1. Anyi asinsili hadi antu jaYehova dikwila nawu aIsarela adikañili? (Talenu mwevulu wakutachikilahu.)

 TWATELA kumulemesha Yehova hamuloña wakutachika chipompelu chawakwaKristu chakushankulu nikufuntisha kudifukula kwalala makonu. Neyi chitwadizili muchibaaba chinafumuhu, muchina chipompelu chanuñañana mwadiña atumbanji twaKristu akusambila, asinsili hadi antu jaYehova dikwila nawu munza wawaIsarela wadikañili. Ana atumbanji amaha adiña nawuselewa waNzambi ahandili hampinji yajilumwinuwu Yerusalema mu 70 C.E. (Luka 21:20, 21) Iyi yuma yamwekeni kushankulu yadifwana nayuma yinakumwekena ambuña aYehova makonu. Kaayi kaSatana keña akijilumuni, ilaña antu ekala mukuloñesha kwaNzambi akahanda hampinji yakajilumunawu kanu kaayi. (2 Tim. 3:1) Tuneluki ñahi?

2. Yesu wahosheli nindidi ‘halukadi lwasweja,’ nawa lukatachika mpinjinyi?

² Yesu wahosheli hakwinza kwindi kwakadi kumona namesu nihakukuma kwanyaka yamakonu nindi: “Henohu hamba kekala lukadi lwasweja, lwakwila kufumisha kutachi yamatuña kushika  nikulelu, kanda alumonañahu dehi, hela kumbidi hiyamba kalumona cheñuku.” (Mat. 24:3, 21) Ilu lukadi lwambukaku, lukatachika neyi Yehova najilumuni dehi ‘Babiloni Muneni’ wanta wakaayi wansakililu yakutwamba, kuzatisha anyuuli japolitiki. (Chim. 17:3-5, 16) Yumanyi yakalondelahu?

3. Hanyima yakujilumuna kwitiya kwakutwamba, chumanyi chikafwilawu kuyila antu jaYehova?

³ Hanyima yakujilumuna kwitiya kwakutwamba, Satana niantu jindi amukaayi akalukuka ambuña Yehova. Chakutalilahu, Nsona yashimwineñahu dehi hadi “Gogi wamwituña daMagogi,” nawu: “Eyi wakakanduka, wakenza neyi nvula yasweja kuzuwa, wakekala neyi ivu dinabuti hetuña wi-i, nineyi niyendu yeyi yejima ninyuza yawantu yayivulu hamu naneyi.” Hamuloña wakwila aYinsahu jaYehova hiyakweti amashidikaku nawa diwu antu awunda hanu hamaseki, akamwekana neyi diwu antu aswayi kulukuka. Ilaña akadokwela makala akesi hamutu!—Ezek. 38:1, 2, 9-12.

4, 5. Chumanyi chikelayi Yehova hampinji yakakeñayi Satana kukukisañana antu jaNzambi?

⁴ Chumanyi chikelayi Nzambi hampinji yakakeñayi Satana kukukisañana antu jaNzambi? Yehova wukamwina antu jindi, nakumwekesha nindi diyi Mwanta Wakuleña Kwejima. Yehova wamonaña nindi kulukuka ambuñindi hohamu nakumulukuka yena. (Tañenu Zekariya 2:8.) Dichi, Tata yetu wamwiwulu wukanyakala kutwamwina. Hanyima yakutupulwisha kaayi kaSatana akakijilumuna haAmagedoni, ‘njita yefuku odu deneni daNzambi Watwesha yejima.’—Chim. 16:14, 16.

⁵ Wuprofwetu wamuBayibolu wahoshaña haAmagedoni nawu: “Yehova wukweti nsañu yakuhosha nanyuza, wakasompa muloña nawantu ejima; hakwila akwakukoña chatama wakayihana kumpoku yakabali. Dimu mwanahoshiyi Yehova. Yehova wamazaza nahoshi nindi, Tiyenu, katama kakela kafuma kumuza iwu kaya kumuza wukwawu, akasañumuna mpepela yasweja ñovu yakafuma kunsa jeseki. Akajahawu kudi Yehova ifuku odu akekala heseki dejima, kufumisha kunsa yeseki yimu ndo nikunsa yeseki yikwawu. Hiyakayidila, hela kuyikuñula, hela kuyijikaku. Akekala wushi wahewulu deseki.” (Yere. 25:31-33) Njita yaAmagedoni yikajilumuna chikupu kanu kaayi katama. Kaayi kaSatana akakifumishahu, ilaña antu ekala mukuloñesha kwaYehova kwaheseki akapuluka.

6, 7. (a) Indi antu ekala ‘mwizaza deneni’ afumaña kudihi? (b) Antu anakuvulilaku ñahi makonu?

⁶ Kuloñesha kwaNzambi kwahanu heseki kunakuyilaku hambidi muloña antu ekalamu akweti wuselewa windi. Bayibolu yatukoleshaña nawu: “Mesu aYehova atalaña antu aloña, nimatu indi atiyililaña chakulembelelawu.” (1 Pet. 3:12) Hanawa antu aloña hekala “izaza deneni,” dawantu “anafumi kuyihuñu oyu yeneni.” (Chim. 7:9, 14) Awa antu akahanda bayi neyi ‘hiizaza’ hohuku. Ilaña “izaza deneni”—dawantu amavulu nankashi. Komana mwatoñojokaña nenu mwakekala hakachi kawantu akapuluka “kuyihuñu oyu yeneni”?

⁷ Indi antu ekala mwizaza deneni afuma kudihi? Anakuyipompesha muloña Yesu washimwineñahu dehi nindi kukekala hichinjikijilu chakwinza kwindi. Wahosheli nindi: ‘Ninsañu iyi yayiwahi yaWanta akayishimwañena mwahita matuña ejima mwashakamawu antu, kulonda yakayilili nyuza yejima wunsahu; henohu dihu hakenza kukumisha.’ (Mat. 24:14) Iwu diwu mudimu walema wunakuzata antu ekala mukuloñesha kwaNzambi, munanu mafuku  akukuminina. Hamuloña wamudimu wakushimwina nikutañisha wunakuzatawu aYinsahu jaYehova mukaayi kejima, antu amavulu nankashi anakudiza kudifukula kudi Nzambi ‘muspiritu, nimuchalala.’ (Yow. 4:23, 24) Chakutalilahu, muyaaka ikumi yinahituhu yakatataka, kufuma muchaaka chamudimu cha 2003 nakushika mu 2012, antu akubadika ha 2,707,000 apapatisheweli nakumwekesha kudihana kwawu kudi Nzambi. Mukaayi kejima, mudi aYinsahu akubadika ha 7,900,000, antu akushika kumamiliyoni anakupompa nawaYinsahu, sweje-e hakwanakana Chanukishu chahachaaka. Twazañalalaña, hakumona antu chinakuvulawu, muloña ‘Nzambi diyi wakulishaña.’ (1 Kor. 3:5-7) Chakadi nikujina, tunakumona izaza deneni chidinakutohelaku chaaka nichaaka.

8. Chumanyi chinakuleñela antu atwalekuhu nakuvulilaku nankashi mukuloñesha kwaYehova makonu?

⁸ Ambuña Nzambi anakutwalekahu nakuvulilaku chikupu muloña Yehova nakutwalekahu nakukiña aYinsahu jindi. (Tañenu Isaya 43:10-12.) Iku kuvulilaku akwishimwineñahu dehi mumazu awuprofwetu ahosha nawu: “Kakehelamu kakabalumuka ikombakaji, wadiñi wanyanya wakekala muza wañovu. Ami Yehova yami nakachinyakisha hamwaka wachu.” (Isa. 60:22) Hampinji yimu awayishewa ashalahu adiña neyi “kakehelamu,” ilaña ichi anavuliluku chineli aIsarela akuspiritu anakuyileta mukuloñesha kwaNzambi. (Ŋal. 6:16) Hamuloña wankisu jaYehova, hayaaka yinahituhu antu anatwalekuhu nakuvulilaku chineli izaza deneni achidi kudipompesha.

9. Twatela kwila chumanyi hakwila tukatambwili nkisu yakumbadi yakanawu Mwizu daNzambi?

⁹ Chili twekala akwaKristu awayishewa hela twekala mwizaza deneni, tukatambwila nkisu yakumbidi yakanawu Mwizu daNzambi. Hakwila nawu tukatambwili iyi nkisu, twatela kwovwahila yuma yakeñañayi Yehova nindi twileña. (Isa. 48:17, 18) Toñojokenu hadi aIsarela adiña nakwovwahila Nshimbi jamwinkeluwu Mosi. Iyi Nshimbi yadiña nakuyikiña aIsarela kuhitila mukuyileja yuma yayiwahi yidi neyi kubula kwila wuvumbi, chakwila hakuzata mudimu wakuselujola, kwakamena anyana nikuhemba akwawu antu niyuma yikwawu. (Kwid. 20:14; Lev. 19:18, 35-37; Kuhit. 6:6-9) Kwovwahila nshimbi jaNzambi kwatukwashaña ninetu munjila yoyimu, nawa twamonaña netu kwila mwatulejañayi himwakalaku. (Tañenu 1 Yowanu 5:3.) Neyi chochina chayikiñileñawu aIsarela naNshimbi, ninetu neyi twovwahila nshimbi jaYehova Nzambi yikutukiña nawa tukutwalekahu kwikala ‘nachikuhwelelu chakola.’—Tit. 1:13.

10. Muloñadi chitwatela kwikala nampinji yakudiza Bayibolu niKudifukula kwaChisaka kwamelela mulungu nimulungu?

¹⁰ Kuloñesha kwaYehova kwahanu hamaseki kunakuyilaku hambidi muyuma yayivulu. Chakutalilahu, tunakutwalekahu nakutiyishisha chiwahi chalala chamuBayibolu. Tunateli kukuhwelela chumichi muloña, “njila yawantu aloña yidi neyi mwaana wahakucha, wayaña nakutooka nichikushika itañwa mwiwulu.” (Yish. 4:18) Ilaña tunateli kudihula netu: ‘Komana inakutiyishisha chikupu chalala chamuNsona chinakulumbululawu makonu? Nikweti chaaku chakutaña Bayibolu mpinji yejima? Komana nekala neyena dakutaña nyikanda yetu? Komana ami nichisaka chami twekalaña naKudifukula kwaChisaka kwamelela mulungu nimulungu?’ Etu amavulu tunateli kuhosha netu chakala wanyi kwila yumiyi. Kakavulu chakeñekaña hikwikala nampinji yakuzatilamu yumiyi. Chalema nankashi kudiza nikuzatisha nsañu yalala yamuNsona, nikutwalekahu kwendela hamu nakuloñesha kwaNzambi, sweje-e chineli yihuñu yamaneni yidi kwakwihi.

11. Indi yawija yakushankulu nikupompa kwamakonu kwanyanya nikwankambi kwatukwashaña ñahi?

 ¹¹ Kuloñesha kwaYehova kwatukoleshaña nawa twovwahileña kufumba kwakapostolu Pawulu kwakwila nawu: “Tuditoñojokenu muntu himuntu, kulonda tusañumuni akwetu kukeñañana nakwila nyidimu yayiwahi. Bayi tuleka kupompa neyi chelañawu amakwawuku, chiña kudilejaleja, chisweji nankashi nanichi chimunamoni ifuku odu hidikwinza nakuswila kwakwihi.” (Heb. 10:24, 25) Yawija yahachaaka nichaaka nikupompa kukwawu kwayikwashileña aIsarela kwikala nachikuhwelelu chakola. Kubombelahu, yawija yidi neyi ‘Yawija Yamuyisolu,’ yelileñawu mumafuku aNehemiya yadiña yawija yakuzañalesha. (Kwid. 23:15, 16; Nehe. 8:9-18) Anetu twahetelaña mukupompa kwachipompelu, kwanyanya nikupompa kwankambi. Dichi twatela tupompeña chikupu kulonda twikali nachikuhwelelu chakola nikwikala namuzañalu.—Tit. 2:2.

12. Indi mudimu wakushimwina Wanta twawumonaña ñahi?

¹² Chineli twekala mukuloñesha kwaNzambi, tukweti muzañalu wakuzata “mudimu wajila wakushimuna nsañu yaNzambi yayiwahi.” (Rom. 15:16) Kuzata iwu “mudimu wajila” kwatuleñelaña twikali ‘akwakukalakala’ hamu naYehova, ‘Wajila.’ (1 Kor. 3:9; 1 Pet. 1:15) Kushimwina nsañu yayiwahi kwaleñelaña kujilika ijina daYehova dajila. Chakadi nikujina, hikukooleka chikupu hakutwinka mudimu wakushimwina ‘nsañu yayiwahi yakulema kwaNzambi wamuzañalu.’—1 Tim. 1:11.

13. Wubwambu wawuwahi niwumi wetu washindamena hayumanyi?

¹³ Nzambi wakeñaña nindi twikali nawubwambu wawuwahi nayena kuhitila mukukundama kudi yena nikukwasha kuloñesha kwindi munyidimu yashiyashana. Mosi wayilejeli aIsarela nindi: “Natambiki niiwulu niiseki ekali ayinsahu jenu lelu, ami nakushili dehi kumesu eyi niwumi nikufwa, ninkisu niishiñu; dichi dinu tondaku wumi kulonda wuhandi, nineyi nianyaneyi; wukeñi Yehova Nzambi yeyi, wovwahili mwizu dindi, wumulamati, muloña yena diyi wumi weyi, diyi mafuku eyi amavulu; kulonda wakashakami mwituña dasanyikililiyi Yehova ankakulula jeyi aAbarahama, naIsaka, naYakoba kuyinka.” (Kuhit. 30:19, 20) Wumi wetu washindamena hakwila mwaya muchima waYehova, kumukeña, kutiyilila mwizu dindi nikumulamata.

14. Mana kwetu wumu watiyili ñahi hakuloñesha kwaNzambi kwahamaseki?

¹⁴ Mana kwetu Pryce Hughes, watwalekeluhu nakukolela kudi Nzambi nawa wovwahilileña nshimbi jamukuloñesha, wasonekeli nindi: “Nasakililaña nankashi hakukakela kukwiluka nkeñelu yaYehova munana mafuku akumatachikilu achaaka cha 1914 . . . Chuma chinalemesha nankashi muchihandilu chami hikutwalekahu kwikala washinshika kukuloñesha kwaYehova kwaheseki. Yuma yinamweni hakusambila yaleñeleli niluki wubanji wekala mukushindamena hamaana awantu. Chinelukili chikupu chumichi haniyi mpinji, nafukwiluhu kukakela kukuloñesha kwalala. Munjilanyi yikwawu munateliyi muntu kutambwila wuselewa ninkisu yaYehova?”

15. Shimunenu yakutalilahu yamuNsona yinakumwekesha chitwatela kumonaña kuhimpika mukutiyishisha kwetu kwansañu yamuBayibolu.

¹⁵ Hakwila nawu muntu nimuntu twikali nawuselewa ninkisu yaYehova, twatela kuzatila hamu nakuloñesha kwindi nikwiteja yuma yinakuhimpawu hakutiyishisha kwetu kwajiNsona. Toñojokenu hachumichi: Hanyima yakufwa kwaYesu, akwaKristu aYudeya amavulu adiña nakulondela Nshimbi chiyakalilili kufuma kunshimbi jiyalondeleleñawu. (Yil. 21:17-20) Hela chochu, mukanda wayitemesheleli Pawulu wayikwashili,  elukili nawu hiyayijilikili nanyilambu ‘yalambulañawu mwaya nshimbuku,’ ilaña ‘ayijilikili namulambu wamujimba waYesu Kristu walambwiliyi kamu hohu bweñi.’ (Heb. 10:5-10) Chakadi nikujina, ana akwaKristu aYudeya amavulu ahimpili yitoñojoka yawu nawa atachikili kwendela hamu nakuloñesha kwaNzambi. Anetu nawa twatela tudizeña nakanañachima nikutoñojoka chikupu hayuma yinakuhimpawu mukutiyishisha kwetu Kwezu daNzambi hela mumudimu wakushimwina.

16. (a) Nkiswinyi yikaleñela chihandilu chikekali chachiwahi mwituña dadiha? (b) Yumanyi yimwatalilaña kumona mwituna dadiha?

¹⁶ Antu ejima atwalekañahu kwikala ashinshika kudi Yehova nikuloñesha kwindi wukuyikiswilaña. AkwaKristu awayishewa ashinshika akadiluñisha kukooleka kwakwikala aswana chimu naKristu mwiwulu. (Rom. 8:16, 17) Neyi twachiñejaña kushakama hamaseki, toñojokenu chitwakazañalalaña hakushakama muParadisa. Chineli twekala mukuloñesha kwaYehova, twazañalalaña nankashi hakulejaku amakwawu chikaninu chaNzambi chakuleta ituña dadiha! (2 Pet. 3:13) Mukanda waMasamu 37:11 wahosha nawu: “Ilaña akwakudizoza akaswana ituña, akatiya kuwaha nankashi nakushakama chachiwahi chamwena.” Antu “akatuña matala, akashakamamu” nawa akadiluñisha “nanyidimu yamakasawu.” (Isa. 65:21, 22) Hikwakekala nawa cheñi makabi, wuzweñi, hela nzalaku. (Mas. 72:13-16) Babiloni Muneni hakatwesha cheñi kudimba muntu wudi wejimaku, muloña akamufumishahu. (Chim. 18:8, 21) Antu afwa akayisañula nawa akekala nakukooleka kwakushakama haya nyaka. (Isa. 25:8; Yil. 24:15) Antu amavulu nankashi adihana kudi Yehova achiñejaña yuma yayiwahi chikupu! Hakwila nawu tukamoni chikashikijewa iyi yikaninu yamuNsona hamuntu hamuntu, twatela kutwalekahu kwikala nawubwambu wakola naNzambi, nikwendela hamu nakuloñesha kwindi.

17. Twatela kumonaña ñahi kudifukula kwetu kudi Yehova nikuloñesha kwindi?

¹⁷ Chineli kukuma kwakanu kaayi kudi kwakwihi, tutwalekenuhu kwikala nachikuhwelelu chakola nikumusakilila Nzambi hakutuloñeshela njila yakudifukwilamu. Davidi ñimbi yamasamu niyena wadiña namuchima wakusakilila, wembili nindi: “Kudi chuma chimu chinamulombi Yehova, nafwili nami nichimoni; dichenichi nami, nishakami mwitala daYehova mafuku ejima inukwikala wamumi, nami nibanjili Yehova chawahayi, nimwihuli chachiwahi mutembeli yindi.” (Mas. 27:4) Komana wonsu wetu tulamati kudi Nzambi, nikutwalekahu kudikunda nawantu jindi, nikwendela hamu nakuloñesha kwaYehova.