Hadaha mwelukahu muntu aseñawu, indi kwiji mweluka amavulu. Mwayiluka muloña antu amavulu anakudiseña nankashi. Chakutalilahu, nsañu yasandujoleluwu muPoland yamwekesheli nawu antu adi nayaaka 30 anashakami muwuluwi hadi yaaka yisatu hela yitanu nachimu diwu avula kudiseña; nawa bayi neyi antu adi naniyi yaaka diwu adiseñaña hohuku.

Kafwampi, “[muEurope] chibalu chawantu adisumbulaña adiseñaña,” ichi dichi chashimuna chileji chamutayi wumu muSpain. (Family Policy in Spain) Chumichi chinakumwekana nimumatuña amakwawu aheta.

Chumanyi chinakukojeja antu kusweja kudiseña? Muntu wumu wakuluka yitembi munsañu jawulu wakuEastern Europe wahosheli nindi: “Kudiseña kwamwekeshaña hatooka wufwinda watachikili dehi, dikwila nawu, kumana kwawulunda nawa chafumañamu hikwambuka, nawa chumichi chaletaña chineñi chikupu.” Wabombeleluhu nindi: “Kusweja kuneña nankashi, kuhila, kuditoñesha, kumona neyi dikukuma kwayuma yejima nikutiya nsonyi,” diyi yuma yavula kumwekena. Mpinji yikwawu yumiyi yaleñelaña muntu kukeña kudijaha. “Neyi antu adiseñela muchota chanyiloña, halondelaña yuma yikwawu. Hamuloña wakutiya wuudi nikumona neyi anamushiyi chisayikila, muntu anaseñuwu watachikaña kutoñojoka nindi: ‘Chineli ananseñi dehi, antu akunmonaña ñahi? Nukuhanda kwanka?’”

Hakwanuka chatiyileñayi yaaka yakunyima, Ewa wahosheli nindi: “Natiyili nsonyi yakadi kutiyañahu dehi chanlejeluwu nawu wulu wunamani, antuñi nami niamabwambu akuntenaña nawu ‘amuseña.’ Nahilileña nankashi. Chineli nashalili nakuhemba nyana yiyedi yanyanya, nazatileña nyidimu yamama yawantu niyatata yawantu.” * Adam, wakalakeli hawueluda yaaka 12, wahosheli nindi: “Nasawuka chikupu chakwila mpinji yikwawu nahilaña, nawa nakeñaña kwikala nkawami.”

Muloña wakusweja kwakama hayuma yikamwekana kumbidi, antu amakwawu akabakanaña chikupu hakwila nawu awundishi muchima, hela chakwila mwahita dehi yaaka. Anateli kutoñojoka nawu kwosi muntu wayakamenaña. Kubombelahu, mukwakusoneka nsañu wumu wahosheli nindi, atela “kuhimpa yitoñojoka yawu nikwiluka chakuumika kukala kukwetuwu.”

Iyala wejina daStanisław wanukaña nindi: “Chitwadiseñeli, nkulu nami wankaanishileña kuya nakutala anyanami ayedi awambanda. Ichi chaletesheli nitoñojokeña nami kwosi muntu wañakameneneña nawa namweneña nami niYehova nañumbi. Natoñojokeleña nami nikufwa kunawahi. Chimwahitili mpinji nelukili nami natoñojokeleña mwaluwa.” Mumbanda  wejina daWanda aseñeluwu niyena walulutileña muchihandilu chindi hamuloña wakubula kwiluka yuma yikamwekana kumbidi, wahosheli nindi: “Nelukili chikupu nami chimwahita mpinji, antu acheñi niakwetu akwakwitiya akañushaña maana wanyi hela tuhu anyanami akuyakamenaña wanyi. Hela chochu, chayinu mpinji namoni amana kwetu chatukwashiluwu hampinji yinafwilileña kukulisha anyanami kulonda ekali akwakudifukula aYehova.”

Awa mazu ahosheluwu anakumwekesha nawu neyi antu adiseña ashalaña nachineñi chikupu. Anateli kutachika kudimona munjila yaluwa, nikutoñojoka nawu ashikilamu wanyi nawa kwosi wunateli kuyisha maana. Anateli cheñi kutwika nyiloña antu ashakamañawu nawu. Nkumininaku, anateli kutachika kutoñojoka nawu antu amuchipompelu akamenaña wanyi nawa adana luwi. Ilaña, yuma yamwenuwu aStanisław niWanda yamwekeshaña nawu antu aseñañawu elukaña nawu amana kwawu niahelawu ayakamenaña chikupu. Kafwampi, akwetu akwaKristu akamenaña munjila yabadika nawa hakusambila himunateli kwiluka nenu anakuyikwashaku.

Anukenu nenu, hela chakwila tukuzata hakumina ñovu yetu hakukwasha akwetu akwakwitiya aseñawu, mpinji yikwawu atiyaña wuudi. Sweje-e, ahela aseñawu anateli kutoñojoka nawu antu antesha hohu diwu ayakamenaña. Alicja wetejeli nindi: “Munahiti dehi yaaka yitanu nayisatu kufuma hanseñeluwu. Ilaña nichidi kudimona neyi nashikilamu wanyi. Neyi natiyi muniyi njila, nakeñaña kwikala nkawami nakudila nikudishona.”

Iyi yuma yinashimunuwu yavula kumwekena antu aseñawu, hela chochu Bayibolu yatufumbaña nawu hitwatela kudambula nkawetuku. Neyi tukañanya kwovwahila iku kufumba dikwila nawu tunakukaana “maana alala ejima.” (Yish. 18:1) Hela chochu, neyi muntu wunakutiya wuudi wamumbanda hela weyala, watela kwiluka nindi wukwila chuma chamaana neyi yabula kusweja kulomba wukwashu kudi muntu weyala hela wamumbanda. Neyi mwila mwenimu, kwosi muntu wukutachika kwikala nayitoñojoka yakufwila mukwawu.

Akwetu akwakwitiya aseñawu anateli kuneña nikwakamena nankashi hachihandilu chawu chakumbidi nawa atiyaña wuudi hela kumona neyi ayumba chisayikila. Neyi twiluka netu antu atiyaña muniyi njila nawa chakala kuumika, twatela kumwimbujola Yehova kuhitila mukuyikwasha amana kwetu niahela. (Mas. 55:22; 1 Pet. 5:6, 7) Twatela kwiluka chikupu netu chitwayikwasha munjila yidi yejima akutiya kuwaha. Eñañi, akuwana amabwambu alala muchipompelu.—Yish. 17:17; 18:24.