YESU Kristu wahosheli nindi: “Yaña kwitala deyi kudi akwenu wuyileji yuma yanakwililiyi Mwanta [Yehova] kutoha, nichanakutiyiliyi luwi.” Haniyi mpinji hadaha Yesu wadiña kwituña dawaGadareni, kukabeta kambwela kamusela, wahosheleña namuntu wakeñeleña kwikala kambanji kindi. Mazu ahosheliyi Yesu amwekeshaña nawu welukili chaaku chekala nawantu, chakukeña kulejaku antaña jetu yuma yatuzañaleshaña nawa yalema.—Maku 5:19.

Nimakonu, twamonaña yaaku yeniyi, hela chakwila iyi yaaku yamwekanaña nankashi kuyisemwa yikwawu, ilaña kuyisemwa yikwawu yamwekanaña wanyi. Dichi, neyi muntu nekali mukwakudifukula walala waYehova Nzambi, wakeñaña kulejaku antaña jindi yuma yayiha yakuhwelelayi. Hanu dinu, nateli kuyileja ñahi? Nateli kushika ñahi hanyichima yawantaña jindi ayaña kunsakililu yacheñi hela abula kwitiya? Bayibolu yatufumbaña chachiwahi nawa choloka.

Kushankulu, Anderi diyi wadiña watachi kumwiluka Yesu neyi Mesiya. Wasambilili kulejanyi hachuma chelukiliyi? ‘Anderi wasambilili kuwana mana kwindi yomweni Shimona hakumuleja nindi, “Tunawani dehi Mesiya;” chaya mukwila nawu Kristu.’ Anderi wamutwalili Petulu kudi Yesu, dikwila nawu wamukwashili Petulu kulonda yekali kambanji kaYesu.—Yow. 1:35-42.

Chimwahitili yaaka kwakwihi nayitanu nachimu, hashakamineñayi Petulu kuYopa amulejeli nawu yayi kukabeta kaluwunda kuKesareya nakumuhempula Konelisu mukulumpi wawamashidika. Petulu wawanini anyi apompeli mwitala? Kafwampi, ‘Konelisu wadiña nakumuchiñilila Petulu niantu ayileñayinawu, dichi wapompesheli awusoku windi niamabwambu  jindi akundayi.’ Dikwila nawu Konelisu wayikwashili antaña jindi kulonda atiyi chahosheleñayi Petulu nikufuukulahu aweni kushindamena hansañu yatiyiluwu.—Yil. 10:22-33.

Tukudizilakwodi kudi Anderi niKonelisu chakwashiluwu antaña jawu?

Hela chochu, kudi yuma yeliluwu Anderi naKonelisu. Anderi wamulejeli Petulu nsañu yaYesu, Konelisu niyena wapompesheli antaña jindi kulonda aditiyili chahosheleñayi Petulu. Ilaña Anderi niKonelisu hiyayikakejeli antaña jawu hela kuzatisha kafuta kakuyileñela ekali atumbanji twaKristuku. Munamoni chuma chitukudizilaku? Anetu twatela kwila chuma chochimu. Tunateli kulejaku antaña jetu nsañu yitwakuhwelela kulonda tuyikwashi eluki nsañu yalala yamuBayibolu niakwetu akwakwitiya. Hela chochu, tweluka netu akweti wuswa wakufuukulahu awenawu dichi hitwatela kuyikakejaku. Hakwila tulumbululi chitwatela kukwasha antaña jetu, talenu chakutalilahu chaJürgen niPetra antu adisumbula akuGermany.

Petra watachikili kudiza Bayibolu nawaYinsahu jaYehova nawa wapapatisheweli. Nfumwindi Jürgen wadiña mukulumpi wawamashidika. Hakusambila Jürgen hatiyili kuwaha nachuma chafuukwiluhu ñodinduku. Chimwahitili mpinji welukili nindi aYinsahu ashimwinaña chalala chamuBayibolu. Niyena wadihanini kudi Yehova, nawa chayinu mpinji nakuzata neyi eluda muchipompelu chawu. Wakolesha ñahi antu afwilaña kushika hanyichima yawantaña jawu akuhwelela yuma yabula kukuhwelelawu?

Jürgen wahosheli nindi: “Hitwatela kuyikakeja antaña jetu hela kuyileja nsañu yayivulu yamuBayibolu hampinji yimuku. Chikuleñela asweji kujinoka. Mukuhita kwamafuku, chikuwaha neyi mutachika kuyilejaku nsañu yantesha mumpinji mumpinji nawa mukubabala. Chalema nankashi neyi tukwasha antaña jetu adiluki nawamana kwetu munakwesekenawu nawa akeña yuma yoyimu. Neyi twila mwenimu akutachika kwiluka chalala.”

Kapostolu Petulu niantaña jaKonelisu anyakeli kwiteja nsañu yamuBayibolu. Antu amakwawu akushankulu atachikili kudiza chalala akeñekeleña mpinji yeneni hakwila nawu afuukuluhu.

Antaña jaYesu amavulu amukuhweleleli hampinji yadiñayi nakushimwina kudantu. Chakutalilahu, chidi neyi kapostolu Yakoba niYowanu adiña asonyi jaYesu nawa mama yawu, Salomi, wadiña tata yindi wamumbanda. Watela wadiña hakachi ‘kawambanda amakwawu amavulu adiñi nakumukalakela [Yesu niapostolu] namahetawu.’—Luka 8:1-3.

Hela chochu, antaña jaYesu amakwawu hiyamwekesheli chikuhwelelu hayoyina mpinjuku. Chakutalilahu, mpinji yimu chimwahitili chaaka kufuma hamupapatishiluwu Yesu, mazaza apompeli mwitala nakutiya chahosheleñayi. “Awusoku windi chanachitiyuwu hiyakuyaku nawu amukwati, muloña elili nawu, Naandali.” Chimwahitili mpinji, amana kwaYesu akuwanamu akeñeleña kwiluka chikwendayi, hayilejeli jiikaku. Muloñadi? “Muloña hela ana kwindi niwena hiyamwitiyiluku.”—Maku 3:21; Yow. 7:5.

Chumanyi chitukudizilaku kudi Yesu cheliliyi nawantaña jindi? Wahilili wanyi hampinji yelili antaña jindi amakwawu amwili nawu naandali. Chamusañwiluwu, Yesu wayikolesheli cheñi antaña jindi hampinji yamwekeniyi kudi mana kwindi wakuwanamu Yakoba. Yesu chamwekeniyi kudi Yakoba niamana kwaYesu amakwawu akuwanamu elukili chikupu  nawu wadiña Mesiya. Nawa adiña hamu nawapostolu niamakwawu mukapeka kahewulu muYerusalema, atambwilili spiritu yajila. Chimwahitili mpinji, Yakoba niYuda amana kwaYesu amakwawu akuwanamu, atwalekeluhu kwikala nakukooleka kwabadika.—Yil. 1:12-14; 2:1-4; 1 Kor. 15:7.

Neyi chochichadiña kushankulu, antaña jetu amakwawu twatela kuyinka mpinji yeneni henohu kanda ekali munjila yaya kuwumi. Chakutalilahu, toñojokenu Roswitha wadiña wetiya muchechi yaRoma Katolika hampinji yapapatisheweliyi nfumwindi, nakwikala Chinsahu chaYehova mu 1978. Hamuloña wakusweja kukuhwelela yuma yamunsakililu mwayileñayi, Roswitha wamudimbulwileña nfumwindi. Ilaña chimwahitili yaaka walekeli kumudimbulula nfumwindi nawa welukili nindi aYinsahu atañishaña nsañu yalala. Mu 2003 niyena wapapatisheweli. Chumanyi chamuleñeleli yahimpi? Chatelela yahili hamuloña wakwila ñodindi wadiña nakumudimbulula, wamukwashili ñodindi Roswitha kulonda yahimpi yitoñojoka yindi. Mazwinyi ahosheliyi ñodindi? Wahosheli nindi, “Munateli kufuma yuma yayiwahi neyi mutwalekahu nakudiwunjika nikudiwunjika chikupu.”

Monika amupapatishili mu 1974, nawa anyanindi ayedi awamayala ekalili aYinsahu chimwahitili yaaka ikumi. Hela chakwila nfumwindi Hans hadimbulwileña yuma yakuhweleleliyuku, wapapatisheweli mu 2006. Chineli ichi chisaka chatwalekeluhu kudiwunjika, chakoleshaña ñahi antu amonaña yuma yamwenuwu? Nawu “twalekenuhu kwikala ashinshika kudi Yehova, nawa bayi muzeyaku.” Hela chochu, atwalekeluhu kumukeña Hans. Nawa akuhweleleli nawu kumbidi Hans wakadiza chalala.

Yesu washimwini nindi mazu ansañu yalala, adi neyi kaseloki kamenji kasefukaña nakuhana wumi wahaya nyaka. (Yow. 4:13, 14) Twakeñaña kukolesha antaña jetu kuhitila mukunwa menji ansañu yalala atuuta nawa atooka. Chakadi nikujina, hitwakeñaña antaña jetu asweni hamuloña wakuyikakeja kunwa menji amavulu hampinji yoyimuku. Tunateli kuyikolesha hela kuyiswenesha kwesekeja nachitunakuyileja nsañu yitwakuhwelela. Bayibolu yahosha nawu: “Muchima wamukwakuloña watoñojokaña chachiwahi mwakwakwila” yahosha cheñi nawu, “Muchima wamukwamaana walejaña kanwa kindi, kunyivumbu yindi wabombelañaku yadizayi.” Tunateli kuzatisha ñahi iku kufumba?—Yish. 15:28; 16:23.

Mumbanda nateli kukeña kumuleja nfumwindi yuma yakuhwelelayi. Neyi ‘yatoñojoka chachiwahi mwakwakwila,’ nateli kuzatisha mazu amawahi chakadi kuhosha nakutalumoka. Hanateli kudimona neyi kwiji waloña chikupu hela neyi wabadikaku. Nhoshelu yayiwahi yinateli kukolesha nikuleta kuwunda. Mpinjinyi yanokañayi nfumwindi nawa yaswayi kuhosha nindi? Nsañwinyi yakeñañayi kuhanjekahu hela kutaña? Komana wakeña nsañu yahosha hasayansi, yajipolitiki hela nsañu yayisela? Nateli kusañumuna ñahi yitoñojoka yanfumwindi kulonda yekali nampwila yakukeña kwiluka nsañu yaBayibolu, hampinji yoyimu nikulemesha mwatoñojokañayi? Kutoñojoka muniyi njila kukumukwasha mumbanda kuhosha chachiwahi nikwikala nakashinshi.

Kushika hanyichima yawantaña jetu achindi kanda ekali aYinsahu, hikwakeñekaña hohu kuyileja yuma yitwakuhwelela mumpinji mumpinjuku. Yililu yetu yayiwahi yatela kumwekesha nawu twakuhwelela yuma yitwahoshaña.

Jürgen itwatena dehi walumbulwili nindi, “Twalekenu nakuzatisha nshimbi yamuBayibolu muchihandilu chenu chejima. Diyi njila yayiwahi yatela kuleñela antaña atoñojokuhu nakwiluka yuma yitwakuhwelelamu hela chakwila hiyakushikena kwitejaku.” Hans, wapapatisheweli hanyima yayaaka 30, kufuma hapapatisheweli ñodindi niyena washimwini nindi dimu. “Kumwekesha yililu yayiwahi yawakwaKristu kwalema, kwaleñelaña antaña jetu kumona chalala chichahimpaña chihandilu chetu.” Antaña jetu atela kwiluka nawu yuma yitwakuhwelela yatuleñelaña kwikala ambukaku nawantu amakwawu, muloña twelaña yuma yayiwahi, bayi yuma yaletaña kukalaku.

Kapostolu Petulu wayifumbili chiwahi ambanda asumbuka nawamayala abula kwitiya nindi: “Shakamenu nakwovwahila anfumu jenwenu aweni; kulonda, hela amu anabuli kwovwahila mazu, akayikoki chakadi mazu, nanochu chakushakamawu añodi jawu; chakumonawu chimukushakama nawoma, chakubula kubajama. Bayi mudiwahisha chakumujimba  nakuyindayinda nsuki, hela nakudikudeka yingelingeli yawuru, hela nakuvwalavwala mahinaku. Chiña mudiwahishi mumuchima wamuntu wamukachi, naspiritu yayovu yawunda yabulaña kutoka, dichi chalema nankashi kumesu aNzambi.”—1 Pet. 3:1-4.

Petulu wasonekeli nindi iyala anateli kumukokola nayililu yayiwahi yañodindi. Hamuloña wakwanuka ilu lushimbi lwamuNsona, muhela wejina daChrista wesekaña kumushika nfumwindi hamuchima nayililu yindi yayiwahi kufuma tuhu hapapatisheweliyi mu 1972. Hela chakwila, nfumwindi wadizileña nawaYinsahu, wachidiña kanda yafuukuluhu kwenda mwaya nsañu yalala. Wayileña kukupompa kwawakwaKristu nikudikunda chiwahi nawantu amuchipompelu. Niwena amulekeli yafuukuluhu yuma yakeñeleñayi. Indi Christa wafwilaña ñahi kumushika nfumwindi hamuchima?

“Nafwilaña kulondela yuma yakeñañayi Yehova nindi nileña. Hampinji yoyimu, nafwilaña kumukoka nfumwami “chakadi mazu” kuhitila muyililu yami yayiwahi. Nazataña nañovu kulonda nili yuma yinakukeñayi neyi hiyinakufumpa nshimbi jamuBayiboluku. Nawa nalemesha wuswa windi wakufuukula nawa nashilaña yuma yejima mumakasa aYehova.”

Yuma yelañayi Christa yinakumwekesha chichalemena kubula kukolela kumu. Watwalekañahu nakuzata nyidimu yakuspiritu mpinji yejima, yinabombelumu kupompa nikuzata mudimu wawakwaKristu wakushimwina. Cheñi nawa, wamwekeshaña kashinshi, nakwiluka nindi watela kumukeña nfumwindi, kwikala nampinji yakushakama nindi hamu nikumwakamena. Kuzata yuma chakubula kukolela kumu nikwikala nakashinshi kwalema nankashi kudi etu ejima tukweti antaña abula kwitiya. Bayibolu yashimuna nawu, ‘Yuma yejima yikweti mpinji yayu.’ Ichi chabombelamu mpinji yitwekalaña nawantaña jetu, sweje-e eni kwetu abula kwitiya. Mukuhanjekaña chiwahi neyi mukwikalaña nampinji yakwikala hamu. Wunsahu wamwekeshaña nawu kuhanjeka chiwahi kwaleñelaña muntu kubula kutiya wuudi, kuneña hela kutiya ichima.—Mukwa. 3:1.

Holger wukweti atata yindi apapatisheweli chimwahitili yaaka 20 kufuma hapapatisheweli antu amuchisaka, wahosheli nindi, “Chekala chalema kumwekesha netu twamukeña ntaña yetu nawa twamulombelañaku.” Christa wahosheli cheñi nindi, ‘Wakatwalekahu kukuhwelela nindi nfumwindi waketeja nsañu yalala nakwikala mukwakudifukula waYehova.’ Mpinji yejima twatela kumwekesha yililu yayiwahi kudi antaña jetu abula kwitiya nikukuhwelela netu ifuku dimu akadiza chalala.

Twafwilaña kutwalekahu kudikunda nawu chikupu, kulonda tuyikwashi antaña jetu adizi chalala, nikuyishika hanyichima nansañu yamuBayibolu. Nawa twatela kumwekesha ‘kudizoza nikalemesha,’ muyuma yejima.—1 Pet. 3:15.