Fwikijenu chuma chikwawu: Mama yawantu wabula kusumbuka wudi nawanyana ayedi, anamutambiki kudi antu ayedi adisumbula amuchipompelu nawu akayi kwitala dawu namelela. Chinayilejiyi anyanindi, anazañalali. Anakutalila mpinji yakuya. Chikunashali ifuku dimu nakuya, awa adisumbula hiyakumuleja mama yawantu nawu kudi yuma yinamwekani dichi bayi akenzaku. Nkumininaku iwu mama yawantu yeluka nichuma chaleñeleli. Hanyima yakumutambika, awa adisumbula ayitambikili kudi amabwambu jawu nawu akayi kwitala dawu nayoyina mpinji nawa etejeli.

Chineli tudi akwaKristu, twatela kwila mutwahoshaña. Hitwatela kuhosha aha ‘eña aha netu nehuku.’ (2 Kor. 1:18) Neyi chinakumwekesha iyi yakutalilahu yiyedi, yuma yejima yenda kwamboka. Mpinji yikwawu kwamwekanaña yuma yinateli kutukañesha kwila mutwakanini. Chuma chamuchidiwu chamumwekeneni kapostolu Pawulu.

Muchaaka cha 55 C.E., hampinji yadiña muEfwesesa halwendu lwindi lwamuchisatu lwawumishonali, Pawulu wakeñeleña kuzambuka Kaluñalwiji kaAegean kulonda yayi kuKorinda kufumahu yakayi kuMasidoniya. Chafuntiliyi kuYerusalema, wafwilileña kuhempula chipompelu chamuKorinda kamuchiyedi, hadaha wakeñeleña nikutambula yamukunkulu yawamana kwetu adiña muYerusalema. (1 Kor. 16:3) Tweluka chumichi muloña ha 2 Akorinda 1:15, 16, twatañañahu nawu: “Chinelukili mwenimu, nakeñeli nisambili kwinza kudenu nami nakayikwashi kamuchiyedi. Nami nakahitili kudenu munjila yami yakuya muMasidoniya; hakufunta kuMasidoniya kunakaya, nakahitili kudenu cheñi nawa, kulonda mwakanshinjikijuku munjila yami yakuya kuYudeya.”

Chinamwekani neyi mumukanda windi watachi Pawulu wayilejeli amana kwetu amuKorinda nindi wukayendela. (1 Kor. 5:9) Hela  chochu, haleheli wanyi kufuma hasonekeliyi wuna mukanda, Pawulu watiyilili kudi aketala daKolowe niantu muchipompelu mwadiña kufwilañana. (1 Kor. 1:10, 11) Pawulu wahimpili lwendu lwindi nawa wasonekeli mukanda wutwatenaña makonu netu Akorinda wamuchimu. Muniwu mukanda, Pawulu wayifumbili chiwahi. Wayilejeli cheñi nindi wahimpili lwendu lwindi, nakuyileja nindi wukusambila kuya kuMasidoniya kufumahu kuKorinda.—1 Kor. 16:5, 6. *

Chamwekeni neyi hampinji yatambwililuwu amana kwetu amuKorinda mukanda windi, “apostolu asweja kulema” amakwawu amuchina chipompelu amutwikili muloña nawu helili mwahosheliyuku. Hakudihakwilaku Pawulu wayihwili nindi: “Dichi chinafuukwili mwenomu chadiñi chakuhemesha, tahindi? Chinatoñojokaña natoñojokaña mwaya chisemwa chaheseki, mwaka nili nami aha eña, aha nehi, tahindi?”—2 Kor. 1:17; 11:5.

Tunateli kwihula netu, Komana kapostolu Pawulu wamweneña yuma yamukañesheli nindi ‘yakuhemesha’? Inehi. Izu datuntululawu nawu “chakuhemesha” datalisha mukubula kwila chuma, neyi kwiji muntu wakadi kushindamena, wabulaña kushikija munakaniyi. Pawulu chayihwiliyi nindi “Chinatoñojokaña natoñojokaña mwaya chisemwa chaheseki?” kwadi kuleñela akwaKristu amuKorinda kwiluka chuma chaleñeleli Pawulu yahimpi mwafukwiliyi bayi neyi wadiña muntu wakadi kushindamenaku.

Pawulu wakaanini nyiloña yamutwikiluwu hakuyisonekela nindi: “Chochashinshikayi Nzambi, mazu etu itwayilejaña hiyakwila aha eña, aha nehuku.” (2 Kor. 1:18) Chakadi nikujina, Pawulu wayikeñeli nankashi amana kwindi niahela amuKorinda dichaletesheli yihimpi lwendu lwindi. Mumukanda wa 2 Akorinda 1:23, twatañañamu nawu, chahimpiliyi lwendu lwindi lwakuya kuKorinda ‘walondeli kuyanakena.’ Eña wayinkeli mpinji kulonda awahishi yuma henohu kanda yayuku. Neyi chochakuhweleleliyi, hampinji yadiñiyi kuMasidoniya, Titusa wamulejeli Pawulu nindi mukanda windi wayisañumwini chakwila aneñeli nawa abalumukili munyichima, chumichi chamuzañalesheli nankashi.—2 Kor. 6:11; 7:5-7.

Chamutwikiluwu Pawulu muloña wakwila nawu helili mwahosheliyuku, chatalishili mukwila nawu hiyateleleli kumukuhwelela kwila yuma yakanineñayi hela nsañu yashimwinineñayuku. Hela chochu, Pawulu wayanukishili akwaKorinda nindi wayishimwinineña nsañu yaYesu Kristu. “Mwana kaNzambi Yesu Kristu, ashimwinuwu mukachi kenu kudetu, kudami nawaSilasi naTimotewu, hadiñi mukwantadi wakwila aha nindi eña, aha nindi nehuku, yena yowu eña chikupu.” (2 Kor. 1:19) Komana nsañu yashimwinineñayi Pawulu hadi Yesu Kristu yadiña yakutwamba? Inehi. Yesu wahosheleña walala muchihandilu chindi chejima nimumudimu windi wakushimwina. (Yow. 14:6; 18:37) Neyi chakwila Yesu washimwinineña nsañu yalala dikwila nawu nsañu yashimwinineñayi kapostolu Pawulu yadiña yalala muloña washimwinineña nsañu yoyimu.

Chakadi nikujina, Yehova ‘hiNzambi wansañu yalala.’ (Mas. 31:5) Tweluka chumichi muloña wamazu asonekeliyi Pawulu nindi: “Muloña hela yikaninu yaNzambi yasweja kuvula, mudi Yesu diyi eña,” dikwila nawu Kristu. Yesu chatwalekeleluhu washinshika hampinji yadiña hamaseki chaletesheli tukuhweleli muyikaninu yaYehova. Pawulu watwalekeluhu nindi: “Mudi yena [Yesu] dimu mwekala Amena, kulonda Nzambi ekali walema hansañu yetu.” (2 Kor. 1:20) Yikaninu yaYehova Nzambi yejima yakashikijewa muloña waYesu hela netu “Amena.”

Kufwa Yehova niYesu ahoshaña walala, Pawulu niyena welileña mwahosheleñayi mpinji  yejima (2 Kor. 1:19) Hakañenyeña kwila mwahosheleñayuku, neyi muntu wakanaña “mwaya chisemwa chaheseki.” (2 Kor. 1:17) Ilaña ‘wendeleña chakumwendesha naspiritu.’ (Ŋal. 5:16) Hampinji yazatileñayi nawakwawu wadiña wayikeña chikupu. Welileña mwahosheleñayi.

Makonu, antu abulaña kwovwahilaña nshimbi jamuBayibolu hiyelaña mwahoshañawuku, sweje-e neyi kunamwekani kukala hela kunamwekani yuma yakeñeshawu. Munsañu jakuselujola antu hiyelaña ‘mwahoshañawuku’ hela chakwila anasoneki yuma yinaditejuwu hayipapilu. Antu amavulu hiyalemeshaña chikaninu chadikanañawu mumaluwuku, dichaleteshaña abuleña kushakama yaaka yayivulu mumaluwi. Antu chinakuswejawu kudiseña chinakumwekesha nawu hiyalemesha chikaninu chamaluwuku nawa amonaña neyi anateli kudiseña tuhu kala mpinji.—2 Tim. 3:1, 2.

Indochenu? Komana mwelaña mumwahoshaña? Eñañi, neyi chitwamona kumatachikilu achinu chibaaba, munateli kukañanya kwila mumwakana, bayi neyi hamuloña wakwila nawu himwelaña mumwahoshañaku ilaña yuma yamwekanaña diyaleñelaña mukañanyi mwakwilila. Ilaña enu akwaKristu mwatela kuzata nañovu kulonda mushikijeña mumwakanaña. (Mas. 15:4; Mat. 5:37) Neyi mwilaña mwenimu, akuyikuhwelela nawu mwaleña mumwahoshaña, himwatwambañaku. (Efwes. 4:15, 25; Yak. 5:12) Antu chelukawu nawu mwatwambaña wanyi, neyi munakuyishimwina nsañu yalala yahosha haWanta waNzambi akutiyililaña. Dichi, twatela kuzata nañovu kulonda twileña mutwahoshaña.