1. Kukalanyi kwamonañawu antu?

 YEHOVA hakeñeleña nindi antu ayandeña nakukala kwenzaña hamuloña wawushinakajuku. Ilaña, wakeñeleña nindi amayala niambanda akadiluñisheña chakadi kukatakata muParadisa. Chawushona, makonu “kuleña kwejima kwaabaña nakufunyisha hamu.” (Rom. 8:22) Munakutoñojoka nenu Nzambi watiyaña ñahi hakumona antu chinakuyandawu hamuloña wanshidi? Kubombelahu, atushinakaji amavulu ayishiyaña chisayikila hampinji yakeñañawu chikupu muntu watela kuyikwasha.—Mas. 39:5; 2 Tim. 3:3.

2. Muloñadi akwaKristu chakamenañawu atushinakaji?

² Antu jaYehova azañalalaña hakwikala nawatushinakaji muchipompelu. Twahetelaña mumaana akwetuwu nichakutalilahu chawu chachikuhwelelu. Hakachi kanawa atushinakaji itwekala nawu amakwawu hiyantaña jetu. Hela chakwila, awa amana kwetu niahela ashinakaja dehi hiyantaña jetu hela nehi, twashañaku muchima nankashi kulonda tuyakameneña. (Ŋal. 6:10; 1 Pet. 1:22) Wonsu wetu tukuhetelamu nankashi neyi twiluka Nzambi chayimonañayi atushinakaji. Tukudiza cheñi hanyidimu yikweti antu amuchisaka kushilahu nichipompelu kutalisha hakwakamena atushinakaji.

3, 4. (a) Yumanyi yalema yalombeliyi nsoneki yaMasamu 71 kudi Yehova? (b) Yumanyi yatela kumulombawu Nzambi atushinakaji amuchipompelu?

³ Nsoneki yaMasamu 71:9 wonenenuwu wamulembeleli Nzambi  nindi: “Bayi wuñumba hawushinakaji wamuku; neyi ñovu jami jinahu bayi wunshiyaku.” Chamwekana neyi Davidi diyi wasonekeli awa mazu. Wamukalakeleli Nzambi kufuma kuwansi windi nichashinakajiliyi, nawa Yehova wamuzatishili munyidimu yayivulu yabadika. (1 Sam. 17:33-37, 50; 1 Anya. 2:1-3, 10) Hela chochu, Davidi welukili nindi wateleleli kumulomba Yehova yatwalekuhu kumumwekeshela wuselewa.—Tañenu Masamu 71:17, 18.

⁴ Antu amavulu makonu adi neyi Davidi. Hela chakwila anashinakaji dehi nawa adi ‘mumafuku atama,’ atwalekañahu nakumuhameka Nzambi hakumina ñovu jawu. (Mukwa. 12:1-7) Atushinakaji amavulu hiyatweshaña kuzata nyidimu yejima yazatileñawu muchihandilu chawuku, kushilahu nimudimu wakushimwina. Ilaña niwena anateli kumulembelela Yehova kulonda yatwalekuhu kuyimwekeshela wuselewa nikuyakamena. Awaatushinakaji ashinshika anateli kukuhwelela nawu Nzambi wukwakula kulomba kwawu. Muloña kulomba kwawu kwesekana nayuma yadiña nakumwakamisha Davidi yalombeliyi hampinji yamonenenuwu.

5. Yehova wayimonaña ñahi atushinakaji ashinshika?

⁵ Nsona yashimuna chikupu hatooka nawu Yehova walemesha nankashi atushinakaji ashinshika cheña nawa wakeñaña ambuñindi alemesheña atushinakaji. (Mas. 22:24-26; Yish. 16:31; 20:29) Mukanda waAlevi 19:32 wahosha nawu, “Neyi kukwinza muntu wukweti mutu wanvu wakanyamukaña, wakalemeshaña ipala kumesu indi, wakamwakamaña Nzambi yeyi; yami Yehova.” Eñañi, kulemesha atushinakaji amuchipompelu wadiña mudimu walema nankashi hampinji yasonekeluwu awa mazu, nawa nimakonu wuchidi walema. Anyi ekala namudimu wakuyakamena?

6. Chakutalilahwinyi chahaniniyi Yesu kutalisha hakwakamena anvwali?

⁶ Izu daNzambi datulejaña nawu: “Lemeshaku tata yeyi namama yeyi.” (Kwid. 20:12; Efwes. 6:2) Yesu wakonkomweneni hanilu lushimbi chayihishiliyi namuloña Afwarisi nawansoneki akaanineña kwakamena anvwali jawu. (Maku 7:5, 10-13) Yesu wahanini chakutalilahu chachiwahi. Chakutalilahu, chelili hakukeña kufwa hamutondu wakuyandishilahu, Yesu wamwinkeli kambanji kindi Yowanu wakeñeliyi mudimu wakwakamena amama yindi, hadaha wadiña nfwila.—Yow. 19:26, 27.

7. (a) Kapostolu Pawulu washimwini lushimbinyi kutalisha hakwakamena anvwali? (b) Mazu ashimwiniyi Pawulu atalisha mudihi?

⁷ Kapostolu Pawulu amoneneni kusoneka nindi antu etiya atela kukwasha yisaka yawu. (Tañenu 1 Timotewu 5:4, 8, 16.) Toñojokenu hansañu yamusonekeleluwu Timotewu kudi Pawulu. Pawulu washimwini antu atela kukwashawu kudi chipompelu munsañu jamali niantu atela kubula kukwashawu. Walumbulwili chikupu nindi anyana etiya, ezukulu niantaña amakwawu adi nawatushinakaji anfwila diwu akweti mudimu wakuyikwasha. Dichi, chipompelu hichatela kwikala namudimu wakuzatisha mali hakwakamena atushinakajuku. Chochimu nimakonu, njila yimu mwamwekeshelañawu akwaKristu nawu ‘amwakama Nzambi’ yekala yakukwasha antaña jawu anakaankili yuma yakumujimba.

8. Muloñadi Bayibolu chiyabulila kushimuna jiika nshimbi jitwatela kulondela hakwakamena anvwali ashinakaja dehi?

⁸ Munjila yikwawu tunateli kuhosha netu, anyana akwaKristu akula dehi diwu akweti mudimu wakukwasha anvwali jawu anakaankili muyuma yakumujimba. Pawulu wadiña nakuhosha hadi antaña etiya ilaña nianvwali abula kwikala muchipompelu chawakwaKristu niwena atela kuyakamena. Njila mwakwashilañawu anyana anvwali jawu yashiyashana. Yuma yenda kwamboka. Yuma yakeñañawu, yililu nichahandañawu kumujimba chambuka. Atushinakaji amakwawu akweti nyana yayivulu; amakwawu akweti  mwana wumu hohu. Amakwawu anateli kutambwila wukwashu kunfulumendi; amakwawu nehi. Cheñi nawa antu anakukeña wukwashu yuma yakeñawu yashiyashana. Dichi, hitwatela kudiwula muntu chinakuhembayi antaña jindi ashinakaja dehuku. Muloña Yehova nateli kukiswila yuma yejima yitwafuukulañahu yashindamena haNsona nawa yinateli kuzatika chiwahi, neyi chochelileñayi mumafuku aMosi.—Kuch. 11:23.

9-11. (a) Kukalanyi kukwawu kunateli kumona antu amakwawu? (Talenu mwevulu wakutachikilahu.) (b) Muloñadi anyana akula dehi chiyatela kubula kunyakalawu kuleka mudimu wampinji yejima? Lumbululenu.

⁹ Neyi anvwali ashinakaja dehi ashakamaña kwakulehi nawanyanawu, chinateli kuyikalila kuyakamena chiwahi. Neyi anvwali akata mukukasumwisha, hadaha hamuloña wakudimbuka, indi kwiji anakotoki, hela kukala kukwawu, chakeñekaña anyana kuya nakutala anvwali jawu mukunyakashana. Dichi atela kuyikwasha, hampinji yantesha indi kwiji hadi mpinji yayilehi. *

¹⁰ Antu adi mumudimu wampinji yejima azatilaña nyidimu yaNzambi kwakulehi nakumukala wawu chayikalilaña kufuukulahu chikupu. Antu azatilaña haBeteli, amishonali niankoñi endaña wejima wawu alemesha chikupu mudimu wawu, awumonaña nawu hikukooleka kwakufuma kudi Yehova. Hela chochu, neyi anvwali anakati, hadaha ashikenaña kutoñojokaña nawu, ‘Twatela kuleka mudimu wetu kulonda tufunti kumukala nakuhemba anvwali jetu.’ Ilaña, chikuwaha neyi atoñojokahu chikupu nikulombelahu kulonda eluki neyi dichuma chinakukeña anvwali jawu. Kwosi muntu watela kunyakala kuleka mudimu wampinji yejimaku, nawa mpinji yejima hichakeñekaña kulekaku. Hadaha kankati kakutwalekahu wanyi, nawa antu amuchipompelu mwekalawu anvwali jenu anateli kuyikwasha.—Yish. 21:5.

¹¹ Shinshikenu chakutalilahu chawamana kwetu ayedi, avwalika ivumu dimu azatilileña kwakulehi namukala wawu. Wumu wadiña kamishonali mwituña daSouth America, mukwawu niyena wazatilileña hachishina chamukaayi, muBrooklyn, New York. Anvwali janawa amana kwetu ashinakajili, dichi akeñekeleña kuyikwasha. Anyanawu awamayala niañodijawu ayili nakutala anvwali jawu kwiluña Dakwakulehi Dakumusela kulonda amoni mwatela kuyikwashilawu. Chimwahitili mpinji, antu adisumbula ashakamineña kwituña daSouth America adiña nakutoñojoka kuleka mudimu wawu kulonda afunti kumukala. Nloñeshi wezanvu dawaeluda wamuchipompelu mwekala anvwali jawu wayitemesheleli nshiña. Aeluda amuchipompelu ashakamini hamu nakuhanjekahu nawa akeñeleña ana amishonali atwalekuhu namudimu wawu neyi chinatwesheki. Aeluda alemesheli nyidimu yazatileñawu awa antu adisumbula nawa akeñeleña nawu ayikwashi kwakamena anvwali jawu. Chisaka chawu chejima chahamekeli chikupu hawuna wukwashu.

12. AkwaKristu anakufwila kwakamena anvwali akula dehi, atela kusha maana hachumanyi neyi hiyakufuukulahu?

¹² Hichikweti muloña nanjila yikutonda chisaka chawakwaKristu kuhembelamu anvwali ashinakaja dehuku, antu ejima anakukeña kukwashana atela kufuukulahu yuma yikuleta kalemesha hejina daNzambi. Hitwatela kwikala neyi alomboli jansakililu amumafuku aYesuku. (Mat. 15:3-6) Twakeñaña kufuukulahu yuma yikuleta kalemesha kudi Nzambi nikuchipompelu.—2 Kor. 6:3.

13, 14. Indi Nsona yashimunaña ñahi nawu yipompelu yatela kukwasha antu amuchipompelu anashinakaji dehi?

¹³ Bayi neyi antu ejima anateli kukwasha antu adi mumudimu wampinji yejima muniyi  njila yitunashimuni hewuluku. Hela chochu, chuma chamwekeni kushankulu chamwekesha nawu yipompelu yakeñaña kukwasha amana kwetu niahela ashinakaja dehi ashinshika anakaankili. Bayibolu yashimunaña nawu muchipompelu chamuYerusalema ‘himwadiña muntu wadiña mukukaankilaku.’ Bayi neyi ejima adiña ahetaku. Chakadi nikujina amakwawu adiña nayuma yantesha yakumujimba, ilaña “hiyakupañila hamuntu hamuntu mwanabuliluwu.” (Yil. 4:34, 35) Chimwahitili mpinji muchina chipompelu mwamwekeni kukala kweneni. Chatiyakeni nawu ‘anfwila ayibondeleña hanzañeneñawu yakudya hefuku hefuku.’ Dichi, apostolu atondeli amayala aya mpuhu yayiwahi, akunjikiluwu kumudimu wakwakamena anfwila nikumona nawu ayinkeleña yakudya yashikila. (Yil. 6:1-5) Kafwampi, mudimu wakuhana yakudya hefuku hefuku wadiña mudimu wakapinji kantesha, wakukwasha antu adiña mukukaankila ekalili akwaKristu haPentekosta 33 C.E. nawa ashalili muYerusalema hakapinji kantesha kulonda akoleshi chikuhwelelu chawu. Hela chochu, chuma cheliluwu apostolu chamwekeshaña nawu chipompelu chinateli kukwasha antu amuchipompelu anakaankili.

¹⁴ Neyi chitunamoni dehi, Pawulu wamulejeli Timotewu nshimbi jashimwineña yuma yaleñeleleña chipompelu kukwasha anfwila akwaKristu muyuma yakaankililuwu. (1 Tim. 5:3-16) Yakoba nsoneki yaBayibolu onenenuwu niyena wetejeli nindi akwaKristu akweti mudimu wakutala anshona abula atata jawu, niambanda anfwila niantu amakwawu amonaña lukadi hela anakaankili. (Yak. 1:27; 2:15-17) Kapostolu Yowanu niyena washimwini nindi: “Muntu wukweti yuma yampata yamunu mwishina, wukumona mana kwindi nayibuli, hakumuumina muchima windi mwivumu, kukeña kwaNzambi kukutwesha kushakama mudi yena ñahi?” (1 Yow. 3:17) Neyi chakwila akwaKristu akweti mudimu wakwakamena antu anakaankili, komana chipompelu nichena hichikweti mudimu wowumuku?

15. Hampinji yitunakukwasha amana kwetu niahela ashinakaja dehi, yumanyi yitwatela kwiluka?

¹⁵ Mumatuña amakwawu, nfulumendi yahanaña jipeshoni niyuma yikwawu yakukwasha atushinakaji hela kuyinka antu akuyihemba hetala. (Rom. 13:6) Kumatuña amakwawu hikwekala wukwashu wamuchidiwuku. Dichi, antaña nichipompelu anateli kukwasha amana kwetu niahela ashinakaja dehi kwesekeja nayuma yinakaankiluwu. Neyi anyana etiya ashakamaña kwakulehi nawanvwali jawu, chinateli kuyikalila anyana kwiluka chikupu wukwashu watela kwinkawu anvwali jawu. Chikuwaha neyi anyana ahanjekaña chikupu nawaeluda amuchipompelu mwekala anvwali jawu kulonda ejima eluki chinakuhanda chisaka  chawu. Chakutalilahu, aeluda anateli kuyikwasha anvwali kulonda eluki nawu anateli kutambwila wukwashu kunfulumendi hela wukwashu wukwawu wahanañawu mwiluña dawu. Aeluda anateli kumona yuma yinakumwekena, yidi neyi nyikanda yinabuli kutañawu hela yitumbu yinakubula kunwawu nawa anateli kulejamu anyana. Neyi aeluda nianyana ahanjekaña chiwahi, akukañesha yuma yinateli kuleta kukala nawa akuyakamenaña chiwahi. Eñañi, neyi kudi muntu wunakushakama kwakwihi wunakuyikwashaku hela watela kuyilejaña anyana ashakamaña kwakulehi mwakwilila, anyana hiyakuswejaña kwakamaku.

16. AkwaKristu amakwawu akamenaña ñahi atushinakaji ekala muchipompelu?

¹⁶ Hamuloña wakukeña amana kwawu ashinakaja dehi, akwaKristu amakwawu adihanaña kuzatisha mpinji yawu niñovu kulonda ayikwashi muyuma yinakaankiluwu. Afuukulañahu kuzata nañovu kulonda amwekesheña chikupu kukeña kudi atushinakaji amuchipompelu. Akwakudihana amakwawu adipañilaña nyidimu nawakwawu muchipompelu kulonda adihimpeña hakwakamena atushinakaji. Hamuloña wakwiluka nawu wena hiyanatweshi kuzata mudimu wampinji yejimaku, atiyaña kuwaha kukwasha anyana ekala mumudimu wampinji yejima kulonda atwalekuhu neyi chinatwesheki. Awa amana kwetu amwekeshaña yililu yayiwahi hama! Hela chochu, wukwashu wahanañawu hiwaleñelaña anyana aleki kuzata mudimu wawu wakwakamena anvwali jawuku.

17, 18. Twatela kwikala nayililu yamuchidinyi yatela kutukwasha kwakamena atushinakaji?

¹⁷ Amana kwetu ejima azataña mudimu wakwakamena atushinakaji atela kufwila kuzata iwu mudimu munjila yakuzañalesha. Neyi ninenu mwazatañaku iwu mudimu, zatenu hakumina ñovu yenu kulonda mutwalekuhu namuzañalu. Mpinji yikwawu wushinakaji waletaña chineñi. Dichi munateli kuzata nañovu kulonda mulemesheña nikukolesha amana kwetu niahela ashinakaja dehi kuhitila mukuhanjeka munjila yakuyikolesha. Twatela kuhameka awa amana kwetu anamukalakeli Yehova nakashinshi hayaaka yayivulu. Yehova havulamenaña nyidimu yinamukalakeluwuku, niakwawu akwaKristu niwena avulamenaña wanyi.—Tañenu Malaki 3:16; Aheberu 6:10.

¹⁸ Kubombelahu, nyidimu yakala yinateli kumwekana neyi yapela kuyizata neyi atushinakaji niantu ayakamenaña ekalañaku nampinji yakuseha. (Mukwa. 3:1, 4) Atushinakaji amakwawu hiyakeñaña nawu aswejeña kulomba-lombaku. Eluka nawu hakwila antu ayisheña maana nikuyihempula chashindamenaña hayililu yamwekeshañawu. Kakavulu twatiyaña antu ayaña nakuhempula anakuhosha nawu, “Nayili nakukolesha mana kwami wakashinakaji, ilaña hakufumaku ninami ankolesheli hama.”—Yish. 15:13; 17:22.

19. Chumanyi chinateli kukwasha atwansi niakulumpi kutwalekahu akola mumpinji yamakabi?

¹⁹ Twachiñejaña chikupu mpinji yikamana makabi niyuma yatama yafumaña mukubula kuwanina. Chayinu mpinji, ambuña Nzambi atela kutwalekahu nakuchiñeja yuma yahaya nyaka. Tweluka netu kukuhwelela yikaninu yaNzambi kwakoleshaña chikuhwelelu chetu hampinji yitunakuhita mumakabi nimuyihuñu. Twahamekaña hakwikala nachikuhwelelu chamuchidiwu, “Dihu hafuma kubula kuzeya; muloña hela muntu wetu wahanzi wudi nakuya nakunoña, muntu wetu wamukachi wudi nakuya nakubalumuka wamwiha hefuku hefuku.” (2 Kor. 4:16-18; Heb. 6:18, 19) Kubombela hakutwalekahu nakwikala nachikuhwelelu chakola muyikaninu yaNzambi, chumanyi chinateli kuyikwasha kulonda muzateña chiwahi nyidimu yakwakamena atushinakaji? Muchibaaba chinalondeluhu tukahanjeka hanjila jajiwahi jinateli kuyikwasha.