NSONA jahosha hayuma yashiyashana yaleñeleleña antu atabuleña mahina awu. Makonu antu anateli kuhayama hakumona antu anakutabula mahina awu, ilaña kudi aYudeya chamwekesheleña chikupu nawu muntu naholokeli mukukala kweneni, naneñi, nadizozi, nahili hela natiyi wushona.

Chakutalilahu, Rubeni “watabwili mahinindi” chelukiliyi nindi kafuta kakwatiliyi kakupulwishilamu mana kwindi Yosefu hikazatikiluku muloña Yosefu amulandishili muwuduñu. Tata yawu Yakoba, “watabwili mahinindi” hampinji yafwikijiliyi nindi Yosefu anamudyi kudi kanyama wamwisaña. (Kutach. 37:18-35) Yoba “watabwili mahinindi” chamulejeluwu nawu anyanindi ejima anayijahi. (Yoba 1:18-20) Ntemesha wadiña ‘namahinindi akutabula’ wenjili kudi Kapristu Muneni Eli nakumuleja nindi aIsarela anayishindi kunjita nawa anyana kaEli ayedi awamayala anayijahi nichimbañu chachitiyañenu anachisendi. (1 Sam. 4:12-17) Yosiya chamutañililuwu mazu adiña mumukanda waNshimbi nawa yeluka niyiluwa yakoñeleña antu jindi, “watabwili mahinindi.”—2 Anya. 22:8-13.

Hampinji yamukabishileñawu Yesu, Kapristu Muneni Kayafwasi “watabwili mahindi ahanzi” chatiyiliyi mazu ahosheliyi Yesu nakutoñojoka nindi namutuki Nzambi. (Mat. 26:59-66) Kwesekeja nanshimbi jakwitiya jatuñiluwu kudi arabi, jahosheli nawu neyi muntu yatiya ijina dajila anakudisawula, owu muntu wateleleli kutabula mahinindi. Hanyima yakwila tembeli yamuYerusalema anayijilumuni, arabi atuñili cheñi lushimbi lukwawu lwahosheleña nawu “makonu, neyi muntu yatiya Ijina Dajila anakudisawula watela kutabula mahinindi neyi nehi, mahinindi akayitabola mutuyikunku-yikunku.”

Hela chochu, kutabula mahina kwadiña kwalema wanyi kumesu aNzambi chiña neyi owu muntu naneñi chikupu. Dichi, Yehova walejeli antu jindi ‘kutabula nyichima yawu nakufunta kudi yena, bayi mahina awuku.’—Yoweli 2:13.