Tata yawantu wakuBrazil wahosheli nindi, “Kuhanjeka haKudifukula kwaChisaka kwamelela kwawahaña chakwila neyi kulekesha chisaka chami nehi, tunateli kudiza kushika niwufuku.” Tata yawantu wakuJapan wahosheli nindi mwanindi weyala wudi nayaaka 10 welukaña wanyi nindi mpinji yinamani nawa wakeñaña kutwalekahu hohu. Muloñadi? Tata yindi wahosheli nindi, “Nsañu yitwadizaña yamusañumunaña nikumuzañalesha.”

Hela chochu, bayi neyi anyana ejima azañalalañaku, nawa kuhosha hohu chalala, amakwawu hiyanateli kukeña kudifukulaku. Muloñadi? Tata yawantu wakuTogo washimwini nindi, “Kudifukula kudi Yehova hikwatela kuleta wuuduku.” Neyi kunakuleta wuudi, hadaha njila yimwalombwelañamu kudifukula kwachisaka diyaleñelaña. Yisaka yayivulu yamonaña nawu Kudifukula kwaChisaka kunateli kwikala neyi chatiyiliyi Isaya nefuku daSabata nindi, “dasweja kuwaha.”—Isa. 58:13, 14.

Atata jawantu akwaKristu, eluka nawu yisaka yawu yinateli kudiluñisha kudifukula kwachisaka, neyi chakwila ahanjekaña munjila yakuzañalesha. Ralf wukweti anyana awambanda asatu niweyala wumu, wahosheli nindi hakudifukula kwachisaka amwekanaña neyi anakuhanjeka hohu chatela amwekaneña neyi anakudiza; muntu wudi wejima wekalaña wakasunuka kuhoshahu. Hela chochu, mpinji yikwawu chakalaña hakwila nawu ejima ashiku maana nikukeña nsañu yinakudizawu. Mama yawantu wumu wetejeli nindi: “Mpinji yejima nazeyaña chakwila hinekalaña nañovu yikuleñela kudifukula kwachisaka kwikaleña kwakudiluñisha neyi chinakeñañaku.” Komana munateli kumanisha iku kukala?

Tata yawantu wakuGermany wukweti anyana ayedi wahosheli nindi: “Twadizaña hansañu  yambokamboka.” Mama yawantu wekala nawanyana ayedi wejina daNatalia wahosheli nindi: “Chuma chasweja kulema nankashi hikuhimpa nsañu, yitwadizaña.” Yisaka yayivulu yambulaña kudifukula kwawu kwachisaka muyibalu yayivulu. Tata yawantu wakuBrazil wejina daCleiton, wudi nawanyana anyanya ayedi walumbulwili nindi: “Ichi chaleñelaña kudiza kusweji kuwaha nawa muntu wudi wejima muchisaka wadiluñishaña.” Anvwali neyi ambulaña mpinji yakudiza, anateli kusha maana kuyuma yinakukeñeka kudi mwana wudi wejima, neyi chakwila anyana ashiyashana muyaaka. Anvwali anateli kukwasha muntu wejima wamuchisaka nawa anateli kuhimpa hakutonda nsañu ninjila yakudizilamu.

Indi yisaka yikwawu yinakwila ñahi hakwila nawu adizeña hansañu yambokamboka? Amakwawu atachikaña Kudifukula kwaChisaka nakwimbila Yehova tumina. Juan wakuMexico wahosheli nindi: “Kwimba tumina kwatutiyishaña kuwaha nawa kwatuleñelaña kutoñojoka hansañu yitunakudiza.” Chisaka chindi chatondaña tumina twesekana nansañu yinakudizawu namelela.

Yisaka yayivulu yatañilaña hamu nsañu yamuBayibolu. Hakwila nawu adizeña munjila jambokamboka, antu amuchisaka adipañilaña nsañu yawantu ashiyashana ashimunawu muyibalu yamuBayibolu. Tata yawantu wakuJapan wahosheli nindi “hakusambila kutañila hamu kwamukalilileña.” Ilaña anyanindi awamayala ayedi atiyileña kuwaha kutañila hamu nawanvwali jawu. Yisaka yikwawu yahemaña yisela yampanji yamuBayibolu. Tata yawantu wejina daRoger wakuSouth Africa wukweti anyana ayedi awamayala, wahosheli nindi: “Kakavulu anyana amonaña yikuma yamunsañu yaBayibolu yitwakañanyaña kumona etu anvwali.”

Njila yikwawu yakudizilamu nsañu yambokamboka yekala yakuzatila hamu, chidi neyi kutuña watu waNowa hela tembeli yaSolomoni yachifwikija. Hakuzata iyi nyidimu chakeñekaña ejima ekali nampinji yakusandujola. Chakutalilahu, mwituña dakuAsia kanka yamuntu namwizukulwindi wamumbanda wudi nayaaka yitanu adiña mukapeka kakuhanjikila. Adiña nakuleña njila jendeliyi kapostolu Pawulu mumudimu windi wawumishonali habodi. Yisaka yikwawu yasonekaña nsañu yamumukanda waKwidika habodi. Donald wakuTogo wudi nayaaka 19, wahosheli nindi, “Kudiza hansañu yashiyashana kwaleñelaña tudiluñisheña chikupu hakudifukula kwachisaka nawa chisaka chahetelelumu. Munateli kutoñojoka hamudimu wumunateli kuzatila hamu wukuleñela mudiluñisheña hakudifukula kwachisaka?

Hela chakwila kuhimpa nikudiza hayuma yambokamboka kwaleñelaña kudifukula kwachisaka kwikali kwakuwahi, hakwila nawu ejima adizi chikupu, kuloñesha kwalema nankashi. Mpinji yikwawu anyana azeyaña swayi, dichi tata yawantu watela kutoñojokahu chadimu hansañu yinatonduwu nikwikala nampinji yakuloñesha chachiwahi. Tata yawantu wumu wahosheli nindi, “Neyi niloñesha dikwila nawu muntu wejima wamuchisaka wukudiza chachiwahi.” Tata yawantu wakuGermany walejelaña chadimu chisaka chidi nsañu yakadizawu henohu kuchidi nyilungu. Hakuloñesha nsañu yakudiza hakudifukula kwachisaka yamuBayibolu yidi haDVD, tata yawantu wakuBenin wudi nawanyana atanu nawumu waloñeshelaña chadimu malwihu nakwinka chisaka chindi. Eñañi kuloñesha dikwaleñelaña kudifukula kwachisaka kwikaleña kwakuwahi chikupu.

Neyi chisaka chilukila chadimu yuma yakadizawu, akuhanjekañahu mukachi kamulungu nawa chikuyileñela ekali nampwila. Nawa neyi muntu wudi wejima wukweti mudimu watela kuzatayi wukwiluka nindi, niyena wudi namudimu wakuzata hakudifukula kwachisaka.

Yisaka yayivulu yikweti kukala kwakudiza mpinji yejima.

Atata jawantu amavulu azataña maora amavulu hakwila nawu akwashi yisaka yawu. Chakutalilahu, tata yawantu wakuMexico wafumaña hetala nampinji ya 6 koloku yabudidi nawa wafuntaña na 20 koloku yawufuku. Kubombelahu, mpinji yikwawu chakeñekaña kuhimpa mpinji yaKudifukula kwaChisaka muloña wanyidimu yikwawu yakundama kukudifukula.

Hela chochu, twatela kufukulahu chikupu kulonda tudifukuleña mpinji yejima. Loïs wakuTogo wudi nayaaka 11 wahosheli hachuma chafuukulahu chisaka chindi kutalisha hakudifukula kwachisaka nindi: “Hela chakwila mpinji yikwawu twatachika kudifukula kwachisaka mukulaba hamuloña wachuma chamwekanaña mukukasumwisha, mpinji yejima twekalaña nakudifukula kwachisaka.” Ichi dichaleñelaña yisaka yikwawu yitanjikileña chadimu mpinji yakudifukula kwachisaka mumulungu. Neyi kumwekana chuma chabula kukuhwelelawu, anateli kuhimpa kulonda kudifukula kwachisaka kukekaluku ifuku dacheñi mumulungu wowumu.

Kwesekeja namwatalisha “kudifukula kwachisaka,” kwekala hikudifukula kwenu kudi Yehova. Antu ejima amuchisaka atela kuleta kudi Yehova ‘nyilambu yañombi yakunyivumbu yawu’ mulungu nimulungu. (Hos. 14:2) Nawa muntu wejima muchisaka watela kuzañalala haniyi mpinji, “muloña muzañalu waYehova diyi ñovu yenu.”—Nehe. 8:9, 10.