1. Muloñadi Nzambi niMwanindi chaswejeluwu kudikeña?

 YESU KRISTU Mwana kaYehova, washimwini nindi: “Nakeña Tata.” (Yow. 14:31) Yesu wahosheli cheñi nindi: “Tata wakeña Mwana.” (Yow. 5:20) Chumichi hichatela kutuhayamishaku. Muloña, hayaaka yayivulu henohu kanda yenzi hamaseki, Yesu wadiña “mukalawenu” waNzambi. (Yish. 8:30) Yehova niYesu chazatilileñawu hamu, Mwana wadizili yuma yayivulu hayililu yaTata yindi nawa kwadiña yuma yayivulu yamuleñeleli yamukeñi tata yindi. Eñañi, kudikunda kwadikundawu dikwaleñeleli asweji kudikeña.

2. (a) Indi Nzambi watukeñeladi? (b) Malwihwinyi itukuhanjekahu?

² Ñimbi yamasamu Davidi wembili nindi: “Nakukeñi, eyi Yehova, yeyi ñovu yami.” (Mas. 18:1) Anetu twatela kumukeña Nzambi, muloña watukeña. Neyi tumwovwahilaña Yehova, wukumwekesha nindi watukeña. (Tañenu Kuhituluka 7:12, 13.) Chineli Nzambi hitwamumonañaku, komana chalala tunateli kumukeña? Indi kumukeña Yehova kwatalisha mudihi? Muloñadi chitwatela kumukeñela? Tunateli kumwekesha ñahi netu twamukeña Nzambi?

3, 4. Muloñadi wutwatelela kumukeña Yehova?

³ “Nzambi hiSpiritu,” dichi hitunateli kumumonaku. (Yow. 4:24) Ilaña, tunateli kumukeña Yehova, nawa Nsona yatukonkomwenaña nawu tumukeñi. Chakutalilahu, Mosi walejeli aIsarela nindi: “Wakakeñi Yehova Nzambi yeyi namuchima weyi wejima, nawumi weyi wejima, nañovu jeyi jejima.”—Kuhit. 6:5.

⁴ Muloñadi wutwatelela kusweja kumukeña Nzambi? Muloña watuleñeli nampwila yakukeña kumwiluka niwuswa wakumwekesha kukeña. Neyi tusweja kumwiluka, twamukeñaña Yehova chikupu nawa chatuleñelaña kwikala namuzañalu. Yesu wahosheli nindi: ‘Adi namuzañalu wowu eluka nawu akeñaña yuma yakuspiritu, muloña Wanta wamwiwulu wawu.’ (Mat. 5:3) Kutalisha hachuma chatenañawu antu amakwawu nawu mpwila yekala nawantu yakukeña kudifukula, mukanda wumu wahosha nawu: “Twahayamaña nankashi, nikwakama hakumona antu ejima chakeñakeñañawu, nikukuhwelela mudi muntu wabadika chikupu, kwejima kwaduwu.”​—Man Does Not Stand Alone, wasonekawu kudi A. C. Morrison.

5. Tuneluki ñahi netu kumukeñakeña Nzambi bayi neyi hikumanisha hohu mpinjuku?

⁵ Komana kumukeñakeña Nzambi hikumanisha hohu mpinji? Inehi, muloña wakeñaña nindi tumuwani. Kapostolu Pawulu washimwini hatooka chumichi hampinji yashimwinineñayi wunsahu kudi antu apompeli hampidi yaMarasa. Waheni wunsahu weniwu kwakwihi na­Parthenon, dikwila nawu tembeli yanzambi wamumbanda wawaAtenisi akushankulu. Fwikijenu neyi mwadiña hohu hampinji yahosheleñayi Pawulu hadi “Nzambi waleñeli mpata yamunu mwishina niyuma yejima yidumu,” nakulumbulula cheñi nindi, “Hashakamaña kwindi mumatembeli akutuña namakasa awantuku.” Kapostolu Pawulu wabombeleluhu cheñi nindi Nzambi ‘wafumishili kudi muntu wumu nyunza yawantu ejima, kulonda ashakami heseki dejima. Hakuyitoñwela yilaaka yawu, niñinza jawu mwakushakaminawu. Nindi akakeñakeñi Nzambi, hamwaha akamupapata, akamuwana; kutoña yena hekala kwakulehi nanetu ejimaku.’ (Yil. 17:24-27) Eñañi, antu anateli kumuwana Nzambi. A Yinsahu jaYehova akubadika hamiliyoni 7 nachikuku ‘anamuwani’ nawa amukeña nankashi.

6. Lushimbinyi lwashimwiniyi Yesu nindi dilu ‘lushimbi lwalema nawa lwabadika’?

⁶ Twatela kumukeña Yehova chakufuma hamuchima. Yesu walumbulwili hatooka to-o hampinji yamwihwiluwu kudi kaFwarisi nindi: “Eyi Nkuluñaña, lushimbi lwabadika nshimbi jejima lushimbinyi?” Yesu wamwakwili nindi: “Keñaku Yehova Nzambi yeyi namuchima weyi wejima, nawumi weyi wejima, namaaneyi ejima. Dilu lushimbi lwabadika lwakusambila.”—Mat. 22:34-38.

7. Chatalisha mudihi kumukeña Nzambi (a) ‘namuchima wetu wejima’? (b) ‘nawumi wetu wejima’? (c) ‘namaanetu ejima’?

⁷ Indi Yesu watalishili mudihi hakuhosha nindi twatela kumukeña Nzambi ‘namuchima wetu wejima’? Watalishili mukwila nindi twatela kumukeña Yehova namuchima wetu wejima wachifwikija, wasañumunaña mpwila yetu niyitoñojoka yetu yejima. Twatela cheñi kumukeña ‘nawumi wetu wejima’ muchihandilu chetu. Kubombelahu, twatela cheñi kumukeña Nzambi ‘namaanetu ejima.’ Munjila yikwawu, twatela kumukeña Yehova chikupu chakadi kujinoka.

8. Kumukeña Nzambi chikupu kukutuleñela kwiladi?

⁸ Neyi tumukeña Nzambi namuchima wetu wejima, nawumi wetu wejima, namaanetu ejima tukwikala atudizi amawahi Ezu dindi, tukwilaña nkeñelu yindi namuchima wejima nawa tukushimwinaña neyena nsañu yayiwahi yaWanta. (Mat. 24:14; Rom. 12:1, 2) Kumukeña Yehova namuchima wejima kukutuleñela kukundama chikupu kwakwihi nayena. (Yak. 4:8) Kafwampi, hitunateli kulumbulula yuma yejima yatukojejaña kumukeña Nzambuku. Hela chochu, tuhanjekenu hayuma yantesha.

9. Muloñadi chitwamukeñela Yehova hamu neyi Nleñi yetu nawa Watwinkaña yuma yejima?

⁹ Yehova diyi Nleñi yetu nawa diyi Watwinkaña Yuma Yejima. Pawulu wahosheli nindi: “Mudi yena dimu mutwahandilaña, dimu mutwendelaña, dimu mutwekalilaña.” (Yil. 17:28) Yehova watwinka iseki dadiwahi hitwashakamaña. (Mas. 115:16) Watwinka cheñi yakudya niyuma yikwawu yitwakeñaña yawahishaña wumi wetu. Dihu hafumini Pawulu hakuyileja antu akwakupesha amuLisitira nindi: “Nzambi wamumi . . . hayilekeli tuhu chakadi kuyishiyila wunsahu windi wakwila chachiwahuku. Wayinkelaña nvula yakufuma kwiwulu, niyilaaka yakudya, nakuyitiyisha kuwaha nayakudya, nikuluña mwaya nyichima yenu mwejima.” (Yil. 14:15-17) Komana yumiyi kwila yituleñela kumukeña Nleñi yetu, Watwinkaña yuma yejima nawa wukweti kukeña nehi?—Mukwa. 12:1.

10. Twatela kwila ñahi hamulambu watwinkayi Nzambi wukaleñela akafumishuhu nshidi nikufwa?

¹⁰ Nzambi watuloñeshela chuma chikaleñela akafumishuhu nshidi nikufwa kutwaswanini kudi Adama. (Rom. 5:12) Eñañi, “Nzambi wamwekeshaña kukeña kwindi yomweni kudetu, hohitwachidiñi akwanshidi Kristu watufwilili.” (Rom. 5:8) Chakadi nikujina, twamukeña Yehova chakufuma hamuchima wetu muloña watuloñeshela chuma chaleñelaña atwanakeni nshidi yetu neyi tubalumuka mumuchima nikukuhwelela mwifutu danyiloña daYesu.—Yow. 3:16.

11, 12. Munjilanyi mwatwinkelayi Yehova kuchiñeja?

¹¹ Yehova ‘watwinka kuchiñeja kwatuleñelaña twikali namuzañalu nikuwunda.’ (Rom. 15:13) Nzambi watwinka kuchiñeja kwatuleñelaña kuumika neyi chikuhwelelu chetu chidi mukweseka. Awayishewa akatwalekahu kwikala ‘ashinshika ndo-o nikukufwa, akayinka chibaaba chawumi mwiwulu.’ (Chim. 2:10) Antu ashinshika achiñejaña kushakama hamaseki, akadiluñisha nkisu yahaya nyaka yikekala heseki dejima muParadisa yakanawu. (Luka 23:43) Twatiyaña ñahi haniyi yuma yitwachiñejaña? Komana hitwatiyaña muzañalu nikuwunda, kushilahu nikumukeña Mukwakuhana ‘yuma yayiwahi yahanañawu yejima, niyamukunkulu yalala yejimaku’?—Yak. 1:17.

¹² Nzambi watwinka kuchiñeja kwakusañuka kwatuzañaleshaña. (Yil. 24:15) Eñañi, twaneñaña chikupu neyi tufwisha muntu itwakeña, ilaña hamuloña wakuchiñeja kwakusañuka, ‘hitwatiyaña wushona, neyi chatiyañawu antu acheñi abula kwikala nakuchiñejaku.’ (1 Tesa. 4:13) Hamuloña wakukeña, Yehova Nzambi wafwilaña kusañula afu, sweje-e antu ashinshika chidi neyi Yoba muntu waloña. (Yoba 14:15) Fwikijenu muzañalu wutwakatiya hakudimona cheñi nawantu akasañwilawu kuwumi wahamaseki. Twamukeña chikupu Tata yetu wamwiwulu watwinka kuchiñeja kwakuwahi kwakusañuka!

13. Yumanyi yamwekeshaña nawu Nzambi watwakamenaña chikupu?

¹³ Yehova watwakamenaña chikupu. (Tañenu Masamu 34:6, 18, 19; 1 Petulu 5:6, 7.) Muloña wakwila tweluka netu Nzambi yetu wukweti kukeña, wakwashaña antu ashinshika kudi yena mpinji yejima, twekala akiñewa hamu neyi ‘nyikoku yindi yadiishañayi.’ (Mas. 79:13) Kubombelahu, yuma yikatwililayi Nzambi muWanta wawuMesiya, yikamwekesha nawu watukeña chikupu. Mwanta windi watondayi, Yesu Kristu, chikafumishayi kutama, madombu nimakabi hamaseki, antu ovwahila akayikiswila, akashakama mukuwunda haya nyaka nawa akekala namaheta. (Mas. 72:7, 12-14, 16) Komana himunateli kwiteja nenu iyi yuma yatukanawu yatuleñelaña tumukeñi Nzambi yetu watwakamenaña namuchima wetu wejima, nawumi wetu wejima, nañovu yetu yejima nimaana etu ejimaku?—Luka 10:27.

14. Nzambi watwinka kukoolekanyi kwabadika kuwaha?

¹⁴ Yehova watwinka kukooleka kwabadika kuwaha kwakumukalakela neyi aYinsahu jindi. (Isa. 43:10-12) Twamukeña Nzambi muloña watwinka  kukooleka kwakuhakwilaku wanta windi nikukwasha antu ekali nakuchiñeja kwalala mukanu kaayi mudi makabi. Hela chochu, tunateli kuhosha nachikuhwelelu chikupu muloña twashimwinaña nsañu yayiwahi yaMwizu daNzambi walala, wakana yuma yitwachiñejaña yabulaña kukañanya. (Tañenu Yoshuwa 21:45; 23:14.) Kafwampi, hitukutwesha kuchinda yuma yatwinkayi nawa yatuleñelaña tumukeñi Yehovaku. Hanu dinu, tunateli kumwekesha ñahi netu twamukeña Yehova?

15. Indi kudiza nikuzatisha Izu daNzambi kunateli kutukwasha ñahi?

¹⁵ Kudiza nakashinshi nikuzatisha yuma yitwadizaña Mwizu daNzambi. Neyi twilaña mwenimu tukumwekesha netu twamukeña Yehova nawa twakeñaña izu dindi dikali ‘chejeji chamunjila yetu.’ (Mas. 119:105) Neyi tunakumona kukala, tunateli kukundejewa namazu amawahi akwila nawu: “Muchima wachikeka dehi puchi wadishona hiwukuwusekeshaku, eyi Nzambi.” “Luwi lweyi, eyi Yehova, hilukunkwatisha. Chimwekalaña yitoñojoka yayivulu mumuchima wami, kukundeja kundeja kuwankundejaña kwatiyishaña muchima wami kuwaha nankashi.” (Mas. 51:17; 94:18, 19) Yehova watiyilaña wushona antu akabakanaña nawa Yesu niyena watiyilaña antu wushona. (Isa. 49:13; Mat. 15:32) Kudiza Bayibolu kunateli kutukwasha kwiluka netu Yehova watukeña chikupu nawa ninetu twafwilaña kumukeña nankashi.

16. Indi kulomba mpinji yejima kwatuleñelaña ñahi kusweja kumukeña Nzambi?

¹⁶ Lombenuña kudi Nzambi mpinji yejima. Kulomba kwatuleñelaña kukundama kwakwihi ‘naMukwakutiya mwalombañawu antu.’ (Mas. 65:2) Neyi twiluka netu Nzambi nakwakula kulomba kwetu, twaswejaña kumukeña. Chakutalilahu, hadaha tweluka netu hetejaña nindi atweseki chabadika muñovu jetuku. (1 Kor. 10:13) Neyi kudi yuma yitunakwakama nawa tumulomba Yehova nakulembelela, tukwikala ‘nakuwunda kwaNzambi’ kwabadika. (Fwi. 4:6, 7) Mpinji yikwawu, tunateli kulombela mumuchima, neyi chalombeliyi Nehemiya, nakukuhwelela netu kulomba kwetu akukwakula. (Nehe. 2:1-6) ‘Chitwakakela mukulomba chakadi kuzeya’ nakwiluka netu Yehova watiyaña kulomba kwetu kwakulembelela, tukusweja kumukeña,  nikumukuhwelela netu wukutukwasha kuumika yuma yesekaña chikuhwelelu chetu.—Rom. 12:12.

17. Neyi twamukeña Nzambi, tukumonaña ñahi kupompa?

¹⁷ Ikalenu nachaaku chakuyaña kukupompa kwawakwaKristu, kupompa kwamaneni, nikupompa kwankambi. (Heb. 10:24, 25) A Isarela apompeleña nakutiyilila nikudiza hadi Yehova kulonda amutiyeña woma nikulondela Nshimbi jindi. (Kuhit. 31:12) Neyi twamukeña Nzambi chikupu chikwikala chaswayi kwila mwatulejañayi. (Tañenu 1 Yowanu 5:3.) Dichi, hitwatela kwiteja chuma chidi chejima chituleñeli kumona kupompa neyi chuma chamukunkulwayuku. Mwamweni, bayi twiteja chuma chidi chejima chituleñeli kuleka kukeña kwetu kwatachi kutwamukeñeli Yehovaku.—Chim. 2:4.

18. Kumukeña Nzambi kwatuleñela kwiladi kutalisha hansañu yayiwahi?

¹⁸ Shimwinenuña antu neyena “nsañu yayiwahi yalala.” (Ŋal. 2:5) Kumukeña Nzambi kwatusañumunaña kushimwina haWanta wawuMesiya waMwanindi akeñayi, wamba ‘kenda mwaya nsañu yalala’ haAmagedoni. (Mas. 45:4; Chim. 16:14, 16) Twazañalalaña chikupu hakuzataku mudimu wakwilisha atumbanji nikukwasha antu kulonda eluki kukeña kwaNzambi nituña dadiha dakanayi.—Mat. 28:19, 20.

19. Muloñadi chitwatela kumusakilila Yehova hakuloñesha atubiña abiñaña nyikoku yindi?

¹⁹ Musakililenuña Nzambi hakuloñesha njila yakubiña nyikoku yindi. (Yil. 20:28) Yehova diyi watwinka aeluda akwaKristu, atukwashaña mpinji yejima. Aeluda ekala neyi ‘kwakubatama mpepela nikwakweyama nvula; neyi tuloña twamenji twamwawuma, neyi wulelu welola deneni mwituña dasweja nkanza.’ (Isa. 32:1, 2) Neyi tuwana mwakwiyama twatiyaña kuwaha kwiyama mpepela yeneni hela nvula yeneni. Neyi kudi nkanza yeneni, twatiyaña kuwaha kubatama muwulelu welola. Awa mazu ankinji anakutukwasha kwiluka netu aeluda atukwashaña kuspiritu nikutukundeja. Neyi twovwahila anakutulombola mukachi ketu, twamwekeshaña netu twasakililaña chikupu ‘yamukunkulu yahanawu mudi antu’ nikumwekesha netu twamukeña Nzambi niKristu, Mutu wachipompelu.—Efwes. 4:8; 5:23; Heb. 13:17.

20. Neyi mwamukeña Nzambi, mukwila ñahi namazu ekala haYakoba 1:22-25?

²⁰ Neyi mukweti wubwambu wawuwahi naYehova, mukwikala ‘akwakwila mwaya mazu, bayi akwakukumina dakutiya hohuku.’ (Tañenu Yakoba 1:22-25.) Muntu ‘welaña mwaya mazu’ wukweti chikuhwelelu chamuleñelaña kuzata neyena mumudimu wakushimwina nikwakulahu hakupompa kwawakwaKristu. Muloña wakwila mwamukeña Nzambi chikupu, mukwovwahilaña ‘nshimbi jalala’ jaYehova, jashimunaña yuma yejima yakeñañayi nindi mwileña.—Mas. 19:7-11.

21. Kulomba kwenu kwakufuma hamuchima anateli kukufwanisha nachumanyi?

²¹ Kumukeña Yehova Nzambi kukuyileñela mumulombeña mpinji yejima chakufuma hamuchima. Chakadi nikujina, ñimbi yamasamu Davidi wateneneña Nshimbi yachitiyañenu yahosheleña hakwocha insensi ifuku niifuku chembiliyi nindi: “Kulomba kwami kushiki kudeyi [Yehova] neyi insensi; chinukwolola makasami kwiwulu chishiki kudeyi neyi mulambu wamelela.” (Mas. 141:2; Kwid. 30:7, 8) Kulomba kwenu kwakulembelela chacheni nimazu enu akufuma hamuchima akumushimeka nikumusakilila Nzambi, ekali neyi insensi yikweti ivumba dadiwahi demenañaku kulomba kwakuwahi.—Chim. 5:8.

22. Tukahanjeka hakukeña kwamuchidinyi muchibaaba chinalondeluhu?

²² Yesu wahosheli nindi twatela kukeña Nzambi niakwetu. (Mat. 22:37-39) Neyi chitwakadiza ichi chililu muchibaaba chikwawu, kumukeña Yehova ninshimbi jindi kukutukwasha kutiyañana chiwahi nawakwetu nikumwekesha netu twakeña akwetu.