KUFUMA MUNKALAÑA JETU
“Mudimu Wakumuna Wuchidi Weneni”
George Young hashikiliyi muRio de Janeiro muMarch 1923
MUCHAAKA cha 1923. Itala dakuhemena Yisela niKwimbilamu Tumina damuSão Paulo denzeli nawantu! Munakutiya izu dawunda daGeorge Young? Mpanji yahanineñayi adiña nakuyimbalumuna hezu hezu mwidimi daPortuguese. Antu akushika ku 585, adiña nakutiyilila nakanañachima. Nsona yamuBayibolu yamwidimi daPortuguese ayimwekesheleleña hasikilini. Kumakumishilu ayina mpanji ahanini makopi akamukanda kahosheleña nawu, Millions Now Living Will Never Die! nawa kedikili nimwidimi daEnglish, German, nimwidimi dawakwaItaly. Mpanji ayihanini chachiwahi! Mpuhu yatiyakeni kwejima. Mafuku ayedi alondeleluhu namelela, antu apompeli cheñi mudina itala nakutiyilila kumpanji yikwawu. Chumanyi chaletesheli yuma yejima iyi?
Muchaaka cha 1867, Sarah Bellona Ferguson wabuukili nachisaka chindi kufuma kwituña daUnited States nakuya kuBrazil. Mu 1899, Sarah welukili nindi wawanini chalala hanyima yakutaña nyikanda yashindamena haBayibolu yamuleteleluwu kudi mwanyikindi weyala wenjili kuBrazil kufuma kuUnited States. Hakwikala ntañi wahamuka wasonekesheli Kaposhi Kakutalila kamwidimi daChizungu. Hamuloña wakwila nsañu yamuBayibolu yamushikili hamuchima, wamusonekeleli Mana kwetu C. T. Russell, nakuditena yamweni nindi, “nidi hakachi kawantu anakumwekesha nawu hitwekala kwakulehi chakukañanya kutushimwinaku.”
Can the Living Talk With the Dead? (mwidimi daPortuguese)
Sarah Ferguson wazatili nañovu hakulejaku antu amakwawu nsañu yalala yamuBayibolu, ilaña wajinokeleña neyi chakwila kudi antu atela kumukwasha nichisaka chindi, kushilahu niantu ejima adiña nanyichima yayiwahi amuBrazil. Mu 1912, Beteli yakuBrooklyn yamulejeli nawu kuSão Paulo kunakwinza muntu wadiña namatilakiti amavulu ahosheleña nawu Where Are the Dead? mwidimi daPortuguese. Muchaaka cha 1915, wadiña nakuhayama chelukiliyi nindi aYinsahu amavulu ateneneñawu nawu Atudizi aBayibolu akuhweleleli nawu keña ayi mwiwulu. Hakushimuna chatoñojokeleñayi wasonekeli nindi: “Indi antu akuBrazil nikukabeta kambwela kaAmerica? . . . Neyi mwiluka
kutoha kwetuña daSouth America chikuleñela mwiluki nenu mudimu wakumuna wuchidi weneni.” Eñañi, kudi mudimu weneni wakwañula wunakuzatawu.Kwakwihi nachaaka cha 1920, akwenzi akuBrazil akwakwendesha maatu enjili kuchipompelu nakupompa muNew York City hampinji yadiña nakuloñeshawu maatu awu. Chafuntiluwu kuRio de Janeiro atachikili kulejaku akwawu yuma yayiha yamuBayibolu yakuhweleleluwu. Hahitili hohu yaaka yantesha, muMarch 1923, George Young, wadiña nkoñi wendaña washikili kuRio de Janeiro, kwawaniniyi antu adiña nampwila yakudiza chalala. Wakeñeli antu ateleleli kubalumuna nyikanda yashiyashana mwidimi daPortuguese. Mana Kwetu Young wayili cheñi nakuhempula kuSão Paulo, kuhiñahu wayili kumusumba wukwawu mwadiña antu akushika ku 600,000. Kuwuna musumba wahanini mpanji nawa wahanini tunyikanda twateneneñawu nawu Millions, neyi chashimunawu kumatachikilu achinu chibaaba. Washimwini nindi, “Chineli nadiña nkawami nashindameneni hohu hayipapilu yakutiyakeshelahu nsañu.” Wabombeleluhu cheñi nindi, iyi yipapilu diyadiña “yatachi kutiyakeshelahu mpanji yawantu amavulu kuzatisha ijina da I.B.S.A. muBrazil.” *
Nsona yamuBayibolu ayimwekesheleleña hasikilini hampinji yahanineñayi Mana Kwetu Young mpanji
Kaposhi Kakutalila kaChizungu kaDecember 15, 1923, kashimwini hachinleji chakuBrazil nawu: “Neyi mwiluka nenu mudimu wakumuna watachikili haJune 1 nawa kwadiña kwosi nyikanda hayina mpinji, mukwiluka nenu Mwanta nakiswili chikupu mudimu.” Chinleji chatwalekeluhu nawu Mana Kwetu Young wahanini mpanji yindi yanaambala 2 hajimpanji 21 jahaniniyi muSão Paulo kutachika haJune 1 nakushika haSeptember 30, nawa antu 3,600 diwu atiyilileña kumpanji jindi jahanineñayi. Nsañu yaWanta yatandileña chovu chovu muRio de Janeiro. Nawa chimwahitili tukweji twantesha, ahanini nyikanda yetu yakubadika ha 7,000 mwidimi daPortuguese. Kubombelahu, Kaposhi Kakutalila katachi kwidika mwidimi daPortuguese, kadiña kaNovember-December 1923.
Sarah Bellona Ferguson, diyi wadiña watachi kusonekesha Kaposhi Kakutalila mwidimi daChizungu muBrazil
George Young wamutambikili Sarah Ferguson, nawa Kaposhi Kakutalila kashimwini nawu: “Muhela wenjili musitolu, nawa wakañenyi nikuhosha niizu dimu. Chamukwatiliyi Mana kwetu Young kuchikasa, wamushinshikili nankashi kumesu, nkumininaku wamwihwili nindi: Mwamweni wudi Nkoñi wendaña?” Hashimbwili wanyi iwu muhela nianyanindi amakwawu apapatisheweli. Kafwampi wahembeleleli hadi yaaka 25 hakwila nawu amupapatishi! Kaposhi Kakutalila kaChizungu kaAugust 1, 1924, kashimwini nawu antu akushika ku 50 apapatisheweli muBrazil, amavulu amumusumba wa Rio de Janeiro.
Dichi, chineli munahiti yaaka 90, hitunateli kwihula cheñi netu: “Indi antu akuBrazil nikukabeta kambwela kaAmerica?” A Yinsahu jaYehova akubadika ha 760,000 diwu anakushimwina nsañu yayiwahi muBrazil. Nawa muSouth America mwejima nsañu yaWanta anakuyishimwina muPortuguese, Spanish nimadimi amakwawu amavulu ahoshañawu munidi ituña. Kwesekeja nachahosheliyi Sarah Ferguson, mu 1915, ‘mudimu wakumuna wachidiña weneni.’—Kufuma munkalaña yetu muBrazil.
^ I.B.S.A. chaya mukwila nawu International Bible Students Association.