1. Nkiswinyi yafumaña kudi Yehova yatuleñelaña kwikala namuzañalu?

 YEHOVA wakeñaña nindi tuzañalaleña, nawa watukiswilaña muyuma yayivulu, kulonda twikaleña namuzañalu. Cheñi nawa, watwinka wumi. Tunateli kumuhameka Nzambi muchihandilu chetu, chineli watukokela mukudifukula kwalala. (Mas. 144:15; Yow. 6:44) Yehova wamwekeshaña nindi watukeña nawa watukwashaña kuumika hampinji yitwamukalakelaña. (Yere. 31:3; 2 Kor. 4:16) Twatiyaña kuwaha cheñi hakunuñañana kwekala hakachi kawantu jaNzambi, tukweti yakudya yakuspiritu niamana kwetu akweti kukeña. Kubombelahu, tukweti kuchiñeja kwakumbidi.

2. Ambuña Nzambi amakwawu ashinshika alwishaña nakukalanyi?

² Hela chakwila kudi yuma yatuzañaleshaña, ambuña Nzambi amakwawu ashinshika chayikalilaña hakwila nawu atwalekuhu amuzañalu hakumukalakela Yehova. Anateli kutoñojoka nawu wena hela nyidimu yamukalakelañawu Yehova hiyalemaku. Antu atwalekañahu nakudimona nawu alema wanyi, amonaña nawu kuhanda “nyaka yayivulu” hikaanu hohu. Chihandilu chamwekanaña neyi kwiji mafuku amwidima.—Mukwa.11:8.

3. Yumanyi yinateli kutuleñela tudimoneña neyi twalema wanyi?

³ Chineñi, kukatakata hela kukula dikwaleñela amana kwetu niahela  adimoneña nawu alema wanyi. (Mas. 71:9; Yish. 13:12; Mukwa. 7:7) Cheñi nawa mukwaKristu wudi wejima watela kwiluka nindi, muchima wadimbanaña nawa wunateli kututanyisha hela chakwila Nzambi wazañalalaña chitwamukalakelaña. (Yere. 17:9; 1 Yow. 3:20) Diyabolu wayitwambilaña ambuña Nzambi. Antu atoñojoka neyi Satana anateli kutuleñela tutoñojokeña neyi chahosheli Elifwazi wabulili chikuhwelelu nindi, twalema wanyi kumesu aNzambi. Awa himazu akutwamba ahosheluwu mumafuku aYoba nimakonu twayimonaña netu himakudi.—Yoba 4:18, 19.

4. Yumanyi yitukudiza munichi chibaaba?

⁴ Yehova washimuna hatooka to-o muNsona nindi wakwashaña antu ejima ‘endaña muchinekineki chamwidima wakufwa.’ (Mas. 23:4) Watukwashilaña kuhitila Mwizu dindi. Bayibolu ‘yikweti ñovu yakusanda nachu mpwembu jakola,’ kubombelahu ninsañu yakutwamba niyitoñojoka yaluwa. (2 Kor. 10:4, 5) Tutalenu chitunateli kuzatisha Bayibolu kulonda yitukwashi tutwalekuhu amuzañalu hakumukalakela Yehova. Munateli kuhetelamu chikupu nawa mukuwana njila jimunateli kukoleshelamu amakwawu.

5. Twatela kudeseka ñahi kulonda tutoñojokeña hayuma yayiwahi?

⁵ Kapostolu Pawulu washimwini yuma yinateli kutukwasha kulonda tutoñojokeña hayuma yayiwahi. Wakonkomweneni chipompelu chamuKorinda nindi: ‘Desekenu ntahi, mutali neyi mudi nachikuhwelelu.’ (2 Kor. 13:5) ‘Chikuhwelelu,’ dihashindamena yuma yakuhwelelawu akwaKristu yashimunawu muBayibolu. Neyi mazu itwahoshaña niyuma yitwelaña yesekana nayuma yitwakuhwelela, dikwila nawu tunadeseki nawa tukumwekesha netu tudi ‘nachikuhwelelu.’ Hela chochu, twatela kwesekeja chihandilu chetu kulonda tumoni neyi chinakwendela hamu nantañishilu yawakwaKristu yejima. Hitwatela kutondahu ntañishilu yitwatela kulondelaku.—Yak. 2:10, 11.

6. Muloñadi wutwatela kudeseka etu aweni kulonda tumoni ‘neyi tudi nachikuhwelelu’? (Talenu mwevulu wakutachikilahu.)

⁶ Hadaha munateli kujinoka hakwila nawu mudeseki muniyi njila, sweje-e neyi mutoñojoka nenu mukukañanya. Ilaña, chatumonañayi Yehova dichuma chasweja kulema kubadika chitwadimonaña etu aweni, nawa yitoñojoka yindi yabadika chikupu yitoñojoka yetu. (Isa. 55:8, 9) Washinshikaña akwakudifukula indi kulonda yamoni yililu yayiwahi yikwetuwu hakwila yayikwashi bayi neyi yayifwishi namuloñaku. Neyi muzatishaña Izu daNzambi hakudeseka enu aweni kulonda mumoni ‘neyi mudi nachikuhwelelu,’ mukudimonaña chikupu neyi chayimonañayi Nzambi. Chikuyikwasha kulonda muleki kudimona nenu mwalema wanyi kumesu aNzambi nakutachika kutoñojoka hachikaninu chamuBayibolu chakwila nawu: Mwalema chikupu kumesu aYehova. Chidi neyi munashinkuli njanena kulonda mukapeka mudi mwidima mutoñeki chejeji.

7. Tunateli kuhetelamu ñahi muyakutalilahu yawantu ashinshika ashimunawu muBayibolu?

⁷ Njila yayiwahi yakudishinshika etu aweni yidi yakutoñojoka chikupu hayakutalilahu yawantu ashinshika ashimunawu muBayibolu. Esekejenu chihandilu chawu nachenu hela yitoñojoka yawu nayenu, kulonda mwiluki chimwadi kwila neyi yenu mwamweni kukala kwamweneñawu. Tuhanjekenu hayakutalilahu yisatu, yinakumwekesha chimunateli kuzatisha Bayibolu kulonda mwiluki ‘neyi mudi nachikuhwelelu’ hakwila mutoñojokeña hayuma yayiwahi.

8, 9. (a) Indi chihandilu chamumbanda wanfwila chadiña ñahi? (b) Mumbanda wanfwila watela watoñojokeleña nindidi?

⁸ Yesu wadiña nakutala mumbanda wanfwila kazweñi hatembeli muYerusalema. Chakutalilahu chanona mumbanda chinateli kutukwasha kulonda tutwalekuhu amuzañalu hela chakwila twakañanyaña kuzata hakumina ñovu yetu. (Tañenu Luka 21:1-4.) Toñojokenu hachihandilu chamumbanda wanfwila.  Womikileña chineñi chakufwisha nfumwindi, nikukala kwaleteña anlomboli jansakililu ‘adiña nakudyila ambanda anfwila’ chatela ayikwasheña antu amuchidiwu abulili hakukinka manuñu. (Luka 20:47) Wadiña kazweñi chikupu chakwila wahanini chawana hatembeli chamali ateleleli kuzatila ñamba mujiminiti jantesha hohu.

⁹ Toñojokenu chatiyiliyi mumbanda wanfwila kazweñi hampinji yeñilileñayi mutembeli iku nasendi tumali twanyanya tuyedi. Komana wadiña nakutoñojoka hatumali twanyanya twayileñayi nakuhana kwesekeja namali ahanineñayi hampinji yachidiña nfumwindi wamumi? Komana watiyili nsonyi hakumona antu adiña hambidi yindi anakuhana mali amavulu, nakujinooka neyi mwalala mulambu windi wadiña walema? Hela chakwila watoñojokeleña mwenimu, wazatili hakumina ñovu yindi hakukwasha kudifukula kwalala.

10. Indi Yesu wamwekesheli ñahi nindi mumbanda wanfwila wadiña walema kumesu aNzambi?

¹⁰ Yesu washimwini nindi Yehova wamulemesheli ona mumbanda wanfwila nichawaana chahaniniyi. Yesu wahosheli nindi, ‘mumbandiwu wanfwila kazweñi, wombililumu kubadika akwawu ejima [asamaheta].’ Chawaana chindi achibombeleli hamu namali ahanini amakwawu, ilaña Yesu wamuhamekeli ona mumbanda chamwekesheliyi nindi wamwakamini Yehova. Akwakuhemba chikasha chakuswekela mali chawaninuwu tumali twanyanya tuyedi elukili wanyi nawu Yehova watulemesheli chikupu nimuntu watuhanini. Hela chochu, Nzambi chamweniyi wuna mulambu dichuma chabadika kulema, kubadika chamweneñawu antu hela mumbanda wanfwila yomweni. Komana munateli kuzatisha iyi nsañu kulonda mudeseki mumoni neyi mudi nachikuhwelelu?

11. Yumanyi yitunateli kudizila kunsañu yahosha hadi mumbanda wanfwila kazweñi?

¹¹ Munateli kumwinka Yehova kwesekeja nachidi chihandilu chenu. Hamuloña wawushinakaji hela kukatakata, antu amakwawu hiyanateli kuzata nañovu mumudimu wakushimwina nsañu yayiwahuku. Komana anateli kutoñojoka nawu hiyatela kuhana maora azatañawuku? Hela neyi mwakatakataña wanyi, hadaha munateli kutoñojoka nenu mwazataña  hohu mpinji yantesha kwesekeja namaora ejima azatañawu antu jaNzambi chaaka nichaaka hakudifukula kudi yena. Hela chochu, twadizilaña kunsañu yaniwu mumbanda wanfwila kazweñi netu Yehova wamonaña nawa walemeshaña yuma yejima yitwamuzatilaña, sweje-e neyi tunakumuzatila hampinji yamakabi. Toñojokenu chimwadifukwileña kudi Yehova hayaaka yinahituhu. Komana hamaora imwamukalakeleleña Yehova chaaka chinamani akeñekeleña nawu mudihani chikupu? Neyi dimu, mwatela kwiluka nenu yuma yimwamuzatilili muyina ora yimu wayilemesheli chikupu. Kufwana mumbanda wanfwila kazweñi, neyi munakuzata hakumina ñovu yenu mumudimu waYehova, mwatela kukuhwelela chikupu nenu ‘mudi nachikuhwelelu.’

12-14. (a) Yitoñojokanyi yatama yadiña naElija? (b) Chafumini hankahi hakwila Elija yatachiki kutoñojoka muniyi njila?

¹² Kaprofwetu Elija wadiña washinshika kudi Yehova nawa wadiña nachikuhwelelu chakola. Ilaña mpinji yimu waneñeli chikupu chakwila wamulombeli Yehova nindi yamujahi, wahosheli nindi: ‘Jinankumi! Ichi dinu eyi Yehova fumishaku wumi wami.’ (1 Anya. 19:4) Antu abulahu dehi kuhita mukukala kwamuchidiwu, anateli kudiwula kulomba kwaElija nawu walombeleña mwenimu muloña ‘wachikela’ chatiyileñayi. (Yoba 6:3) Hela chochu, watiyili kutama. Ilukenu nenu Yehova wamukwashili, chatela yamuzuwili Elija hakulomba nindi yafwi.

¹³ Chafumini hankahi hakwila Elija yatachiki kulomba nindi yafwi? Henohu kanda yeli mwenimu, wazatili mudimu waletesheli aIsarela eluki nawu Yehova diyi Nzambi walala, nawa chafuminumu atuprofwetu twaBayali 450 ayijilumwini. (1 Anya. 18:37-40) Hadaha, Elija wakuhweleli nindi antu jaNzambi akufunta cheñi kukudifukula kwalala, ilaña hiyelili mwenimuku. Mwadi Yezebeli watama watemesheli kañanda kudi Elija nakumuleja nindi wakeñeleña kumujaha. Hakufwila kupulwisha wumi windi, Elija watemukilili kukabeta kambwela kaYuda mwisaña.—1 Anya. 19:2-4.

¹⁴ Chashakaminiyi nkawindi, Elija watachikili kutoñojoka hamudimu windi wawukaprofwetu wamweneñayi nindi wamukunkulwayi. Wamulejeli Yehova nindi: “Ami hinabadika ankakulula jamuku.” Wadina nakudimona nindi wamukunkulwayi neyi lunkuñu nawa neyi mafwaha awankakulula jindi afwa dehi. Dikwila nawu, wadesekeli yomweni kushindamena hayitoñojoka yindi nawa wadimweni nindi hadiña walema kumesu aYehova hela kudi muntu wudi wejimaku.

15. Indi Nzambi wamumwekesheli ñahi nindi wamukeña Elija?

¹⁵ Ilaña Nzambi Watwesha Yejima wamumweneña Elija munjila yambukaku. Nzambi watwalekeluhu kumumona Elija nindi walema nawa Yehova welili yuma yaleñeleli Elija yeluki nindi amukeña. Nzambi watemesheli kañelu kulonda yamukoleshi Elija. Yehova wamwinkeli cheñi Elija yakudya nimenji amwinkeli ñovu yakwenda lwendu lwamafuku 40, nakuya kukabeta kambwela kuMpidi yaHorebi. Kubombelahu, Nzambi wamukwashili Elija chachiwahi kulonda yaleki kutoñojoka mwaluwa nindi kwosi aIsarela amakwawu adiña ashinshika kudi Yehova. Sweje-e dinu, Nzambi wamwinkeli Elija mudimu wukwawu nawa wetejeli. Elija wahetelelumu nankashi chamukwashiluwu kudi Yehova nawa wafuntili nakutwalekahu namudimu windi wawukaprofwetu wazatiliyi nañovu.—1 Anya. 19:5-8, 15-19.

16. Jinjilanyi jikwawu mwayikwashilañayi Nzambi?

¹⁶ Nsañu yaElija yinateli kuyikwasha kulonda mwiluki neyi mudi nachikuhwelelu nawa yinateli kuyisañumuna kulonda mudimoneña nenu mwalema. Chatachi, toñojokenu jinjila mwayikwashilañayi Yehova. Kuduhu kambuñindi, hadaha eluda hela mukwaKristu wapama wayikwashili hampinji yimwadiña mukukaankila? (Ŋal. 6:2) Komana Bayibolu, nyikanda yetu yawakwaKristu nikupompa kwachipompelu kunayikwashi enu kulonda mwikali akola? Mpinji yikwawu yimwakatambwila wukwashi kuhitila muniji njila, mwatela kwanuka Kunafumi wukwashu nawa mwatela  kulomba nakumuhameka Yehova.—Mas. 121:1, 2.

17. Yumanyi yalemeshayi Yehova mudi ambuñindi?

¹⁷ Chamuchiyedi, ilukenu nenu munateli kudidimba nakutoñojoka nenu mwalema wanyi. Chuma chabadika kulema, chatumonañayi Nzambi. (Tañenu Aroma 14:4.) Yehova walemesha chitwamuzatilaña nichitwekala ashinshika kudi yena; hatumonaña kulema kuhitila munyidimu yitwazatañaku. Kufwana Elija, hadaha ninenu munamuzatili Yehova nyidimu yayivulu kubadika yimuneluki. Kudantu amakwawu muchipompelu anahetelumu chikupu, kubombelahu niantu ekala mwiluña mumwashimwinaña anatiyi chalala muloña wakudikita kwenu nañovu.

18. Mudimu wayinkayi Yehova wamwekeshaña chumanyi?

¹⁸ Nkumininaku, mwatela kumona mudimu wunayinkiyi Yehova nenu hiwunsahu wunakumwekesha nawu wudi nanenu. (Yere. 20:11) Kufwana Elija, munateli kuneña muloña mudimu wenu wunakumwekana neyi hiwunakusoña nyikabuku hela munakukañanya kushikija chikonkwanyi chakumuzatila Nzambi. Hela chochu, muchidi nakukooleka kwabadika kutukweti wonsu wetu makonu, kwakushimwina nsañu yayiwahi nikutiyakesha ijina daNzambi. Twalekenuhu kwikala ashinshika. Chochimu, ninenu anateli kuyileja mazu ekala muchishimu chaYesu akwila nawu: “Iñila mumuzañalu wankaka yeyi.”—Mat. 25:23.

19. Kukalanyi kwamweniyi nsoneki yaMasamu 102?

¹⁹ Nsoneki yaMasamu 102 wamweni yihuñu. Wamweni “kukala,” hamuloña wamakabi nichineñi chatiyileñayi nawa ‘jamukañili’ chakwila hadiñi nañovu yakuumika kukala kwinduku. (Mas. 102 tumazu twahewulu) Mazu ahosheliyi amwekeshaña nawu wamweni kañalaña, watiyileña wuudi nawa waneñeli chikupu. (Mas. 102:3, 4, 6, 11) Watoñojokeli nindi Yehova wakeñeleña kumunata.—Mas. 102:10.

20. Kulomba kunateli kukwasha ñahi muntu wunakulwisha nayitoñojoka yatama?

²⁰ Hela chochu, ñimbi yamasamu watwalekeluhu nakumushimeka Yehova. (Tañenu Masamu 102:19-21.) Neyi chitunamoni muMasamu 102, niantu akweti chikuhwelelu ayandaña nawa chayikalilaña kutoñojoka hayuma yacheñi. Ñimbi yamasamu watiyili neyi kwiji “kajila kashakama kanka waku hewulu detala,” neyi kwiji chihandilu chindi chejima chadiña chamakabi hohu. (Mas. 102:7) Neyi mutiya neyi chatiyileñayi, lombenu kudi Yehova neyi chalombeliyi ñimbi yamasamu. Kulomba kwamuntu wunamoni kukala, dikwila nawu kulomba kwenu, kunateli kuyikwasha hampinji yimunakulwisha nayitoñojoka yatama. Yehova wayikana nindi “Natali mesu kwakulombawu ampwampu, Hanasekeshi mwanalombeluwuku.”(Mas. 102:17) Kuhwelelenu mwakanayi.

21. Indi muntu wunakuyanda nayitoñojoka yatama nateli kutachika ñahi kutoñojoka hayuma yayiwahi?

²¹ Mukanda waMasamu 102 wamwekeshaña cheñi chimunateli kwikala nayitoñojoka yayiwahi. Ñimbi yamasamu watachikili kutoñojoka hayuma yayiwahi kuhitila mukushinshika hawubwambu windi naYehova. (Mas. 102:12, 27) Kwiluka nindi Yehova wakwashaña antu Jindi mpinji yejima yamonañawu kweseka kwamukundejeli. Dichi neyi yitoñojoka yatama yinakuyikañesha kuzata chikupu mumudimu waNzambi hampinji yantesha, lombelenuhu. Mulombenu Nzambi yatiyi kulomba kwenu bayi neyi mufumi muyihuñu yimunakumona hohuku, ilaña ‘kulonda antu ashimuni ijina daYehova.’—Mas. 102:20, 21.

22. Tunateli kumulemesha ñahi Yehova wonsu wetu?

²² Eñañi, tunateli kuzatisha Bayibolu kulonda tudeseki etu aweni neyi tudi nachikuhwelelu nikwiluka netu twalema kudi Yehova. Kuhosha hohu chalala, mukanu kaayi, hitunateli kuleka chikupu kutoñojoka hayuma yatama hela kuneñaku. Hela chochu, wonsu wetu tunateli kumulemesha Yehova nikuheta wamwinu kuhitila mukwikala ashinshika hampinji yitunakuumika mumudimu windi.—Mat. 24:13.