Twatela ‘Kwakula Ñahi Antu Ejima’?
“Kuhosha kwenu kwikali naluwi, kwakutoweja namuñwa, . . . kulonda mwiluki mwakwakwila antu ejima.”—KOL. 4:6.
1, 2. (a) Shimunenu chakutalilahu chinakumwekesha kulema kwakwihula malwihu amawahi. (Talenu mwevulu wakutachikilahu.) (b) Muloñadi chitunateli kubula kutiyila woma neyi atwihula hansañu yakala?
HAYAAKA yantesha yinahituhu, muhela mukwaKristu wahanjekeleña nanfumwindi wabula kwitiya hansañu yamuBayibolu. Kumpinji yakunyima, wadiña membala wamuchechi yaKristendomu. Hampinji yahanjekeleñawu, nfumwindi wahosheli nindi, wakuhweleleli mudi Anzambi Asatu. Chelukiliyi nindi, hadaha nfumwindi heluka mwatalisha ntañishilu Yawanzambi Asatuku, wamwihwili nindi: “Komana mwakuhwelela nenu Nzambi diyi Nzambi, Yesu hiNzambi, nawa spiritu yajila hiNzambi, ilaña kwekala Nzambi wumu hohu bayi aNzambi asatuku?” Nfumwindi wahayamini nawa wahosheli nindi, “Inehi, hinakuhwelela mwenimuku!” Kufumahu atachikili kuhanjeka chikupu chekala Nzambi walala.
2 Ichi chakutalilahu chinakumwekesha kulema kwakwihula malwihu amawahi mukubabala. Chinakumwekesha cheñi chikuma chalema: Hitwatela kutiya woma neyi atwihula hansañu yakala yidi neyi Anzambi Asatu, kesi kahelu hela neyi ajinooka nawu hikwekala Nleñuku. Neyi tumushindamena Yehova nikuzatisha yuma yatudizishañayi, tunateli kwakula mujila yayiwahi, yinateli kushika hanyichima yawantu anakututiyilila. (Kol. 4:6) Ichi tuhanjekenu hayuma yelañawu akwakushimwina akuluka yitembi hakuhanjeka haniyi nsañu. Tukuhanjeka chitunateli (1) kwihula malwihu hakwila twiluki yuma yinakutoñojoka muntu wunakututiyilila, (2) kuhanjeka hayuma yahosha Nsona, (3) nikuzatisha yakutalilahu kulonda chikuma chitiyakani.
IHULENUÑA MALWIHU HAKWILA MWILUKI YUMA YINAKUTOÑOJOKA ANTIYILILI JENU
3, 4. Muloñadi kwihula malwihu chikwalemena kulonda twiluki yuma yakuhwelelayi muntu? Shimunenu chakutalilahu.
3 Kwihula malwihu kunateli kutukwasha kwiluka yuma yakuhwelelayi muntu. Kwalemenadi? Yishimu 18:13, yahosha nawu, “Muntu welaña wuchidi kanda atiyi chachiwahi hakwakula, chamuleñelaña niwusupi ninsonyi.” Mwamweni, henohu kanda tutachiki kuhanjeka chahosha Bayibolu hansañu yidi yejima, chikuwaha neyi twiluka yuma yakuhwelelayi muntu wunakutiyilila. Mukunkulwayi tukumanisha kwampinji nakutaadika hansañu yabula nikukuhwelelayi muntu.—1 Kor. 9:26.
4 Twili netu munakuhanjeka hansañu yakesi kahelu namuntu. Bayi neyi antu ejima akuhwelela nawu kesi kahelu hiluña dalala mwayandishilañawu antuku. Antu amavulu akuhwelela nawu hikwambuka hohu naNzambi. Dichi tunateli kuhosha netu: “Chineli antu atoñojokaña mwashiyashana hansañu yakesi kahelu, inakukeña niluki indenu mwatoñojokaña ñahi?” Hanyima yakutiya chikwakulayi muntu, tunateli kumukwasha chachiwahi kulonda yeluki Bayibolu chiyahosha hanoyu nsañu.
5. Indi kwihula malwihu kunateli kutukwasha ñahi kwiluka chuma chaleñela muntu yakuhweleli mwenomu?
5 Kwihula malwihu mukubabala kunateli cheñi kutukwasha twiluki chuma chaleñela muntu yakuhweleli munoyu yuma. Chakutalilahu, indi neyi tuwana muntu mumudimu wakushimwina wunakuhosha nindi hakuhwelela mudi Nzambuku? Tunateli kukunkulula netu yitoñojoka yamukaayi diyamuluwañesha, chidi neyi ntañishilu yakwila nawu yuma yadileñeli yayeni. (Mas. 10:4) Hela chochu, antu amakwawu aleka kumukuhwelela Nzambi muloña wamakabi asweja amonañawu nawa iyahitamu. Chinateli kuyikalila kukuhwelela nawu Nleñi wekala kwoku hamuloña wamakabi amonañawu. Dichi, neyi mwiniitala yajinooka nindi Nzambi kwekala kwosi, tunateli kwihula netu, “Komana dichimwatoñojokaña mpinji yejima?” Neyi yakaana, tunateli kumwihula neyi kudi chuma chinakumuleñela yajinookeña nindi hikwekala Nzambuku. Chikwakulayi dichikuleñela twiluki chitwatela kumukwasha chachiwahi kulonda yamwiluki Nzambi.—Tañenu Yishimu 20:5.
6. Chumanyi chitwatela kwila hanyima yakwihula lwihu?
6 Chitwamwihula muntu lwihu, twatela kutiyilila chikupu chikwakulayi nikwiteja mwatoñojokañayi. Chakutalilahu, muntu nateli kushimuna nindi maposu diwu amuleñelaña yajinookeña nindi hikwekala Nleñi wukweti kukeñaku. Henohu kanda tumuleji wunsahu wamwekeshaña nawu Nzambi wekala kwoku, chikuwaha neyi tumukundeja nikumuleja netu chatama wanyi kwiluka muloña wutwakabakenaña. (Hab. 1:2, 3) Neyi tudiwunjika nikuhanjeka nindi munjila yayiwahi tukumuleñela yakeñi kudizilahu yuma yikwawu. *
HANJEKENUÑA HAYUMA YAHOSHA NSONA
Chumanyi chinateli kutukwasha kuzata chiwahi mumudimu wakushimwina? (Talenu parakalafu 7)
7. Kushimwina chiwahi kwashindamena hachumanyi?
7 Tushinshikenu chitwatela kuhanjeka hachahosha Nsona. Bayibolu dichitwa chacheni chitwazatishaña mumudimu wetu wakushimwina. Chatukwashaña kwikala “awanini chikupu, awahili nyidimu yayiwahi yejima.” (2 Tim. 3:16, 17) Kushimwina chachiwahi hikwashindamena hakutaña nsona yayivuluku, ilaña kwashindamena hakutaña nsona nikuyilumbulula chiwahi. (Tañenu Yililu 17:2, 3.) Chakutalilahu, shinshikenu hayakutalilahu yisatu yinalondeluhu.
8, 9. (a) Njilanyi yimu mutunateli kuhanjekela namuntu wakuhwelela nindi Yesu wesekana naNzambi? (b) Njilanyi jikwawu jimwamona nenu jayikwashaña hakuhanjeka haniyi nsañu?
8 Chakutalilahu 1: Mumudimu wetu wakushimwina, tunateli kuwana muntu wakuhwelela nindi Yesu wesekana naNzambi. Nsonanyi jitunateli kutaña hakuhanjeka haniyi nsañu? Tunateli kumuleja muntu yatañi Yowanu 6:38, hamutenawu Yesu nakuhosha nindi: “Ichi chinasuluki mwiwulu hinalondi kwila muchima wamami awenuku, nalondi kwila muchima wayena wantemesheli.” Hanyima yakuhanjeka haniyi vasi, tunateli kumwihula muntu netu: “Neyi Yesu hiNzambi, hinyi wamutemesheli kufuma mwiwulu nakwinza hamaseki? Komana Wamutemesheli hamubadika Yesuku? Muloña, muntu atemeshañawu habadikaña muntu wunamutemeshuku.”
9 Munjila yoyimu, tunateli kutaña Afwilipi 2:9, halumbulwiliyi kapostolu Pawulu yuma yakoñeliyi Nzambi chelili Yesu nafwi dehi nichamusañwiluwu. Iyi vasi yahosha nawu: “Nzambi nawa namutuumbakeshi [Yesu] chakubadika, namwinki ijina dabadika majina ejima.” Hakwila tumukwashi muntu yeluki chahosha iyi nsona, tunateli kumwihula netu: “Neyi chakwila Yesu wadiña wesekana naNzambi henohu kanda yafwi nawa Nzambi wamutumbakesheli nakumwinka ijina dabadika, komana Yesu hadi kumubadika Nzambuku? Hanu dinu muntu nateli kumubadika ñahi Nzambi?” Neyi tuhanjeka muniyi njila, tukumuleñela yekali nampwila yakudizilahu yuma yikwawu neyi chakwila walemesha Izu daNzambi nawa wukweti muchima wakudiza.—Yil. 17:11.
10. (a) Tunateli kuhanjeka ñahi namuntu wakuhwelela mukesi kahelu? (b) Njilanyi jikwawu jimwamona nenu jayikwashaña kuhanjeka hakesi kahelu?
10 Chakutalilahu 2: Mwiniitala wayaña munsakililu chamukalilaña kwiteja nindi antu atama hiyakayiyandisha mukesi kahelu haya nyakaku. Hadaha chaleñela yakuhweleli mukesi kahelu muloña wakeñaña nindi antu atama akayibabeshi hayiluwa yakoñañawu. Tunateli kuhanjeka ñahi namuntu watoñojokaña muniyi njila? Chatachi, tunateli kumuleja chikupu netu antu atama akayibabesha. (2 Tesa. 1:9) Kuhiñahu, tukumuleja kutaña mukanda waKutachika 2:16, 17, wahosha nawu wuloku wanshidi hikufwa. Tunateli kumulumbulwila netu hamuloña wanshidi yakoñeliyi, Adama wakojejeli antu ejima kuvwalika akwanshidi. (Rom. 5:12) Ilaña tunateli kumuleja netu Nzambi hashimwini nindi wakababesha antu mukesi kaheluku. Tunateli cheñi kumwihula netu, “Neyi chakwila Adama naEvu adi kuyibabesha haya nyaka mukesi kahelu, komana Nzambi hadi kuyisoñamishaku?” Kuhiñahu, tunateli kutaña Kutachika 3:19, hashimunawu chayishiñiluwu hanyima yakwila anavulumuni dehi ilaña hiyatenahu kesi kaheluku. Dichi, Adama amulejeli nawu wakafunta cheñi kulunkuñu. Tunateli kumwihula netu, “Komana chadi kwikala chuma chachiwahi kumuleja Adama nawu wakafunta kulunkuñu henohu wakaya mukesi kahelu?” Neyi muntu wudi namuchima wakukeña kudiza, lwihu lwamuchidiwu lukumukwasha kutoñojoka nankashi haniyi nsañu.
11. (a) Tunateli kuhanjeka ñahi namuntu wakuhwelela nindi antu ejima amawahi ayaña mwiwulu? (b) Njilanyi jikwawu jimwamona nenu jayikwashaña neyi himukuhanjeka hansañu yakuya mwiwulu?
11 Chakutalilahu 3: Mumudimu wetu wakushimwina, tunateli kuwana muntu wakuhwelela nindi antu ejima amawahi ayaña mwiwulu. Kukuhwelela muniyi njila kwafumaña hachatoñojokañayi mwiniitala nindi dimwatalisha Bayibolu. Chakutalilahu, twili netu munakuhanjeka nindi hamukanda waChimwekeshu 21:4. (Tañenu.) Muntu nateli kutoñojoka nindi tukekala naniyi nkisu yashimunawu haniyi vasi muwumi wamwiwulu. Tunateli kuhanjeka nindi ñahi? Chatela tutañi nsona yikwawu yikushimuna chikuma, tunateli kuhanjeka hansañu yidi muyoyeniyi nsona. Yahosha nawu “hikwakekala nawa cheñi kufwaku.” Tunateli kumwihula muntu neyi chakwila neteji nindi hakwila chuma chikabuli kwikalaku cheñi dikwila nawu chadiñi kwoku. Hadaha wukwakula nindi eña. Kuhiñahu tunateli kumuleja netu mwiwulu himwekala kufwaku; hanu hamaseki hohu dihu hafwañawu antu. Chakadi nikujina, nkisu yakumbidi yashimunawu haChimwekeshu 21:4 yakekala hanu hamaseki.—Mas. 37:29.
ZATISHENU YAKUTALILAHU KULONDA CHIKUMA CHITIYAKANI
12. Muloñadi Yesu chazatishilileñayi yakutalilahu?
12 Kubombela hakwihula malwihu, Yesu wadiña nakuzatisha yakutalilahu mumudimu windi wakushimwina. (Tañenu Matewu 13:34, 35.) Yakutalilahu yazatishileñayi Yesu yadiña nakumwekesha yitoñojoka yawantu adiña nakumutiyilila. (Mat. 13:10-15) Yakutalilahu yazatishileña yadiña nakukokola antu nikuyileñela kwanuka yuma yatañishileñayi. Tunateli kuzatisha ñahi yakutalilahu muntañishilu yetu?
13. Tunateli kuzatisha chakutalilahwinyi hakwila tushimuni netu Nzambi wabadika Yesu?
13 Twatela kuzatisha yakutalilahu yapela. Chakutalilahu, neyi tunakulumbulula netu Nzambi wamubadika Yesu, hadaha tunateli kuzatisha iyi njila. Tunateli kushimuna netu Nzambi niYesu ateneni hawulunda wekala muchisaka hakulumbulula wubwambu wekala hakachi kawu. Nzambi wamuteneni Yesu nindi Mwanindi, Yesu niyena wamuteneni Nzambi nindi Tata yindi. (Luka 3:21, 22; Yow. 14:28) Kuhiñahu, tunateli kumwihula mwiniitala netu: “Neyi munakukeña kunleja nenu antu ayedi esekana, wuntaña wamuchidinyi wumukutena hakulumbulula ichi chikuma?” Hadaha muntu nateli kutena amana kwamuntu ayedi hela ampamba. Neyi yatena ampamba, tunateli kumuleja netu ichi hichakutalilahu chachiwahi. Nkumininaku tunateli kumwihula netu: “Neyi etu tunyakala kushimuna ichi chakutalilahu, komana Yesu Ntañishi Muneni—nateli kukañanyi kuzatisha chakutalilahu chochimu? Ilaña, wamuteneni Nzambi nindi Tata yindi. Dichi Yesu wamuteneni Nzambi nindi wamubadika wukweti ñovu kubadika yena.”
14. Chakutalilahwinyi chinakumwekesha nawu Nzambi hanateli kumwiteja Diyabolu nindi yakabisheña antu mukesi kaheluku?
14 Shinshikenu hachakutalilahu chikwawu. Antu amakwawu akuhwelela nawu Satana diyi “wakabishaña” antu mukesi kahelu. Chakutalilahu chinateli kukwasha nvwali kwiluka nindi chalala Nzambi kwila yamwiteja Diyabolu kukabisha antu mukesi kahelu nehi. Tunateli kuhosha netu: “Fwikijenu nenu mwanenu nadikañi nawa nakwila yuma yatama nankashi. Mukwila ñahi?” Hadaha nvwali nateli kuhosha nindi wukumufumba mwanindi. Nateli kutwalekahu kumufumba mwanindi kulonda yaleki yuma yatama yinakwilayi. (Yish. 22:15) Hanyima yakuhanjeka haniyi nsañu, tunateli kumwihula nvwali chuma chatela kwilayi neyi mwana yakaana kumufumba. Anvwali amavulu anateli kuhosha nawu chikuhiñahu akumubabesha mwana. Kuhiñahu tunateli kwihula netu, “Indi neyi mwiluka nenu kudi muntu watama chikupu wunaleñeli mwanenu yekali mukañanyi wandunda?” Chakadi nikujina, nvwali wukuneña chikupu namuntu wamuchidiwu. Hakulumbulula munatalishi ichi chakutalilahu, tunateli kumwihula nvwali netu, “Chineli muneluki nenu muntu watama diyi wayiluwañesheleli mwanenu, komana mukumuleja ona muntu nenu yamubabeshi mwanenu?” Chakadi nikujina, wukwakula nindi inehi. Eñañi, Nzambi hanateli kumwiteja Satana nindi yababeshi antu wowamu analuwañeshuwu kudi Diyabolu kwila yuma yatamaku!
TWALEKENUHU NAKUTOÑOJOKA HAYUMA YAYIWAHI
15, 16. (a) Muloñadi wutwatela kubula kukuhwelela netu muntu wejima itukushimwina nsañu yaWanta wukwiteja? (b) Komana twatela kwikala akuluka yitembi hakwila nawu tushimwina chiwahi? Lumbululenu. (Talenu chikasha chinakwila nawu “ Chitwa Chatela Kutukwasha Kwakula.”)
15 Tweluka chikupu netu bayi neyi antu ejima itwashimwinaña nsañu yaWanta anateli kuyitejaku. (Mat. 10:11-14) Hela neyi tuyihula malwihu amawahi, tuhanjeka nawu munjila yayiwahi nikuzatisha yakutalilahu yayiwahi, hiyanateli kwitejaku. Kafwampi, antu antesha hohu diwu etejeli nsañu yatañishileñayi Yesu, hela chakwila wadiña Ntañishi muneni hanu hamaseki.—Yow. 6:66; 7:45-48.
16 Munjila yikwawu, hela neyi twatoñojokaña netu hitwakuluka yitembuku, tunateli kuzata chiwahi mumudimu wakushimwina. (Tañenu Yililu 4:13.) Izu daNzambi datuleñelaña kukuhwelela netu antu ‘ejima . . . afuukwilawu dehi kumona wumi wahaya nyaka,’ akwiteja nsañu yayiwahi. (Yil. 13:48) Dichi tutwalekenuhu nakutoñojoka hayuma yayiwahi, nikuwahisha ntañishilu yetu nawa bayi tuneñaku neyi antu itunakushimwina nsañu yayiwahi yaWanta akaana. Tuzatisheña chikupu yuma yinakutudizishayi Yehova nakukuhwelela netu yikutukwasha nikukwasha antu atutiyililaña. (1 Tim. 4:16) Yehova nateli kutukwasha kulonda twiluki ‘chakwakula antu ejima.’ Neyi chitukadiza muchibaaba chinahiñuhu, tunateli kuzata chiwahi mumudimu wakushimwina neyi tulondela lushimbi lwatenañawu nawu Lushimbi Lwalema.
^ Talenu chibaaba chinakwila nawu “Bushe Kuti Mwacetekela Ukuti Kwaliba Kabumba?” muKaposhi Kakutalila kaChibemba kaOctober 1, 2009.
