala nakuchiñeja kwawumi wahaya nyaka mwituña dadiha. (Yish. 10:22; 2 Pet. 3:13) Tunateli kwila ñahi mwenimu chineli twamonaña yihuñu yafumaña mukubula kwovwahila kwaAdama?

7. Nzambi wawanini ñahi njila yatela kutukwasha kulonda twikali nawubwambu wawuwahi nayena?

⁷ Mwamweni Yehova diyi Mukwakuhana Wabadika watwinkaña yuma yejima yitwakeñaña. Chakutalilahu, hamuloña waluwi lwindi lwasweja watwamwinaña. Mwalala, wonsu wetu hitwawaninaku muloña twaswanini nshidi kudi tata yetu waheseki watachi. (Rom. 3:23) Hela chochu, muloña wakukeña kwaYehova, wawanini njila yatela kutukwasha kulonda twikali nawubwambu wawuwahi nayena. Kapostolu Yowanu wasonekeli nindi: “Kukeña kwatukeñayi Nzambi kwamwekeni hatemesheliyi Nzambi Mwanindi wumu hohu mumpata yamunu mwishina, kulonda tuhandili mudi yena. Kweniku diku kukeña; hiyetu twakeñeli Nzambuku, yena diyi watukeñeletu, hakutemesha Mwanindi ekali ifutu danyiloña yetu.”—1 Yow. 4:9, 10.

8, 9. Yehova wamwekesheli ñahi nawu Himukwakuhana Wabadika mumafuku Abarahama niIsaka? (Talenu mwevulu wakutachikilahu.)

⁸ Kwakwihi nachaaka cha 1800 B.C.E. kwamwekeni chuma chashimwinuwu muwuprofwetu chamwekeshaña njila yayiwahi yaloñesheliyi Yehova kulonda antu ovwahila akaheti wumi wahaya nyaka. Aheberu 11:17-19 halumbulula nawu: “Nakukuhwelela Abarahama, chamwesekeluwu, hakulambula Isaka; eñañi, yena watiyili kuwaha kutambula yikaninu, hakulambula mwanindi wumu hohu; yowu atenenuwu nawu, Anyaneyi akayitenena mudi Isaka. Welili nindi, hela mukufwa Nzambi natweshi kumusañula; dimu mwamutambwiliyi muchifwikija.” Chuma chakoñeliyi Abarahama chesekana nachakoñeliyi Yehova. Yehova wahanini Mwanindi, Yesu Kristu, kulonda  kukuula antu ampata yamunu mwishina.—Tañenu Yowanu 3:16, 36.

⁹ Isaka watela wazañaleli chikupu chelukiliyi nindi hakufwa neyi mulambuku! Chakadi nikujina wazañaleli chelili Nzambi yahiñishumu mulambu wacheñi, chizamba chamukoku chakakeleli muchiputa chadiña kwakwihi. (Kutach. 22:10-13) Dichaletesheli hadina iluña hiyakutumbahu nawu “Yehova Yire,” chaya mukwila nawu ‘Yehova Wahanaña.’—Kutach. 22:14.

YEHOVA WATUKIÑAÑA

10, 11. Anyi anakulombola “mudimu wakushimuna nsañu yakukundamisha,” nawa anakuwuzata ñahi?

¹⁰ Chitukutoñojokaña chikupu Yehova chamwekeshañayi nindi Himukwakuhana Wabadika, twahamekaña mudimu walema wazatiliyi Yesu Kristu, neyi chahamekeliyi Pawulu hakusoneka nindi: ‘Muloña tuneluki chalala netu wumu chafwililiyi antu ejima, dichi niejima afwili. Wafwilili ejima kulonda antu akuhanda abuli kudihandila cheñi awenawu, amuhandilaña yena wayifwilili, asañwiluwu mudi afu.’—2 Kor. 5:14, 15.

¹¹ Hamuloña wakumukeña kwamukeñeluwu Nzambi nikukooleka kwabadika kwakumukalakela, akwaKristu akusambila atambwilili “mudimu wakushimuna nsañu yakukundamisha.” Mudimu wawu wakushimwina nawa wakwilisha atumbanji wakwashili antu adiña nanyichima yayiwahi kulonda ekali mukuwunda naNzambi nikwikala amabwambu jindi, nakwikala anyanindi akuspiritu. Makonu, ambuña Yehova awayishewa niwena azataña mudimu wowumu. Yuma yazatañawu neyi añimenu jaNzambi niKristu yakwashaña antu akweti nyichima yayiwahi kukunda kudi Yehova nakwikala akwakwitiya.—Tañenu 2 Akorinda 5:18-20; Yow. 6:44; Yil. 13:48.

12, 13. Tunateli kumwekesha ñahi netu twamusakililaña Yehova hayuma yejima yatwinkañayi?

¹² Hamuloña wakumuhameka Yehova neyi Mukwakuhana Wabadika, akwaKristu ejima akweti kuchiñeja kwakushakama hamaseki niwena azatilaña hamu nawawayishewa mumudimu wakushimwina Wanta. Twazatishaña Bayibolu muniwu mudimu chawana chikwawu chabadika kuwaha chatwinkayi Nzambi. (2 Tim. 3:16, 17) Kuhitila mukuzatisha chiwahi Izu daNzambi mumudimu wakushimwina, twakwashaña antu amakwawu kwikala nakukooleka kwakuheta wumi wahaya nanyaka. Wejima wetu twashindamenaña hachuma chikwawu chatwinkayi Yehova chatukwashaña muniwu mudimu, dikwila nawu spiritu yindi yajila. (Zek. 4:6; Luka 11:13) Mwafumaña yuma yayiwahi nankashi neyi chitwamonaña muYearbook yindi yejima yawaYinsahu jaYehova. Tukweti kukooleka kwabadika nankashi kwakuzata muniwu mudimu wakumuhameka Tata yetu nawa Mukwakutwinka yuma yitwakeñaña!

¹³ Hayuma yejima yatwinkayi Nzambi, twatela kudihula netu: ‘Komana nazataña nañovu mumudimu wakushimwina kulonda nimwekeshi nami namusakililaña Yehova chikupu hayuma yanyinkayi? Nateli kuzata nañovu kulonda nishimwineña chachiwahi chikupu nsañu yayiwahi?’ Tunateli kumwekesha netu twasakililaña hayuma yayiwahi yatwinkayi Nzambi kuhitila mukutwamijaku nyidimu yaWanta muchihandilu chetu. Neyi twila mwenimu, Yehova wukutwinkaña yuma yitwakeñaña. (Mat. 6:25-33) Chineli Nzambi watukeña, twatela kuzata nañovu chikupu kulonda tumuzañalesheña nikutiyisha muchima windi kuwaha.—Yish. 27:11.

14. Yehova wekala ñahi Mukwakupulwisha antu jindi?

¹⁴ Davidi ñimbi yamasamu wembili nindi: ‘Ilaña ami kwami nikazweñi wabula yuma; hela chochu, Yehova enda antoña; yeyi nkwashi yami, yeyi mukwakumpulwisha.’ (Mas. 40:17) Yehova natwalekuhu kwikala Mukwakupulwisha antu jindi neyi izanvu, sweje-e neyi anakutwalekahu nakuyiyandisha chikupu kudi ayilumbu jawu chakubula kuleka. Twamusakililaña chikupu Nzambi chatukwashañayi hampinji yatuyandishañawu nihayuma  yayivulu yakuspiritu yatwinkañayi mpinji yejima.

YEHOVA WATUKIÑAÑA

15. Shimunenu chakutalilahu chatata yawantu wukweti kukeña chakiñañayi mwanindi.

¹⁵ Tata yawantu wakeña anyanindi wayinkaña yuma yakeñañawu nikuyikiña. Wafwilaña kuyamwina neyi adi muwubanji. Mana kwetu wumu wanukaña chuma chamumwekeneni hampinji yadiñayi kansi. Ifuku dimu afumineña mumudimu wakushimwina nawatata yindi, ashika nikukaloña. Awanini kaloña nenzali muloña wanvula yeneni yanokeli nantentemena. Hakwila nawu azambuki, ateleleli kukiluka kufuma helola dimu deneni nakukilukila hadikwawu. Mwana diyi watwamininuku, chelili nindi yakilukili helola waselumukilili mumenji nawa wajiminini mapampa kayedi. Wenowu muzañalu watiyiliyi mwana hamuloña wakwila atata yindi anyakeli kumukwata chikupu kumafwiji nakumupulwisha henohu kanda yanwini! Munjila yoyimu, Tata yetu wamwiwulu watwamwinaña kuyuma yatama yamukaayi nikudi Satana nyuuli yanaka kaayi. Mwamweni, Yehova diyi Mukwakukiña wambadika.—Mat. 6:13 1 Yow. 5:19.

16, 17. Yehova wayikwashili nikuyikiña ñahi aIsarela hampinji yalwileñawu nawaAmaleki?

¹⁶ Kukiña kwatukiñañayi Yehova akulumbulula chiwahi hachuma chamwekeni, chelili nayipulwishi dehi aIsarela kufuma muwuduñu muEjipitu nikuyikiña muchihayamisha hampinji yazambukileñawu Kaluñalwiji Kachinana mu 1513 B.C.E. Hanyima yakwenda muchinkala mpata kwakwihi naMpidi yaSinayi, iwu munza washikili muRefwidimi.

¹⁷ Kwesekeja nawuprofwetu waNzambi wasonekawu haKutachika 3:15, Satana wafwilileña kuwana njila mwakulukukila aIsarela amwekeneña neyi adiña adana wakuyamwina. Wayilukukili kuhitila mudi Amaleki, adiña ayilumbu jawantu jaNzambi. (Kuch.  24:20) Toñojokenu yuma yakoñeliyi Yehova kuhitila mudi amayala awana ashinshika adi neyi Yoshuwa, Mosi, Aroni, niHuri. Hampinji yalwileñayi Yoshuwa nawaAmaleki, Mosi, Aroni niHuri emeni hewulu dampidi yadiña kukamwihi. Cholweliyi Mosi makasa indi kwiwulu, aIsarela emikili mushindu. Ilaña makasa aMosi chalemenuwu, Aroni naHuri amukwatilili makasindi kwiwulu. Chineli Yehova wamukwashili nikumukiña, “Yoshuwa wazeyesheli Amaleki niantu indi.” (Kwid. 17:8-13) Mosi watuñili kameña, wakitumbili ijina nindi, “Yehova Nissi,” chaya mukwila nawu ‘Yehova Diyi Chiswamu Chami.’—Tañenu Kwidika 17:14, 15.

TONDOLWELENU NYIHETU YASATANA

18, 19. Indi Nzambi nakukiña ñahi ambuñindi makonu?

¹⁸ Yehova wakiñaña antu amukeña nawa amwovwahilaña. Kufwana aIsarela adiña muRefwidimi, neyi atulukuka kudi ayilumbu twatemukilaña kudi Nzambi kulonda yatwamwini. Yehova watukiñaña hamu neyi izanvu, nawa watujikililaña kunyihetu yaDiyabolu. Toñojokenu Nzambi chinatwalekuhu kukiña amana kwetu akaanaña kudiñija munsañu jamatuña nachiyuulu hamuloña wakwikala akwaKristu. Chakutalilahu, ichi dichamwekeneña muchiyuulu chawaNazi muGermany nimumatuña amakwawu muyaaka yamuma 1930 nikukutachika kwa 1940. Neyi tukutañaña nikutoñojoka chikupu hansañu yachihandilu chawantu akiñiluwu kudi Nzambi hampinji yakweseka, ashimunawu muYearbook, kukutukolesha kulonda tumukuhweleli Yehova neyi chiswamu chetu.—Mas. 91:2.

¹⁹ Mukuloñesha kwaYehova nimunyikanda yasonekañawu, atulejaña nsañu yatela kutukiña. Toñojokenu yumiyi chiyinakutukwasha makonu. Antu amukaayi chinakuswejawu kudiñija muyuma yatama yidi neyi wuvumbi, walwa, nikutala nyevulu yanzekesi, Yehova watusoñamishaña kuyuma yinateli kujiyisha yililu yetu yayiwahi. Chakutalilahu, atufumbaña munjila yayiwahi kulonda tuleki kudikunda nawantu atama kuhitila muIntaneti. *—1 Kor. 15:33.

20. Atukiñaña nikutulombola ñahi muchipompelu chawakwaKristu?

²⁰ Tunateli kumwekesha ñahi chikupu netu ‘anakutudizisha kudi Yehova’? Babalenu kulonda mwovwahileña nshimbi jindi. (Isa. 54:13) Muyipompelu yetu twekala akiñewa, muloña atulombolaña nikutukiña kudi amayala ashinshika akalakalaña neyi aeluda atufumbaña nikutukwasha naNsona. (Ŋal. 6:1) Yehova watwakamenaña kuhitila mudi awa ‘antu ekala yamukunkulu.’ (Efwes. 4:7, 8) Twatela kwila ñahi neyi anakutufumba? Nzambi wukatukiswila neyi twovwahilaña namuchima wejima.—Heb. 13:17.

21. (a) Twatela kufukulahu kwila chumanyi? (b) Nsañwinyi yitwakadiza muchibaaba chinalondeluhu?

²¹ Twikalenu namuchima wakufwila kutulombola kudi spiritu yajila nikwovwahila mwatufumbañayi Tata yetu wamwiwulu. Twatela cheñi kutoñojoka chikupu hachihandilu chaMwanindi, Yesu Kristu, nikufwila kwimbujola chakutalilahu chindi chachiwahi. Yesu amukiswilili chikupu, hamuloña wakwovwahila kushika nikukufwa. (Fwi. 2:5-11) Kufwana Kristu, anetu nawa akatukiswila neyi tumukuhwelela Yehova namuchima wetu wejima. (Yish. 3:5, 6) Dichi twatela kumukuhwelela Yehova mpinji yejima netu diyi Watwinkaña yuma yitwakeñaña nawa Watukiñaña. Tukweti kukooleka kweneni chikupu kwakumukalakela! Tukusweja kumukeña neyi tutoñojokaña hachililu chikwawu chamuchisatu chaTata yetu watwakamenaña, dikwila nawu hiibwambu detu. Muchibaaba chinalondeluhu twakadiza Yehova chekalayi Ibwambu detu itwakeñesha.

[Tumazu twaheshina]

[Malwihu aKuzatisha haKudiza]

[Mwevulu wudi hefu 19]

Yehova nateli kuzatisha akwetu akwakwitiya kulonda atukwashi kwikala ashinshika mumpinji yakala (Talenu maparakalafu 18-20)