1, 2. Indi njila mwatutalilañayi Yehova yambuka ñahi namakamela akwiluka nachu nsañu ashañawu munyikwakwa?

 MUMATUÑA amavulu, akwanshimbi asha makamela munyikwakwa kulonda amoneña chinakwenda nyotoka nikukwata nyevulu yamaposu anakumwekana. Neyi ñendeshi wamotoka yahuma muntu nawa yatemuka, akwanshimbi akuzatisha nyevulu yakwatawu nakamela kulonda amukwati ñendeshi wunatemuki. Chakadi nikujina, hamuloña wakuzatisha awa makamela mumaluña ejima, chinakuyikalila antu kuleya nyiloña yinakukoñawu.

² Iyi njila yakuzatisha makamela akwiluka nachu nsañu yinawanini mumaluña amavulu, yinakutwanukisha chumanyi hadi Tata yetu Yehova wukweti kukeña? Bayibolu yatulejaña nawu mesu indi “adi kwejima.” (Yish. 15:3) Hela chochu, komana chinatalishi mukwila nawu wafwilaña hohu kuwana yiluwa mudetu mpinji yejima? Komana Nzambi watutalaña kulonda yatukanjikijeña nindi tulondeleña nshimbi jindi nikutubabesha neyi tuvulumuna? (Yere. 16:17; Heb. 4:13) Inehi. Yehova watutalaña muloña watukeña wejima wetu nawa wakeñaña nindi twikala nachihandilu chachiwahi.—1 Pet. 3:12.

3. Njilanyi jitanu mwatwakamenañayi Nzambi chiwahi jitukuhanjekahu?

³ Yumanyi yikutuleñela twiluki netu Nzambi watutalaña muloña  watukeña? Tuhanjekenu hanjila jitanu mwatwakamenañayi Nzambi. Welaña mwenimu (1) kuhitila mukutubabesha neyi tumwekesha yililu yatama, (2) kuhitila mukutufumba neyi hitukuya munjila yaluwa, (3) kuhitila mukutulombola nayishina yekela Mwizu dindi, (4) kuhitila mukutukwasha neyi tunakumona kweseka kwashiyashana, nawa (5) kuhitila mukutusomwena neyi yamona nindi tunakwila yuma yayiwahi.

4. Muloñadi Yehova chamusoñamishililiyi Kena nindi nshidi ‘yafukamini kuchisu’?

⁴ Tusambilenu kushinshika chatwakamenañayi Nzambi neyi hitukutachika kwikala nayililu yatama. (1 Kushi. 28:9) Hakwila nawu tuhameki iyi njila mwatwakamenañayi Nzambi, tutoñojokenu hachuma cheliliyi naKena “wazuwili nankashi” chelili yabuli kutambwila wuselewa waNzambi. (Tañenu Kutachika 4:3-7.) Yehova wamulejeli Kena ‘kwila chachiwahi.’ Neyi yakañanya kwila mwamulejeluwu, Yehova wamusoñamishili nindi nshidi “yinafukami kuchisu.” Nzambi wamwihwili nindi: ‘Komana wukutwesha kwikala mwanta wayu?’ Wakeñeleña Kena yabalumuki kulonda ‘yatambwili wuselewa waNzambi.’ Neyi twikala nawuselewa waNzambi wukutukwasha kutwalekahu kwikala nawubwambu wawuwahi naNzambi.

5. Munjilanyi mwatusoñamishilañayi Yehova hayililu yetu yatama yitunateli kwikala nayu?

⁵ Indi etu makonu? Mesu aYehova ahanukaña munyichima yetu; dichi hitunateli kumusweka yitoñojoka niyuma yitwafwilaña yidi munyichima yetuku. Tata yetu wukweti kukeña wakeñaña tulondeleña njila jakuloña; hela chochu, hatukakejaña kuhimpa njila yitunatonduhuku. Kuhitila Mwizu dindi Bayibolu, watusoñamisha neyi hitukukeña kuya munjila yacheñi. Munjilanyi? Neyi tunakutaña Bayibolu hefuku hefuku, twawanaña nsañu yatukwashaña kushinda yaaku niyililu yatama. Kubombelahu, nyikanda yetu yawakwaKristu yinateli kushimuna hakukala kunatukabishi hampinji yayilehi nikutuleja chitunateli kukushinda. Cheñi hakupompa kwetu kwawakwaKristu, wejima wetu twatambwilaña kufumba hampinji yatelela.

6, 7. (a) Muloñadi chitukuhoshela netu nsañu yasonekelañawu antu ejima hichinjikijilu chamwekeshaña nawu Nzambi wayakamenaña? (b) Munateli kuhetelamu ñahi mukwakamena kwaNzambi?

⁶ Kusoñamisha kwejimiku kwamwekeshaña chikupu nawu Yehova watwakamenaña hamuntu hamuntu. Mwamweni, mazu ekala muBayibolu anashimbuli chikupu, nyikanda yasonekañawu mukuloñesha kwaNzambi ayisonekelaña antu amavulu nankashi, nawa kufumba kutwatambwilaña hakupompa kwekala kwawantu ejima amuchipompelu. Hela chochu, muyuma yejimiyi Yehova wayilejaña kusha muchima Kwizu dindi kulonda muhimpi yililu yenu. Dichi yuma yejimiyi yinakumwekesha nawu Yehova wayakamenaña chikupu.

⁷ Hakwila nawu tuheteli mukusoñamisha kwaNzambi, twatela kusambila kwiluka netu watwakamenaña chikupu. Kuhiñahu twatela kulondela chikupu Izu dindi nakufwila kuleka yitoñojoka yidi yejima yamuneñeshaña Nzambi. (Tañenu Isaya 55:6, 7.) Neyi tutiyilila kukusoñamisha kwatwinkañawu, tukudamwina kuyuma yomisha mbaña. Indi neyi chakwila tutwalekahu nayililu yatama? Wukwashwinyi wunateli kutwinkayi Tata yetu wukweti kukeña?

8, 9. Indi kufumba kwatufumbañayi Yehova kuhitila mudi ambuñindi kwamwekeshaña ñahi nawu watwakamenaña chikupu? Shimunenu chakutalilahu.

⁸ Tunateli kwiteja netu Yehova watwakamenaña neyi atufumba. (Tañenu Aheberu 12:5, 6.) Chakadi nikujina, hitwatiyaña kuwaha neyi atufumba hela kutubabeshaku. (Heb. 12:11) Hela chochu, toñojokenu hayuma yatela kushinshikahu muntu wunenzi nakutufumba. Watela kwiluka yuma yitunakwila yinateli kutamisha wubwambu wetu naYehova Nzambi, watela kututoñojokelaku chitunakutiya nakukala kutukweti nawa watela kuzatisha mpinji yindi  niñovu kulonda yatuleji Bayibolu chitunateli kutukwasha tuhimpi yililu yetu yinakumuneñesha Nzambi. Twalemeshaña iku kufumba muloña tweluka netu kwafumaña kudi Yehova.

⁹ Tushinshikenu hachakutalilahu chimu chinakumwekesha antu chinateli kumwimbujolawu Nzambi hakufumba. Henohu kanda yadizi chalala, mana kwetu wumu watalileña nyevulu yanzekesi mpinji yejima, ilaña washindili ichi chaaku. Hela chochu, ichi chaaku chindi chakunyaka wachidiña nachu neyi kwiji nchawa jinakunoña chovu-chovu. Chalandiliyi nshiña yayiha, watachikili cheñi chaaku chindi chakutala nyevulu yanzekesi. (Yak. 1:14, 15) Watalileña nyevulu yanzekesi hanshiña kuhitila mukusandujola hamawebu sayiti ahaIntaneti. Ifuku dimu hadiña nakushimwinawu kuhitila mukuzatisha nshiña, wamwinkeli eluda nshiña kulonda yataliluhu makeyala. Eluda chatachikiliyi kuzatisha nshiña, wamweni mawebu sayiti amwekeshaña nyevulu yanzekesi hanshiña. Chumichi chaleñeleli iwu mana kwetu wadiña muniku kukala amukoleshi kutwalekahu nakumukalakela Nzambi. Amufumbili hampinji yatelela nawa iku kufumba kwamukwashili chikupu, nkumininaku washindili chaaku chindi chatama. Tunateli kumuhameka chikupu Tata yetu wamwiwulu watwakamenaña nawa wamonaña nshidi jetu jaswama nikutufumba henohu kanda tuheñuki chikupu munjila.

10, 11. (a) Munjilanyi mumunateli kwitejela Nzambi yayilomboleña? (b) Chumanyi chamwekeneni chisaka chimu chinakumwekesha chichawahila kulondela wunlomboli waYehova?

¹⁰ Ñimbi yamasamu wamwimbilili Yehova nindi: ‘Wanlombolaña nikunleja.’ (Mas. 73:24) Mpinji yejima yitunakukeña wunlomboli, twatela ‘kumwiteja’ Yehova kuhitila mukuzatisha Izu dindi kulonda twiluki chahoshayi hanoyu nsañu. Kuzatisha yishina yamuBayibolu hikwatuheteshaña hohu kuspirituku, ilaña mpinji jikwawu kwatukwashaña chitwatela kwakamena yuma yakumujimba.—Yish. 3:6.

¹¹ Chakutalilahu chinakuhosha hadi ndimi wumu wafweteleleña iha mwiluña damapidi daMasbate muPhilippines, chinakumwekesha Yehova chalombolañayi antu amakwawu. Yena niñodindi azataña wupayiniya wampinji yejima nawa akweti chisaka cheneni. Ifuku dimu, ahayamini chayilejeluwu kudi mwiniiluña nindi afumi heluña dindi. Chumanyi chaleñeleli? Ayitwambililili nawu hiyayipwapoki. Hela chakwila mana kwetu helukili wanyi kwatela kuwanayi iluña kwakushakama nachisaka chindi, wahosheli nindi “Yehova wukutwinka. Mpinji yejima  watwinkaña yuma yitwakaankilaña hela yuma yinakali chamuchidinyi.” Yuma yakuhweleleliyi mana kwetu yazatikili. Chimwahitili mafuku, ichi chisaka achilejeli nawu chikutwalekahu kushakama hanidi iluña. Chumanyi chaletesheli? Mwiniiluña wamweni nindi hela chakwila ichi chisaka chawaYinsahu achitwambilili, chatwalekeluhu kumwekesha kalemesha nikuwunda hamuloña wakuzatisha yishina yamuBayibolu. Chumichi chamutiyishili kuwaha mwiniiluña chakwila wayilejeli nindi atwalekuhu kushakama nawa wayinuñililuku iluña dikwawu dakudimamu. (Tañenu 1 Petulu 2:12.) Chakadi nikujina, Yehova watulombolaña kuhitila Mwizu dindi kulonda ditukwashi kuumika kukala kwamuchihandilu.

12, 13. Yumanyi yinateli kuleñela antu amakwawu ajinokeña neyi chakwila Nzambi wamonaña makabi ayihitañamu hela nehi?

¹² Hela chochu, mpinji jikwawu kweseka kutwamonaña kwatwalekañahu. Hadaha tunakuyekela nakankati, antaña jetu anakutudimbulula hela tunakumona makabi. Mpinji yikwawu twabobolaña nawamana kwetu hela ahela amuchipompelu hamuloña wakushiyashana kwayitachi.

¹³ Chakutalilahu, munateli kuhila namazu anahoshiyi mana kwenu imunakutoñojoka nenu atama. Nawa munateli kuhosha nenu ‘chumichi hichatela kuzatika mukuloñesha kwaNzambuku.’ Ilaña mana kwetu wunayihilishi anamwinki nyidimu yayivulu muchipompelu nawa antu amakwawu anakuhosha nawu wekala chiwahi. Munateli kudihula nenu, ‘Muloñadi? Komana Yehova hamonañaku? Komana kwosi chuma chatela kwilayi?’—Mas. 13:1, 2; Hab. 1:2, 3.

14. Chumanyi chikuleñela Nzambi yabuli kutukwasha kulonda kukala kutukweti kumani?

¹⁴ Kudi yuma yikuleñela Yehova yabuli kuyikwasha nakukala kumukweti. Chakutalilahu, munateli kutoñojoka nenu mukwenu diyi wunaluwañeshi, ilaña Nzambi nateli kumona yuma munjila yambukaku. Kwesekeja nachamonañayi Nzambi, hadaha yenu munaluwi chikupu. Mazu imunakutoñojoka nenu atama, hadaha hikufumba kwakuwahi kumwatela kutoñojokahu chikupu. Munsañu yahosha hachihandilu chindi, Mana Kwetu Karl Klein wazatiluhu Mwizanvu Dalombolaña wahosheli hampinji yimu yamufumbiluwu chakadi kumuhita mumbadi kudi Mana Kwetu J. F. Rutherford. Chihahitili mpinji, Mana Kwetu Rutherford wamwimushili Mana Kwetu Klein namuzañalu chikupu nindi, “Wudi ñahi Karl?” Ilaña Mana Kwetu Klein waakwili nakaneñawudi muloña wachidiña wahila hakufumba kwamufumbiluwu. Mana Kwetu Rutherford chamweniyi nindi Mana Kwetu Klein wuchidi nefunda kumuchima, wamusoñamishili kulonda yabuli kufwa mumuhetu waDiyabolu. Chimwahitili mpinji, Mana Kwetu Klein wasonekeli nindi: “Neyi tumuhembela mana kwetu nkunyi hamuloña wakwila natufumbi, dikwila nawu tukufwa mumuhetu waDiyabolu.” *

15. Chumanyi chimwatela kwiluka chikuyikwasha kuwundisha muchima hampinji yimunakutalila Yehova kulonda yayikwashi nakukala kumukweti?

¹⁵ Cheñi, chinateli kutukalila kuwundisha muchima neyi kukala kutunakuhitamu kunakutwalekahu. Tunateli kuumika ñahi? Fwikijenu munakwendesha motoka mumukwakwa mudi nyotoka yayivulu nawa munalabi. Muneluki wanyi mpinji yimukushika kumunakuya. Neyi muhila nawa mufuukulahu kuhitila njila yacheñi, munateli kujimbala. Munateli kuumba mpinji yeneni nankashi hakwila mushiki kumunakuya kubadika mpinji yimunateli kuumba neyi mutwalekahu munoyu njila. Chochimu, neyi mukakela kunjila jasonekawu Mwizu daNzambi, mukuhita kwamafuku mwakashika kumunakuya.

16. Chumanyi chikwawu chinateli kuleñela Yehova yafuukuluhu kubula kutukwasha nakukala kutunakumona?

¹⁶ Yehova nateli kufuukulahu kubula kutukwasha  nakukala kutunakumona muloña nakukeña tudiziluku chikupu. (Tañenu 1 Petulu 5:6-10.) Nzambi hakojejaña makabuku. (Yak. 1:13) “Mukwankunyi nenu Diyabolu,” diyi wunakukojeja makabi amavulu nankashi. Hela chochu, Nzambi nateli kwiteja makabi asweja kutumwekena kulonda atukwashi kuyilaku hambidi munyidimu yitwamuzatilaña. Wamonaña makabi itwahitañamu nawa ‘chineli watwakamenaña,’ wukutwiteja kuhita mumakabi ‘hakapinji kantesha’ hohu. Komana mwahamekaña Yehova chayakamenañayi neyi munakuhita mumakabi, nakukuhwelela nenu wukuyibuzila njila yikuyikwasha?—2 Kor. 4:7-9.

17. Anyi ashinshikañayi Yehova, nawa muloñadi?

¹⁷ Chakukumishaku, kudi chuma chamuleñelaña Nzambi kushinshika hachihandilu chetu. Wamulejeli Mwanta Asa kuhitila mudi Hanani mukwakumona nindi: “Mesu aYehova adi nakutalatala mwahita iseki dejima, kulonda akwashuku nañovu adi nanyichima yalala, yindi chikupu.” (2 Kushi. 16:9) Hela chakwila Nzambi hamweni muchima walala mudi Asaku, ‘wakayimwekeshela ñovu yindi’ neyi mutwalekahu kwila yuma yaloña.

18. Neyi himukutoñojoka nenu kwosi wayihamekaña hanyidimu yayiwahi yimwakalakalaña, yumanyi yimwatela kwanuka hadi Yehova? (Talenu mwevulu wakutachikilahu.)

¹⁸ Nzambi wakeñaña nindi ‘tukeñakeñeña yayiwahi,’ ‘tukeñi yayiwahi’ ‘nikwila yayiwahi’ kulonda ‘yatumwekesheleña wuselewa.’ (Amosa 5:14, 15; 1 Pet. 3:11, 12) Yehova wamonaña antu aloña, nawa wayikiswilaña. (Mas. 34:15) Chakutalilahu, toñojokenu hadi ankoñu ayedi aHeberu Shifwira niPuwa. Hampinji yadiñawu aIsarela muwuduñu muEjipitu, awa ambanda ayedi amutiyileña Nzambi woma chikupu kubadika Fwaro wayilejeli nindi ajaheña anyana awamayala awaHeberu ejima hanyima yakuvwalika. Chakadi nikujina, hamuloña wakumutiya Nzambi woma, chinleji chawu chayileñeleli apulwishi mawumi awanyana awamayala. Chimwahitili mpinji, Shifwira niPuwa ayinkeli anyana awu aweni. (Kwid. 1:15-17, 20, 21) Mesu aYehova amonaña kwejima, amweni yililu yawu yayiwahi. Mpinji jikwawu, tunateli kutoñojoka netu kwosi muntu niwumu wamonaña yuma yayiwahi yitwelañaku. Ilaña Yehova wamonaña. Wamonaña yuma yayiwahi yejima yitwakoñaña nawa wamba katufweta.—Mat. 6:4, 6; 1 Tim. 5:25; Heb. 6:10.

19. Indi muhela wumu welukili ñahi nindi Yehova wamonaña yuma yayiwahi yitwelaña?

¹⁹ Muhela wumu muAustria welukili nindi Nzambi wamweneña nyidimu yindi yadikitileñayi. Chineli wafuma kuHungary, watambwili keyala yamuntu wahoshaña idimi dachiHungarian kulonda yakamwendeli nakumushimwina. Hashimbwili wanyi, wamwendeleli iwu muntu, ilaña kwosi muntu niwumu wadiña hetala. Wafuntiluku cheñi mapampa kakavulu. Mpinji yikwawu, welukileña nindi hetala hadi muntu, ilaña chadondomweneneñayi kwosi wakwileña. Washileña nyikanda yakutañamu, kumusonekela nyikanda, keyala yindi ninsañu yikwawu. Hanyima yakufuntilaku hadi chaaka chimu nitukweji tutanu nakamu, wamuwanini ona muntu. Muhela amwimushili namuzañalu kudi ona mumbanda nawa wamulejeli nindi: “Iñilenu mwani. Natañileña nyikanda yejima yimwanleteleleña nawa nadiña nakuyitalila.” Hamuloña wakwila iwu mwiniitala adiña nakumuuka, hatwesheleña kudimona nawantuku. Atachikili kumudizisha Bayibolu. Eñañi, Nzambi wamusomweneni iwu muhela hanyidimu yadikitileñayi.

20. Mwatiyaña ñahi hakwiluka nenu Yehova wayakamenaña?

²⁰ Yehova wamonaña yuma yejima yimwelaña nawa wamba kayisomwena. Neyi mwiluka nenu mesu aNzambi adi hadi enu, bayi mutoñojoka nenu wafwilaña kuwana nyiloña hela yiluwa yimunakukoña neyi chelaña makamela awantuku. Nawa twalekenuhu nakukundama kudi Nzambi wayakamenaña chikupu.