1, 2. (a) Yesu washimwini nindi lushimbi lwamuchiyedi lwabadika Nshimbi yejima hilushimbinyi? (b) Tukuhanjeka hamalwihwinyi?

 HAKUMWESEKA Yesu, kaFwarisi wumu wamwihwili nindi: “Eyi Nkuluñaña, lushimbi lwabadika Nshimbi jejima lushimbinyi?” Neyi chitwadizili muchibaaba chinamani, Yesu wamwilili nindi, “Lushimbi lwabadika lwakusambila” dilu ilu: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima.” Yesu wabombeleluhu cheñi nindi: “Kudi nawa lwamuchiyedi lwafwana neyi ilu nawu, Keñaku mukwenu neyi chiwadikeña eyi aweni.”—Mat. 22:34-39.

² Yesu washimwini nindi twatela kukeña mukwetu neyi chitwadikeña etu aweni. Dichi twatela kudihula netu: Indi mukwetu hinyi? Tunateli kumwekesha ñahi netu twakeña mukwetu?

3, 4. (a) Yesu wazatishili chakutalilahwinyi hakwakula lwihu lwakwila nawu: “Mukwetu yowinyi?” (b) Indi kaSamariya wamukwashili ñahi muntu weyililuwu, weteluwu nakumushiya kwakwihi nakufwa? (Talenu mwevulu wakutachikilahu.)

³ Tunateli kutoñojoka netu mukwetu himuntu washakamaña kwakwihi, ibwambu detu twadikunda nindi nawa watukwashaña.  (Yish. 27:10) Ilaña toñojokenu chahosheliyi Yesu hamwihwiluwu kudi muntu wadimweneña kuloña nindi: “Mukwetu yowinyi?” Hakumwakula, Yesu wazatishili chakutalilahu chakaSamariya wamuwahi. (Tañenu Luka 10:29-37.) Tunateli kutoñojoka netu kapristu wamuIsarela nikaLevi adi kwila neyi chelaña mukwetu wamuwahi, hampinji yamwenuwu ona muntu weyililuwu, weteluwu nakumushiya kwakwihi nakufwa. Ilaña, amushili kwawu chakubula kumukwasha. Ona muntu amukwashili kudi kaSamariya, muntu wakumunza wawantu alemesheli Nshimbi jamwinkeluwu Mosi, ilaña atiyañeneña nawaYudeya wanyi.—Yow. 4:9.

⁴ Hakwila nawu yamukwashi ona muntu eteluwu kulonda yakoli, kaSamariya wamuhuñunwinini manji nivinyu hayilonda yindi. Mali ayedi amwinkeliyi mwiniitala akumuhemba nachu ashikilili munfwetu yamafuku ayedi. (Mat. 20:2) Tunateli kwiluka muntu wamwekesheli nindi wadiñi mukwawu wamuwahi kudi ona muntu akatishiluwu. Chakutalilahu chaYesu chatudizishaña chikupu nawu twatela kutiyila mukwetu wushona nikumukeña.

5. Indi muOctober 2012, ambuña Yehova amwekesheli ñahi nawu akeña akwawu hampinji yamwekeni wubanji wadimwekenaña?

⁵ Chakala kuwana antu akweti wushona neyi ona kaSamariya wamuwahi. Sweje-e, munanu ‘mafuku akukuminina’ akala mudi antu abulaña kutiyila akwawu wushona, asweja kuzuwa, abulaña kukeña yayiwahi. (2 Tim. 3:1-3) Chakutalilahu, kukala kunateli kumwekana neyi kwikala wubanji wadimwekenaña. Toñojokenu hachuma chamwekeni hampinji yaholokeli mpepela yasweja ñovu yatenenuwu nawu Hurricane Sandy, muNew York City, kumakumishilu aOctober mu 2012. Kabadi kamu kamusumba mwakisikili yuma nankashi, amakombi eyilili antu henohu adi dehi nakukala kwakubula malayiti, kesi niyuma yikwawu yakeñekaña. Mudodina iluña, aYinsahu jaYehova aloñesheli izanvu dakwashili akwawu aYinsahu niantu amakwawu. AkwaKristu elaña yuma yamuchidiwu muloña akeña akwawu. Njilanyi jikwawu mutunateli kumwekeshela netu twakeña mukwetu?

6. Indi mudimu wetu wakushimwina wendelaña ñahi hamu nakukeña akwetu?

⁶ Yikwashenu antu kulonda akoleshi wubwambu wawu naNzambi. Twakwashaña antu kuhitila mukuyileja nsañu ‘yakukundeja yekala munyikanda yajila.’ (Rom. 15:4) Chakadi nikujina, twamwekeshaña netu twakeña akwetu neyi tuyishimwina nsañu yalala yamuBayibolu. (Mat. 24:14) Kwenoku kukooleka kutukweti kwakushimwina nsañu yaWanta kufuma kudi, “Nzambi wakuchiñeja”!—Rom. 15:13.

7. Indi Lushimbi Lwalema hilushimbinyi, nawa twahetelañamu ñahi neyi tulwovwahila?

⁷ Londelenuña Lushimbi Lwalema. Ilu lushimbi alushimuna mumazu ahosheliyi Yesu muMpanji yindi yahaMpidi nindi: “Yejima yimunakeñi antu kuyililenu, ninenu nawa yililenu mwomumu. Muloña dimu mwaya nshimbi niatuprofwetu.” (Mat. 7:12) Neyi tumonaña akwetu kwesekeja nachatufumbiliyi Yesu, dikwila nawu tunakulondela mwaya “Nshimbi” (Kutachika nakushika kuKuhituluka) ‘niAtuprofwetu’ (nyikanda yawuprofwetu yaNsona yachiHeberu). Munyikanda yeniyi Nzambi washimuna hatooka to-o nindi wakiswilaña antu akeña akwawu. Chakutalilahu, Yehova wahosheleleli mudi Isaya nindi: “Hembenu wuñaji, ilenu yaloña . . . Muntu wukwila mwenimu nakooleki.” (Isa. 56:1, 2) Eñañi twakooleka muloña twakeña akwetu nikuyilila yuma yaloña.

8. Muloñadi chitwatela kukeñela ayilumbu jetu, nawa chumanyi chinateli kumwekana neyi twila mwenimu?

⁸ Keñenu ayilumbu jenu. Yesu wahosheli nindi: “Munatiyi cheliluwu nawu, Keñaku mukwenu,  helaku chilumbu cheyi. Ilaña ami nukuyileja nami keñenu ayilumbu jenu, ninawa ayikabishaña, yilombelenu; kulonda mwikali anyana kaTata yenu wudi mwiwulu.” (Mat. 5:43-45) Kapostolu Pawulu washimwini chikuma chochimu hampinji yasonekeliyi nindi: ‘Neyi chilumbu cheyi natiyi nzala, mwinki yakudya adyi; neyi natiyi mpwila, mwinki menji anwi.’ (Rom. 12:20; Yish. 25:21) Kwesekeja naNshimbi yamwinkeluwu Mosi, muntu wateleleli kukwasha chilumbu chindi neyi kanyama kindi nadimbuki nachiteli chindi. (Kwid. 23:5) Kudikwasha kwamuchidiwu kwaleñeleleña antu adiña adihela kwikala amabwambu. Hamuloña wakwila akwaKristu amwekeshaña kukeña, ayilumbu jetu amavulu alekaña kutuyandisha. Neyi tukeña ayilumbu jetu, hela tuhu antu aswejaña kutuyandisha, tunateli kutiya kuwaha neyi amakwawu ekala akwaKristu alala.

9. Yesu wahosheli nindidi hakuleta kuwunda nawamana kwetu?

⁹ “Londenu kuwunda nawantu ejima.” (Heb. 12:14) Twatela kufwila kuwunda ninawamana kwetu, muloña Yesu wahosheli nindi: “Neyi wudi nakutwala mulambu weyi kukameña, kwenoku hiwukwanuka neyi nidi namuloña namana kwami, shiyaku mulambu weyi kwenoku kukameña, wuyi wusambili kutiyañana namana kweyi; winzi dinu nakuhana mulambu weyi.” (Mat. 5:23, 24) Nzambi wukutukiswila neyi tukeña amana kwetu nikunyakala kuleta kuwunda nawamana kwetu.

10. Muloñadi chitukubulila kwikala akwakukeña yiluwa?

¹⁰ Bayi mwikala akwakukeña yiluwaku. Yesu wahosheli nindi, “Bayi musompeshaña akwenuku, kulonda abuli kuyisompesha ninenu. Muloña kusompesha kumukusompesha akwenu diku kwakayisompeshawu nachu ninenu; chesekelu chimukuyesekela akwenu dichi chakayesekelawu ninenu. Wukutaliladi kachibalu kadi mudisu damana kweyi, kwinza chipamba chidi mudisu deyeyi aweni hiwachimonañaku? Indi wukumwililadi mana kweyi neyi, Tali nikufumishi kachibalu kadi mudisu deyi; indi chipamba chidi mudisu deyeyi aweni? Eyi nfwikiji! Sambilaku kufumisha chipamba chidi mudisu deyeyi aweni, mwaka wumoni chachiwahi kufumisha kachibalu kadi mudisu damana kweyi.” (Mat. 7:1-5) Iyi hinjila yalema chikupu yatulejeliyi kulonda tubuleña kuwana yiluwa yanyanya mudi akwetu henohu etu tukweti yiluwa yamaneni!

11, 12. Njilanyi yambukaku yitwamwekeshelañamu netu twakeña mukwetu?

¹¹ Twakeñaña kumwekesha netu twakeña mukwetu munjila yambuka. Kufwana Yesu, twashimwinaña nsañu yayiwahi yaWanta. (Luka 8:1) Yesu wayinkeli atumbanji twindi mudimu ‘wakwilisha atumbanji munyunza yejima.’ (Mat. 28:19, 20) Neyi tuzataña iwu mudimu nañovu, twafwilaña kukwasha mukwetu kulonda yafumi munjila yabwambwañana yaya kukujilumuka, nakwikala munjila yanyanya yaya kuwumi. (Mat. 7:13, 14) Chakadi nikujina, Yehova watukiswilaña neyi tuzata muniyi njila.

¹² Kufwana Yesu, twakwashaña antu kulonda akeñeña yuma yakuspiritu. (Mat. 5:3) Neyi antu atiyilila, twazataña mudimu weneni wakuyikwasha kulonda ekali nawubwambu naNzambi kuhitila mukuyishimwina “nsañu yaNzambi yayiwahi.” (Rom. 1:1) Antu atambwilaña nsañu yaWanta akundamaña kudi Nzambi kuhitila mudi Yesu Kristu. (2 Kor. 5:18, 19) Dichi neyi tushimwinaña nsañu yayiwahi, dikwila nawu, tunakumwekesha netu twakeña mukwetu munjila yalema nankashi.

13. Mwatiyaña ñahi hakuzata mudimu wetu neyi akwakushimwina aWanta?

¹³ Twazañalalaña hakukwasha antu kulonda ovwahileña nshimbi jaNzambi jaloña kuhitila mukufuntila nikuyidizisha Bayibolu. Ichi chinateli kukwasha muntu wunakudiza Bayibolu kuhimpa chikupu chihandilu chindi. (1 Kor. 6:9-11) Twatiyaña kuwaha hama hakumona Nzambi chinakukwashayi antu “afuukwilawu dehi kumona wumi wahaya nyaka,” kuhimpa chihandilu chawu nakwikala nawubwambu wakola nayena. (Yil. 13:48) Antu amavulu alekaña kuneña nakwikala namuzañalu nawa alekaña kwakama nakumukuhwelela Tata yawu wamwiwulu. Twatiyaña kuwaha neyi tumona antu amaha anakudikita nañovu kulonda akoleshi wubwambu wawu naNzambi. Himunateli kwiteja nenu hakwikala akwakushimwina aWanta, tukweti kukooleka kwabadika kwakumwekesha netu twakeña akwetu munjila yadimenaku?

14. Mumazu enu, shimunenu njila jikwawu jakukeña jashimunawu ha 1 Akorinda 13:4-8.

¹⁴ Neyi tuzatisha mazu asonekeliyi Pawulu kutalisha hakukeña hakudikunda nawakwetu, tunateli kukañesha kukala kwakuvulu, tukwikala namuzañalu nawa Nzambi wukutukiswila. (Tañenu 1 Akorinda 13:4-8.) Tuhanjekenu hamazu ahosheliyi Pawulu kutalisha hakukeña kulonda twiluki chitwatela kuzatisha mazu ahosheliyi hampinji yitunakudikunda namukwetu.

15. (a) Muloñadi wutwatelela kumwekeshela kudiwunjika niluwi? (b) Yumanyi yikutuleñela kutondolwela ichima nikudinka wanta?

¹⁵ “Kukeña kwadiwunjikaña, kukweti niluwi.” Neyi chochadiwunjikayi Nzambi nikutiyila luwi antu abula kuwanina, anetu nawa twatela kumwekesha luwi nikudiwunjika neyi akwetu aluwañesha hela atuhosha chatama nikumwekesha winyi. “Kukeña hikwahetaña ichimaku,” eñañi neyi tukweti kukeña kwalala hitukufwilaña maheta amukwetu hela nyidimu yikwetiyi muchipompeluku. Cheñi nawa neyi tukweti kukeña, hitukudinkaña wanta hela kuditoheshaku. Kafwampi, “mesu akulembujola, nimuchima wadinka wanta, hela inoñu dawantu atama hinshidi.”—Yish. 21:4.

16, 17. Tunateli kulondela ñahi mazu asonekawu hamukanda wa 1 Akorinda 13:5, 6?

¹⁶ Kukeña kunateli kutuleñela kumwekesha yililu yayiwahi kudi mukwetu. Hitunateli kumudimba, kumwiyila, hela kwila chuma chidi chejima chinateli kufumpa nshimbi yaNzambi niyuma yatulejañayi nindi tulondeleñaku. Kukeña kukutuleñela cheñi kubula kutoñojokaña hansañu yetu etu aweni hohu chiña nijawakwetu.—Fwi. 2:4.

 ¹⁷ Kukeña kwalala hikwanyakalaña kuzuwaku nawa ‘hikwahembelaña mukwawu nkunyuku’ neyi kwiji tunakusoneka nsañu mumukanda hampinji yinatwiluwu katama kudi antu. (1 Tesa. 5:15) Neyi tuhembaña nkunyi kumuchima, tukumuneñeshaña Nzambi, dikwila nawu tunakusonswela kesi kanateli kubutuka nakutuletela wubanji niakwetu. (Lev. 19:18) Kukeña kwatuleñela kuzañalala nansañu yalala, ilaña hikwatuleñelaña ‘kuzañalala nayuma yabula kuloñaku,’ hela chakwila muntu wunatuvulumuni anakumukabisha.—Tañenu Yishimu 24:17, 18.

18. Chumanyi chitwadizaña hakukeña kwashimunawu ha 1 Akorinda 13:7, 8?

¹⁸ Talenu chalumbulwiliyi cheñi Pawulu kukeña. Wahosheli nindi kukeña “kwovwahilaña yuma yejima.” Neyi muntu yatuvulumuna, ilaña yalomba kwanakena, kukeña kukutuleñela kumwanakena. Kukeña ‘kwakuhwelelaña yuma yejima’ yekala Mwizu daNzambi nawa kwatuleñelaña kusakilila yuma yatudizishañawu mukuloñesha kwaYehova. Kukeña “kwachiñejaña yuma yejima” yasonekawu muBayibolu nawa kwatuleñelaña kukwasha antu amakwawu kulonda eluki yuma yitwachiñejaña. (1 Pet. 3:15) Cheñi nawa hampinji yitudi mukweseka twalombaña netu yuma yibuli kutukalila. Kukeña “kwatatakenaña mwahita yuma yejima,” chili anatuvulumuni, anakutuyandisha hela tunakumona kweseka kukwawu. Kubombelahu, “kukeña hikwakañanyañaku.” Antu ovwahila akatwalekahu kumwekesha kukeña haya nyaka.

19, 20. Kufumbanyi kwamunsona kukutuleñela tukeñeña mukwetu?

¹⁹ Neyi tuzatishaña kufumba kwamuBayibolu, tunateli kutwalekahu kukeña mukwetu. Kukeña kwamuchidiwu kwatuleñelaña kukeña antu ejima bayi neyi antu akuchisemwa chetu hohuku. Twatela kwanuka cheñi netu Yesu wahosheli nindi: “Keñaku mukwenu neyi chiwadikeña eyi aweni.” (Mat. 22:39) Nzambi niYesu akeñaña nawu tukeñi mukwetu. Neyi tukweti kukala namukwetu, dichi tuneluki wanyi mwakwilila, twatela kulomba kudi Nzambi kulonda spiritu yindi yajila yitukwashi. Neyi twila mwenimu, Yehova wukutukiswila nawa wukutukwasha kwila yuma munjila yakukeña.—Rom. 8:26, 27.

²⁰ Lushimbi lwakwila nawu tukeñi mukwetu neyi chitwadikeña etu aweni alutenaña nawu “lushimbi lwawanta.” (Yak. 2:8) Hanyima yakutena Nshimbi jikwawu jamwinkeluwu Mosi, Pawulu wahosheli nindi: ‘Hela neyi kwekala nshimbi jikwawu, jejima jahwila mwizu idi nawu, Keñaku mukwenu neyi chiwadikeña eyi aweni. Kukeña hikwakoñaña mukwawu chatamaku; dichi kukeña kwawanishaña nshimbi.’ (Rom. 13:8-10) Dichi, twatela kutwalekahu kukeña akwetu.

21, 22. Muloñadi wutwatela kumukeña Nzambi nimukwetu?

²¹ Hampinji yitunakutoñojoka chikupu muloña wutwatelela kukeñela mukwetu, chikuwaha neyi tutoñojokaña hamazu aYesu ahosheliyi nindi Tata yindi “watuntwishaña itañwa dindi nihadi atama nihadi amawahi, wanokeshaña nvula nihadi aloña nihadi aheña.” (Mat. 5:43-45) Twatela kutwalekahu nakukeña mukwetu, chili waloña hela nehi. Neyi chitwamona dehi hakusambila, kushimwina nsañu yaWanta diyi njila yalema yakumwekeshelamu kukeña. Oyi nkisu yikatambwila mukwetu neyi yeteja nsañu yayiwahi namuchima wumu!

²² Tukweti yuma yayivulu yatela kutuleñela tumukeñi Yehova chakadi kujinoka. Kudi cheñi njila jajivulu mutwatela kumwekeshela netu twakeña mukwetu. Neyi tumukeña Nzambi nimukwetu, dikwila nawu twalemesha mazu ahosheliyi Yesu haniyi nsañu yalema. Sweje-e dinu, tukumuzañaleshaña Tata yetu wamwiwulu wukweti kukeña, Yehova.