1. Chumanyi chitwalemesha mukudifukula kwetu?

 MWAMONAHU dehi ijina daYehova anadisoneki hamatala amavulu hela hayuma yekalaña mwitala dakuhembela yuma yakushankulu? Chakadi nikujina, mwashiluku muchima nankashi nawa mwatiyili kuwaha. Kafwampi, twalemesha ijina daNzambi mukudifukula kwetu, muloña tudi aYinsahu jaYehova. Mukaayi kejima mwosi izanvu dawantu dalemesha ijina daNzambi neyi etuku. Chineli tukweti kukooleka kwakututena hejina daNzambi, twatela kwila yuma yaletaña kalemesha hejina dindi.

2. Twatela kwiladi chineli tukweti kukooleka kwakututena hejina daNzambi?

² Bayi neyi twekalaña nawuselewa waYehova kuhitila mukuzatisha ijina daNzambuku. Twatela kwila yuma yesekana nanshimbi jindi jajiwahi. Diwu muloña watwanukishaña Bayibolu nawu antu jaYehova atela ‘kwambuka kuyuma yatama.’ (Mas. 34:14) Kapostolu Pawulu washimwini ilu lushimbi hampinji yasonekeliyi nindi: ‘Ejima akutena ijina daYehova afumi kuyuma yaheña.’ (Tañenu 2 Timotewu 2:19.) Chineli twekala aYinsahu jindi, antu atwiluka nawu twatenaña ijina daYehova. Hanu dinu, twatela kufuma ñahi kuyuma yaheña?

3, 4. Nsonanyi yakalila antu adiza chikupu Bayibolu, nawa muloñadi?

³ Shinshikenu Nsona hafumini mazu aPawulu ekala ha 2 Timotewu 2:19. Iyi nsona yatena ‘chikuku chaNzambi chakola’ nawa yashimuna cheñi yuma yiyedi yasonekawu hachikuku. Nsañu yatachi yakwila nawu, “Yehova weluka antu indi,” chakadi nikujina awa mazu afuma haKuchinda 16:5. (Talenu chibaaba chinafumuhu.) Nsañu yamuchiyedi yakwila nawu, ‘Ejima akutena ijina daYehova afumi kuyuma yaheña,’ himazu ayikalila antu adiza chikupu Bayibolu. Muloñadi?

⁴ Mazu azatishiliyi Pawulu amwekeshaña nawu wayifumishili mumukanda wacheñi. Ilaña chamwekana neyi muNyikanda yachiHeberu mwosi nsona hafumishiliyi Pawulu iyi nsañu. Indi kapostolu wateneneñadi chahosheliyi nindi: ‘Ejima akutena ijina daYehova afumi kuyuma yaheña’? Nsañu yasambililiyi kuhosha Pawulu wayifumishili mumukanda waKuchinda kapetulu 16 mwashimunawu nsañu yakudikaña kwaKora. Komana nsañu yamuchiyedi niyena yadifwana nansañu yakundama kukudikaña kwaKora?

5-7. Chumanyi chamwekeni mumafuku aMosi chamwekeshaña hafumini mazu aPawulu asonekawu ha 2 Timotewu 2:19? (Talenu mwevulu wakutachikilahu.)

⁵ Bayibolu yahosha nawu Datani niAbirami anyana kaEliyabi azatilili hamu naKora nakwikala anlomboli awantu adikañileña naMosi niAroni. (Kuch. 16:1-5) Adiña nakumusawula Mosi hamesu awantu nawa akaanini nawu Nzambi hamutondeli kwikala nyuuluku. Ana akwakudikaña atwalekeluhu kushakama nawantu jaYehova nawa aleteli wufwinda hadi antu ashinshika. Chashikili ifuku daYehova dakwambula akwakudifukula ashinshika nawakwakudikaña, Nzambi waheni nshimbi yatiyakana.

⁶ Bayibolu yahosha nawu: “Yehova wahosheli naMosi, nindi, Hoshaku nachipompelu, neyi, Oku kutabanaka yaKora, naDatani, naAbirami, fumenuku. Mosi wanyamukili, wayili kudi aDatani naAbirami. Akulumpi awaIsarela amulondeleli. Wahosheli nachipompelu, nindi, Fumenu mwani, kumatenti anawa mayala atama, bayi mukwata kuyuma yawuku, mwakenza kanoñela kumu nanshidi jawu jejima. Afuma nikutabanaka yaKora, naDatani, naAbirami, mwa-mwa.” (Kuch. 16:23-27) Dichi Yehova wajahili ana akwakudikaña ejima. Kwambukaku, akwakudifukula ashinshika chelili afuminuku, akaanini yuma yaheña nawa ayijahili wanyi.

⁷ Yehova welukaña jekala munyichima yawantu! Weluka antu indi ashinshika. Hela chochu, antu jindi ashinshika afuukwiluhu kudambula nawantu atama. Chidi neyi Pawulu wateneneña nsañu yekala haKuchinda 16:5, 23-27 hampinji yasonekeliyi nindi: ‘Ejima akutena ijina daYehova afumi kuyuma yaheña.’ Iyi nsañu yinesekani namazu ahosheliyi Pawulu nindi: “Yehova weluka antu indi.”—2 Tim. 2:19.

8. Muloñadi chitwatelela kwikala ashinshika kubadika kutena hohu ijina daYehova hela kwikala muchipompelu chawakwaKristu?

⁸ Pawulu wahosheli hansañu yamwekeni mumafuku aMosi kulonda yamwanukishi Timotewu nindi chalema nankashi kufuukulahu chiwahi hakwila yahembi wulunda windi naYehova. AkwaKristu ateleleli kwikala ashinshika kubadika kwikala hohu muchipompelu, neyi chateleleluwu antu jaNzambi ashinshika amumafuku aMosi kuzata nañovu kubadika kutambika hohu hejina daYehova. Akwakudifukula ashinshika atela kufuukulahu kufuma kuyuma yaheña. Chumanyi chateleleli kwilayi Timotewu? Indi  antu jaYehova amakonu anateli kuhetelamu ñahi mukufumba kwaPawulu kwonenawu?

9. Indi “kwihujola kwawusupi kwakadi maana” kwaluwañesheli ñahi chipompelu chawakwaKristu chakushankulu?

⁹ Mwizu daNzambi mwekala kufumba kwahosha hanyitapu yayuma yaheña yatela kukaanawu akwaKristu. Chakutalilahu, hamavasi anyeñumuka 2 Timotewu 2:19, Pawulu wamulejeli Timotewu nindi ‘bayi mufwilaña ntadi yamazuku’ nawa nindi ‘tondolwelaku kubobola kwamukunkulwayi.’ (Tañenu 2 Timotewu 2:14, 16, 23.) Antu amakwawu amuchipompelu adiña nakutañisha ntañishilu yawakwakusekesha. Amakwawu niwena adiña nakutañisha nsañu yaleteleña ntadi. Hela chakwila iyi nsañu hiyadiña yambuka nantañishilu yamuBayiboluku, yumiyi yaleteleña chaambu. Nsañu yeniyi yaleteli kubobola nikutadeka hamazu, nawa yaleteli kukala muchipompelu. Dihu hafumini Pawulu yakonkomweni hakulema ‘kwakuleka kwihujola kwawusupi kwakadi maana.’

10. Chumanyi chitwatela kwila neyi tuwana akwakusekesha?

¹⁰ Makonu, antu jaYehova hiyavula kuwana akwakusekesha mukachi kachipompeluku. Hela chochu, neyi tuwana ntañishilu yabula kwikala muBayibolu kudi kwejima, twatela kuyikaana. Hiwusupi neyi tutachika kutadeka nawakwakusekesha chili mesu namesu, kwakula nsañu yahaIntaneti hela njila yidi yejima yakuhanjekelamu. Hela chakwila tunakufwila kumukwasha muntu, kwesekeja nansañu yamuNsona yitunahanjekuhu, chikwikala chaluwa neyi tuhanjeka nindi. Ilaña, chineli tudi antu jaYehova, twatondolwelaña chikupu akwakusekesha.

11. Chumanyi chinateli kuleta “kwihujola kwawusupi,” nawa aeluda akwaKristu anateli kwimika ñahi chakutalilahu chachiwahi?

¹¹ Kubombela hadi akwakusekesha, kwekala yuma yikwawu yinateli kuluwañesha kuwunda kwekala muchipompelu. Chakutalilahu, yitoñojoka yambukaku kutalisha hayisela yinateli kwikala “kwihujola kwawusupi kwakadi maana.” Ilaña neyi antu amakwawu anakuleja akwawu kuhema yisela yafumpaña nshimbi jaYehova jajiwahi, aeluda akwaKristu hiyatela kudiwula yililu yamuchidiwu muloña wakutondolwela hohu ntaduku. (Mas. 11:5; Efwes. 5:3-5) Hela chochu, aeluda bayi alejaña antu kulonda alondeleña yitoñojoka yawuku. Alondelaña chikupu kufumba kwamuBayibolu kwayinkawu ankoñi akwaKristu kwakwila nawu: “Biñenu mukanka wanyikoku yaNzambi wudi mukachi kenu, . . . bayi nakulonda kuheta kwatamaku, chiña namuchima wakukeñamu; bayi nakwikala anyanta anawa ayishililuwu kuhembaku, chiña nakwikala akutalilahu anyikoku.”—1 Pet. 5:2, 3; tañenu 2 Akorinda 1:24.

12, 13. (a) Indi aYinsahu jaYehova afuukulañahu ñahi hayisela, nawa nshimbinyi yamuBayibolu yalondelañawu? (b) Indi nshimbi yitunahanjeki muparakalafu 12 yakundama ñahi kuyuma yahalwetu yashiyashana?

¹² Munsañu yayisela, kuloñesha kwetu hikwashinshikaña jifilimu, yisela yahavidiyo, nyikanda hela tumina kulonda ashimuni yimu yidihi yitwatela kutondolwelaku. Muloñadi? Bayibolu yakoleshaña antu ejima kufumba ‘yitoñojoka yawu kulonda ambuleña yayiwahi nayatama.’ (Heb. 5:14) MuBayibolu mwekala nshimbi jinateli kumukwasha mukwaKristu kusakula yisela yatelela. Muyuma yejima yamuchihandilu chetu, twafwilaña “kushinshika yuma yamutiyishaña Mwanta kuwaha.” (Efwes. 5:9) Bayibolu yatañishaña nawu nyitu yayisaka yatela kwikala nawuswa kulonda atwesheña kufuukulahu nawu yisela yikwawu hiyatelela kwikala mwitala dawuku. *—1 Kor. 11:3; Efwes. 6:1-4.

 ¹³ Nshimbi jamuBayibolu jitunahanjeki hewulu hijakundama hakutonda yisela hohuku. Chatoñojokañawu antu hayakuvwala nikudiwahisha, nsañu yayikatu niyakudya niyuma yikwawu yahalwetu yinateli kuleta ntadi. Dichi neyi kwosi muntu wunamotoki nshimbi yamuBayibolu, chikuwaha neyi antu jaYehova aleka kutadeka hansañu yamuchidiwu, “nduñu yaMwanta, chinjila kufwila ntadi, chiña ekali wamwovu nawantu ejima, wukweti kashinshi kakuleja akwawu, ekali mukwakutiyilila akwawu.”—2 Tim. 2:24.

14. Chakutalilahwinyi chazatishiliyi Pawulu hakumwekesha kulema kwakutondolwela kudikunda nawantu atama?

¹⁴ Munjilanyi yikwawu munateleli antu ‘atenaña ijina daYehova kufuma kuyuma yaheña’? Neyi aleka kudikunda nawantu elaña yuma yaheña. Chalema muloña Pawulu chahosheliyi hachakutalilahu ‘chachikuku chaNzambi chakola,’ wahosheli cheñi hachakutalilahu chikwawu. Wasonekeli nsañu ‘yetala deneni’ nindi “himwekalaña nsaba jawuru nasiliva hohuku, mwekalaña nawa janyitondu namawumba; jikwawu jampuhu, jikwawu jakadi mpuhu.” (2 Tim. 2:20, 21) Kufumahu wakonkomweneni akwaKristu “kuditookesha nakwambuka” kunsaba yazatishañawu kuyuma ‘yakadi mpuhu.’

15, 16. Tunateli kudizila kwodi kuchakutalilahu ‘chetala deneni’?

¹⁵ Indi ichi chakutalilahu chalumbulukadi? Pawulu wafwanishili chipompelu chawakwaKristu ‘netala deneni’ nawa antu amuchipompelu wayifwanishili ‘nansaba,’ hela yuma yamwitala. Yuma yikwawu yekala mwitala yinateli kutama nayuma yafwana chili majilu. Mwiniitala nateli kwambula yuma yamuchidiwu kuyuma yitooka, chidi neyi yuma yazatishañayi hakuteleka.

¹⁶ Chochimu, antu jaYehova makonu  anakufwila kwikala ashinshika muchihandilu chawu, atela kwambuka kudi antu amuchipompelu atwalekañahu kudiwula nshimbi jaYehova. (Tañenu 1 Akorinda 15:33.) Neyi twambuka kudi antu amakwawu amukachi kachipompelu, twatela ‘kwambuka’ chikupu kudi antu abula kwikala muchipompelu, amavulu ‘hiyakwakufwila mali, abulaña kwovwahila anvwali jawu, abula kujila, akakutuñula akwawu, asweja kuzuwa, abulaña kukeña yayiwahi, anfukeji, akeñaña yakuditiyisha aweni kuwaha, kukeña Nzambi nehi.’—2 Tim. 3:1-5.

17. Indi aIsarela ashinshika amwovwahilili ñahi chikupu Yehova?

¹⁷ MuBayibolu ashimunamu chuma chafuukwiluwu aIsarela chayilejeluwu nawu “Oku kutabanaka yaKora, naDatani, naAbirami, fumenuku.” Bayibolu yahosha nawu ‘afuminuku hohenohu.’ (Kuch. 16:24, 27) Hiyajinokeli hela kushintajalaku. Bayibolu yashimuna cheñi nawu ovwahililili chikupu. ‘Afumini kutubadi twejima.’ Antu ashinshika hiyakeñeleña kusha wumi wawu hakatoñaku. Ovwahililili namuchima wejima. Atondeluhu kumwovwahila Yehova nakudikaña nawantu atama. Chumanyi chitunateli kudizila kunichi chakutalilahu?

18. Pawulu watalishili mudihi chamufumbiliyi Timotewu nindi ‘yatemuki kufwila kwatama kwawukwenzi’?

¹⁸ Hakwila nawu tuhembi wubwambu wetu naYehova, twatela kuzata mukunyakashana nikufuukulahu chiwahi. Ichi chinesekani namazu aPawulu amufumbiliyi Timotewu akwila nawu, ‘Temukaku kufwila kwatama kwawukwenzi.’ (2 Tim. 2:22) Hayina mpinji, Timotewu wadiña wakula dehi, hadaha wadiña muyaaka yamuma 30. Hela chochu, niakulumpi ekalaña nayitoñojoka yawusupi ‘yakufwila kwatama kwawukwenzi.’ Timotewu wateleleli ‘kutemuka’ neyi amona kukala kwamuchidiwu. Munjila yikwawu, Timotewu wateleleli ‘kufuma kuyuma yaheña.’ Yesu washimwini mazu wowamu chahosheliyi nindi: “Neyi disu deyi dakudimbwishaña ditubuli, wudinatili kwakulehi naneyi.” (Mat. 18:9) Makonu, akwaKristu ovwahilaña iku kufumba afuukulañahu chiwahi chakadi kushintajala neyi amona yuma yinateli kuzeyesha chikuhwelelu chawu.

19. Indi antu amakwawu afuukulahu ñahi kuhemba wulunda wawu naYehova makonu?

¹⁹ Amakwawu aswejeleña kunwa walwa henohu kanda ekali aYinsahu, ichi afuukulahu kuleka kunwa walwa. Amakwawu aleka yisela yikwawu yabula kwikala yatama muloña hiyakeñaña yiyileñeli kwikala nayitoñojoka yatamaku. (Mas. 101:3) Chakutalilahu, henohu kanda yekali Chinsahu, mana kwetu wumu wayileña nakuhañana kuyidika kwelileñawu yuma yatama. Ilaña chadiziliyi chalala, waleka chikupu kuhañana hela tuhu hayidika yawaYinsahu muloña hakeñaña kusañumuna yitoñojoka yatama yakunyimaku. Kafwampi, akwaKristu hiyayikaanisha chikupu kunwa walwa, kuhañana hela kwila yuma yikwawu yabula kutamaku. Hela chochu, wejima wetu twatela kwila yuma yatela kuhemba wulunda wetu naYehova.

20. Hela chakwila ‘kufuma kuyuma yaheña’ chapela wanyi, chumanyi chatukundejaña?

²⁰ Twatela kwila yuma yikuleta kalemesha hejina daNzambi, muloña tukweti kukooleka kwakututena hejina dindi. Twatela ‘kufuma kuyuma yaheña’ ‘nikwambuka kuyuma yatama.’ (Mas. 34:14) Hela chochu, kwila mwenimu hichuma chapelaku. Ilaña twazañalalaña hakwiluka netu Yehova wakeña “antu indi” ovwahilaña nshimbi jindi jaloña.—2 Tim. 2:19; tañenu 2 Kushindulula 16:9a.