Nsona hiyakaanisha ichi chaaku chakwocha chibimbuku.

MuBayibolu mwekala nsañu yashimunaña nawu nyijimba hela mafwaha awantu afwa ayocheli. (Yosh. 7:25; 2 Kushi. 34:4, 5) Ichi chaya mukwila nawu ana antu hiyateleleli kuyijika munjila yayiwahuku. Ilaña neyi ocha yibimbi, mpinji yejima hichatalishili mukwila nawu hiyateleleli kuyijikaku.

Tweluka chumichi hansañu yahosha hakufwa kwaMwanta Sawulu nianyanindi awamayala asatu. Wejima wawu awana afwili halwileñawu njita nawaFwilistinu. Hakachi kawanyana afwili hadiña niJonatani ibwambu daDavidi wadikundiliyi nindi chikupu. Ayilobu awaIsarela ashakamineña muYabeshi Gileyadi chatiyiluwu chuma chamwekeni, anoneli yibimbi yejima yiwana, ayocheli nawa ajiikili mafwaha. Nkumininaku Davidi wayihamekeli ana aIsarela hachuma cheliluwu.—1 Sam. 31:2, 8-13; 2 Sam. 2:4-6.

Tukweti kuchiñeja kwamuNsona kwakwila nawu afu amba kayisañula, nawa Nzambi diyi wakasañula antu. Hela chakwila muntu wunafwi anamwochi hela anamujiiki, Yehova wukweti ñovu yakusañula cheñi muntu nakumwinka mujimba wawuha. Ana aHeberu asatu ashinshika akeñeleña kujahawu muluteñu lwakesi kwesekeja nalushimbi lwaheniyi Mwanta Nebukaneza, hiyatiyili woma wakufwaku, muloña elukili nawu Nzambi wamba kayisañula. (Dan. 3:16-18) Ichi dichi chuma chamwekeni nikudi ambuña Yehova ashinshika ajahiluwu nakwocha yibimbi yawu muyilombu yakuyandishila yawa Nazi. Ambuña Nzambi ambokamboka ashinshika anafwi nanyitendanzumbu hela munjila jikwawu chakwila kwosi niyidi yamujimba yamonawu. Hela chochu, amba kayisañula.—Chim. 20:13.

Yehova hatelela kukuñulula mujimba wamuntu wawukulu hakwila yamusañuluku. Nzambi wamwekeshaña iwu wunsahu kuhitila mukusañula akwaKristu awayishewa nawumi wamwiwulu. Kufwana Yesu, ‘ahandishiluwu muspiritu,’ akwaKristu awayishewa ayisañulaña neyi chochiyekalawu ilaña nanyijimba yakuspiritu. Hiyayaña mwiwulu hela nachidi chimu chamujimba wawu wawuntu wawukuluku.—1 Pet. 3:18; 1 Kor. 15:42-53; 1 Yow. 3:2.

Twakuhwelela netu muntu akamusañula bayi neyi hamuloña wakwila mujimba windi awocheli hela awujiikiluku. Ilaña akamusañula hamuloña wakwila twakuhwelela netu Nzambi wukweti ñovu nawa wafwilaña kushikija yikaninu yindi. (Yil. 24:15) Kafwampi, hitunateli kwiluka chikupu Nzambi chasañwileñayi antu muchihayamisha kushankulu hela chakasañulayi afu kumbiduku. Hela chochu, twamukuhwelela Yehova. ‘Wakoleshamu’ dehi kuhitila mukumusañula Yesu.—Yil. 17:31; Luka 24:2, 3.

AkwaKristu atela kusha muchima hayaaku yelañawu antu amwiluña dawu ninshimbi janfulumendi jahosha hayibimbi. (2 Kor. 6:3, 4) Nkumininaku, muntu yamweni hela chisaka anateli kufuukulahu neyi chakwila anakukeña kujiika chibimbi hela kuchocha.