1, 2. Muloñadi Pawulu chatiyililiyi wushona antu azeya?

 MPINJI yikwawu wejima wetu twazeyaña. Neyi tukata chipwembu hela yikatu yikwawu tunateli kuzeya chakwila tukukañanya nikuzata nyidimu yitwazataña mafuku ejima. Fwikijenu nenu mudana ñovu, bayi hadi mulungu wumu hela yiyedi hohuku, ilaña hadi tukweji twatuvulu. Neyi mudi nakukala kwamuchidiwu, komana himukusakilila neyi akwenu ayakamena chachiwahuku?

² Mpinji yikwawu, kapostolu Pawulu wazeyeleña chamukabishileñawu kudi antu abula kwikala muchipompelu niantu amuchipompelu. Kakavulu watoñojokeleña nindi hakutwesha kuumikaku. (2 Kor. 1:8; 7:5) Pawulu chatoñojokeleñayi hachihandilu chindi nikukala kwamweneñayi neyi mukwaKristu washinshika, wahosheli nindi: “Hinyi nazeyi chakadi kuzeyami?” (2 Kor. 11:29) Hakutena akwaKristu ashiyashana amuchipompelu, afwanishawu nayidi yamujimba, Pawulu wahosheli nindi ana ‘amwekanaña neyi hiyaheta ñovuku, diwu akweti nyidimu.’ (1 Kor. 12:22) Watalishili mudihi? Muloñadi chitwatela kumwena antu amwekanaña kuzeya neyi chayimonañayi Yehova? Kuyimona neyi chayimonañayi Yehova kukutukwasha ñahi?

3. Chumanyi chinateli kutuleñela kudiwula antu amuchipompelu adi mukukaankila?

³ Tunakushakama mukaayi munenzali yililu yakudibecha nawa antu avula kulemesha antu achidi nañovu niatwansi. Antu amavulu akoolekelaña ana amonañawu nawu azeya kulonda aheti yuma yinakukeñawu. Yililu yamuchidiwu yatama, dichi neyi kubabala nehi, nimuchipompelu tunateli kutachika kudiwula antu adi mukukaankila. Hela chochu, tunateli kwikala nayililu yayiwahi kulonda tumoneña antu azeya neyi chayimonañayi Nzambi.

4, 5. (a) Indi chakutalilahu chekala ha 1 Akorinda 12:21-23, chatukwashaña ñahi kwiluka Yehova chamonañayi kuzeyazeya kwawantu? (b) Twahetelañamu ñahi neyi tukwasha antu azeya?

⁴ Tunateli kwiluka Yehova chamonañayi kuzeyazeya kwawantu neyi tushinshika chakutalilahu chasonekawu mumukanda watachi wayisonekeleluwu Akorinda kudi Pawulu. Mukapetulu 12, Pawulu watwanukishaña nindi nichidi chamujimba wamuntu chakehelamu hela chabula ñovu chikweti mudimu. (Tañenu 1 Akorinda 12:12, 18, 21-23.) Antu amakwawu akuhwelela nawu yuma yadileñeli yayeni ajinookaña nawu yidi yamujimba yikwawu yalema wanyi. Ilaña, nsañu yawanañawu hakudiza chatuñawu mujimba, yamwekeshaña nawu yidi yamujimba yamonañawu nawu yalema wanyi yazataña mudimu walema. Chakutalilahu, antu amakwawu amonaña nawu kamunu kanyanya kakumwendu kalema wanyi; ilaña, ichi akimonaña nawu kakwashaña mujimba.

⁵ Chakutalilahu chaPawulu chamwekeshaña nawu antu ejima amuchipompelu chawakwaKristu alema. Kwambukaku naSatana wasawulaña antu, Yehova wamonaña ambuñindi ejima, kushilahu ninana azeya, nindi ‘alema.’ (Yoba 4:18, 19) Iyi nsañu yatela kutusañumuna wonsu wetu kulonda tutiyeña kuwaha netu twekala alema muchipompelu nihakachi kawantu jaNzambi mukaayi kejima. Chakutalilahu, toñojokenu hampinji yimwakwatili kashinakaji kulonda mumukwashi. Hadaha mwatachikili nikwenda chovu-chovu. Komana chimwamukwatili kuchikasa hichadiña chuma chalemaku nawa himwatiyili kuwahaku? Eñañi, neyi tukwasha akwetu anakaankili, twatiyaña muzañalu nawa twamwekeshaña chililu chakudiwunjika, kukeña nikupama. (Efwes. 4:15, 16) Tata yetu wukweti kukeña weluka nindi, antu amuchipompelu alemesha antu ejima amwekeshaña nawu akeña akwawu hichikweti muloña nakuzeyazeya kwawuku.

6. Mpinji yikwawu Pawulu wazatishileña ñahi mazu akwila nawu ‘kubula ñovu’ ‘nikukola’?

⁶ Hampinji yasonekeleliyi Akorinda, Pawulu wazatishili mazu akwila nawu ‘kubula ñovu’ ‘nikuzeya,’ muloña dichi chayimweneñawu akwaKristu akushankulu kudi antu abula kwitiya nawa dichi chadimweneñayi yomweni. (1 Kor. 1:26, 27; 2:3) Pawulu chahosheliyi hadi antu ‘akola,’ hakeñeleña nindi akwaKristu amakwawu adimoneña neyi abadika akwawuku. (Rom. 15:1) Ilaña, wahosheli nindi akwaKristu akola mukwitiya ekali adiwunjika nawantu achidi kanda akoli mukwitiya kwalala.

7. Chumanyi chinateli kutukañesha kukwasha antu adi mukukala?

⁷ Neyi tukwasha “atuzweñi,” tukumwekesha netu twamwimbujolaña Yehova nawa tukwikala nawuselewa windi. (Mas. 41:1; Efwes. 5:1) Hela chochu, mpinji yikwawu tunateli kukañanya kukwasha antu adi mukukaankila hamuloña wakutoñojoka munjila yaheña. Indi kwiji tuneluki wanyi mazu itwatela kuhosha, dichi tukutiya nsonyi nawa tukukañanya kukukwasha antu adi mukukala. Muhela wejina daCynthia, * atemukiluwu kudi nfumwindi,  wahosheli nindi: “Neyi amana kweyi aleka kuhanjeka neyi hela aleka kukwakamena neyi chatela kwila ibwambu deyi, wukuneña nankashi. Neyi wunakumona kweseka, wukukeña antu akukundejeña.” Davidi wakushankulu welukili chineñi chatiyaña antu neyi anayitemuki.—Mas. 31:12.

8. Chumanyi chikutuleñela tukwasheña chikupu antu adi mukukala?

⁸ Neyi twanukaña netu amana kwetu amakwawu niahela anazeyi hamuloña wayihuñu yinakumonawu, yidi neyi yikatu, kushakama muchisaka chambokelamu mukwitiya, hela chineñi, tukuyitiyilaña luwi chikupu. Anetu nawa ifuku dimu twamba kamona kukala kokumu. Henohu kanda eñili Mwituña daChikaninu, aIsarela, adiña atuzweñi nawa abulili ñovu mwituña daEjipitu, ayilejeli nawu bayi ‘achinchikisha nyichima yawu’ kudi amana kwawu adiña mukukalaku. Yehova wayilejeli nindi ateleleli kukwasha atuzweñi akeñekeleña kuyikwasha.—Kuhit. 15:7, 11; Lev. 25:35-38.

9. Chumanyi chitwatela kusambila kwila neyi hitukukwasha antu anakumona kukala? Lumbululenu.

⁹ Chatela tuyitwikeña nyiloña hela kuyijinooka, twatela kukolesha antu anakumona kukala namazu amuBayibolu. (Yoba 33:6, 7; Mat. 7:1) Chakutalilahu: Neyi muntu wudi hakatukutuku amukatisha mumaposu ahamukwakwa nawa amutwala kuchipatela, komana andotolu atachikaña kwihula neyi diyi wakojeja maposu? Inehi, ashikenaña dakumwinka muntu yitumbu. Munjila yoyimu, neyi mukwetu mukwakwitiya nazeyi hamuloña wakukala kunakumonayi, twasambilaña kumukolesha naBayibolu.—Tañenu 1 Atesalonika 5:14.

10. Munjilanyi mutukuhoshela netu antu amwekanaña neyi azeya diwu ‘aheta muchikuhwelelu’?

¹⁰ Neyi tutoñojokaña hakukala kunakumonawu amana kwetu, tunateli kumona kuzeyazeya kwawu munjila yacheñi. Toñojokenu hadi muhela wunomiki ikañesha muchisaka hadi yaaka yayivulu. Amakwawu ekala adizoza nawa amwekanaña kuzeya, ilaña amwekeshaña chikuhwelelu chakola niñovu. Neyi mumona mama yawantu wabula kusumbuka wenzaña mpinji yejima kukupompa namwanindi hela nawanyana, komana himwazañalalaña hachikuhwelelu chindi nikutatakena kwamwekeshañayuku? Toñojokenu cheñi hadi anyana anakukolela kuchalala hela chakwila amonaña kukala hashikola. Yuma yejimiyi, yatukwashaña kwiluka netu antu amwekanaña neyi azeya diwu ‘aheta muchikuhwelelu’ neyi chekala amakwawu hakachi ketu anakuhanda chiwahi.—Yak. 2:5.

11, 12. (a) Chumanyi chinateli kutukwasha kuhimpa yitoñojoka yetu kutalisha hakuzeyazeya kwawantu? (b) Twadizilañaku chumanyi kudi Yehova cheliliyi naAroni?

¹¹ Atukwashaña kuhimpa yitoñojoka yetu kulonda tumoneña kuzeyazeya kwawantu neyi chamonañayi Yehova kuhitila mukushinshika chamanishiliyi kukala nawambuñindi amakwawu. (Tañenu Masamu 130:3.) Chakutalilahu, neyi mwadiña hamu naMosi hampinji yatuñiliyi Aroni mukishi wamwana kañombi wawuru, mwadi kutiya ñahi chadiña nakudiyiñishayi Aroni? (Kwid. 32:21-24) Mwadi kumumona ñahi Aroni, chelili muhelindi Miriyami yamukojeji kutachika kumuhoshola Mosi hamuloña wakusumbula mumbanda wakumutaña wacheñi? (Kuch. 12:1, 2) Mwadi kwila ñahi hampinji yakañenyuwu aAroni naMosi kumulemesha Yehova, hampinji Yayinkeliyi menji muchihayamisha kuMeriba?—Kuch. 20:10-13.

¹² Yehova wadi kumubabesha Aroni hayiluwa yejima yeliliyi chakadi kumba mpinji. Ilaña Welukili nindi Aroni hadiña muntu watamaku nawa hakoñeli nshidi yaswejaku. Chamwekana neyi Aroni wetejeli yuma yatama hela  ikakeja dawantu amakwawu dimuleñeli kuheñuka munjila yaloña. Ilaña, chamulejeluwu yiluwa yakoñeliyi, washikeneni dakwiteja yiluwa yindi nawa wetejeli mwafuukwiliyi Yehova. (Kwid. 32:26; Kuch. 12:11; 20:23-27) Yehova watalili hohu hachikuhwelelu chaAroni nichabalumukiliyi mumuchima. Chimwahitili yaaka yayivulu, Aroni nimutaña windi ayanukileña nawu adiña amwakama Yehova.—Mas. 115:10-12; 135:19, 20.

13. Chumanyi chikutukwasha kuhimpa yitoñojoka yetu kutalisha hakuzeyazeya kwawantu?

¹³ Hakwila nawu tuhimpi yitoñojoka yetu yikali neyi yaYehova, twatela kushinshika chitwamonaña antu azeya. (1 Sam. 16:7) Chakutalilahu, twelaña ñahi neyi kampululu yakañanya kumwekesha kashinshi hakutonda yisela hela neyi yamwekesha yililu yatama? Chatela tusweji kumuzuwila, komana kwila tushinshika hayuma yitwatela kwila yikumukwasha kulonda yapami nehi? Twatela kuzata nañovu kulonda tukwashi muntu wunakukeña wukwashu, neyi twila mwenimu tukwikala nakashinshi nikukeña.

14, 15. (a) Yehova wamumweni ñahi Elija wabulili kumwekesha wulobu hampinji yantesha? (b) Yumanyi yitunateli kudizila kuchuma chamumwekeneni Elija?

¹⁴ Atukwashaña cheñi kulonda tumoneña akwetu chachiwahi kuhitila mukwesekeja yitoñojoka yetu nachuma cheliliyi Yehova nawambuñindi aneñeli. Elija wadiña hakachi kanana ambuñindi. Hela chakwila washindili atuprofwetu akutwamba aBayali 450 chakadi kutiya woma, Elija watemukili chatiyiliyi nawu Mwadi Yezebeli wakeñeleña kumujaha. Chendeliyi makilomita 150 hakuya kuBerisheba, wayili mwisaña mwamweni. Chazeyeliyi nalwendu lwalulehi lwendeliyi munkanza yayeni, ona kaprofwetu washakamini mwishina damutondu ‘nakulomba nindi yofwi.’—1 Anya. 18:19; 19:1-4.

¹⁵ Indi Yehova watiyili ñahi chamweniyi kaprofwetu  kindi washinshika naneñi chikupu? Komana wamukaanini kambuñindi muloña waneñeli hampinji yantesha nawa wakañenyi kumwekesha wulobu? Inehi! Yehova welukili kuzeya kwaElija nawa watemesheli kañelu kindi kulonda yamukoleshi. Kañelu wamulejeli Elija kapampa kayedi nindi yadyi yakudya. Yakudya yadiiliyi yamwinkeli ñovu yakwenda lwendu ‘lwasweja kuleha.’ (Tañenu 1 Anyanta 19:5-8.) Eñañi, henohu kanda yamuleji nshimbi jateleleli kulondelayi, Yehova wasambilili kutiyilila kudi kaprofwetu kindi nawa wamwinkeli yakudya.

16, 17. Tunateli kwakamena ñahi amana kwetu neyi chamwakamenenuwu Elija kudi Yehova?

¹⁶ Tunateli kumwimbujola ñahi Nzambi yetu watwakamenaña? Hitwatela kunyakala kumuleja muntu mwakwililaku. (Yish. 18:13) Chikuwaha neyi tusambila kuwundisha muchima nikumwekesha netu twayakamenaña antu adimonaña nawu ‘alema wanyi’ hamuloña wakukala kwachihandilu chawu. (1 Kor. 12:23) Neyi twila mwenimu, tukutwesha kuyikwasha kwesekeja nakukala kukwetuwu.

¹⁷ Chakutalilahu, toñojokenu hadi Cynthia itwatena hakusambila, atemukiluwu kudi nfumwindi nakumushiya nawanyana ayedi awambanda. Ashalili nkawawu. Chumanyi cheliluwu akwawu aYinsahu? Walumbulwili nindi: “Chitwayitemesheleli nshiña nakuyileja yuma yamwekeni, mwahitili hohu jiminiti 45 ashika nihetala detu. Adilili. Hiyatushili nkawetu hamafuku ayedi indi kwiji asatuku. Hamuloña wakwila hitwadyileña chiwahuku nawa twaneñeli chikupu, amanakwetu atusendeleña kumatala awu.” Chakadi nikujina chumichi chinayanukishi mazu aYakoba akwila nawu: ‘Neyi mana kwenu hela muhelenu wudi nawuvu, nabuli yakudya yalelu, mwinenu wumu hakumwila nindi, Endaku chachiwahi, tiyaku iyena, ikutaku; hakwila kumwinka yuma yakumujimba yanakaankiliyi nehi, chikukwashana ñahi? Dichi nichikuhwelelu chakadi nyidimu chikudifwila.’ (Yak. 2:15-17) Chineli amana kwetu niahela amuchipompelu chawu ayikwashili hampinji yatelela, Cynthia nawanyanindi awambanda ekalili nañovu yakuzata wupayiniya wakukwasha chimwahitili tukweji tutanu nakamu kufuma hamwenuwu kukala.—2 Kor. 12:10.

18, 19. (a) Tunateli kukwasha ñahi antu anazeyi hakapinji kantesha? (b) Anyi ahetelañamu neyi tukwasha antu anazeyi?

¹⁸ Hadaha mweluka dehi nenu muntu wunakuyekela nayikatu yamaneni mwahitaña mpinji hakwila yakoli. Munjila yoyimu, mukwaKristu wunakabakani nakukala kwamuchihandilu hela kukala kukwawu, mwahitaña mpinji yeneni hakwila yakoleshi wubwambu windi naNzambi cheñi. Eñañi, mukwetu mukwakwitiya watela kukolesha chikuhwelelu chindi kuhitila mukudiza nkawindi, kulomba nikuzata nyidimu yikwawu yawakwaKristu. Komana tunateli kwikala adiwunjika kushika nimpinji yikakoleshayi wubwambu windi naNzambi? Nawa haniyi mpinji, komana tukutwalekahu kumukeña? Komana tunateli kukwasha akwetu anazeyi hakapinji kantesha hakwila niwena adimoni nawu alema, nikwiluka nawu akwaKristu ekala nakukeña?—2 Kor. 8:8.

¹⁹ Twatela kwanuka netu hampinji yitwakwashaña amana kwetu, twekalaña namuzañalu wafumaña mukuhana. Twekalaña cheñi nachililu chakutiyila akwetu wushona nikudiwunjika. Ilaña kwekala yuma yayivulu yitwahetelañamu. Antu ejima muchipompelu azañalalaña nawa adikeñaña wumu namukwawu. Sweje-e dinu, twamwimbujolaña Yehova walemesha antu ejima. Eñañi, yumiyi yatusañumunaña wejima wetu, kulonda ‘tukwasheña akwetu abula ñovu.’—Yil. 20:35.