1, 2. (a) Kukalanyi kwamonaña yisaka yayivulu, nawa adihulaña malwihwinyi? (b) Anvwali nianyana anateli kudiloñesha ñahi hamuloña wakuhimpika kwachihandilu?

 CHAKATAÑA nankashi kumuchima hakumona anvwali jenu adiña namujimba wakola, adishakaminineña, hiyakukañanya kudihemba aweni. Hadaha aMama yenu hela aTata yenu adimbuka nawa anakotoki, anawomboloki hetala hela anayikwati nachikatu cheneni. Kudi cheñi kukala kukwawu kwamwekanaña. Chayikalilaña atushinakaji kwiteja nawu chihandilu chawu hela nshakaminu yinakuhimpiki chakwila hiyakutwesha kushakama nkawawuku. (Yoba 14:1) Yumanyi yitwatela kwila kulonda tuyikwashi? Tunateli kuyihemba ñahi?

² Chibaaba chimu chahoshaña hansañu yakuhemba atushinakaji chashimuna nawu: “Hela chakwila kuhanjeka hansañu jawushinakaji hichuma chakala, yisaka yadiloñeshelaña chadimu mwakwilila yafuukulaña chiwahi neyi kunamwekani kukala.” Twatela kwanuka netu kwosi muntu wukutwesha kutemuka wushinakajuku. Dimuloña waweni wutwatela kudiloñeshela hamu neyi chisaka. Chumanyi chinateli kukwasha yisaka kuzatila hamu kulonda yifuukuluhu chiwahi?

3. Indi yisaka yatela kwiladi neyi anvwali ashinakaja dehi anakukeña nankashi wukwashu? (Talenu mwevulu wakutachikilahu)

³ Mpinji yashikaña chakwila anvwali jetu ashinakaja dehi hiyakutwesha kudihemba awenuku. (Tañaku Mukwakutañisha 12:1-7.) Neyi anvwali anashinakaji dehi chakwila hiyakutwesha kushakama nkawawuku, atela kushakama hamaseki nawanyanawu kulonda awani njila yayiwahi mwakwilila. Chikuwaha neyi chisaka chejima chikuhanjeka hayuma yinakukeñeka hakukwashana nichimwatela kuzatila hamu wonsu wenu. Wonsu wawu, sweje-e anvwali atela kuhosha chakadi kuhita mumbadi nihayuma yatela kuyikwasha. Atela kuhanjekahu neyi anvwali akushakama nkawawu hetala hela neyi kudi wukwashu wukuyinkañawu. * Hanjekenu hayuma yimukwila wonsu wenu kulonda anvwali ahandeña chiwahi. (Yish. 24:6) Chakutalilahu, amakwawu akuyikwashaña mutunyidimu hefuku hefuku, amakwawu munsañu jamali. Muntu wejima watela kwiluka chatela kwilayi, nawa akudihimpaña mukuhita kwampinji nawa mwatela kuhanjeka haniyi nsañu yakudihimpashana.

4. Indi chisaka chinateli kuwana kudihi wukwashu?

⁴ Hakutachika kuhemba anvwali, ikalenu nampinji yeneni yakwiluka chinakuhandawu anvwali. Neyi yikatu yawanvwali yinakuswejelaku, ilukenu yuma yikumwekana hambidi. (Yish. 1:5) Hanjekenu nanyitayi yanfulumendi yakwashaña atushinakaji. Yihulenu ayileji njila yikukwashilamu anvwali jenu kushakama chiwahi hela yikuyikwasha enu kuyihemba chiwahi. Chimwatachika kutoñojoka hayikatu yidi muchisaka, mukutachika kuneña nikuluwankana nankashi muyitoñojoka. Hampinji yamuchidiwu, lejenuku ibwambu denu imwakuhwelela. Sweje-e dinu, mwatela kulomba kudi Yehova. Yehova wukuyinka kuwunda muyitoñojoka kulonda mwiluki chakwila nakukala kunayiholokeli.—Mas. 55:22; Yish. 24:10; Fwi. 4:6, 7.

5. Muloñadi chichawahila kwilukila chadimu njila mwakuhembela anvwali ashinakaja dehi?

⁵ Atushinakaji amakwawu niyisaka yawu elukilaña chadimu mwakwilila henohu kukala kanda kumwekani. Chakutalilahu, atela kwihula neyi chikumukwasha nvwali kushakama namwanindi, hela kushakama mwitala mwahembelañawu atushinakaji hela kuzatisha njila jikwawu jinateli kuyikwasha. Amwenaña chadimu ‘makabi niyihuñu’ nakudiloñesha. (Mas. 90:10) Yisaka yabulaña kudiloñeshela chadimu yafuukulañahu lufuchi neyi kukala kunayimwekeni. Nkuluñaña wumu nindi: “Iyi hidiyi mpinji yakufuukula hayuma yamuchidiwuku.” Hamuloña wakukeha kwampinji, antaña akwikala nayuma yayivulu yakwila nawa hiyakuditeja wumu namukwawuku. Ilaña neyi mudiloñeshela chadimu, chakayikwasha kwiluka mwakwilila.—Yish. 20:18.

6. Indi anvwali nianyana anateli kuhetelamu ñahi mukuhanjeka hansañu yakuhembelamu atushinakaji?

⁶ Hadaha, chikuyikalila hakwila muyileji anvwali jenu nenu chihandilu chawu chikuhimpika hela nenu ifuku dimu akabuuka. Ilaña amavulu ahoshaña nawu mpanji yamuchidiwu yakwashanaña kumbidi. Muloñadi? Muloña chayipelelaña kuhanjika hansañu yalema nikuditiyilila nikuwana njila jikuyikwasha henohu kukala kanda kumwekani. Neyi chisaka chikuhanjeka nakukasunuka hayuma yinakukeñawu nakukeña niluwi, chikufumamu akudikunda nawa akukeñañana. Hela chakwila anvwali anakukeña kudishakamina nakudihemba aweni, anvwali atela kuhanjeka nawanyanawu njila yinakukeñawu kuyihembelamu, nawa chumichi chinateli kuyikwasha nankashi.

7, 8. Nsañwinyi yatela kuhanjekahu chisaka nawa muloñadi?

 ⁷ Enu anvwali, mwatela kuleja anyanenu yuma yimunakukeña hampinji yimunakuhanjeka, chidi neyi nsañu jamali niyuma yikwawu. Chumichi chikakwashaku anyanenu kwiluka mwakwilila neyi munakati nawa himukutwesha kufuukulahuku. Hadaha anyanenu akwila yuma yimunakukeña kulonda mutwalekuhu kudishakamina. (Efwes. 6:2-4) Chakutalilahu, mukwiteja neyi mwanenu yayitambika nindi mushakameña nindi hamu nachisaka chindi indi kwiji mwatalilaña chuma chacheñi? Mwatela kwanuka nenu hadaha anyanenu anakutoñojokela mwacheñi nawa hatela kuhita mpinji hakwila anvwali hela anyana ahimpi yitoñojoka yawu.

⁸ Dichi neyi tukufuukwilahu chadimu nikuhanjeka, hitwakekala nakukala kwenenuku. (Yish. 15:22) Lejenu anyanenu mwakuyuukila ninjila jimwakeña jakuyuukilamu. Mwatela kuzatisha yikuma yidi hachipapilu chaDurable Power of Attorney chawaYinsahu jaYehova neyi himukuhanjeka. Muntu wejima wudi nawuswa wakwiluka njila yakumukilamu nawa watela kukaana hela kwiteja. Chipapilu chaAdvance Medical Directive chamwekeshaña yuma yinakukeñayi muntu. Kutonda muntu wakuyimenaku kwamwekeshaña nawu munamukuhweleli muntu nawa nateli kufuukulahu chiwahi neyi kunamwekani kukala. Ejima anafwachiki haniyi yipapilu atela kwikala namakopi awu akuzatisha neyi kunamwekani yikatu. Antu amakwawu ahembelaña iyi yipapilu hamu nayipapilu yalema yidi neyi wilu, inshuwalansi, mukanda wakunyambawulu niyipapilu yanyitayi yanfulumendi.

9, 10. Mpinjinyi yinateli kukeñawu anvwali nankashi wukwashu kudi anyana?

⁹ Kakavulu, anvwali nianyana akeñaña atushinakaji kudishakamina neyi achidi nañovu kumujimba. Atela kudishakamina neyi akweti ñovu yakuteleka, kuwahisha mwitala, kunwa yitumbu nikuhosha chiwahi. Chumichi chikuleñela anyana kubula kusweja kudakamena. Mukuhita kwampinji, neyi ñendelu yawanvwali yinatachiki kukala chakwila anakukañanya nikuya nakulanda yuma hela anatachiki kuluwankana muwoñu, anyana atela kuyikwasha.

¹⁰ Atushinakaji aluwankanaña muyitoñojoka nawa aneñaña. Kutiya nikumona nikutoñojoka kukutachika kuyikalila hela tuhu nikuya kumusalanyi. Neyi kukala kwamuchidiwu kutachiki, yitwalenu kuchipatela. Anyana atela kuwana njila yakumanishilamu iku kukala. Hampinji yamuchidiwu, atela kwikala namudimu wakutwala nvwali yawu nakudimona nandotolu neyi chayileñayi yomweni. Hakwila ahembi chiwahi anvwali jawu, anyana atela kuyihoshelaku, kuyifwachikila kuyipapilu, kuyitwala kudi ndotolu nikuyizatilaku yuma yikwawu.—Yish. 3:27.

11. Yumanyi yimwatela kwila hakwila chiyipeleluku anvwali kuhimpa?

 ¹¹ Neyi yikatu yawanvwali jenu yamaneni, mwatela kuhimpa njila yakuyihembelamu hela itala munakushakamawu. Neyi mukuhimpa hakachuma kanyanya, chikuyipelela anvwali jenu kuhimpa. Neyi mwashakamaña kwakulehi nawanvwali jenu, komana kwila muleja mukwenu Chinsahu hela ntuñi nawu yayihempuleña hefuku hefuku kulonda yayilejeña chinakuhandawu anvwali jenu nehi? Anakukeña hohu wukwashu wakuyitelekela niwakuyiwahishila mwitala? Neyi muhimpa yuma yantesha mwitala chinateli kuyikwasha anvwali kulonda ashakameña nikuwelela hohu mwitala? Hadaha anakukeña hohu muntu wakuyizatilañaku tunyidimu twamwitala ilaña akushakamaña nkawawu. Ilaña neyi hiyakutwesha kushakama nkawawuku, mwatela kuwana njila mwakuyikwashila. Kukala kwejima kukwetuwu, keñenu neyi mwiluña denu muduhu mutayi wakwashaña atushinakaji. *—Tañenu Yishimu 21:5.

12, 13. Indi anyana akula dehi ashakamaña kwakulehi alemeshaña ñahi nikuhemba anvwali jawu?

¹² Anyana akeña anvwali jawu akeñaña nawu ashakameña chiwahi. Twekalaña nakuwunda muyitoñojoka muloña tuneluki netu tunakuyihemba chiwahi anvwali. Hamuloña wanyidimu, anyana akula dehi hiyashakamaña kwakwihi nawanvwali jawuku. Anyana amuchidiwu atambulaña mafuku akunooka kulonda ayi nakuhempula nikukwasha anvwali nikuyizatilaku tunyidimu tunakukañanyawu anvwali kuzata. Anyana anateli kumwekesha nawu ayikeña anvwali jawu kuhitila mukuyitemeshela jinshiña hefuku hefuku nikuyisonekela nyikanda hela jiemelu.—Yish. 23:24, 25.

¹³ Hela chakwila anvwali ashakamaña kwakulehi, mwatela kuwana njila jakuyikwashilamu anvwali jenu hefuku hefuku. Neyi mwashakamaña kwakulehi nawa anvwali jenu hiyaYinsahu, mwatela kuhanjeka nawaeluda amuchipompelu mwapompañawu kulonda ayikwashi. Nawa bayi mulalamena kuyilombelaku anvwali jenuku. (Tañenu Yishimu 11:14.) Hela chakwila anvwali jenu hiyaYinsahuku, mwatela ‘kuyilemesha atata yenu niamama yenu.’ (Kwid. 20:12; Yish. 23:22) Kuhosha hohu walala, yisaka yejima yelaña yuma yashiyashana. Anyana amakwawu atambikaña anvwali jawu kulonda ashakameña nawu hela kuyiswija kwakamwihi. Hela chochu, iwu himudimu wakala. Anvwali amakwawu hiyakeñaña kushakama nawanyanawu akula dehi akweti anyanaku; muloña akeñaña kushakama nkawawu, hiyakeñaña kukabisha anyanawuku. Anvwali amakwawu afuukulañahu kushakama mwitala dawu muloña akweti mali akulandamu yuma yakudikwasha nachu.—Mukwa. 7:12.

14. Kukalanyi kunateli kumonayi mwana wudi kwakwihi nawanvwali?

¹⁴ Muyisaka yayivulu, anyana ashakamaña kwakwihi nawanvwali diwu azataña mudimu weneni wakuhemba anvwali. Hela chochu, anyana amuchidiwu atela cheñi kusha muchima hayisaka yawu bayi hadi anvwali jawu hohuku. Mwatela kwiluka mwakukumina. Neyi yuma yinamukalili mwana wunakuhemba anvwali, chisaka chatela kushakama hamaseki kulonda chiluki mwakwilila. Komana mwana wumu diyi wunakuzata nyidimu yayivulu? Kwila anyana amakwawu akwashanaku nehi hela kudihimpashana?

15. Munateli kumwamunaku ñahi muntu wunakuhemba anvwali?

 ¹⁵ Neyi anvwali ashinakaja dehi anakukeñeka wukwashu wampinji yejima, mwana wunakuyihemba wukutachika kwaaba. (Mukwa. 4:6) Anyana akweti kukeña atela kuzata nañovu kulonda akwashi anvwali jawu, ilaña iwu mudimu wunateli kuyikalila nankashi. Anyana anakuhemba anvwali anakukeña wukwashu mpinji yejima atela kushahu muchima nikulomba wukwashu. Neyi anakuyikwasha mpinji yejima chikuyikwasha kulonda mutwalekuhu kuhemba anvwali chakubula kuyitwala kumatala kwahembelañawu atushinakaji.

16, 17. Kukalanyi kwamonañawu anyana anakuhemba nvwali wakula dehi, nawa anateli kuumika ñahi? (Talenu cheñi chikasha chinakuhosha nawu, “Mudimu Wakuhemba Anvwali.”)

¹⁶ Chatukataña kumuchima hakumona yihuñu yinakumonawu anvwali jetu itwakeña hamuloña wawushinakaji. Mpinji jikwawu anyana ahembaña anvwali aneñaña, adakamenaña, kudinka nyiloña hela kufuntisha katama. Mpinji jikwawu nvwali washinakaja dehi nateli kutompola hela kubula kumwekesha kusakilila. Neyi chumichi chinamwekani, bayi munyakala kuhilaku. Nkuluñaña wumu weluka jayitoñojoka yawantu wahosheli nindi “Neyi anvwali anatuhilishi, twatela kwiteja netu anatuhilishi nawa bayi tuditwika muloñaku.” Lejenuku mwinikwenu hela ntaña yenu hela ibwambu denu imwakuhwelela chimunakutiya. Neyi muyilejamu akwenu ndulu yikumana.

¹⁷ Mpinji jikwawu chisaka hichikutwesha kutwalekahu kuhemba nvwali yawu hetalaku, muloña wakubula mali hela kubula kwiluka mwakuhembela atushinakaji. Dichi chisaka chikufukulahu nawu chimutwali nvwali yawu kumatala ahembelañawu atushinakaji. Muhela wumu mukwaKristu wayihempwileña amama yindi adiña mwitala mwahembelañawu atushinakaji kakavulu. Wahosheli nindi: “Hitwatwesheleña kuyihemba aMama hadi maora 24 hefuku hefukuku. Chatukalilili nankashi hakwila tufuukuluhu kuyitwala amama kwitala dahembelañawu atushinakaji. Chumichi chatukalilili hama. Hela chochu, iyi njila yayikwashili amama chikupu henohu kanda afwi nawa etejeli.”

18. Nkiswinyi yinateli kutambwilawu anyana ahembaña anvwali jawu?

¹⁸ Mudimu wakuhemba anvwali akula dehi wakala nawa wazeyeshaña. Hela chochu, hikudi njila jinateli kuzatika chiwahi jakuhembelamu anvwali chakadi kumona kukalaku. Ilaña, neyi mufuukulahu chiwahi nikudikasa muyitoñojoka nikutiyañana chiwahi nikulomba, mukutwesha kuhemba anvwali jenu chiwahi. Neyi mwila mwenimu, mukwikala namuzañalu muloña muneluki nenu munakuyihemba chiwahi. (Tañenu 1 Akorinda 13:4-8.) Sweje-e dinu, mukwikala nakuwunda muyitoñojoka nawa mukutambwila nkisu jaYehova hamuloña wakulemesha anvwali jenu.—Fwi. 4:7.