1, 2. (a) Indi chinsahu waYehova wabadika hinyi? (b) Indi ijina daYesu dalumbulukadi, nawa Mwana kaNzambi wazatili ñahi kwesekeja nachalumbuluka ijina dindi?

 ‘DICHI chinavwalikilili, dichi chinenjilili mumpata yamunu mwishina, kulonda nakekali chinsahu chansañu yalala.’ (Tañenu Yowanu 18:33-37.) Yesu Kristu walejeli nguvulu wawaRoma wamuYudeya awu mazu hampinji yamusompesheleñawu nawu amujahi. Yesu wafumini tuhu hakuditena nindi himwanta. Chimwahitili yaaka, kapostolu Pawulu washimwini hadi Yesu wamwekesheli wulobu nindi ‘hamu neyi chinsahu washimwini chiwahi hatooka kumesu aPontusi Pilatu.’ (1 Tim. 6:13) Eñañi, chakeñekaña kwikala nawulobu chikupu hakwikala ‘chinsahu washinshika nawa walala’ mukanu kaayi kaSatana mudi kuhelañana.—Chim. 3:14.

² Yesu wavwalikili neyi chinsahu chaYehova muloña wadiña wakumunza wawaYudeya. (Isa. 43:10) Eñañi, wekalili chinsahu wabadika watondeliyi Nzambi kwimenaku ijina Dindi. Yesu walemesheli chikupu ijina dindi damwinkeluwu kudi Nzambi. Chelili kañelu yamuleji Yosefu, tata yaYesu wamuleleli nindi, Mariya nabaabi ivumu nañovu yaspiritu yajila, kañelu wahosheli cheñi nindi: ‘Yena wakavwala mwana weyala; eyi wakamutumba ijina dindi neyi, Yesu; muloña yena diyi wakaamwina  antu indi kunshidi jawu.’ (Mat. 1:20, 21) Antu adiza chikupu Bayibolu etejaña nawu ijina daYesu dafuma kwijina dachiHeberu, daYeshuwa, nawa dikweti ijina daNzambi dadihi; dalumbuluka nawu “Yehova diyi Chamwinu.” Kwesekeja nachalumbuluka ijina dindi, Yesu wakwashili ‘nyikoku yajimbala yetala daIsarela’ kulonda abalumuki munyichima nakuleka nshidi jawu hakwila ekali cheñi nawuselewa waYehova. (Mat. 10:6; 15:24; Luka 19:10) Dichi chaletesheli Yesu kudikita chikupu hakushimwina Wanta waNzambi. Nsoneki waNsañu Yayiwahi Maku washimwini nindi: ‘Yesu hakuya muÑaliliya nakushimuna nsañu yayiwahi yaNzambi, nindi, Mwaka wunashiki dehi, wanta waNzambi wudi kwakwihi. Balumukenu munyichima, mwitiyi nsañu yayiwahi.’ (Maku 1:14, 15) Yesu wayitanyishili cheñi anlomboli amukwitiya kwawaYudeya chakadi woma, nawa ichi hichuma chikwawu chaleñeleli amujahili hamutondu.—Maku 11:17, 18; 15:1-15.

3. Chumanyi chamwekeni hefuku damuchisatu kufuma hafwiliyi Yesu?

³ Hefuku damuchisatu kufuma hamujahiluwu Yesu munjila yawukatu, kwamwekeni chuma chekomwesha, Yehova wamusañwili namujimba wakuspiritu, bayi wawuntuku. (1 Pet. 3:18) Hakwila yamwekeshi wunsahu wakwila nawu amusañwili, Mwanta Yesu wamwekeni mumujimba wawuntu. Hefuku damusañwiluwu, wamwekeni kapampa katanu kudi atumbanji ashiyashana.—Mat. 28:8-10; Luka 24:13-16, 30-36; Yow. 20:11-18.

4. Kupompanyi kwalombweliyi Yesu hefuku damusañwiluwu, nawa wayinkeli mudimwinyi atumbanji twindi?

⁴ Hampinji yamwekeni Yesu kapampa kamuchitanu, wadimwekesheli kudi apostolu indi apompeli nawantu amakwawu. Hayina mpinji yalema, Yesu wayidizishili atumbanji Izu daNzambi. ‘Hakujikula kashinshi kawu kulonda eluki mwalumbulukila Nyikanda Yajila.’ Dichi elukili nawu Nyikanda Yajila yashimwineñahu dehi nawu akamujaha kudi ayilumbu jaNzambi nawa akamusañula muchihayamisha. Chamanishiluwu kupompa hadina ifuku damusañwiluwu, Yesu wayilejeli atumbanji twindi mudimu wawu. Wayilejeli nindi ‘akashimwañena mwijina dindi nsañu yakubalumuka mumuchima, nikuyanakena nshidi, mwahita nyunza yejima, kutachikila kuYerusalema.’ Wahosheli cheñi nindi: ‘Enu yenu ayinsahu yayumiyi.’—Luka 24:44-48.

5, 6. (a) Muloñadi Yesu chahosheleliyi nindi ‘mukekala ayinsahu jami’? (b) Njilanyi yayiha yankeñelu yaYehova yatachikiluwu kushimwina atumbanji twaYesu?

⁵ Dichi Yesu chamwekeniyi kapampa kakukumishaku chelili munahiti dehi mafuku 40, apostolu indi elukili mwatalishiliyi hampinji yayilejeliyi chatiyakana nindi: ‘Mwakekala ayinsahu jami nimuYerusalema, nimwahita Yudeya mwejima, nimuSamariya, nikwakumina maseki.’ (Yil. 1:8) Muloñadi Yesu chahosheleliyi nindi: ‘Mukekala ayinsahu jami,’ bayi aYehovaku? Yesu wadi kuhosha nindi akekala ayinsahu jaYehova, ilaña wahosheleña nawaIsarela adiñi dehi ayinsahu jaYehova.

⁶ Haniyi mpinji atumbanji twaYesu atachikili kushimwina nkeñelu yaYehova munjila yayiha, njila yabadika chikupu yapulwishililumu Yehova aIsarela muwuduñu muEjipitu nimuBabiloni. Kufwa nikusañuka kwaYesu Kristu kwaleñela antu kulubuka muwuduñu wasweja, wuduñu wanshidi nikufwa. Hefuku daPentekosta 33 C.E., atumbanji twaYesu awayishiluwu alejeli antu “nyidimu yaNzambi yañovu,” nawa antu amavulu atiyili etiyili. Dichi, Yesu chashakaminiyi kuchikasa chachidiilu chaTata yindi mwiwulu, ijina dindi datachikili kutiyakana mwahita iseki dejima muloña antu amavulu atachikili kumukuhwelela nawu diyi njila yazatishileñayi Yehova hakwamwina antu.—Yil. 2:5, 11, 37-41.

7. Indi yuma yamwekeni hefuku daPentekosta 33 C.E. yamwekeshañadi?

⁷ Yuma yamwekeni haPentekosta mu 33 C.E., yamwekesheli nawu Yehova wetejeli mulambu waYesu wawanina neyi chuma chakutookesha hela kubuta nachu nshidi. (Heb. 9:11, 12, 24) Yesu walumbulwili nindi henjili ‘nindi akamukalakeluku, ilaña nindi akakalakeli akwawu, akahani wumi windi neyi ifutu danyiloña dakukuula nachu antu amavulu.’ (Mat. 20:28) Bayi neyi “antu amavulu” aheteleli mwifutu danyiloña daYesu hiyaYudeya hohu abalumukili munyichimaku. Ilaña Nzambi wakeñaña nindi ‘antu ejima ahandi,’ chineli ifutu danyiloña ‘dafumishaña nshidi yawantu ampata yamunu mwishina.’—1 Tim. 2:4-6; Yow. 1:29.

8. Atumbanji twaYesu ashimwinini nakushika kudihi, nawa atwesheli ñahi kwila mwenimu?

⁸ Komana atumbanji twaYesu akusambila adiña nawulobu wakutwalekahu kushimwina wunsahu waYesu? Ashimwinini, ilaña hiyazatishili ñovu jawuku. Spiritu yajila yaYehova yasweja ñovu yayisañumwini nikuyikolesha kulonda atwalekuhu kushimwina. (Tañenu Yililu 5:30-32.) Chimwahitili yaaka, kwakwihi na 27 kufuma haPentekosta 33 C.E., atumbanji ashimwinini “mazu ansañu yayiwahi yalala” kudi aYudeya ejima niaJentili “mwahita kuleña kwejima kwekala mwishina dewulu.”—Kol. 1:5, 23.

9. Neyi chiyashimwineñahu dehi, chumanyi chamwekeneni antu amuchipompelu chawakwaKristu chakusambila?

⁹ Chawushona, antu amuchipompelu chawakwaKristu chakusambila atachikili kutañisha nsañu yakutwamba. (Yil. 20:29, 30; 2 Pet. 2:2, 3; Yuda 3, 4) Yesu washimwineñahu dehi nindi akwakusekesha afumini kudi “watama,” Satana, akavula nawa akatwalekahu kukañesha akwaKristu alala kushika “nihamba kakuma nyaka yinu.” (Mat. 13:37-43) Kuhiñahu Yehova wamutondeli Yesu kwikala Mwanta wawantu amukaayi. Nawa wekalili Mwanta muOctober 1914, dikwila nawu “mafuku akukuminina” akaayi kaSatana katama atachikili.—2 Tim. 3:1.

10. (a) Ifukwinyi dalema dashimwinañawu dehi akwaKristu awayishewa? (b) Chumanyi chamwekeni muOctober 1914, nawa wunsahu wunakumwekesha ñahi chumichi?

¹⁰ AkwaKristu awayishewa ashimwineñahu  dehi nawu October 1914 hifuku dalema muloña Wanta waNzambi wukatachika kuyuula. Elukili chumichi kushindamena hawuprofwetu waDanyeli wahosha hamutondu weneni watemenuwu nawa watachikili kumena cheñi chimwahitili “mpinji jitanu najiyedi.” (Dan. 4:16) Yesu wateneni iyi mpinji yoyimu nindi ‘nyaka yanyunza yatoñolawu’ muwuprofwetu washimwiniyi hakwinza kwindi kwakumbidi ‘nikukuma kwanyaka yinu.’ Kufuma muchaaka cha 1914, ‘chinjikijilu chakwinza kwaYesu neyi Mwanta wamuha weseki chinakumwekana hatooka to-o kudi antu ejima. (Mat. 24:3, 7, 14; Luka 21:24) Kufuma hayina mpinji, “nyidimu yaNzambi yañovu” yakoñayi Yehova yabombelamu nikumuswanyika Yesu kwikala Mwanta wawantu amukaayi.

11, 12. (a) Indi Mwanta wamuha weseki watachikili kwiladi hanyima yanjita mu 1919? (b) Yumanyi yikwawu yatachikili kumwekana kufuma hakachi kayaaka yamuma 1930 nakutwalekahu? (Talenu mwevulu wakutachikilahu.)

¹¹ Hakwikala Mwanta wamuha weseki, Yesu Kristu watachikili kwamwina atumbanji twindi awayishewa muwuduñu ‘waBabiloni muneni.’ (Chim. 18:2, 4) Mu 1919, hanyima yanjita yakaayi yatachi, atumbanji atachikili kushimwina wunsahu mukaayi kejima nakutiyakesha njila yaNzambi yakwamwina antu nikushimwina nsañu yayiwahi yaWanta watachikili kuyuula. AkwaKristu awayishewa akoolekeleli iyi mpinji kulonda ashimwini nawa chumichi chaletesheli kupompesha awayishewa amavulu akaswana hamu naKristu.

¹² Hakachi kayaaka yamuma 1930 nakutwalekahu, chamwekeni hatooka to-o nawu Kristu watachikili kupompesha “anyikoku acheñi” amavulu nankashi akunyunza yeñi nayeñi akekala “izaza deneni.” Idi izaza deneni dalombolañawu kudi akwaKristu awayishewa niwena embujolaña chakutalilahu chaYesu hakushimwina chakadi woma nawa eluka nawu Nzambi niKristu diwu atela kuyamwina. Neyi omika hakuzata iwu mudimu nawa atwalekañahu kukuhwelela mwifutu danyiloña daKristu, amwizaza deneni akakooleka muloña akapuluka ‘yihuñu yeneni,’ yikafumishahu kaayi kaSatana.—Yow. 10:16; Chim. 7:9, 10, 14.

13. Chineli twekala aYinsahu jaYehova, chumanyi chitwafwilaña kwila, nawa tunateli kutwesha ñahi kwila chumichi?

¹³ Tutwalekenuhu kulemesha kukooleka kwakwikala aYinsahu ashimwinaña ‘nyidimu yañovu’ yinazatiyi Yehova Nzambi niyikaninu yindi yakumbidi. Chalala, kushimwina mpinji yejima muniyi njila kwakala. Amana kwetu amavulu ashimwinaña mumaluña mwekala antu ekala nakaneñawudi, asekeshaña hela ayiyandishaña. Tunateli kwila chelili kapostolu Pawulu nialundanindi. Pawulu wahosheli nindi: ‘Twomikili mudi Nzambi yetu  nakuyishimwinenu nsañu yaNzambi yayiwahi, iku nikumona makabi amavulu.’ (1 Tesa. 2:2) Dichi bayi tuzeyaku. Ilaña, tufwilenu kwila yuma yitwakanini hakudihana chineli chiyuulu chaSatana keña achijilumuni nakushala mahembi. (Isa. 6:11) Hitunateli kwila chumichi muñovu jetuku, ilaña kufwana akwaKristu akusambila, twatela kumulomba Yehova kulonda yatwinki “ñovu jabadika nankashi” naspiritu yindi.—Tañenu 2 Akorinda 4:1, 7; Luka 11:13.

14, 15. (a) Indi akwaKristu akushankulu ayimweneña ñahi, nawa kapostolu Petulu wahoshelidi hadi wena? (b) Twatela kutiya ñahi neyi anakutuyandisha hamuloña wakwikala aYinsahu jaYehova?

¹⁴ Makonu antu amavulu aditenaña nawu hiyakwaKristu, ‘ilaña amukaanaña Nzambi nanyidimu yawu, ashimana, ovwahila wanyi; hiyazataña nyidimu yayiwahi yidi yejimaku.’ (Tit. 1:16) Chikutukwasha neyi twanuka netu akwaKristu alala akushankulu ayiheleli chikupu kudi antu amavulu ashakamineñawu nawu. Dichi chaletesheli kapostolu Petulu kusoneka nindi: ‘Neyi akuyisawula hansañu yejina daKristu, munakooleki; muloña spiritu yaNzambi yidi hadenu.’—1 Pet. 4:14.

¹⁵ Komana aYinsahu jaYehova makonu niwena ayisawulaña? Eña, muloña twashimwinaña wunsahu hawanta waYesu. Dichi neyi atuhela hakushimwina ijina daYehova, chochimu ‘nakutusawula hansañu yejina daYesu Kristu,’ wayilejeli ayilumbu jindi nindi: ‘Ami nenzi mwijina daTata yami, himunantambwiluku.’ (Yow. 5:43) Dichi ifuku dikayidimbululawu mumudimu wenu wakushimwina bayi mukatiya womaku. Neyi ayikabisha muniyi njila chinakumwekesha nawu mukweti wuselewa waNzambi nawa spiritu yaNzambi ‘yidi hadenu.’

16, 17. (a) Kukalanyi kwamonañawu antu jaYehova mumatuña amavulu? (b) Munakufwila kwiladi?

¹⁶ Hampinji yoyimu mwatela kwanuka nenu antu amavulu anakudiza chalala mumatuña amavulu. Hela mumaluña mwashimwinawu nankashi twawanaña antu akeñaña kutiyilila itunateli kuleja mazu amawahi awamwinu. Tuzatenuña nañovu hakufuntila kudi antu amwekesheli mpwila nawa neyi chinatwesheki nikuyidizisha Bayibolu kulonda tuyikwashi ashiki kukudihana nikupapatishewa. Hekwawu ninenu mwatiyaña neyi chatiyañayi Sarie wakuSouth Africa, wunazati mudimu wakushimwina kubadika hayaaka 60. Wahosheli nindi, “Nasakililaña nankashi muloña ifutu danyiloña daYesu dinanleñeli nikali nawulunda wawuwahi naYehova, Mwanta wakuleña kwejima nawa natiyaña kuwaha hakutiyakesha ijina dindi dalema.” Sarie nanfumwindi Martinus, anakwashi antu amavulu kwikala akwakudifukula aYehova, kushilahu nianyanawu asatu. Sarie wahosheli cheñi nindi: “Kwosi mudimu wukwawu wanletelaña muzañalu chikupu nawa Yehova wazatishaña spiritu yindi hakutwinka ñovu yakutwalekahu kuzata iwu mudimu wakupulwisha antu.”

¹⁷ Hela chakwila tudi akwaKristu apapatishewa hela neyi tunakufwila kupapatishewa, twatela kusakilila hakukooleka kutukweti kwakudikunda hamu nachipompelu chawaYinsahu jaYehova mukaayi kejima. Dichi twalekenuhu kushimwina wunsahu chikupu hampinji yimunakufwila kwikala ajila mukaayi kaSatana kabula kujila. Neyi mwila mwenimu mukuleta kalemesha kudi Tata yetu wamwiwulu wukweti kukeña, wukweti ijina dindi datutenañawu.