1, 2. Yehova wayimonaña ñahi ambuñindi ahamaseki?

 NEYI anvwali anakutala anyanawu anyanya anakuhema, kakavulu ahayamaña hawuswa wakuvwalika nawu wukwetuwu. Komana ninenu mwamonahu dehi chumichi? Mwana wumu nateli kwikala namaana muyuma yikwawu ilaña mwana mukwawu nateli kwiluka yisela yansolu hela yakusoñasoña. Hichikweti muloña nayawana yikweti anyanawuku, anvwali atiyaña kuwaha kwiluka wuswa wukweti anyanawu.

² Yehova niyena washaña muchima chikupu hadi anyanindi ahamaseki. Wamonaña ambuñindi amakonu nindi ‘hiyuma yalema yamunyunza yejima.’ (Hag. 2:7) Alema muloña akweti chikuhwelelu nawa adihana kudi yena. Hadaha ninenu mwamonaña nenu hakachi kawakwenu aYinsahu makonu, hadi akweti yawana yashiyashana. Amana kwetu amakwawu akweti yawana yakuhana chiwahi jimpanji, amakwawu niwena ayinka chawana chakuzata nyidimu munjila yayiwahi. Ahela amavulu akweti chawana chakudiza madimi acheñi nakuyizatisha mumudimu wakushimwina, amakwawu niwena akweti chawana chakukolesha antu anakukeña wukwashu hela kwakamena akata. (Rom. 16:1, 12) Komana hitwasakililaña hakwikala muchipompelu chawakwaKristu amuchidiwuku?

3. Malwihwinyi itukushinshikahu muchinu chibaaba?

 ³ Hela chochu, akwetu akwakwitiya amakwawu, kushilahu niatwansi hela amana kwetu achidi amaha muchalala, atela kuzata nañovu chikupu nyidimu yamuchipompelu nikudimona nawu adi hakachi kawamana kwawu amuchipompelu. Tunateli kuyikwasha ñahi hakwila azati hakumina ñovu jawu? Muloñadi wutwatelela kushinshika hohu yuma yayiwahi mudi amana kwetu, kulonda tuyimoneña neyi chayimonañayi Yehova?

4, 5. Indi nsañu yekala mumukanda wawaAnsompeshi 6:11-16 yamwekeshaña ñahi nawu Yehova wamonaña wuswa wawambuñindi?

⁴ Nsañu yayivulu yamuBayibolu yashimunaña nawu Yehova wamonaña yuma yayiwahi mudi ambuñindi nawa washinshikaña cheñi nihawuswa wukwetuwu. Chakutalilahu, hampinji yamutondeluwu Gideyona kulonda yayikuuli antu jaNzambi akabishileñawu kudi aMidiyani, watela wahayamini nankashi chamwimushiluwu kudi Kañelu nindi: “Yehova wudi naneyi, eyi chilobu mukwañovu.” Chamwekana hatooka to-o nawu hayina mpinji Gideyona hadimweni nindi ‘himukwañovuku.’ Wetejeli nindi hashikila mwokuku. Neyi chinamwekeshuwu mumpanji yinalondeluhu, Yehova wamukuhweleleli chikupu kambuñindi kubadika chadimweneñayi Gideyona yomweni.—Tañenu Ansompeshi 6:11-16.

⁵ Yehova wamukuhweleleli Gideyona nindi nateli kuyikuula aIsarela muloña Wamweni wuswa windi. Chatachi, kañelu kaYehova wamweni Gideyona chahulileñayi tidiku nañovu jindi jejima. Kudi chuma chikwawu chamuhayamishili kañelu. Kushankulu, andimi adiña nakuhulila tidiku hanji kulonda muzuñu wulelukeña nampepela. Ilaña, Gideyona wahulilileña tidiku yindi yantesha muwukamwinu wavinyu mukuswamujoka kulonda abuli kumumona kudi aMidiyani. Wadiña muntu wababala. Dichi chamutondeleliyi Yehova muloña wadiña ndimi wababala nawa wadiña iyala wamaana. Eñañi, Yehova wamweni wuswa windi nawa wamuzatishili.

6, 7. (a) Indi Yehova chamumweneñayi kaprofwetu Amosa chambukili ñahi nachamumweneñawu aIsarela amakwawu? (b) Chumanyi chamwekesha nawu Amosa wadiña muntu wataña?

⁶ Munjila yoyimu, nsañu yakaprofwetu Amosa yamwekeshaña nawu Yehova wamonaña wuswa mudi ambuñindi, hela chakwila antu amavulu amumweneña nawu walema wanyi. Amosa waditeneni yomweni nindi hikabiña kawanyikoku nawa mukwakukunkula nyishikimi, mutapu wamukabu wawatuzweñi. Yehova chamutondeliyi Amosa kushimuna mazu awunsompeshi amulejeluwu hadi wanta wanyitaña ikumi wawaIsarela apesheleña, aIsarela amakwawu atela amudiwileña.—Tañenu Amosa 7:14, 15.

⁷ Amosa wafumini kumukala, ilaña welukili tushidikilu ninsañu yayivulu yawanyanta amunana mafuku. Hadaha welukili chahandileñawu antu muIsarela nawa watela welukili chihandilu chanyunza yadikumashaninuwu nayu hamuloña wawantu enjileña nakulanda yuma yambokamboka. (Amosa 1:6, 9, 11, 13; 2:8; 6:4-6) Antu adiza chikupu jaBayibolu makonu amuhamekaña Amosa nawu hinsoneki wamuwahi chikupu. Iwu kaprofwetu wasonekeli mazu apela alema nawa mazu indi adifwana. Eñañi, Amosa chamutanyishiliyi kapristu watama Amaziya chakadi woma, chamwekesheli nawu Yehova watondeli muntu watelela nawa wamweni wuswa windi wabulili kumonawu antu.—Amosa 7:12, 13, 16, 17.

8. (a) Indi Yehova wamulejelidi Davidi? (b) Mazu ekala haMasamu 32:8 akoleshaña ñahi antu abulaña kudikuhwelela hela abula wuswa?

⁸ Eñañi, Yehova wamona wuswa mudi ambuñindi ejima. Wamulejeli chikupu Mwanta Davidi nindi wukamulombolaña ‘nadisu dindi.’ (Tañenu Masamu 32:8.) Komana munamoni iyi nsañu chiyinateli kutukolesha  ninetu? Hela chakwila twadikuhwelela wanyi, Yehova nateli kutukwasha kuzata nyidimu yitukubula kutwesha kuzata muñovu jetwetu aweni. Neyi chochakwashañayi nvwali mwanindi wunakudiza kwenda, Yehova niyena wakeñaña kutukwasha kulonda tuyiluku hambidi nawulunda wetu nayena. Yehova nateli cheñi kuzatisha akwetu akwakwitiya kulonda atukwashi kuzata hakumina ñovu yetu. Munjilanyi?

9. Tunateli kuzatisha ñahi kufumba kwaPawulu ‘kwakutoñojoka’ hansañu yawakwetu?

⁹ Pawulu wayikonkomweneni akwaKristu ejima ‘kutoñojoka’ hansañu yawakwawu akwakwitiya. (Tañenu Afwilipi 2:3, 4.) Chuma chalema chekala mukufumba kwaPawulu chakwila nawu, tushinshikeña yawana yikwetuwu akwetu nikwiteja netu akweti yawana yeniyi. Twatiyaña ñahi neyi muntu yatuhameka hayililu yayiwahi yitukweti? Kakavulu chatuleñelaña kutwalekahu kuzata chiwahi. Chochimu, neyi tuyileja akwetu akwakwitiya netu akweti yililu yayiwahi, tukuyikwasha kukolesha wulunda wawu naNzambi.

10. Anyi itwatela kuhameka?

¹⁰ Anyi itwatela kuhameka? Kafwampi, wejima wetu twakeñaña kutuhameka mumpinji mumpinji. Hela chochu, atwansi hela amana kwetu achidi amaha muchalala atela kwiluka nawu anakuzata nyidimu yamuchipompelu. Chumichi chikuyikwasha kwiluka nawu twayilemesha. Izu daNzambi dakoleshaña amana kwetu amuchidiwu nawu azateña nyidimu yayivulu muchipompelu, ilaña neyi tubula kuyihameka tunateli kuyifuntisha hanyima.—1 Tim. 3:1.

11. (a) Indi eluda wumu wamukwashili ñahi mukwenzi wadiña nansonyi? (b) Nsañu yaJulien yinayidizishi chumanyi?

¹¹ Eluda wejina daLudovic, akwashiluwu hampinji yadiñayi kansi, wahosheli nindi: “Neyi nisha muchima chikupu hadi mana kwetu, wayilañaku hambidi swayi swayi.” Ludovic wahosheli hadi mukwenzi wumu wadiña nansonyi wejina daJulien nindi: “Mpinji yikwawu Julien wafwilileña kuzata nyidimu yamuchipompelu, ilaña hadikuhweleleluku, dichi yuma yelileñayi hiyadiña nakulumbulukaku. Ilaña namweni nami wadiña namuchima waluwi nawa wakeñeleña kukwasha ana kwindi muchipompelu. Dichi chatela nijinoki yuma yelileñayi, nashinshikili hayililu yindi yayiwahi nawa namukolesheleña.” Chimwahitili mafuku, Julien wekalili nkoñi wakuzatila nawa chayinu mpinji hipayiniya wampinji yejima.

12. Chumanyi chakeñekaña hakwila tumukwashi muntu kuzata hakumina ñovu jindi? Shimunenu chakutalilahu.

¹² Neyi tunakukeña kukwasha akwetu kulonda azati hakumina ñovu yawu twatela kuyiluka. Neyi chinamwekeshi nsañu yaJuien, hakwila tumoni yililu yayiwahi yikwetiyi muntu ninyidimu yelukayi, hitwatela kutalaña hohu hakuzeyazeya kwinduku neyi tunakukeña kumukwasha. Yesu niyena hatalileña hohu hakuzeyazeya kwadiña nakapostolu Petuluku. Hela chakwila mpinji yikwawu Petulu wamwekeneña neyi washinshika wanyi, Yesu washimwineñahu dehi nindi wukekala wakola neyi ilola.—Yow. 1:42.

13, 14. (a) Baranaba wamwekesheli ñahi kashinshi hansañu yaMaku wachidiña kansi? (b) Indi mana kwetu wumu wakansi amukwashili ñahi neyi chamukwashiluwu Maku? (Talenu mwevulu wakutachikilahu.)

¹³ Baranaba niyena wamwekesheli kashinshi neyi Yesu hansañu yaYowanu atumbiluwu ijina dikwawu dakuRoma nawu Maku. (Yil. 12:25) Halwendu lwaPawulu lwatachi lwawumishonali lwayiluwu naBaranaba, Maku wadiña nakukalakala neyi ‘nkwashi,’ hadaha wayikwashileña mutunyidimu twakeñekeleña. Hela chochu, chashikiluwu muPamfwiliya,  Maku wayishili akwawu chisayikila. Ayili nkawawu kukabeta kachimunswa nakuhita mumaluña mwadiña atupondu. (Yil. 13:5, 13) Ilaña chimwahitili mafuku Baranaba wamweni yililu yayiwahi yaMaku, hashili maana hakuzeyazeya kwinduku nawa watwalekeluhu nakumudizisha mudimu. (Yil. 15:37-39) Chumichi chamukwashili Maku kwikala kambuña Yehova wapama. Kafwampi, Maku wadiña hamu naPawulu kuRoma hampinji yadiñayi Pawulu mukaleya, nawa niyena wemushili akwaKristu amuchipompelu chaAkolosi nawa kapostolu Pawulu wamuhamekeli. (Kol. 4:10) Toñojokenu chazañaleliyi Baranaba hakutiya nawu Pawulu nakumukeña Maku kulonda yamukwasheñaku.—2 Tim. 4:11.

¹⁴ Alexandre, atondeluwu tuhu wueluda wanukaña chamukwashiluwu kudi mana kwetu wamushili muchima nindi: “Hinachidiña kansi, kulomba hadi antu amavulu hichuma chankalilileña hama. Eluda wumu wanlejeli chinatela kudiloñesha kulonda niwundisheña muchima. Chatela yalejeña antu acheñi kulonda alombeña, kakavulu wanlejeleña nindi nilombeña hakubulakana kwakuya mumudimu wamwiha. Chimwahitili mpinji, nalekeli kuzaala.”

15. Indi Pawulu wayihamekeli ñahi amana kwindi?

¹⁵ Neyi tumona yililu yayiwahi yikwetiyi mukwetu mukwaKristu, komana twamuhamekaña? Mukapetulu 16 kamukanda waAroma, Pawulu wahamekeli akwawu akwakwitiya akubadika ha 20 amweniyi nindi adiña nayililu yayiwahi. (Rom. 16:3-7, 13) Chakutalilahu, Pawulu wetejeli nindi Andironiku naYuniya, amukalakeleli Kristu hadi yaaka yayivulu kubadika yena, nawa wakonkomweneni hakuumika kwomikiluwu neyi akwaKristu. Pawulu wamuhamekeli nimama yaRufusa, hadaha wateneni chamwakameneniyi hakusambila.

16. Chumanyi chafumañamu neyi tuhameka atwansi?

¹⁶ Mwafumaña yuma yayiwahi neyi tuhameka amana kwetu chakufuma hamuchima. Toñojokenu hadi kansi wejina daRico, wakuFrance, adimbulwileñawu kudi tata yindi wabulili kwikala mukwakwitiya nawa wamukaanishili Rico kupapatishewa. Rico watoñojokeleña nindi wateleleli kuhembelela sampu nakuli kwesekeja nanshimbi kulonda yatachiki kumukalakela Yehova chikupu. Waneñeleña cheñi muloña akwawu kushikola adiña nakumuseha. Eluda wamuchipompelu wejina daFrédéric, etejeluwu kudiza naniwu kansi weyala washimwini nindi: “Namuhamekeli Rico muloña ikañesha damweneñayi damwekesheli nawu, wadiña nawulobu wakushimuna yuma yakuhwelelayi.” Awa mazu akumuhameka amukolesheli Rico kulonda yatwalekuhu kwikala wambukaku nawa amukwashili kukundama kwakwihi natata yindi. Rico wapapatisheweli chashikijiliyi yaaka 12 yakuvwalika.

17. (a) Tunateli kukwasha ñahi amana kwetu kuyilaku hambidi? (b) Mishonali wumu washili ñahi muchima hadi amana kwetu atwansi, nawa mwafumini chumichi?

¹⁷ Mpinji yejima yitunahameki akwetu akwakwitiya ahana mpanji chiwahi hela anazati nañovu, dikwila nawu tunayinki akwetu ñovu yakumukalakela Yehova chikupu.  Sylvie, * wunazatili haBeteli yamuFrance hayaaka yayivulu, wahosheli nindi ahela niwena atela kuhameka amana kwetu. Wahosheli nindi ambanda anateli kusakilila hayuma yashiyashana yamonañawu. Dichi mazu “awu akukolesha anateli kwesekana nayuma yahoshañawu amana kwetu akuluka yitembi.” Wabombeleluhu nindi: “Nikweti mudimu wakuhameka akwetu.” (Yish. 3:27) Mishonali wejina daJérôme, wakuFrench Guiana, nakwashi atwansi amavulu awamayala kushikahu hakuzata mudimu wawumishonali. Wahosheli nindi: “Namonaña nami chinahameka amana kwetu atwansi hayuma yinakwilawu chiwahi mumudimu wakushimwina hela kwakula chiwahi, azataña chiwahi nankashi. Nawa chumichi chayileñelaña kutwalekuhu kuzata nañovu.”

18. Muloñadi kuzatila hamu nawatwansi chikwawahila?

¹⁸ Tunateli cheñi kuyikolesha akwetu akwakwitiya kutwalekahu kukolesha wulunda wawu naNzambi neyi tuzataña hamu nawu. Eluda nateli kumuleja mana kwetu wakansi weluka chikupu kuzatisha kompyuta kulonda yapulinti nsañu yidi ha jw.org yinateli kukolesha atushinakaji abula kompyuta. Hela neyi munakuzata Hetala daWanta, kwila mumuleja mana kwetu wakansi kulonda muzatili nindi hamu nehi? Neyi mwila mwenimu mukwikala nampinji yakwiluka wuswa wukwetuwu atwansi nawa mukuyihameka nikumona yuma yikafumamu.—Yish. 15:23.

19, 20. Muloñadi chitwatelela kukwasha akwetu kukolesha wulunda wawu naNzambi?

¹⁹ Yehova chamutondeliyi Yoshuwa kwikala nlomboli yawaIsarela, wamulejeli cheñi Mosi nindi ‘yamukoleshi’ ‘nikumukundeja’ Yoshuwa. (Tañenu Kuhituluka 3:28.) Antu amavulu nankashi anakwikala akwakudifukula muchipompelu chetu chamukaayi kejima. Bayi neyi aeluda hohu diwu atela kukwasha amana kwetu atwansi niantu achidi amaha kulonda azateña hakumina ñovu jawuku, ilaña akwaKristu ejima akuluka yitembi atela kuyikwasha. Dichi antu amavulu anakutachika kuzata mudimu wampinji yejima, nawa antu amavulu ‘anakushikahu hakutañisha amakwawu.’—2 Tim. 2:2.

²⁰ Hela twekala muchipompelu chatuñawu dehi chili mwizanvu danyanya dinakukula kulonda dikali chipompelu, tunateli kukwasha amana kwetu kulonda kumbidi akazati chiwahi. Chuma chatela kutukwasha hikumwimbujola Yehova, wamonaña yililu yayiwahi mudi ambuñindi mpinji yejima.