KATHERINE wakulilili muUnited States nawa chashikijiliyi yaaka 16 yakusemuka wapapatisheweli nakwikala Chinsahu chaYehova. Wadikitileña chikupu mumudimu wakushimwina ilaña mwiluña mwashimwinineñayi antu antesha hohu diwu atiyilileña nsañu yaWanta. Wahosheli nindi: “Natañileña nsañu yamwekeshaña antu alombeli kudi Nzambi kulonda ayitemesheli muntu wakuyikwashaku kumwiluka. Nakeñeleña kuwana muntu wamuchidiwu ilaña namuwanini wanyi.”

Chashimwininiyi mwiluña dodimu hampinji yayilehi, Katherine watachikili kutoñojoka kuya kwiluña kwekala antu akeñaña kutiyilila nsañu yaWanta. Hela chochu, wajinokeli neyi chakwila wukutwesha kuya. Washiyahu dehi chisaka chindi kamu hohu muwumi windi nawa yadiñi nyilungu yiyedi hohu, ilaña wadiñi nakuyanuka ifuku niifuku. Hela chochu, walekeli kwakamena muloña wakeñeleña kwikala namuzañalu wafumaña mukukwasha antu amukeñakeñaña Yehova. Hanyima yakutoñojoka hamatuña ambokamboka kwatela kuyayi, wasonekeleli kumutayi waGuam nawa watambwilili nsañu yakeñeleñayi. MuJuly 2007, henohu wudi nayaaka 26, Katherine wayili kuSaipan, chitutu chekela haKaluñalwiji kaPacific, hekala makilomita kwakwihi na 10,000 kufuma kwawu. Yumanyi yadiluñishiliyi kuna kwiluña kwayili?

Chashikiliyi muchipompelu chachiha, hashimbwili niwanyi Katherine waweni Doris, mumbanda wadiña nayaaka yamuma 40 wetejeli kudiza Bayibolu. Chadiziluwu tupetulu tusatu twakusambila mumukanda waChatañishaña Bayibolu, Katherine watachikili kwakamena. Washimwini nindi: “Doris wadiña kadizi wamuwahi, dichi hinakeñeleña kumuluwañeshaku. Nadiñi Kanda nilomboleñahu dehi kadizi waBayibolu wakwila tunakudiza nindi mpinji yejima, dichi natoñojokeli nami Doris wakeñekeleña kumudizisha kudi muhela wakuluka yitembi hadaha muyesekenawu yaaka.” Katherine walombeli kudi Yehova kulonda yamukwashi kuwana muhela watela kumudizisha Doris. Kuhiñahu wafuukwiluhu kumuleja Doris nindi wukukeña muntu wacheñi wukumudizishaña.

Katherine washimwini nindi: “Henohu kanda nimuleji iyi nsañu, Doris wanlejeli nindi wadiñi nakukala kwakeñeleñayi kunleja. Chanlejeliyi kukala kwadiñiyi naku, ninami namulejeli Yehova chankwashiliyi kuzata nakukala kokumu muchihandilu chami. Wansakililili.” Kuhiñahu Doris wamulejeli Katherine nindi: “Yehova nakukuzatisha eyi kulonda wunkwashi. Ifuku diwenjili hetala dami katachi, nadiñi  nakutaña Bayibolu nawa nayitañili hamaora amavulu. Nadilileña nikumulomba Nzambi nami yatemeshi muntu wakunkwasha kulonda niluki Bayibolu. Dichi eyi wenjili nakudondomwena kwitala. Yehova wakwili kulomba kwami!” Katherine wadiñi nakuwulumuna madilu hampinji yashimwineñayi iyi nsañu yakuhizumwisha. Katherine wahosheli nindi: “Nsañu yahosheliyi Doris yamwekesheli nawu Yehova wakwili kulomba kwami. Yehova wanlejeli nindi nateli kutwalekahu nakumudizisha Doris.”

Doris wapapatisheweli mu 2010, ichi wadizishaña atudizi aBayibolu amavulu. Katherine nindi: “Nasakililaña chikupu muloña mpwila yinadiñi nayu hampinji yayilehi yakukwasha muntu washinshika kwikala kambuña Yehova yashikijeweli!” Makonu, Katherine wazataña wupayiniya wadimena kuKosrae, chitutu chekala haKaluñalwiji kaPacific.

Amana kwetu niahela akubadika nkulakaji (adi nayaaka kutachikila ha 19 nakushika ku 79) azatila dehi kudi kukaankila kweneni kuMicronesia. Erica wayili nakuzatila kuGuam mu 2006 henohu wudi nayaaka 19 yakusemuka, wahosheli chatiyañawu awa akwakukalakala adikita. Wahosheli nindi: “Kuzata wupayiniya mwiluña mwekala antu afwilaña kudiza chalala kwaletaña muzañalu nankashi. Namusakililaña nankashi Yehova chankwashiliyi kulonda nizatuku iwu mudimu. Himudimu wawuwahi!” Makonu, Erica watiyaña kuwaha kukalakala neyi payiniya wadimena kuEbeye haYitutu yaMarshall. Kafwampi kukalakela kwituña dacheñi hichuma chakala. Tutalenu kukala kusatu kwamonañawu antu anakuzatila kuMicronesia kulonda tumoni chomikañawu kukala kweniku.

Chihandilu. Simon wadiña nayaaka 22 chashikiliyi hachitutu chaPalau mu 2007, washikeneni dakwiluka nindi wakwatileña mali antesha chikupu kubadika akwatileñayi kwituña dawu kuEngland. Wahosheli nindi: “Nalekeli kulanda yuma yawusekiseki. Chayinu mpinji nalandaña hohu yakudya yakeñekaña, nawa nanyeñumokaña kulonda niwani kudi wuseya wapela. Neyi kudi chuma chinakisiki, nakeñakeñaña chikuñu chazatishawu dehi nawa nakeñaña muntu watela kunloñeshela.” Indi kupelesha chihandilu kwamukwashili ñahi? Simon wahosheli nindi: “Chankwashili kwiluka yuma yakeñekaña muchihandilu nichakuhanda namali antesha. Yehova nankwashi nankashi muyuma yayivulu. Hayaaka yitanu nayiyedi yinazatili munidi iluña, mpinji yejima nekalaña nayakudya nihakukama.” Chalala, Yehova wakwashaña antu apeleshaña chihandilu chawu muloña akeñaña kutwamijaku Wanta.—Mat. 6:32, 33.

Kwanuka antaña. Erica nindi: “Nadikunda chikupu nachisaka chami nawa nakameneneña nami chinatachika kuyanuka nikuzataña chiwahi wanyi mudimu wakushimwina.” Chumanyi cheliliyi hakudiloñesha? Wahosheli nindi, “Henohu kanda niyi, natañili yibaaba yayivulu muKaposhi Kakutalila yahosha hakwanuka antaña. Chumichi chankwashili kwiluka chakuumika iku kukala. Muchibaaba chimu, mama yawantu wamulejeli mwanindi wamumbanda chakamenañayi Yehova nindi, ‘Yehova nateli kukwakamena chiwahi  chikupu kubadika chinukukwakamena.’ Iyi nsañu yankolesheli hama.” Hannah nanfumwindi Patrick azatilaña kuMajuro haYitutu yaMarshall. Hannah womikaña kukala kwakwanuka antaña jindi kuhitila mukudikunda nawamana kwindi niahelindi muchipompelu chawu. Wahosheli nindi: “Namusakililaña Yehova mpinji yejima hakunyinka amana kwami amukaayi kejima muloña niwena hichisaka chami. Neyi hiyankwashiluku, hinadi kutwesha kuzatila kwadiñi kukaankilaku.”

Kukwata amabwambu. Simon nindi, “Chiwashika kwituña dacheñi, yuma yejima yekala yambuka. Mpinji yikwawu chankalilaña kuhosha yuma yakusehesha antu chakwila antiyi mwinatalishi.” Erica nindi: “Hakusambila natiyileña neyi kwosi wadiña nakuñakamena, ilaña kutoñojoka chinenjilili dichi chuma chankwashili. Hinenjili nakuditiyisha kuwahaku, ilaña nenjili nakumuzatila chikupu Yehova.” Wahosheli cheñi nindi: “Chimwahitili mpinji, nakwatili amabwambu amawahi chikupu inalemesha.” Simon wazatili nañovu hakwila yadizi idimi dakuPalau, chumichi chamukwashili ‘kwikala wakasunuka’ nawana kwindi niahela amwiluña denidi. (2 Kor. 6:13) Amana kwetu amukeñeli muloña wadizili idimi dawu. Eñañi, neyi amana kwetu añinza niamwiluña denodu azatilaña hamu, wejima wawu ahetelañamu hakukwata wubwambu wawuwahi muchipompelu. Wulokwinyi wukwawu watambwilaña antu adihanaña namuchima wumu kuzatila kwiluña kudi kukaankila?

Kapostolu Pawulu wahosheli nindi: “Muntu wukukuwa yayivulu wakaañula nawa yayivulu.” (2 Kor. 9:6) Nshimbi yekela haniyi nsona yazatikaña nikudi antu azataña chikupu munyidimu yawu. Yumanyi yayiwahi ‘yaañulañawu yayivulu’ kuMicronesia?

KuMicronesia kuchidi antu amavulu anakukeña kudiza Bayibolu nawa munateli kumona antu chadizañawu nikuzatisha chalala chaMwizu daNzambi nikupapatishewa. Patrick naHannah niwena ayili nakushimwina kuAngaur, kachitutu kanyanya hekala antu 320. Chashimwininuwu hanichi chitutu hadi tukweji tuyedi, awanini mama yawantu wabula kusumbuka. Washikeneni kwiteja kudiza Bayibolu, chalala chamushikili chikupu hamuchima nawa wahimpili chihandilu chindi. Hannah nindi: “Mafuku ejima chitwamanisha kudiza, neyi hitukufunta kwitala hamakinga etu, twaditalileña nakuhosha netu: ‘Kusakililaku Yehova.’” Hannah wabombeleluhu nindi: “Neluka nami Yehova wadi kumukokola iwu mumbanda munjila yacheñi, ilaña muloña twayili nakuzatili kwadiña kukaankila kweneni, twawanini muntu wudi neyi mukoku, dichi twamukwashili kulonda yamwiluki Yehova. Ichi dichi chuma chasweja kuwaha chitwamweni muchihandilu chetu.” Erica wahosha nindi, “neyi wukukwasha muntu kumwiluka Yehova, wunateli kwikala namuzañalu chikupu.”

Mumatuña amavulu mudi kukaankila kweneni kwawakwakushimwina aWanta. Munateli kwikala hakachi kawantu ayaña nakushimwina kudi kukaankila? Mulombenu Yehova kulonda mwikali nampwila yakufwila kuzata chikupu mudimu wenu. Hanjekenu iyi nsañu nawaeluda amuchipompelu chenu, nkoñi wañinza hela nawantu ayili nakuzatila mwituña mwekala kukaankila. Neyi munatachiki dehi kudiloñesha, sonekelenu kasanji kamutayi katalaña odu iluña kulonda ayileji nsañu yayivulu. * Hadaha ninenu mukudibomba nawamana kwetu niahela, atwansi niakulumpi, ajiki niadisumbula adihanaña namuchima wumu nawa ekalaña namuzañalu ‘wakwaañula yayivulu.’