Mukamina kakumuhameka nachu Nleñi, Mwanta Davidi wamuIsarela wakushankulu wembili nindi: “Natiyi kuwaha nakwila muchima weyi, eyi Nzambi yami, mwalala, nshimbi jeyi jidi mukachi kamuchima wami.” (Mas. 40:8) Hela chakwila, wamweneña ihuñu muchihandilu chindi, Davidi watiyileña kuwaha kwila mwaya muchima waNzambi. Hela chochu, bayi neyi Davidi diyi hohu mukwakudifukula waYehova watiyileña kuwaha hakumukalakela Nzambi walalaku.

Hampinji yazatishiliyi mazu ekala haMasamu 40:8 hakutena Mesiya hela Kristu, kapostolu Pawulu wasonekeli nindi: “Dichi chenjiliyi [Yesu] mumpata yamunu mwishina hakwila nindi, Kukuketwila chimuna hela kukulambula mulambu, hiwayikeñeli kweyuku, hiwukunloñeshela mujimba. Eyi hiwunakeñi nyilambu yamukuma yakushita, hela nyilambu yahanshiduku. Hinukwila nami, Tala, ami nenzi dehi nakwila muchima weyi, eyi Nzambi; chochanasonekuwu mumukanda wakuvuña nakuntenami.”—Heb. 10:5-7.

Hampinji yadiñiyi hamaseki, Yesu watiyileña kuwaha kutala yileñeleña, kudikunda nawamabwambu nikudyila hamu nawakwawu. (Mat. 6:26-29; Yow. 2:1, 2; 12:1, 2) Ilaña yuma yalemesheli niyatiyileñayi kuwaha chikupu hikwila mwakeñañayi Tata yindi. Kafwampi, Yesu wahosheli nindi: “Kudya kwami yowu kwila muchima wayena wantemesheli, nakamanishi mudimu windi.” (Yow. 4:34; 6:38) Atumbanji twaYesu adizilili kudi Mwanta wawu chuma chaletaña muzañalu walala. Namuzañalu waweni, ashimwinini nsañu yaWanta kudi antu amakwawu namuchima wumu nawa neyena.—Luka 10:1, 8, 9, 17.

Yesu wayilejeli atumbanji twindi nindi: ‘Yenu mwakelishi atumbanji munyuza yejima, mwakayipapatishi mwijina daTata, nidaMwana, nidaspiritu yajila. Mwakayileji kuhemba yuma yejima yinayilejenu; tiyenu, ami nidi nenu mafuku ejima nikwakakumina nyaka.’ (Mat. 28:19, 20) Hakwila nawu tuzati iwu  mudimu chakeñekaña kuya nakushimwina antu kumaluña kwejima kwaduwu, kufuntila kudi antu amwekesheli mpwila, nikuyidizisha Bayibolu. Kuzata iwu mudimu kunateli kuleta muzañalu weneni.

Mpwila yitukweti diyi yatela kutukwasha kwikala namuzañalu mumudimu wetu wakushimwina, hela chakwila antu akwiteja hela akukaana nsañu yitwayishimwinaña. Muloñadi chitwashimwinaña nsañu yayiwahi hela chakwila antu atudiwulaña? Twamwekeshaña netu twamukeña Nzambi niantuñi netu, kuhitila mukuzata mudimu wakushimwina Wanta nikwilisha atumbanji. Eñañi, wumi wawantu wudi hakatoña—wetu niwawantuñi netu. (Ezek. 3:17-21; 1 Tim. 4:16) Tuhanjekenu hayikuma yinakwashi akwetu akwakukalakala amavulu kutwalekahu namuzañalu mumudimu wakushimwina mumaluña mwakala kushimwina.

Kakavulu kwihula malwihu amawahi mumudimu wetu wakushimwina mwafumaña yuma yayiwahi. Ifuku dimu nantetemena, Amalia wamweni muntu nakutaña chipapilu chansañu mupaaki. Wamuwanini nawa wamwihwili neyi chakwila watañiluhu nsañu yayiwahi muchipapilu. Chakwiliyi nindi mwosi, Amalia wahosheli nindi: “Nayileteli nsañu yayiwahi yinakuhosha haWanta waNzambi.” Chumichi chasañumwini mpwila yanona muntu nawa wetejeli kudiza Bayibolu. Kafwampi, Amalia watachikili kudizisha antu asatu Bayibolu muyina paaki.

Janice wamonaña iluña kwazatilañayi nindi hiiluña dindi dakushimwina. Chelili kalama wumu nimukwawu muyazatilaña atiyi kuwaha chibaaba chadiña muKaposhi Kakutalila, Janice watachikili kuyiletela magazini mpinji yejima. Welili chochimu nikudi mukwawu mwazatilileñawu, watiyili kuwaha hansañu yashiyashana yekala muKaposhi Kakutalila niAwake! Chumichi chaletesheli muntu mukwawu mwazatilileñawu yalombi magazini. Janice wahosheli nindi, “Yehova wankiswilili hama.” Nkumininaku wadiña nawantu 11 atwalilileñayi magazini kumudimu windi.

Nkoñi wendaña walejeli akwakushimwina nindi neyi anakushimwina kwitala nikwitala, hiyatela kukunkulula hohu kuhitila mukumuleja mwiniitala nawu twakenza ifuku dikwawuku. Ilaña, atela kumwihula muntu nawu: “Mukukeña niyileji chitwadizishaña Bayibolu?” hela “Ifukwinyi nawa mpinjinyi yimunakukeña nikafunti kulonda tukatwalekuhu nakuhanjeka?” Nkoñi wendaña washimwini nindi kuzatisha iyi njila, amana kwetu niahela amuchipompelu chazatilileñayi atachikili kudiza Bayibolu nawantu 44 mumulungu wumu.

Mwafumaña yuma yayiwahi neyi munyakala kufuntilaku, chimwahita mafuku antesha kufuma halwendu lwatachi. Muloñadi? Chamwekeshaña nawu tunakukeña kukwasha antu anakukeña kwiluka chalala kulonda eluki chatañishaña Bayibolu. Mumbanda wumu chamwihwiluwu chuma chaleñeleli yeteji kudiza Bayibolu nawaYinsahu jaYehova, wakwili nindi,  “Natachikili kudiza muloña amwenkesheleli kukeña chikupu.”

Chimwahitili mpinji yantesha kufuma kuShikola yaMudimu wawuPayiniya, Madaí wadizishileña Bayibolu antu 15 nawa wahaninuhu antu 5 kudi akwakushimwina amakwawu. Antu amavulu adizishileñayi Bayibolu atachikili kuya kukupompa kwetu mpinji yejima. Chumanyi chamukwashili Madaí yatachiki kudiza nawantu amavulu? Shikola yamuleñeleli yeluki nindi chalema kutwalekahu nakufuntilaku sampu nawani antu amwekesheli mpwila halwendu lwatachi. Chinsahu mukwawu wunakwashi antu amavulu kudiza nsañu yalala yamuBayibolu, wahosheli nindi, “Neluki nami kutwalekahu nakufuntilaku dichuma chalema hakwila nawu nikwashi antu anakukeña kumwiluka Yehova.”

Chakeñekaña kuzata nañovu hakwila tufuntili kudi antu nikuyidizisha Bayibolu. Hela chochu, mwafumaña yuma yayiwahi chikupu. Neyi tuzataña nañovu mumudimu wakushimwina Wanta, tunateli kukwasha antu amakwawu kulonda “eluki nsañu yalala chikupu,” yikayileñela akapuluki. (1 Tim. 2:3, 4) Anetu tunateli kwikala namuzañalu nankashi.