1. Komana kwakamena antu chachiwahi mumudimu wakushimwina chalema? Shimunenu chakutalilahu. (Talenu mwevulu wakutachikilahu.)

 HAYAAKA yantesha yinahituhu, akwaKristu adisumbula akwituña daFiji azatileña mukampeni kakutambika antu kuChanukishu, chakufwa kwaKristu. Dichi nvula yatachikili kunoka hampinji yahanjekeleñawu namumbanda hanji yetala dindi. Mana kwetu wamwinkeli ona mumbanda ambulela nawa yena niñodindi adibutili mwambulela yimu. Awa adisumbula azañaleli chamumwenuwu ona mumbanda nenzi kuChanukishu. Wetejeli nindi hanukili yuma yikwawu yamulejeluwu aYinsahu hampinji yamuhempwiluwuku. Ilaña watiyili kuwaha chamwakamenenuwu chakwila chamusañumwini kwinza kuChanukishu. Chumanyi chaleñeleli yazañalali? Awa antu adisumbula alondeleli Lushimbi lwatenañawu nawu Lushimbi Lwalema.

2. Indi Lushimbi Lwalema hilushimbinyi, nawa tunateli kuluzatisha ñahi?

² Indi Lushimbi Lwalema hilushimbinyi? Hikufumba kwashimwiniyi Yesu hampinji yahosheliyi nindi: “Yejima yimunakeñi antu kuyililenu, ninenu nawa yililenu mwomumu.” (Mat. 7:12) Tunateli kuzatisha ñahi ilu lushimbi? Tunateli kwila mwenimu munjila jiyedi. Chatachi, twatela kudihula netu, ‘Neyi yami nadiña neyi iwu muntu, nikukeña nami añili ñahi?’ Chamuchiyedi,  zatenu nañovu kulonda mumwakameni owu muntu neyi chimukukeña enu kuyakamena.—1 Kor. 10:24.

3, 4. (a) Lumbululenu muloña wutukuhoshela netu hitwatela kulondela hohu Lushimbi Lwalema muchihandilu chetu nawakwetu akwakwitiyaku. (b) Yumanyi yitukuhanjekahu muchinu chibaaba?

³ Kakavulu twazatishaña ilu Lushimbi Lwalema muchihandilu chetu nawakwetu akwakwitiya. Ilaña Yesu hahosheli nindi hitwatela kwakamena hohu akwetu akwakwitiyaku. Kafwampi, washimwini haLushimbi Lwalema hampinji yahosheleñayi chitwatela kwakamena antu ejima kushilahu niayilumbu jetu. (Tañenu Luka 6:27, 28, 31, 35.) Neyi chakwila twatela kuzatisha ilu Lushimbi Lwalema hadi ayilumbu jetu, dikwila nawu twatela kulondela chikupu ilu lushimbi hampinji yitunakushimwina kudi antu amavulu ‘afuukwilawu dehi kumona wumi wahaya nyaka.’—Yil. 13:48.

⁴ Ichi tukuhanjeka hamalwihu awana itwatela kwanuka hampinji yitudi mumudimu wakushimwina: Muntu wamuchidinyi inakukeña kuhanjeka nindi? Kudihi kwinakuya nakuhanjekela nawantu? Mpinjinyi yinakuya nakuhanjeka nawantu? Nateli kuhanjeka nawantu munjilanyi? Neyi chitukuhanjekahu, awa malwihu anateli kutukwasha kwiluka yuma yinakutoñojoka antu itunakushimwina kulonda tuhimpi njila yakushimwinamu.—1 Kor. 9:19-23.

5. Twatela kudihula malwihwinyi?

⁵ Mumudimu wetu wakushimwina, kakavulu twahanjekaña nawantu. Muntu himuntu wukweti nkulilu yindi, nikukala kwashiyashana. (2 Kushi. 6:29) Hakushimwina nsañu yayiwahi kudi muntu mwatela kudihula nenu: ‘Neyi chakwila, yena yekala mukwakushimwina ami nikala mwiniitala nikukeña nami yamoneña ñahi? Komana nukutiya kuwaha neyi yamonaña nindi nidi muntu wamuchituñilu hohu wabula kushikilamu? Ntahindi nukukeña nami yañiluki chiwahi chinekala?’ Kutoñojoka hamalwihu amuchidiwu kukutukwasha kulonda tuyakameneña antu hamuntu hamuntu.

6, 7. Twatela kwila ñahi neyi tuwana muntu wazuwa mumudimu wakushimwina?

⁶ Muntu wudi wejima watiyaña kutama neyi amutena nawu “wamukunkulwayi.” Chakutalilahu: Etu akwaKristu twazataña nañovu chikupu hakwila tulondeleña kufumba kwamuBayibolu kwakwila nawu ‘kuhosha kwetu kwikali naluwi, mafuku ejima.’ (Kol. 4:6) Hela chochu, hamuloña wakubula kuwanina mpinji yikwawu twahoshaña mazu aleñelaña hitukuditoñesha mukuya kwamafuku. (Yak. 3:2) Neyi chakwila tumuhoshola muntu, hadaha odu ifuku tunahinduki chiwahi wanyi, hitwakeñaña atumoneña nawu “tukweti winyi” hela nawu “hitwakamenaña akwetuku.” Twakuhwelelaña netu muntu watuhoshola wukuditoñesha. Komana hitwatela kuyakamena akwetu munjila yoyimuku?

⁷ Neyi muwana muntu wazuwa mumudimu wakushimwina, mwatela kweseka kwiluka chuma chinaleñeli yazuwi. Hadaha nakuhita mukukala kumudimu hela kushikola. Indi kwiji nakuyekela nakankati. Kakavulu, enimatala azuwaña hakusambila, etejaña nsañu yayiwahi neyi antu jaYehova amwekesha luwi nikalemesha.—Yish. 15:1; 1 Pet. 3:15.

8. Muloñadi chitwatela kushimwina nsañu yaWanta kudi ‘antu ejima’?

⁸ Twashimwinaña kudi antu ejima. Chakutalilahu, hayaaka yantesha yinahituhu, muKaposhi Kakutalila kaLunda asonekamu yuma yamwekeni yakubadika ha 30, muyibaaba yinakwila nawu “Bayibolu Yahimpaña Yihandilu Yawantu.” Antu amakwawu ashimunawu muniyi yibaaba adiña amakombi, akwakusheta walwa, ambanji, hela ateñuka nayitumbu yashetana. Amakwawu adiña akwansañu jamatuña nachiyulu, akulumpi jansakililu, hela antu asweja kusha  maana munyidimu. Amakwawu adiña nakwila yuma yatama. Ilaña, wonsu wawu chatiyiluwu nsañu yayiwahi, atachikili kudiza Bayibolu nawa ahimpili chihandilu chawu nakwinza muchalala. Dichi, bayi tutoñojokaña netu antu amakwawu hiyanateli kutiya nsañu yaWantaku. (Tañenu 1 Akorinda 6:9-11.) Ilaña, twatela kwiluka netu ‘antu ejima’ anateli kutiya nsañu yayiwahi.—1 Kor. 9:22.

9. Muloñadi chitwatela kulemeshela matala awantu?

⁹ Kudihi kutwahanjekelaña nawantu mumudimu wetu wakushimwina? Twavula kuhanjeka nawu hamatalawu. (Mat. 10:11-13) Twatiyaña kuwaha neyi antu amakwawu alemesha yuma yetu nimatala etu. Muloña twalemesha itala detu. Twakeñaña kushakama kumatu kwawunda, chakadi kutuluwañesha. Twatela kulemesha antuñinetu munjila yoyimu. Dichi neyi tunakushimwina kwitala nikwitala, twatela kulemesha matala awu.—Yil. 5:42.

10. Tunateli kushimwina ñahi chakadi kuluwañesha antu mumudimu wetu?

¹⁰ Mudinu ituña munasweji wubanji, enimatala amavulu akamaña neyi amona antu abula kwilukawu. (2 Tim. 3:1-5) Dichi hitwatela kuleñela enimatala atachiki kutujinookaku. Chakutalilahu, neyi chakwila munayi hetala nawa mudondomwena nikuchinsu chakumbidi. Neyi kwosi muntu wunakwiteja, tunateli kutachika kusumbila hanjanina hela kuhitañana hanji nakukeñakeña mwiniitala. Komana kwiluña denu, chumichi chinateli kumuluwañesha chikupu mwiniitala? Indi antuñi nindi akutoñojoka nawudi? Eñañi, twakeñaña kuwana antu amavulu neyi tudi mumudimu wetu wakushimwina. (Yil. 10:42) Twafwilaña kutandisha nsañu yayiwahi, kudi antu kulonda adizi chalala. (Rom. 1:14, 15) Hela chochu, hitwelaña yuma yidi yejima yinateli kuluwañesha antu mwiluña detu dakushimwinaku. Kapostolu Pawulu wasonekeli nindi: “Bayi mwila chuma chakudimbwisha nachu muntu hela chimuku, kulonda mudimu wetu abuli kuwumona kutama.” (2 Kor. 6:3) Neyi tulemeshaña matala niyuma yawantu ekala mwiluña mutwashimwinaña, yililu yetu yinateli kukokola antu kuchalala.—Tañenu 1 Petulu 2:12.

11. Twatiyaña ñahi neyi antu abula kutumanishila mpinji yetu?

¹¹ Chineli tudi akwaKristu, etu amavulu tukweti nyidimu yayivulu yakwila. Hakwila nawu tuzati nyidimu yetu, twatwamijañaku nyidimu yalema nikutanjika ndandanda yetu chiwahi. (Efwes. 5:16; Fwi. 1:10) Ilaña twaneñaña neyi kumwekana yuma yikutukañesha kuzata nyidimu yetu yitunatanjiki. Dichi twatiyaña kuwaha neyi antu amakwawu abula kutumanishila mpinji yetu, nikumwekesha kashinshi hakuhosha nanetu hampinji yinakuhanjekawu nanetu. Neyi twanukaña Lushimbi Lwalema, tunateli kulemesha ñahi antu itwashimwinaña?

12. Tunateli kwiluka ñahi mpinji yayiwahi yekalañawu antu hamatala mwiluña detu?

¹² Twatela kwiluka mpinji yayiwahi yakuhanjeka nawantu hamatalawu. Mwiluña detu ditwashimwinañamu, mpinjinyi yavula kuwanika antu ahamatala? Mpinjinyi yatelawu kututambwila chiwahi? Twatela kuwana njila yayiwahi kulonda tuhimpi ndandanda yetu. Kumatuña amakwawu, mudimu wetu wakushimwina kwitala nikwitala wendaña chiwahi nampinji yamelela. Neyi mwiluña denu dakushimwina antu ekalaña hamatala namelela, komana kwila muyaña nakushimwina kwitala nikwitala nampinji yamelela nehi? (Tañenu 1 Akorinda 10:24.) Tunateli kukuhwelela netu Yehova wukutukiswila, neyi tudihana hakuzata mudimu wakushimwina hampinji yekalaña antu amwiluña detu hamatalawu.

13. Tunateli kumulemesha ñahi mwiniitala?

¹³ Munjilanyi yikwawu yitunateli  kumwekesha kalemesha kudi muntu? Neyi tuwana muntu wunakukeña kudiza chalala, twatela kumushimwina chiwahi ilaña bayi tusweja kushimbulaku. Hekwawu mwiniitala nakukeña kuzatisha oyu mpinji kulonda yazatilumu nyidimu yindi yalema. Neyi yahosha nindi wukweti nyidimu yayivulu, twatela kumuleja netu tukushimbula wanyi nawa twatela kwila mutunahoshi. (Mat. 5:37) Hakukumisha kuhanjeka, twatela kumwihula kulonda yatuleji mpinji yitwakamwendela cheñi. Akwakushimwina amakwawu chayikwashaña neyi ahosha nawu: “Inakukeña nikayendeli cheñi. Chikuwaha neyi nikasambila kuyitemeshela nshiña nela meseji henohu kanda ninzi?” Neyi tuhimpa ndandanda yetu kwesekeja nawantu amwiluña detu, dikwila nawu tunakumwimbujola Pawulu, ‘wabulileña kwila yuma yakudikwasha nachu yomweni; chiña yowu kukwasha antu amavulu, kulonda ahandi.’—1 Kor. 10:33.

14-16. (a) Muloñadi wutwatela kumulejela mwiniitala chuma chitunendeli? Lumbululenu. (b) Njilanyi yamonañayi nkoñi wumu wendaña nindi yamukwashaña?

¹⁴ Twili netu munatambwili nshiña dichi munakañanyi kwiluka izu damuntu wunayitemesheli. Himuntu itunabuli kwiluka, nawa hakwihula yakudya yitwakeñesha nankashi. Dichi tunamwiluki wanyi niyuma yinakukeñayi. Hamuloña wakubula kukeña kumutiyisha nsonyi, tunateli kuhanjeka nindi chantesha, ilaña tumuleja netu hitukutwalekahu nakuhanjekaku. Munjila yikwawu, fwikijenu nenu muntu wunayitemesheli nshiña nadilumbululi  yomweni, tweluka netu watalaña hansañu yayakudya, nawa hakutuleja nindi wukweti nsañu yatela kutukwasha. Tukutiyilila nankashi kunsañu yinakutulejayi. Muloña twatiyaña kuwaha nankashi neyi antu ashikena kutuleja yuma yinakukeñawu nawa munjila yayiwahi. Tunateli kwila ñahi munjila yoyimu nawantu itwawanaña mumudimu wetu wakushimwina?

¹⁵ Mumaluña amavulu, twatela kumuleja mwiniitala chuma chitunendeli. Eñañi, tukweti nsañu yalema yabula kwilukayi mwiniitala, indi neyi chakwila tunadilumbululi wanyi nawa tushikena dakumwihula netu: “Neyi chakwila mukweti ñovu yakumanisha kukala mukaayi, kukalanyi kumunateli kumanisha?” Tweluka netu nkeñelu yakwihula lwihu lwamuchidiwu yekala yakwiluka yuma yinakutoñojokayi muntu kulonda tumuleji chahosha Bayibolu. Hela chochu, mwiniitala nateli kudihula nindi: ‘Indi iwu muntu hinyi, nawa muloñadi wunakuñihwilayi ilu lwihu? Natalishi mudihi?’ Dichi twatela kuhosha munjila yikuleñela mwiniitala yabuli kutujinoka. (Fwi. 2:3, 4) Tunateli kwila ñahi mwenimu?

¹⁶ Nkoñi wumu wendaña wawana nindi iji njila jinalondeluhu jamukwashaña hama. Neyi anadimushi dehi namwiniitala wukumwinka tilakiti yinakuhosha nawu, Komana Munakukeña Kwiluka Ñakwilu Yanawa Malwihu? nakuhosha nindi: “Tunakuhana iyi tilakiti kudi antu ejima amwiluña detu lelu. Yinakushimuna hamalwihu atanu nalumu ehulañawu antu amavulu. Tambulenu kopi yenu iyi.” Mana kwetu washimwini nindi antu amavulu atulishaña muchima neyi eluka chuma chitunendeli. Neyi twila mwenimu, chekalaña chaswayi kutwalekahu nakuhanjeka. Nkoñi wendaña wamwihulaña cheñi mwiniitala nindi: “Mwatoñojokahu dehi hanawa malwihu?” Neyi chakwila mwiniitala yatondahu lwihu lumu, mana kwetu wabakulaña tilakiti nakuhanjeka chahosha Bayibolu hanolu lwihu. Neyi nehi, watondaña lwihu nikutwalekahu kuhanjeka chakadi kumwekesha neyi kwosi yuma yelukayi mwiniitala. Hela chochu, kudi njila jajivulu jakutachikilamu kuhanjeka. Kumaluña amakwawu, enimatala akeñaña musambila kwila yuma yakeñañawu henohu kanda muyileji chuma chimunendeli. Chuma chalema hikuhimpa njila yakushimwinamu kwesekeja nachakeñañawu antu amwiluña detu.

17. Neyi chitunadizi muchinu chibaaba, tunateli kulondelaña ñahi Lushimbi Lwalema?

¹⁷ Twalondelaña ñahi Lushimbi Lwalema mumudimu wetu wakushimwina? Twayakamenaña enimatala hamutu hamuntu. Twalemeshaña enimatala niyuma yawu neyi tunayi hamatalawu. Twakeñaña kuya nakushimwina hampinji yekalañawu antu hamatala nihampinji yatela kutiyililawu. Nawa twashimwinaña nsañu yetu munjila yakwila antu amwiluña detu ashikeni dakwiteja.

18. Mwafumaña yumanyi yayiwahi neyi twakamenaña antu amwiluña detu neyi chitwakeñaña ninetu kutwakamena?

¹⁸ Mwafumaña yuma yayiwahi neyi twakamenaña antu amwiluña detu dakushimwina neyi chitwakeñaña ninetu kutwakamena. Neyi tuyakamenaña antu munjila yayiwahi nikuyitoñojokelaku, dikwila nawu tunakutoñeka chejeji, nikukonkomwena hakulema kwanshimbi jamuNsona, nikumulemesha Tata yetu wamwiwulu. (Mat. 5:16) Dichi twatela kuhanjekaña nawantu munjila yatela kuyikokola adizi nsañu yalala. (1 Tim. 4:16) Chili antu itwashimwinaña nsañu yaWanta akwiteja hela nehi, twazañalalaña hakwiluka netu tunakuzata nañovu hakukalakala mudimu wetu. (2 Tim. 4:5) Wonsu wetu tumwimbujoleña kapostolu Pawulu wasonekeli nindi: ‘Yuma yejima yinelaña, nelilaña nsañu yayiwahi kulonda nishimwini amakwawu.’ (1 Kor. 9:23) Dichi, tutwalekenuhu nakulondela Lushimbi Lwalema mumudimu wetu wakushimwina.