KAFWAMPI, natiyili kukala wanyi nami antu antesha hohu diwu atiyilili kumpanji yami yinahanini mu 1957. Kufuma tuhu kuwansi wami, nadiña nansonyi chikupu. Hinadiña kansi, nelileña neyi hamukala hanenzi antu naswamineña hela chakwila nayiluka.

Mwamweni, mukuhayama hakwiluka nenu nyidimu yayivulu yinazati mukuloñesha kwaYehova yinaleñeli kudikunda nawantu amavulu, kushilahu amabwambu jami niantu inabula kwiluka. Hela chochu, nichidi nansonyi nawa nadimonaña nami nashikahu wanyi, dichi hinatela kudihameka ami aweni hanyidimu yinakalakalañaku. Ilaña, namoni chashikijewaña chikaninu chaYehova chakwila nawu: “Nakakwinkaña ñovu; chalala nakakukwashañaku; chalala nakakukwataña chachiwahi nachikasa chami chachidiilu chakuloña kwami.” (Isa. 41:10) Wukwashu wunatambwilaña kudi akwetu akwaKristu, diyi njila yimu mwankwashilayi Yehova chikupu. Lekenu niyileji wukwashu wukwawu, kutachika hampinji yinadiña kansi.

Ifuku dimu haMulungu nantetemena muyaaka yamuma 1940, Elsie Huntingford wahempwili chisaka chetu hafamu kukabeta kambwela kaOntario. Amama diwu ashinkwili kuchisu, atata ashalili mwitala nanami muloña  adiña nansonyi neyi ami, nawa twadiña nakutiyilila. Atata amweni nawu Muhela Huntingford wadiña nakulandisha yuma nawa Amama anateli kulanda yuma yitwabulileña kukeña, dichi Atata edikili nakushimuna nawu tunakukeña wanyi. Muhela Huntingford wehwili nindi: “Munakuhosha nenu munakukeña wanyi kudiza Bayibolu tahindi?” Atata akwili nawu; “tunakukeña kudiza.”

Muhela Huntingford watuhempwili hampinji yayiwahi chikupu. Anvwali jami adiña mamembala akola chikupu muChechi yaUnited yakuCanada, ilaña iyi mpinji diyalekeluwu kuya miniyi chechi. Alekelelidi? Alekeli kuyaku muloña mukulumpi wachechi walamikili chipapilu hambañu hadiña majina awantu kwesekeja namali ahanineñawu. Anvwali jami abuli mali amavulu diwu adiña kwishina kwakweni, nawa akulumpi jachechi ayikakejeleña nawu ahani mali amavulu. Hamuloña wakukeña kutwalekahu namudimu windi, mukulumpi mukwawu wetejeli nindi hatañishileña yuma yakuhweleleliyuku. Dichi, twafumini muniyi chechi ilaña twachidiña kukeña njila yakumwilukilamu Nzambi.

Chineli hayina mpinji mudimu wawaYinsahu jaYehova awukaanishili muCanada, Muhela Huntingford wadiña nakudizisha chisaka chetu, wazatishileña hohu Bayibolu nikamukanda kanyanya keyila mwasonekeliyi nsañu. Chelukiliyi nindi hitunateli kumufukejela kunfulumenduku, watachikili kutwinka nyikanda yashindamena haBayibolu. Twelileña chitwamanisha kudiza, tusweka nyikanda. *

Muhela Huntingford washimwinineña nsañu yayiwahi neyena hela chakwila kwadiña kudimbulula nikukala kukwawu. Iyena damwekesheleñayi danleñeleli nikali namuchima wakuhakwilaku chalala. Chimwahitili chaaka chimu, kufuma hapapatisheweli anvwali jami nakwikala aYinsahu jaYehova, ninami nadihanini kudi Nzambi. Napapatisheweli haFebruary 27, 1949, muchizawu chachikuñu chanwishilileñawu andimi yimuna yawu. Nadiña nayaaka 17 yakuvwalika. Chinapapatisheweli nafwilileña kutachika mudimu wampinji yejima.

Nashintajalili kutachika wupayiniya hayina mpinji. Hayaaka yantesha, nazatilileña kunyambawulu nimukasanji muloña natoñojokeleña nami natela kwikala namali akudikwashamu nachu mumudimu wawupayiniya. Hela chochu, chineli nadiña kansi, nelileña chinakwata mali hohenohu niyizatisha. Dichi mana  kwetu wejina daTed Sargent wankolesheli nindi nikali wahamuka nikumukuhwelela Yehova. (1 Kushi. 28:10) Muloña wakwila ankolesheli munjila yayiwahi, natachikili kuzata mudimu wawupayiniya muNovember 1951. Nadiña hohu na 40 dola mali akuAmerica, ninkinga yayikulu, kushilahu nipakumuna dimu dadiha danyikanda. Ilaña mpinji yejima Yehova wadiña nakunkwasha muyuma yejima yinakeñeleña. Nasakililaña chikupu muloña mana kwetu Ted wankolesheli kutachika mudimu wawupayiniya. Chumichi chanleñeleli kwikala nankisu yayivulu.

Ifuku dimu namelela muAugust 1952, natambwilili nshiña kufuma kuToronto. Kasanji kaMutayi kawaYinsahu jaYehova kamuCanada antambikili nawu nikayi nakutachika kuzata mudimu wahaBeteli muSeptember. Hela chakwila natiyileña nsonyi nawa nadiña kanda niyeñahu dehi kumutayi, nazañaleli muloña apayiniya amakwawu anlejeli yuma yayiwahi yekala haBeteli. Henohu nalekeli kwakama.

Chimwahitili yaaka yiyedi kufuma hampinji yinashikili haBeteli, nahiñili hachifulu chaBill Yacos, neyi nkoñi mukwakulombola chipompelu (wutwatenaña netu nloñeshi wezanvu dawaeluda) waShaw Unit muToronto. * Chinashikijili yaaka 23 yakusemuka, natiyileña neyi nichidi kansi wabula kwiluka yuma. Ilaña Mana Kwetu Yacos wanlejeli chakwila munjila yakudizoza nawa mukukeña. Nawa Yehova wankwashili chikupu.

Mana Kwetu Yacos—wadiña namujimba watukumana, wadiña waseha nawantu. Wakeñeli amana kwetu, niwena amukeñeli. Mpinji yejima wayihempwileña hamatalawu bayi neyi hampinji yadiñawu nakukala hohuku. Mana kwetu Bill Yacos wankolesheli kwila mwomumu nikuzata hamu nawamana kwetu niahela mumudimu wakushimwina. Wahosheli nindi, “Ken, amana kwetu atela kwiluka nawu wayikeña. Ichi chikubuta hayiluwa yayivulu.”

Yehova wankwashili munjila yayiwahi nankashi kufuma tuhu muJanuary 1957. Muniwu kakweji dihu nasumbwili Evelyn, wafumini kuShikola yaGileyadi yamunaambala 14. Henohu kanda tudisumbuli, wadiña nakuzatila mumbaka yaQuebec mwahosheleñawu idimi daFrench. Munana mafuku Chechi yawaRoma Katolika diyalombweleña mbaka yaQuebec. Dichi, Evelyn wamweneña kukala hakuzata mudimu windi, ilaña watwalekeluhu washinshika hakuzata mudimu windi nikudi Yehova.

Cheñi nawa Evelyn wekala washinshika nikudami. (Efwes. 5:31) Kafwampi kashinshi kindi kekalili mukweseka chitwafumini hakudisumbula. Twadiña twakasa dehi lwendu netu twakayi kuFlorida, U.S.A., ilaña ifuku dalondeleluhu kufuma hachawija chetu, kasanji kamutayi kanlejeli nawu niyi kukubulakana kwesendeli mpinji yeneni kuBeteli yamuCanada. Eñani, iku kubulakana kwaluwañesheli lwendu lwetu, ilaña ami niEvelyn twafwilileña kwila yuma yatulejeliyi Yehova nindi twili. Dichi hitwayili halwendu lwetu lutwakeñeleña kuya nakunookaku. Muniwu mulungu, Evelyn wazatileña mumudimu wakushimwina kwakwihi nakasanji kamutayi. Hela chakwila idi iluña dadiña dambuka neluña daQuebec, watwalekeluhu nakushimwina.

Chamanini iwu mulungu, nahayamini chanlejeluwu  kuya nakuzata mudimu wawunkoñi kukabeta kamujika kaOntario. Nafumini tuhu hakusumbula nawa nadiña hohu nayaaka 25, nachidiña kanda niluki yuma yayivulu, ilaña twayili nakuzata iwu mudimu muloña twamukuhweleleli Yehova. Yadiña mpinji yamashika dichi twakandamini masuwa yanyamukili mukachi kawufuku, twendeleli hamu nawankoñi endaña amavulu akuluka yitembi afuntileña kumaluña kwazatilileñawu. Atukolesheli nankashi! Mana kwetu wumu watulejeli nindi tukaami mukapeka kamumasuwa kakukaama mwateleleli kukaamayi yomweni, kulonda tubuli kuchisha wufuku wejima saña twashakamina. Chikwachili nantetemena, henohu muhiti dehi mafuku 15 kufuma hitwadisumbwili, twayili nakuhempula kadizanvu kanyanya kuHornepayne, neyi chinashimuna hakusambila.

Kudi yuma yayivulu yadiña nakututalila kumbidi. Hampinji yitwazatilaña mudimu wawunkoñi wankambi kukumana kwachaaka cha 1960, antambikili kuya Shikola yaGileyadi yanaambala 36, nawa shikola yeniyi yadiña yatukweji ikumi yatachikili muFebruary 1961 kuBrooklyn, New York. Kafwampi natiyili kuwaha, ilaña hinazañaleli nankashuku muloña Evelyn amutambikili wanyi. Ilaña, kufwana ambanda amakwawu adiña nakukala kwokumu, Evelyn amulejeli kusoneka mukanda wakushimuna nindi neteji twambuki hadi tukweji ikumi. Evelyn wadilili, ilaña twaditejeli netu niyi kushikola nawa wazañalili hakwiluka nindi nakadiza yuma yayivulu kushikola yaGileyadi.

Haniyi mpinji, Evelyn wazatilileña hamutayi wakuCanada. Wadiña nakukooleka kwakushakama mukapeka kamu namuhela wawayishewa wejina daMargaret Lovell. Ami niEvelyn twadiña nakudanuka chikupu. Hela chochu, Yehova watukwashili nawa twatwalekeluhu nakuzata nyidimu yetu hitwambukili. Chanzañalesheli chikupu chadihaniniyi ñodami nindi tuzatishi mpinji yetu yitwateleleli kushakama hamu kulonda tumukalakeli Yehova nikuloñesha kwindi.

Chinashakamini kuGileyadi hadi tukweji tusatu, Mana Kwetu Nathan Knorr, walombweleña mudimu wakushimwina mukaayi kejima hayina mpinji, wanlejeli chuma chahayamishili chikupu. Wanlejeli nindi neyi nakeñi nateli kuleka Shikola yaGileyadi kulonda nifunti kumutayi wakuCanada nikazati neyi Ntañishi waShikola yaMudimu waWanta hadi mpinji yantesha. Mana Kwetu Knorr wanlejeli nindi nateleleli kwiteja wuna mutambi hela nehi. Neyi nakeñeli nadi kumanisha Shikola yaGileyadi nawa hadaha adi kuntemesha mumudimu wawumishonali. Wanlejeli cheñi nindi neyi nafuukwiluhu kufunta kuCanada, hiyadi kuntambika cheñi kushikola yaGileyaduku, hekwawu adi kufuntisha mumudimu wakushimwina kuCanada. Anlejeli nawu nikufuukulahu ami aweni hanyima yakuhanjeka nañodami hayina nsañu.

Chineli Evelyn wanlejeli nindi walemesha nyidimu yaNzambi, nashikeneni kuyileja Amana Kwetu Knorr nami, “Mudimu wejima wunakukeña kuloñesha kwaYehova nawu tuzati, tukuzata namuchima wumu.” Mpinji yejima twatoñojokaña netu hichikweti muloña nayuma yitwakeñañaku, twatela kuya nakuzatila kwejima kunatuleja kuloñesha kwaYehova nawu tuyi.

 Dichi, muApril 1961, nafumini kuBrooklyn nakufunta kuCanada nakutañisha Shikola yaMudimu waWanta. Chimwahitili mpinji, twekalili mamembala amuchisaka chaBeteli. Ilaña, nahayamini, chinatambwili mutambi wakuya kushikola yaGileyadi yanaambala 40, yatachikileña mu 1965. Evelyn wateleleli cheñi kusoneka mukanda wakwiteja nindi twambuki. Chimwahitili nyilungu yantesha, twazañaleli chelili yatambuli mukanda wakumwiteja kuya kushikola hamu nanami.

Chitwashikili kuShikola yaGileyadi, Mana kwetu Knorr watulejeli nindi atudizi ekala mushikola yazatishaña idimi daFrench neyi chitwadiña etu, akayitemesha kuAfrica. Ilaña chitwamanishili shikola atutemesheli cheñi kuCanada. Antondeli kwikala mukulumpi wamutayi (atenañawu makonu nawu nloñeshi waKometi yaMutayi). Nadiña hohu nayaaka 34 yakusemuka, namulejeli Mana Kwetu Knorr nami, “Nichidi kansi nankashi.” Ilaña wankolesheli chikupu. Kufuma tuhu hinatachikili kuzata iwu mudimu, nehwileña amana kwetu akulumpi, akuluka yitembi haBeteli henohu kanda nifuukuluhu yuma yamaneni.

Kuzatila haBeteli kunankwashi kudizila chikupu kudi antu amakwawu. Nalemeshaña nawa nahamekaña amamembala amakwawu amuKometi yaMutayi. Anankwashi cheñi munjila yayiwahi kudi akwaKristu amavulu amayala niambanda, atwansi niakulumpi, ahita muyuma yidi neyi yitwahitamu ekala hanu hamutayi nimuyipompelu yashiyashana mutunazatili.

Mudimu wahaBeteli wunankwashi cheñi kutañisha antu amakwawu nikukolesha chikuhwelelu chawu. Kapostolu Pawulu wamulejeli Timotewu nindi: “Shakamaku muyuma yiwadizili.” Watwalekeluhu nindi: “Nsañu jiwatiyili kudami mukachi kawayinsahu amavulu, jikunjiki antu ashinshika akatwesha kuleja akwawu nawa.” (2 Tim. 2:2; 3:14) Mpinji yikwawu akwetu akwaKristu añihulaña yuma yinadizi hadi yaaka 57 yinazatili haBeteli. Nakulaña hohu nami, “Kwikala namuchima wakunyakala kuzata nyidimu yinakukeñayi Yehova nindi muzati mukuloñesha kwindi, nikushindamena hawukwashu Yehova.”

Namonaña neyi kwiji nashika haBeteli haloshi iku nichidi kutiya nsonyi nawa neyi kansi weyala wabula kwiluka yuma. Hela chochu, haniyi yaaka yejimiyi Yehova diyi ‘wankwataña kuchikasa chami chachidiilu.’ Sweje-e dinu kuhitila mudi akwetu kwakwitiya, atwalekañahu kunkwasha hampinji yatelela namazu amawahi, Yehova wankoleshaña nindi: “Bayi wutiya womaku, nukukukwashañaku.”—Isa. 41:13.