1. Indi Yesu washili ñahi chakutalilahu chakudihana?

 HAMPINJI yadiñayi Yesu hanu heseki, washili chakutalilahu chachiwahi chakudihana. Mpinji yejima welaña mwaya muchima waNzambi kubadika yuma yakeñeleñayi yomweni. (Yow. 5:30) Wamwekesheli nawu wadiña namuchima wakudihana chikupu kuhitila mukutwalekahu kwikala washinshika kushika nikukufwa hamutondu wakuyandishila.—Fwi. 2:8.

2. Tunateli kumwekesha ñahi muchima wakudihana, nawa muloñadi chitwatelela kwila mwenimu?

² Hakwikala atumbanji twaYesu, anetu twatela kwikala namuchima wakudihana. Indi kwikala namuchima wakudihana kwatalisha mudihi? Kwatalisha mukwila nawu muntu watela kwikala namuchima wakukeña kukwasha amakwawu kubadika kwila yuma yinakukeñayi yomweni. Munjila yikwawu tunateli kuhosha netu hikubula kwikala nalwisu. (Mat. 16:24) Kubula kwikala nalwisu kunateli kutukwasha kukeña kuzatila amakwawu kubadika kukeña hohu yuma yetwetu aweni. (Fwi. 2:3, 4) Mwalala, Yesu watudizishili nindi muchima wakudihana dihashindamena kudifukula kwetu. Munjilanyi? Kukeña kwamwekeshañawu akwaKristu, kwatusañumunaña kwikala namuchima wakudihana, dichinjikijilu chawatumbanji twaYesu alala. (Yow. 13:34, 35) Nawa toñojokenu hankisu yitwadiluñishaña hamuloña wakwikala hakachi kawamana kwetu  amukaayi kejima amwekeshaña muchima wakudihana!

3. Yumanyi yinateli kutuleñela tubuli kwikala namuchima wakudihana?

³ Hela chochu, tukweti chilumbu wabulaña kumwekana wunateli kutukojeja kubula kwikala namuchima wakudihana. Chilumbu yeniwu hichaaku chetu chakwikala nalwisu. Anukenu Adama naEvu chamwekesheluwu lwisu. Lwisu dilwamuleñeleli Evu yakeñi kwikala neyi chekalayi Nzambi. Nfumwindi niyena wamwekesheli lwisu hamuloña wakukeña kumuzañalesha ñodindi. (Kutach. 3:5, 6) Diyabolu chayifumishiliyi Adama naEvu kukudifukula kwalala, watwalekahu kweseka antu kulonda ekali nalwisu. Wesekeli kuzatisha njila yoyimu hampinji yamwesekeleñayi Yesu. (Mat. 4:1-9) Makonu, Satana nadimbi antu amavulu, nakuyileñela amwekesheña lwisu muyuma yayivulu. Twatela kushaku kashinshi chikupu muloña yililu yalwisu yinasweji kutanda yinateli kwikala nimudetu.—Efwes. 2:2.

4. (a) Komana chayinu mpinji tunateli kuleka chikupu yaaku yalwisu? Lumbululenu. (b) Malwihwinyi itukuhanjekahu?

⁴ Lwisu ludi neyi ndala yalamataña kuchikuñu. Neyi chikuñu chishakama hamwana hela hanvula chinateli kwikala nandala. Ndala neyi yisweja kulamata kuchikuñu yakalaña kuyifumisha nawa neyi muyilekelaku yikukisañana chuma chikuleka nikuzatika. Munjila yoyimu, hela chakwila chayinu mpinji hitunateli kumanisha chikupu chaaku chetu chakwikala nalwisu hamuloña wakubula kuwanina, twatela kushaku maana kulonda tutwalekuhu kushinda yaaku yamuchidiwu. (1 Kor. 9:26, 27) Tunateli kwiluka ñahi netu tukweti lwisu? Hanu dinu tunateli kwikala ñahi namuchima wakudihana chikupu?

5. (a) Bayibolu yekela ñahi neyi chibanjilu? (Talenu mwevulu wakutachikilahu.) (b) Neyi hitukudishinshika kulonda twiluki neyi tukweti lwisu, yumanyi yitwatela kutondolwela?

⁵ Neyi chochitwazatishaña chibanjilu kulonda twiluki chinakumwekana mpolu yetu, dichi tunateli kuzatisha Bayibolu kulonda twiluki chidi muntu wetu wamukachi nikuwahisha hanakukeñeka kwolola. (Tañenu Yakoba 1:22-25.) Hela chochu, chiña neyi tuchizatisha chiwahi chibanjilu chinateli kutukwasha kulonda twiluki chitunakumwekana. Chakutalilahu, neyi tusumbila hohu muchibanjilu, hitukutwesha kumona hanakukeñeka kuwahishaku. Hela neyi twimana hakabavu hakuditala muchibanjilu, hadaha tukumona mwevulu wamuntu wacheñi. Munjila yoyimu, hakwila tuzatishi Bayibolu kulonda tumoni chaaku chatama, chidi neyi lwisu, twatela kuzata nañovu kubadika kuyitaña hohu hela kuyizatisha kulonda tumoni yiluwa yamuntu wacheñi.

6. ‘Twakakelaña’ ñahi mulushimbi lwawanina?

⁶ Chakutalilahu, hadaha tunateli kutañaña Izu daNzambi mpinji yejima, hela ifuku niifuku, ilaña tunateli kukañanya kwiluka yaaku yalwisu yinateli kwikala munyichima yetu. Chumichi chinateli kumwekana ñahi? Toñojokenu hachumichi: Muchakutalilahu chaYakoba chachibanjilu, bayi neyi muntu wakañenyi kuditala chachiwahi muchibanjiluku. Ilaña Yakoba wasonekeli nindi muntu ‘wadimweni.’ Hanu dihu, kukalanyi kwadiña naniwu muntu? Yakoba watwalekeluhu nindi: ‘Hohenohu hakufumahu, navulameni dehi chekalayi.’ Eñañi, chakumishiliyi kuditala muchibanjilu wakañenyi kuwahisha hamweniyi nindi hanatami. Kwambukaku, muntu welaña mwaya mazu hakuminaña ‘dakutala mulushimbi lwawanina lwalala chikupuku,’ ilaña ‘wakakelañamu.’ Chatela yavulameni nshimbi yawanina yekala Mwizu daNzambi, watwalekañahu kulondela yuma yatañishaña Bayibolu. Yesu niyena washimwini chikuma chochimu hampinji yahosheliyi nindi: “Neyi mukushakama mumazu ami, mukwikala atumbanji twami chalala.”—Yow. 8:31.

7. Tunateli kuzatisha ñahi Bayibolu hakwila twiluki neyi tudi nachaaku chalwisu?

⁷ Dichi, hakwila nawu mubuli kwikala nalwisu, mwatela kusambila kutaña Izu daNzambi nakanañachima. Kukuyikwasha mwiluki  himunateli kuzatila. Ilaña kudi yuma yikwawu yimwatela kwila. Mwatela kusandujola chikupu. Neyi mudiza nsañu yimu yamuBayibolu nawa muyiluka chikupu, mwatela kudifwikija neyi yenu kuhitila mukudihula nenu: ‘Neyi nadiña ami nadi kwila ñahi? Mwalala nadikufuukulahu mwaloña?’ Chuma chabadika kulema, chimwakumisha kutoñojoka chikupu hayuma yimunatañi fwilenu kuyizatisha. (Mat. 7:24, 25) Tutalenu chitwatela kuzatisha nsañu yahosha hadi Mwanta Sawulu nikapostolu Petulu kulonda yitukwashi kutwalekahu namuchima wakudihana.

8. Hampinji yatachikiliyi Sawulu kuyuula wadiña nachililwinyi, nawa wachimwekesheli ñahi?

⁸ Mwanta Sawulu wekala chakutalilahu chakutusoñamisha etu nawu lwisu lunateli kutukañesha kwikala namuchima wakudihana. Hampinji yatachikiliyi kuyuula Sawulu wadiña muntu wadizoza hama. (1 Sam. 9:21) Wakaanini kuyibabesha aIsarela adiwili wanta windi, hela chakwila wadiña nawuswa wakuyibabesha muloña Nzambi diyi wamwinkeli chifulu. (1 Sam. 10:27) Mwanta Sawulu walondeleli wunlomboli waspiritu yaNzambi hampinji yayilombweleñayi aIsarela hayiluwu nakutapa aAmoni. Kuhiñahu mukudizoza wamuhamekeli chikupu Yehova wamukwashili kushinda.—1 Sam. 11:6, 11-13.

9. Indi Sawulu watachikili ñahi kwikala nalwisu?

⁹ Chimwahitili mpinji, Sawulu watachikili kwikala nachililu chalwisu chamuleñeleli yatachiki kudinka wanta, neyi chochatachikaña ndala. Chayishindiliyi aAmaleki munjita welili yuma yakeñeleñayi yomweni kubadika kumwovwahila Yehova. Hamuloña walwisu Sawulu wasendeli yuma yapupiluwu chatela yayikisañani, neyi chamulejeluwu kudi Nzambi. Nawa Sawulu mukudivwimba wadituñilili kaposhi. (1 Sam. 15:3, 9, 12) Chenjili kaprofwetu Samweli nakumuleja nindi chuma cheliliyi chamuneñesheli Yehova, Sawulu wadiyiñishili nakuhosha nindi wovwahilili lushimbi lwaNzambi nawa watwikili akwawu nyiloña hachiluwa chakoñeliyi. (1 Sam. 15:16-21) Kubombelahu, kudivwimba dikwaleñeleli Sawulu yasweji kukeña kudimwekesha kudantu neyi waloña kubadika kukeña kumuzañalesha Nzambi. (1 Sam. 15:30) Tunateli kuzatisha ñahi nsañu yahosha hadi Sawulu neyi chibanjilu chatela kutukwasha twiluki chitwatela kwikala namuchima wakudihana?

10, 11. (a) Chuma chamumwekeneni Sawulu chatudizishañadi hakwikala namuchima wakudihana? (b) Tunateli kutondolwela ñahi yililu yatama yamwekesheliyi Sawulu?

¹⁰ Chatachi, chuma chamumwekeneni Sawulu chamwekeshaña nawu bayi tusweja kudishindamenaku, neyi hakusambila twadiña namuchima wakudihana, hitwatela kutoñojoka netu tukatwalekañahu kuwumwekeshaku. (1 Tim. 4:10) Anukenu nenu Sawulu welileña yuma yayiwahi nawa wadiña nawuselewa waNzambi hakapinji kantesha, ilaña wakañenyi kuleka lwisu lwatachikili mumuchima windi. Yehova wamukaanini Sawulu hamuloña wakubula kwovwahila.

¹¹ Chamuchiyedi, twatela kushaku kashinshi kulonda tubuleña kusha muchima hohu hayuma yitunakwila chiwahi, nakudiwula yuma yitwatela kuzatilahu. Chumichi chidi neyi tunakuditala muchibanjilu nakukomoka chinakumwekana yakuvwala yetu yayiha nakukañanya kumona majilu adi kumesu. Hela chakwila, hitunateli kudishindamena neyi Sawuluku, ilaña twatela kuzata nañovu kulonda tutondolweli chaaku chidi chejima chikutuleñela kufwa mumuhetu wowumu watama. Neyi atufumba, bayi tudiyiñishaña nakumona netu hitunaluwañeshuku, hela kutwika amakwawu nyiloña. Chatela twikali neyi Sawulu, chikuwaha neyi tukwovwahilaña mwatufumbañawu.—Tañenu Masamu 141:5.

12. Indi muchima wakudihana wunateli kutukwasha ñahi neyi tunavulumuni nshidi yahamesu bwi-i?

¹² Indi neyi tunavulumuni nshidi  yahamesu bwi-i? Sawulu wakeñeleña amumoni nawu waloña, ichi chamukañesheli yakañanyi kwikala cheñi nawubwambu naNzambi. Kwambukaku, muchima wakudihana wunateli kutukwasha tubuleña kutiya nsonyi nakulomba wukwashu. (Yish. 28:13; Yak. 5:14-16) Chakutalilahu, mana kwetu wumu watachikili kutala nyevulu yanzekesi henohu wudi nayaaka 12, nawa watwalekeluhu nakuyitala mukuswamujoka kubadika hayaaka 10. Washimwini nindi: “Chankalilili kumulejamu ñodami niaeluda chuma chinelileña. Ilaña chinayilejeli munelileña, natiyili neyi anañamuni chiteli chalema chadiña hamafwiji ami. Amabwambu jami amakwawu aneñeli chiyantambwiluwu mudimu wawunkoñi, atiyili neyi nayisawishi. Ilaña, neluki nami Yehova nakutiya kuwaha nanyidimu yami kubadika hampinji yinatalileña nyevulu yanzekesi, nawa chatumonañayi Yehova dichuma chabadika kulema.”

13, 14. Indi Petulu wamwekesheli ñahi lwisu?

¹³ Kapostolu Petulu wamwekesheli muchima wakudihana hampinji yamudizishileñawu kudi Yesu. (Luka 5:3-11) Ilaña, wateleli kuleka yaaku yalwisu. Chakutalilahu, wahilili chelili kapostolu Yakoba niYowanu akwati kafuta kakukeña kwikala nachifulu cheneni hamu naYesu muWanta waNzambi. Hadaha Petulu watoñojokeli nindi itanda dimu dikekala dindi muloña Yesu wahosheli nindi Petulu akamwinka mudimu walema. (Mat. 16:18, 19) Hela chochu, Yesu wamusoñamishili Yakoba niYowanu, kushilahu niPetulu niapostolu amakwawu, kulonda abuli kwikala nayililu yalwisu yakwikala ‘anyanta hadi’ ana kwawu.—Maku 10:35-45.

¹⁴ Petulu watwalekeluhu nakulwisha nayililu yindi yalwisu, nihanyima yakwila Yesu namufumbi dehi kulonda yaleki yililu yindi. Yesu chayilejeliyi apostolu nindi akamutemuka hampinji yantesha, Petulu wadiwili akwawu nakudivwimba kuhitila mukuhosha nindi yena hohu diyi wukatwalekahu washinshika. (Mat. 26:31-33) Hela chochu, wakañenyi kwikala washinshika, muloña ifuku dodimu nampinji yawufuku hamwekesheli muchima wakudihanaku. Hakufwila kudikiña yomweni, Petulu wamukaanini Yesu mapampa kasatu.—Mat. 26:69-75.

15. Muloñadi chakutalilahu chaPetulu chichatukoleshelaña?

 ¹⁵ Hela chakwila walwishileña naniyi yiluwa, Petulu watushila chakutalilahu chachiwahi. Hamuloña wakuzata nañovu niwukwashu waspiritu yaNzambi yajila, Petulu walekeli yililu yindi yatama nawa wamwekesheli yililu yakudihemba nikudihana. (Ŋal. 5:22, 23) Womikili kweseka kwabadikili chikupu nakweseka kwamudimbweshili hakusambila. Wamwekesheli kudizoza hampinji yamuzuwililuwu kudi kapostolu Pawulu hamesu awantu. (Ŋal. 2:11-14) Nawa Petulu chamuzuwililuwu, hashili ndulu kumuchima nakutoñojoka nindi Pawulu wamusawishili hakumuzuwila hamesu awantuku. Petulu watwalekeluhu kumwekesha nindi wamukeñeli Pawulu. (2 Pet. 3:15) Chakutalilahu chaPetulu chinateli kutukwasha kwikala namuchima wakudihana.

16. Tunateli kumwekesha ñahi muchima wakudihana neyi tudi mukukala?

¹⁶ Toñojokenu chimwelaña neyi mudi mukukala. Hampinji yayumbililuwu aPetulu niapostolu amakwawu mukaleya hamuloña wakushimwina, azañaleli nankashi ‘nanochu chayifuukwililuwu kutela kusawuka kukoola ijina [daYesu].’ (Yil. 5:30-41) Anenu nawa munateli kumona makabisha neyi hikukooleka kwakumwimbujola Petulu nikulondela mumahaji aYesu kuhitila mukumwekesha muchima wakudihana. (Tañenu 1 Petulu 2:20, 21.) Neyi mumwekesha yililu yamuchidiwu yikuyikwasha kwovwahila munakuyifumbawu aeluda. Londelenu chakutalilahu chaPetulu chatela muzuweña mumuchima.—Mukwa. 7:9.

17, 18. (a) Tunateli kudihula netudi kutalisha hanyidimu yitunakukeña kumuzatila Nzambi? (b) Tunateli kwiladi neyi twiluka netu tudi nalwisu mumuchima?

¹⁷ Munateli cheñi kudizila kuchakutalilahu chaPetulu kutalisha hanyidimu yimunakufwila kumukalakela Nzambi. Munateli kuzata nyidimu yamuchidiwu munjila yikumwekesha muchima wakudihana. Hela chochu, mwatela kubabala kulonda mubuli kuzata iyi nyidimu namuchima wakukeña kuya mpuhu. Dichi dihulenu nenu, ‘Komana mpwila yami yakufwila kukalakala chikupu hela yakukeña kumuzatila Yehova yikuluwankana hamuloña wakufwila kuya mpuhu hela yakukeña wanta, neyi chamulombeluwu Yesu kudi Yakoba niYowanu nawu yayinki chifulu cheneni?’

¹⁸ Neyi mwiluka nenu mumuchima wenu mudi lwisu, mulombenu Yehova yayikwashi kulonda muhimpi yitoñojoka yenu; nawa zatenu nañovu kulonda mpuhu yiyeña kudi Nzambi kubadika kudenu aweni. (Mas. 86:11) Munateli cheñi kuzata nyidimu yinateli kuyileñela mubuli kuya mpuhu. Chakutalilahu, munateli kwikala nayililu yamukabu waspiritu yayikalilaña. Neyi mwaloñeshaña chachiwahi nsañu yakudiza hakupompa ilaña himwekala nampwila yakuzata mudimu wakuwahisha Itala daWantaku, munateli kwikala nachikonkwanyi chakuzatisha kufumba kwekala haAroma 12:16.—Tañenu.

19. Twatela kwila ñahi hakwila yuma yitukumona muchibanjilu Chezu daNzambi yibuli kutuneñesha?

¹⁹ Neyi tuditala chachiwahi muchibanjilu Chezu daNzambi nawa tumona niyiluwa yitukweti, niyuma yinakumwekesha nawu tudi nalwisu tunateli kuzeya. Neyi chumichi chiyimwekena toñojokenu hadi muntu welaña mwaya mazu wamuchishimu chaYakoba. Yakoba halumbulwili muntu chamanishiliyi kukala kwawaniniyi swayi-swayi hela kumanisha kukala kwejimaku; ilaña Yakoba washimwini nindi ona muntu ‘watwalekeluhu nakutala mulushimbi lwawanina.’ (Yak. 1:25) Wanukili yuma yamweniyi muchibanjilu nawa watwalekeluhu nakuzatilahu kulonda yawahishuhu. Eñañi, dimonenuña chiwahi enu aweni nikwiluka nenu mwawanina wanyi. (Tañenu Mukwakutaŋisha 7:20.) Twalekenuhu kutala mulushimbi lwawanina, kulonda mutwalekuhu kwikala namuchima wakudihana. Yehova nakukeña kuyikwasha neyi chinakwashiyi amana kwenu amavulu, hela chakwila hiyawaninaku, anateli nawa akweti wuselewa waNzambi ninkisu yindi.