Zañalalenu Muloña Mwana kaMukoku Hakusumbula!

‘Tuzañalalenu, tutiyenu kuwaha nankashi, . . . muloña kusumbula kwaMwana kaMukoku kunashiki dehi.’—CHIM. 19:7.

YIKUMA YITWATELA KWANUKA

Indi hakusumbula kwaMwana kaMukoku, nsumbuki hinyi nawa Kristu nakumuloñesha ñahi kulonda yasumbuki?

Mpinjinyi yikasumbulayi Mwana kaMukoku?

Tuneluki ñahi netu “anyikoku acheñi,” niwena akazañalala hampinji yikasumbulañayi Mwana kaMukoku?

1, 2. (a) Kusumbula kwanyi kukaleta muzañalu mwiwulu? (b) Malwihwinyi itukuhanjekahu?

 KULOÑESHA chawija chakusumbula kwasendaña mpinji yeneni chikupu. Tukuhanjeka hamaluwi amawahi, maluwi amwanta. Toñojokenu hachuma ichi! Awa maluwi anayiloñeshi hadi yaaka 2,000. Mpinji yinakuswila kwakwihi chikupu kulonda nsumbuli yasendi nsumbuki yindi. Muchipañu chaMwanta keña mwikali tumina twakuzañalala, nawa mazaza amwiwulu akemba nawu: ‘Aleluya! Muloña Yehova Nzambi yetu, Watwesha yejima, hakuyuula. Tuzañalalenu, tutiyenu kuwaha nankashi, tumulemeshenu; muloña kusumbula kwaMwana kaMukoku kunashiki dehi, niñodindi nadiloñeshi dehi.’—Chim. 19:6, 7.

² ‘Mwana kaMukoku’ wakasumbula nawa wakaleñela mwiwulu mukekali kuzañalala diyi Yesu Kristu. (Yow. 1:29) Navwali yakuvwala yamuchidinyi yakusumbwilamu? Indi nsumbuki yindi hinyi? Nsumbuki yindi nadiloñeshi ñahi kulonda yasumbuki? Indi maluwi akekalaku mpinjinyi? Awa maluwi akaleñela mwiwulu mukekali muzañalu, indi antu achiñejaña kushakama hamaseki haya nyaka niwena akazañalala? Tunakukeña kwiluka chikupu yumiyi, dichi tukuhanjeka hanawa malwihu hampinji yitukudizaña nsañu yekala muMasamu 45.

 ‘MAHININDI ANUNKAÑA IVUMBA DADIWAHI’

3, 4. (a) Indi mahina aNsumbuli akusumbwilamu amuchidinyi, nawa yumanyi yamuzañaleshaña? (b) Indi ‘nyana kawanyanta, niambanda indi alema’ azañalalaña naNsumbuli hiyanyi?

³ Tañenu Masamu 45:8, 9. Nsumbuli Yesu Kristu, wavwala mahina awanta akusumbwilamu. Mwamweni, mahinindi anunkaña neyi ‘malasha evumba dadiwahi,’ adi neyi “mora, nikasiya,” iyi diyi nyitondu yashileñawu mumanji ajila akuwayisha nachu azatishileñawu muIsarela.—Kwid. 30:23-25.

⁴ Tumina twamwiwulu tukavumishawu muchipañu chindi tukaleñela Nsumbuli yakasweji kuzañalala chikela mpinji yakusumbula hiyikushika kwakwihi. ‘Ambanda indi alema’ dikwila nawu kuloñesha kwaNzambi kwamwiwulu niwena akazañalala, kushilahu ‘ninyana kawanyanta,’ dikwila nawu, añelu ajila. Okuwaha hakutiya mazu mwiwulu anakubidika nawu: Tuzañalalenu, tutiyenu kuwaha nankashi, . . . muloña kusumbula kwaMwana kaMukoku kunashiki dehi’!

NSUMBUKI NADILOÑESHI DEHI KUSUMBUKA

5. Indi ‘iñoda Mwana kaMukoku,’ hinyi?

⁵ Tañenu Masamu 45:10, 11. Tunamwiluki dehi Nsumbuli, hanu dinu nsumbuki hinyi? Nsumbuki nakwimena izanvu dawantu ekala muchipompelu chalombolañawu kudi Yesu Kristu. (Tañenu Aefwesesa 5:23, 24.) Akekala muWanta waKristu wawuMesiya. (Luka 12:32) Awa akwaKristu awayishewa naspiritu a 144,000 ‘Diwu alondaña Mwana kaMukoku kwayañayi kwejima.’ (Chim. 14:1-4) Ekalaña ‘añoda Mwana kaMukoku,’ nawa ashakamaña nindi mwiwulu.—Chim. 21:9; Yow. 14:2, 3.

6. Muloñadi awayishewa chayitenenañawu nawu “mwana kamwanta wamumbanda,” nawa muloñadi chayilejelawu ‘kuvulamena awusoku wawu’?

⁶ Nsumbuki wakumbidi hiyamutena hohu nawu ‘Mwana wamumbandaku,’ ilaña amutena cheñi nawu “mwana kamwanta wamumbanda.” (Mas. 45:13) Indi “mwanta” hinyi? Yehova wayitambula akwaKristu awayishewa kulonda ekali ‘anyanindi.’ (Rom. 8:15-17) Chineli akekala ansumbuki amwiwulu, awayishewa ayileja nawu: “Vulamenaku awusoku weyi, niakwetala dawatata yeyi.” Atela kutoñojokaña “yuma yamwiwulu, bayi yahamasekuku.”—Kol. 3:1-4.

7. (a) Indi Kristu nakuloñesha ñahi nsumbuki yindi wakumbidi? (b) Indi nsumbuki wamumonaña ñahi Nsumbuli yindi wakumbidi?

⁷ Hayaaka yayivulu yinahituhu, Kristu nakuloñesha nsumbuki yindi kulonda yakekali namaluwi mwiwulu. Kapostolu Pawulu walumbulwili nindi Kristu ‘wakeñeli chipompelu, hakudihanahu yomweni kuchikoola. Kulonda chinachitookeshiyi dehi, achijiliki nakuchiwelesha namenji amazu; kulonda adinki yomweni chipompelu chalubanji, chakadi ihuji, hela nyiku, hela yuma yidi ochu; chiikali chajila, chakadi hakuchinkela muloña.’ (Efwes. 5:25-27) Pawulu wayilejeli akwaKristu awayishewa amuKorinda wakushankulu nindi: “Nayitiyila mukawu, mukawu waNzambi; muloña nayotesheli kudi nfumwenu wumu, yowu Kristu, kulonda nakayitwali kudi yena neyi chañadima walumbuluka wabulahu dehi iyala.” (2 Kor. 11:2) Nsumbuli, Mwanta Yesu Kristu wakeña chikupu “lubanji” lwakuspiritu lwansumbuki yindi wakumbidi. Nawa nsumbuki weluka nindi diyi ‘mwanta’ windi nawa ‘wamufukaminaña’ muloña diyi wukekala nfumwindi kumbidi.

NSUMBUKI ‘ANAMUSHIKIJI KUDI MWANTA’

8. Muloñadi chichatelela kumutena nsumbuki nawu “nasweji kukekema”?

⁸ Tañenu Masamu 45:13, 14a. Nsumbuki anamulumbululi nawu “nasweji kukekema” muloña nakusumbuka  namwanta. HaChimwekeshu 21:2, iwu nsumbuki amwesekeja nañanda, Yerusalema Yayiha, nawa ‘anamuwahishi kulonda yasumbuki nanfumwindi.’ Iyi ñanda yamwiwulu yidi “nalubanji lwakulema kwaNzambi,” nawa yatoñekaña chejeji “neyi ilola dasweja kulema wuseya, neyi njasiperi, ilola damwekana nikwishinadi to-o.” (Chim. 21:10, 11) Lubanji lwakulema kwaYerusalema Yayiha alulumbulula chachiwahi mumukanda waChimwekeshu. (Chim. 21:18-21) Dichaleñeleli ñimbi yamasamu yamulumbululi nsumbuki nindi ‘wasweja kukekema.’ Muloña, maluwi amwanta ekekala mwiwulu.

9. Indi “mwanta” akatwalilawu nsumbuki diyinyi, nawa navwali ñahi?

⁹ Nsumbuki akamutwala kudi Nsumbuli yindi dikwila nawu Mwanta wawuMesiya. Watachikili dehi kumuloñesha, ‘nakumuwelesha namenji amazu.’ Nsumbuki wekala ‘wajila, wakadi nihakumwinkela muloña.’ (Efwes. 5:26, 27) Nsumbuki yindi watela kuvwala yakuvwala yahachawija. Nawa navwali chiwahi chikupu! Eñani, “mahinindi akuvwala ayituña nakubomba hamu nansambu jawuru,” nawa “yena akamushikija kudi mwanta navwali mahina akusowashana.” Hamaluwi aMwana kaMukoku, ‘mumbanda amwiteja kuvwala mahina amawahi atooka atamuka akadi hatama. Muloña mahina amawahi atooka hinyidimu yawakwakujila yaloña.’—Chim. 19:8.

‘KUSUMBULA KUNASHIKI DEHI’

10. Mpinjinyi yikasumbulayi Mwana kaMukoku?

¹⁰ Tañenu Chimwekeshu 19:7. Mpinjinyi yikasumbulayi Mwana kaMukoku? Hela chakwila “ñodindi nadiloñeshi dehi” kusumbuka, yuma yinashimuniwu hewulu hiyinakumwekesha chawija chachenuku. Ilaña, yinakulumbulula chibalu chakukumishaku chalukadi lwasweja. (Chim. 19:11-21) Komana ichi chaya mukwila nawu akadisumbula henohu Nsumbuli, Mwanta kanda yamanishi kwimika mushindu? Inehi. Yimwenu yashimunawu mumukanda waChimwekeshu hiyayisoneka mundondaku. Mumasamu kapetulu 45, maluwi amwanta ayishimuna nawu akekalaku hanyima yakwila Mwanta Yesu Kristu namanyiki dehi mpoku yindi yakabali kulonda ‘yayi nakushinda’ ayilumbu jindi.—Mas. 45:3, 4.

11. Yumanyi yikakoñayi Kristu hakwila yakemiki mushindu?

¹¹ Dichi tunateli kuhosha netu yuma yikamwekana muniyi njila: Chatachi, “chivumbi muneni,” dikwila nawu Babiloni Muneni, wanta wakaayi wansakililu yakutwamba akamujilumuna. (Chim. 17:1, 5, 16, 17; 19:1, 2) Kuhiñahu, Kristu wukaleta wunsompeshi waNzambi hachiyuulu chatama chaSatana heseki dejima kuhitila mukuchijilumuna haAmagedoni, ‘njita yefuku deneni daNzambi Watwesha yejima.’ (Chim. 16:14-16; 19:19-21) Nkumininaku, Mwanta Wanjita wakemika mushindu kuhitila mukumuumbila Satana niandemoni jindi mwikela, hiyakekala nañovu yakuluwañesha antuku.—Chim. 20:1-3.

12, 13. (a) Kusumbula kwaMwana kaMukoku kukekalaku mpinjinyi? (b) Anyi akazañalala mwiwulu hakusumbula kwaMwana kaMukoku?

¹² AkwaKristu awayishewa chamanishawu mudimu wawu wahamaseki hampinji yakwinza kwaKristu, ayisañwilaña kuwumi wamwiwulu. Hanyima yakujilumuna Babiloni Muneni, Yesu wakapompesha antu ejima amwizanvu dansumbuki. (1 Tesa. 4:16, 17) Dichi, henohu njita yaAmagedoni kanda yivulumuki, antu ejima amwizanvu ‘dansumbuki’ akaya mwiwulu. Mawija aMwana kaMukoku akekalaku hanyima yaniyi njita. Awa mawija akaleta muzañalu chikupu! HaChimwekeshu 19:9 hahosha nawu: “Anatambikuwu kumawija aKana kaMukoku anakooleki.” Eñañi, a 144,000 amwizanvu dansumbuki akazañalala chikupu. Nawa Mwanta Nsumbuli wukazañalala  chikupu hakwikala nawalunda nindi ashinshika ‘akadyi nikunwa nawu kumesa yindi yamuWanta windi’ muchifwikija. (Luka 22:18, 28-30) Hela chochu, hamawija aMwana kaMukoku bayi neyi Nsumbuli ninsumbuki diwu akazañalala hohuku.

¹³ Neyi chitwashimuna hakusambila, matanda amwiwulu embilaña hamu nawu: ‘Tuzañalalenu, tutiyenu kuwaha nankashi, tumulemeshenu [Yehova]; muloña kusumbula kwaMwana kaMukoku kunashiki dehi, niñodindi nadiloñeshi dehi.’ (Chim. 19:6, 7) Indi ambuña Yehova hamaseki atiyaña ñahi? Komana niwena akazañalala?

“AKAYISHIKIJA NAKUZAÑALALA”

14. Neyi chashimunawu muMasamu 45, indi ‘atunkaña twansumbuki’ hiyanyi?

¹⁴ Tañenu Masamu 45:12, 14b, 15. Kaprofwetu Zekariya washimwineñahu dehi mpinji yamumafuku akukuminina, yakadikundawu chikupu antu amunyunza nawantu ashalahu aIsarela akuspiritu. Wasonekeli nindi: “Hamafuku owu ikumi dawamayala akunyuza yamadimi ejima, akakwata [chikupu] kwihina dakaYudeya, nawu, Tuyi nenu, muloña tunatiyi nawu Nzambi mwekala nindi.” (Zek. 8:23) HaMasamu 45:12, “ikumi dawamayala” ayishimuna muchifwikija nawu “mwana wamumbanda wakuTira” nawa ‘antu aheta.’ Ayaña kudi awayishewa ashalahu kulonda ‘alembi awani wuselewa’ nikumuzatila Yehova. Kufuma tuhu 1935, antu amavulu ayaña kudi ashalahu kulonda ayikwashi “ayi mukuloña.” (Dan. 12:3) Awa antu ashinshika amabwambu jawakwaKristu awayishewa atookesha dehi yililu yawu nawa hiyadiñijaña munsakililu yakutwambaku.  Awa “atunkaña” ansumbuki endañayi nawu adihana kudi Yehova nawa anakumwekesha nawu hiyambuña aMwanta Nsumbuli ashinshika.

15. Indi ‘atunkaña twansumbuki’ azatilaña ñahi hamu nezanvu dansumbuki dichidi hamaseki?

¹⁵ Ashalahu amwizanvu dansumbuki asakililaña awa “atunkaña” chadikitañawu nañovu hakushimwina ‘nsañu yayiwahi yaWanta’ mwahita matuña ejima. (Mat. 24:14) Bayi neyi ‘spiritu ninsumbuki diwu eleña hohu nawu, Inzañaku. Niantu atiyaña niwena elaña nawu, Inzaña.’ (Chim. 22:17) Eñañi, “anyikoku acheñi” niwena atiyili antu awayishewa amwizanvu dansumbuki anakwila nawu “Inzaña” nawa adibomba nansumbuki hakutambika antu ahamaseki nawu “Inzaña.”—Yow. 10:16.

16. Yehova wayinka anyikoku acheñi kukoolekanyi?

¹⁶ Ashalahu awayishewa akeña amabwambu jawu nawa azañalalaña hakwiluka nawu Tata yaNsumbuli, Yehova, wayinka anyikoku acheñi aheseki kukooleka kwakuzañalela hamu, hamuloña wakusumbula kwaMwana kaMukoku mwiwulu. Ashimwineñahu dehi nawu ‘atunkaña twansumbuki’ “akayishikija nakuzañalala nakutiya kuwaha.” Eñañi, anyikoku acheñi, achiñejaña kushakama hamaseki haya nyaka, niwena akazañalala hampinji yikasumbulañayi Mwana kaMukoku mwiwulu. Mukanda waChimwekeshu washimunaña chachiwahi nawu “izaza deneni” ‘demana kumesu etanda dawanta, nikumesu aKana kaMukoku.’ Amukalakelaña Yehova mudimu wajila muchipañu chaheseki mutembeli yakuspiritu.—Chim. 7:9, 15.

“ANYANEYI AKAHIÑA MUDI ATATA JEYI”

17, 18. Indi mumaluwi aMwana kaMukoku mwakafuma ñahi yuma yayiwahi nawa Kristu wukekala tata yanyi muChiyuulu Chayaaka Ikombakaji?

¹⁷ Tañenu Masamu 45:16. ‘Atunkaña twansumbuki’ yaKristu wamwiwulu akazañalala cheñi chakamonawu yuma yayiwahi yikafuma mumaluwi mwituña dadiha. Mwanta Nsumbuli wakasañula ‘atata jindi,’ akekala ‘anyanindi’ ahamaseki. (Yow. 5:25-29; Heb. 11:35) Wakayibalumuna akekali “atulamba mwejima mwahita iseki.” Chakadi nikujina, hakachi kawaeluda ashinshika makonu Kristu wukatondahu amakwawu kulonda akalomboleña mwituña dadiha.—Isa. 32:1.

¹⁸ Hakuyuula kwindi kwaYaaka Ikombakaji, Kristu wukekala cheñi tata yawantu amakwawu. Antu ejima akashakama heseki akayinka wumi wahaya nyaka muloña akuhwelela mwifutu danyiloña daYesu. (Yow. 3:16) Dichi wukekala ‘Tata yawu wahaya nyaka.’—Isa. 9:6, 7.

CHATUSAÑUMUNAÑA ‘KUTIYAKESHA IJINA DINDI’

19, 20. Indi yuma yakuzañalesha yashimunawu muMasamu 45 yayileñelaña akwaKristu alala ejima makonu kwiladi?

¹⁹ Tañenu Masamu 45:1, 17. Eñañi, nsañu yasonekawu muMasamu 45 yalema kudi akwaKristu ejima. Awayishewa ashalahu hamaseki azañalalaña nakuchiñeja kwakwila nawu keña ekali hamu nawamana kwawu mwiwulu niNsumbuli yawu. Anyikoku acheñi atiyaña kuwaha kwovwahila Mwanta wawu walema nawa alemesha kukooleka kwakwikala hamu nawantu amwizanvu dansumbuki ashalahu hamaseki. Chakadisumbulawu, Kristu nialundanindi amuWanta akakiswila chikupu antu akashakamaña hamaseki.—Chim. 7:17; 21:1-4.

²⁰ Chitunakutalila kushikijewa ‘kwansañu yabadika kuwaha’ yakwanakana nachu Mwanta wawuMesiya, komana hitwatiyaña kuwaha ‘kutiyakesha ijina dinduku’? Tutwalekenuhu kwikala hakachi kawantu ‘akamuhamekaña Mwanta haya nyaka nanyaka.’

[Malwihu aKuzatisha haKudiza]

[Mwevulu wudi hefu 11]

Maluwi aMwana kaMukoku akazañalesha ‘atunkaña twansumbuki’ (Talenu parakalafu 16)